Read Ngiemboon Megàŋ ntúm 18 Bible Online

Megàŋ ntúm 18 - Ngiemboon bible

Megàŋ ntúm 18

¹Yɔɔn nò tɔ́g, Pɔl fó tÿǒsoŋ Atɛ̀ne ńgʉa lê tÿǒsoŋ Korento,

²ńgʉa tà ńkúu wó, ńgyá tsɔ̌ nyìŋ Yuda gẅie mé tóŋo yé lê Akilas. Mbà mé la zyé yé tsɛ̀ɛ pàga ngwòŋ Pôŋ. Pɔ́ nzwě we Piriska nyé tá ńtóo, éfóo ngwòŋ Italia. Mbà Kása Kɔlɔde ka tsẅi ngie pà Yuda metsèm é fó tÿǒsoŋo *Roma ńgʉa. Pɔl gʉa ńgúɔ wɔ́b.

³Pá’ pâ pɔ̌ lɔ́ɔn ḿbú fa’a pɔ́ tà’ ntí fà’. Á gwɔ́ lélɔg nzsǒ ńnyɛte *mentàb la, Pɔl cʉ́’ʉ ńtsẅé pɔ́ mbʉ̀a pɔ́b, pâ pɔ̌ pú fa’a.

⁴Á gwɔ́ yɛ̌ lyɛ’ɛ́ nzse pà Yuda wɔ́, Pɔl gʉa *ndá cú’tè pɔ́b, éfa’a shÿó léshwóŋ pà Yuda pâ pà Gelekia nò tà pɔ́ jú’.

⁵Silas pɔ́ Timoté gÿo ńgwɔ́ tà fó Makedonia ńtó, Pɔl cʉ́’ ńnéŋe twó pɔ́ ndà’ léshwóŋó nò Ssé, ńne ńnyɛte ńkyagte, éshwóŋó pà Yuda ngie Yěsô zɔɔ *Nzà’nkÿo gẅie pɔ́ tsẅé ḿbyɛ́bɛ.

⁶Tá pà Yuda tiŋ pɔ́ ndʉ̀’, ńzoonte Pɔl. Á lêen ńcʉ́’ ḿbú’ pɔ́ pfepfɔ́b nà menzsǒ mé, ńgɔɔn né pɔ́b ngie metse mí lɔɔn ḿpfɛte twó pi, mbà yɔ́ɔn nò té mǒ wɔ́. Mèŋ n gee fó fʉ̀’ɔɔn, é cʉ́’ʉ shwóŋó nò Ssé pɔ́ mbwo pʉ̀a pie pɔ́ té pà Yuda wɔ́.

⁷Pɔl gɔɔn pú’u, éfó *ndá cú’tè ńkẅɛ, ńgʉa lê mbʉ̀a tsɔ̌ nyìŋ, mé tóŋo yé lê Tutius Jẅistẅis. Á gwɔ́ nyìŋ, mbà à la záb ntʉ́m we nà Ssé pà Yuda. Ndá yé gwóon ńgwɔ́ pɔ́ ngʉ̀ŋe *ndá cú’tè pà Yuda.

⁸Krispus gẅie aa ndÿò tsɛ̀ɛ *ndá cú’tè pà Yuda pâ ngẅɛ̀ ndá ye ntsèm gÿo ńzáb ntʉ́m wɔ́b ná Cʉ̀apʉ̀a. Mé nu’u wɔ́b ntse. Pʉ̀a Korento tà ńgyɔ́ɔn jú’u shwóŋè Pɔl ńzẅíŋ yɔ́b légwɔ́ pʉ̀a Kristo. Mé nu’u wɔ́b yɔ́b ntse.

⁹Á gwɔ́ tsɔ̌ letsẅɛ́’, Cʉ̀apʉ̀a gɔɔn né Pɔl ngie: Pɔ́ɔn lécÿɔ’! Shwóŋo nò yɔ́ɔn shwóŋ, tè láŋte,

¹⁰mélà’mie pɔgɔ zɔ pǔ ńgwɔ́ nùɔ. Atsɔ̌ nyìŋ tè ku’u légwoon gú tà ńgÿo nò tepòŋ ná gù wɔ́. Mèŋ n gɔɔn pá’ɔɔn, ńtí nue pʉ̀a pie ée pɔ́ɔn, ée tÿǒsoŋ yɔɔn tà ńgyɔ́ɔn.

¹¹Pɔl tsẅé Korento tà’ ngù’ lê mesaŋ ntɔgɔ́, ńne ńzí’i pʉ̀a nò Ssé.

¹²Á gwɔ́ fʉ̀’ áyɛ̌, Galion gwɔ́ ngúmnɔ́ɔn ná pàga ngwòŋ pà *Roma gie mé tóŋo lê Akay. Pà Yuda ńnéŋe tà ḿbʉ’ʉ nnɛ́ nzèm Pɔl, ńgwoon yé ńdɔg ńgʉa jʉ’ gie mé sá’a ntsaŋ wɔ́,

¹³ésẅiŋe yé, ńgɔɔn ngie: Nyìŋ wɔɔn ne sẅite pʉ̀a ńgie pɔ́ gu’te Ssé nà ntí gie *lepʉ̌ té ne ńkwoŋo wɔ́.

¹⁴Pɔl jú’ tà ne fa’a lépÿɛ, Galion gwóon ńzá’, ńgɔɔn mbwo pà Yuda ngie: Á kéen pé’e ńgwɔ́ nò lézẅé nyìŋ kà pɔ́ tsɔ̌ máa nò tepòŋ gẅie nyìŋ gÿǒ wɔ́, mbà mèŋ n ŋaga nò gí, mbà pà Yuda.

¹⁵Tá pá’ pi ké sele pɔ́ tsetsɛ̀ɛ pi, ńzoŋo nò pɔ́ nà meshwóŋè, pâ mezíŋ mbɔɔ *lepʉ̌ sie é gwɔ́ pɔ́ sí la, á líe pɔ́ gẅí. Mèŋ n te ne ńkwoŋo léŋag yɛ̂ ntí mentsaŋ wɔ́!

¹⁶Gallion gɔɔn pú’u, éfó jʉ’ gie mé sá’a ntsaŋ wó, ńjwoŋo wɔ́b.

¹⁷Pɔ́b métsèm gwoon Sostɛne gẅie aa ndÿò tsɛ̀ɛ *ndá cú’tè pɔb, ńzye pɔ́ jʉ’ gie mé sá’a ntsaŋ wó lécua yé. Galion tè tsɔ́b.

¹⁸Pɔl ná’a ńgíŋ ńzye ńnéŋe Korento. Tá ńde’e mefɛ́ mefɛ́, ńgʉa Senkerée pá’ à ge kúu *máamáa kanú’ é gʉa lê Siria pâ Piriska pɔ́ Akilas gwɔ́. Pɔl gwaa kúu kanú’, ńzẅaga twó yé ńdɔgɔ ńgɔɔn ngie à gÿǒ mmó gie à la ka’a mbwo Ssé tà ńcʉ́me.

¹⁹Pɔ́ gʉa tà ńkúu Efeso, Pɔl nyé Piriska pɔ́ Akilas wó, ńgwɔ́ gʉa ńzɔɔn ńgʉa ńkúu *ndá cú’tè pà Yuda, éshwóŋ pà Yuda nò.

²⁰Pɔ́ zɛ́te yé ngie pâ pɔ̌ ná’á ńzye ńnéŋe. Tá à tè zẅíŋ.

²¹Tá ńgwɔ le’e wɔ́b ńgɔɔn né pɔ́b ngie: E Ssé lɔɔn ńzẅíŋ, mbà mèŋ n ge táa tá gíŋe tóo mbʉ̀a pi. Á gɔɔn pɛ́’ɛ̀, ńdeen ńké ńgʉa ńkúu kanú’, éfó Efeso ńgʉa.

²²Kanú’ gÿo ńkúu Sezare Pɔl sẅɛ́’ ḿbʉ nê Yerósalem, ńtsyɛ’te cú’tè pʉ̀a kristo tá ḿbiŋ fó wó ńgʉa lê Antiokia,

²³ńkúu Antiokia, ńná’a ńzye ńnéŋe tá ńgʉa, ńzyɛ́’ ye pàga ngwòŋ Galitia pɔ́ Filigia, ńgiŋe ńkẅiŋte pʉ̀a Kristo.

²⁴Atsɔ̌ nyìŋ Yuda gẅie mé la zyé yé Alekzáŋdeli, mé tóŋo yé lê Apolos tóo Efeso, ńgwɔ́ nyìŋ ńgɔɔn nò á kẅɛ, ḿbiŋ ńzsé ŋwà’ne Ssé mboŋó.

²⁵Mbà mé ka zí’i yé nò ńnáa nà mánzsè Cʉ̀apʉ̀a Yěsô. Á ne ńnéŋe twó kwà’ mboŋó éshwóŋó yɛ̌ nò ḿbiŋe ńzí’i pʉ̀a nò Yěsô pɔ́ ndʉŋ ndʉŋ pá’ á gwɔ́. Tá ńgʉa nà nò kẅè ntse, á zsé yé pɔ́ pá’ Jâŋ lɔ̌ɔn ńnu’u pʉ̀a ntse.

²⁶Á gɔɔn nò Ssé *ndá cú’tè pà Yuda, éshʉa shʉ̌a. Piriska pɔ́ Akilas jú’u shwóŋè yé ńdɔgɔ yé ńgʉa, ńnyɛte ńda’te yé nò ńnáa ná mánzsè Cʉ̀apʉ̀a.

²⁷Appolos gÿo ne ńtsɔ́ɔn léfó Efeso ńgʉa nà pàga ngwòŋ Akay, mefɛ́ mefɛ́ jú’ ńkẅiŋte yé, ńŋwe’e ŋwà’ne ńnáa mbwo yé, légwɔ́ gie à ge kúu wó, é náa mbwo pʉ̀a Kristo pie ée wó pɔ́ kúe yé mboŋó. Á gʉa tà ńkúu wó, ḿbú ńkẅéte pʉ̀a Kristo pá’ɔɔn tɛ’, mélà’mie Ssé la ne ńtóonte yé,

²⁸pâ pà Yuda zɔɔn ńtyé mvfò lá’, ńzóŋo nò ńnáa ná Yěsô, á ne ńdɔgɔ nò gie á fóo tsɛ̀ɛ ŋwà’ne Ssé ńnyɛte ńda’te ngie Yěsô zɔɔ *Nzà’nkÿo, ḿbú ne ńdɔgɔ yé shwóŋè ńjÿɔ́’ɔ ncwò pà Yuda.