Read Ngiemboon Megàŋ ntúm 19 Bible Online

Megàŋ ntúm 19 - Ngiemboon bible

Megàŋ ntúm 19

¹Apolos gwaa gwɔ́ Korento pá’ɔɔn, Pɔl ne ńzyɛ́’ɛ tsɛ̀ɛ pàga ngwòŋ gie memáa mekwɛ́ ée wó, ńgʉa tà ńkúu Efeso, ńgyá tsɔ́ ntá’ pʉ̀a Kristo gwɔ́ wó,

²ńzɛ́te wɔ́b ngie: Pi la gwɔ́ tà ńcʉ́’ pʉ̀a Kristo pé’e tà Ssé náa Zẅìge Ndʉalʉ̌a né pi? Pɔ́ tsɔ́’ ngie: Peg laa zɔɔn fó ńjú’ pá’ mé kíme tsɔ́ Zẅìge Ndʉalʉ̌a wɔ́.

³Pɔl zɛ́te wɔ́b ngie: Tà ntí lénu’u gẅi ntse la gwɔ́ pɔ́ yɛ̌? Pɔ́ tsɔ́’ ngie: E laa ntí ye Jâŋ.

⁴Pɔl gɔɔn né pɔ́b ngie: Jâŋ ka ne nu’u pʉ̀a ntse ńdɔgɔ ńnyɛɛ ngie pɔ́ zẅiŋé lékúbe mà, tá ńké ne ńgɔɔn mbwo lá’ ngie: Pɔ́ záb ntʉ́m wɔ́b ná nyìŋ gẅie aa nzèm yé ńne ńtóo, ńgɔɔn pú’u, angàŋ gwɔ́ Yěsô.

⁵Pʉ̀a ŋwɛ́ jú’u yɔɔn shwóŋè, ńgÿó mé nu’u wɔ́b ntse ná lezíŋ Cʉ̀apʉ̀a Yěsô.

⁶Pɔl gwɔ́ tà ńzáb mbwó twó pɔ́b, a Zẅìge Ndʉalʉ̌a kúu ná pɔ́b. Pɔ́ zye léshwóŋó meshwóŋè mie pɔ́ laa zɔɔn ńzí’i wɔ́, ḿbiŋ ne ńtsẅii nkʉ̀ gẅie é fóo mbwo Ssé.

⁷Epʉ̀a pɔɔn ŋwɛ́ métsèm laa mmó ntsɔ̀b pʉ́a lê legém.

⁸Pɔl lɔg mesaŋ métá, ńké ńgee pɔ́ *ndá cú’tè pà Yuda á Efesò ŋwɛ́. Eshwóŋó nò Ssé éshʉa shʉ̌a, éshwóŋó pʉ̀a pá’ *lefùɔ Ssé ée pú’u, éfa’a shÿó lékyagte tà pɔ́ zẅíŋ.

⁹Tá’, etsɔ́ pʉ̀a shÿɔg shÿɔg, ńdʉ’ʉ lézẅíŋ, ńtyé pɔ́ mvfò lá’ ńgwága nò ná mánzsè Yěsô gẅie Pɔl ne ńgɔɔn. Pɔl lêen ńké ńnyé wɔ́b, éfag pʉ̀a pie pɔ́ zẅiŋé lécʉ́’ pʉ̀a Kristo, ńdɔg ńgʉa lê jʉ’ʉ sekúd Tiranus, ńne ńzí’i wɔ́b mmó lyɛ̌’ ntsèm,

¹⁰ńgÿo pɔ́ pú’u, nà ngù’u lá’ yépʉ́a. Tà pʉ̀a metsèm pie é tsẅé tsɛ̀ɛ pàga ngwòŋ Azia, kà à gwɔ́ pɔ́ nyìŋ Yuda wɔ́, ka à tè nyìŋ Yuda wɔ́ wɔ́, á jú’u nò Cʉ̀apʉ̀a.

¹¹E Ssé cʉa ná mbwó Pɔl ńgÿo kwà’ menò mmɔɔn mmɔɔn mie mé laa gyá,

¹²tà mé cʉ́’ʉ ńdɔgɔ shúm nzsǒ laa tsì’i shÿó sie é kibé jʉ’e nnɛ́ Pɔl, ńgee ńnáa mbwo megàŋa guɔ. Meguɔ mɔ́b maga, *messé tepòŋ fóo nà petsɔ́ ńkẅɛɛ.

¹³Etsɔ́ pà Yuda gíŋe ńgwɔ́ yɔ́b wó, ńgwɔ́ pʉ̀a pie ée ńgwá ńgiŋe ńjwoŋo *messé tepòŋ, gÿo fà’ shÿó lélɔg lezíŋ Cʉ̀apʉ̀a Yěsô ńjwoŋ *messé tepòŋ ná pʉ̀a, ńne ńgɔɔn mbwo *messé tepòŋ ngie: Mèŋ n dɔ̌g lezíŋ Yěsô gẅie Pɔl gɔɔn la, ńtsẅi ngie pi kẅɛ!

¹⁴Epúɔ tándá pànuŋe pwɔ́’ pà Yuda sɔɔn mbʉ́a, lezíŋ sé gwɔ́ lê Seva, zɔ̌ lɔ́ɔn ńgÿo yɔɔn ntí nò.

¹⁵Tá’, á fó lyɛ̌’ e *Ssé tepòŋ tsɔ́’ɔ mbwo pɔ́b ngie: Mèŋ n ne ńzsé Yěsô, ńgíŋe ne ńzsé nyìŋ gẅie Pɔl aa wɛ̌, ńgʉa ná pi, pi ee pàwɔ̌?

¹⁶Nyìŋ gẅie essé tepòŋ laa ná yé, kem púɔ Seva nê melà’, ḿbú ńtʉ ńcʉa wɔ́b, ńnéŋ mefʉ̌ŋ ná pɔ́b, tà pɔ́ fó ndá ńkẅɛ ńkÿo té nzsǒ ná pɔ́b.

¹⁷Pʉ̀a pie ée tÿǒsoŋ Efeso, pà Yuda laa pʉ̀a pie é té pà Yuda wɔ́, jú’u yɔɔn nò, ḿbú ḿbɔ́g, ńgɔɔn ngie: Cʉ̀apʉ̀a Yěsô aa wó tɛ’.

¹⁸Lelÿò pʉ̀a zẅíŋe nò Yěsô, ḿbiŋe ne ńtóo ńtyé tsetsɛ̀ɛ pʉ̀a ńkwé’e ngyè yɔb tÿǒ ńzẅíŋe mmó gie pɔ́ ka gÿo, á tepòŋ.

¹⁹Lelÿò pʉ̀a pie é kaa megàŋ lekàŋ lɔg meŋwà’ne lekàŋ mɔ́b ńtó mé tuɔ pɔ́ mvfò lá’. Mé tsíg nkáb meŋwà’ne ŋwɛ́, é gwɔ́ pàg nkáb ntsá’ móm ntʉ̀a[16]

²⁰Wɔɔn aa pá’ Cʉ̀apʉ̀a la ne ńdɔgɔ metʉ̀ mé ńgÿo, ashwóŋè yé ne ńkẅi’i saa jʉ’, ńne ńkẅi’i ńgẅiin tʉ̀.

²¹Mɔɔn menò la tɔ́g, Pɔl záb ngie à ge gʉa Yerósalem, é gwɔ gʉa é cʉa tsɛ̀ɛ pàga ngwòŋ Makedonia pɔ́ ye Akay, ńne ńgɔɔn ngie: Á ne ńzɛ́te ngie n dɔɔn ńgʉa tà ńkúu wó, ńgíŋe ńgʉa *Roma,

²²ńkwaŋ pú’u, ńtʉ́ njÿó ńtúmo Timoté pɔ́ Eraste á Makedonia, é gwɔ́ pʉ̀a pie é kẅéte yé. Tá kwà’ yé lê twó yé gíŋe ńná’a ńzyé ńnéŋe tsɛ̀ɛ pàga ngwòŋ Azia.

²³Á gwɔ́ fʉ̀’ó atsɔ̌ máamáa và’ gwe ńtí pʉ̀a pie pɔ́ ée ná mánzsè Yěsô.

²⁴Atsɔ̌ tâlɔɔn gwɔ́ wó mé tóŋo yé lê Ndermetelẅis, á zɔ́gɔ ńdɔgɔ tʉ̌ nkáb ńtsó tsɔ́ púɔ mendá ńdɔgɔ fʉ’ʉ máa ndá ssé gie mé lɔ́ɔn ńtóŋo yɛ̌ ssé lê Artémis, ńtsó mé sẅiŋe, é pú ńnáa nkáb mbwo pà tsó tɛ’.

²⁵Á cú’te pàtsó laa petsɔ́ pʉ̀a pie pɔ́ lɔ́ɔn fa’a yɔ́b yɛ̌ ntí fà’, ńgɔɔn mbwo pɔ́b ngie: Meshǔ pɔ́ɔn, pi ne ńzsé mboŋó ngie pege jú’u mboŋó pá’ɔɔn ńtí yɔɔn fà’.

²⁶Tá’, pi ne ńgyá gí ḿbiŋe ne ńjú’u mmó gie nyìŋ wɔɔn gẅie mé tóŋo lê Pɔl ne ńgɔɔn. À ne shwóŋó pʉ̀a ngie messé mie mé lɔgɔ pɔ́ mbwó ńnyɛte é té messé wɔ́. À gɔ̌ɔn pú’u, tà lelÿò pʉ̀a jʉ’ɔɔn zẅíŋ. Á té gwɔ́ pɔ́ ndà’ Efeso wɔ́. Á cʉ́’ pɔ́ mêjʉ’ à gwɔ́ pɔ́ pàga ngwòŋ Azia ntsèm ntsèm.

²⁷Yɔɔn nò fa’a lécʉŋte fà’ yégè. À ge gÿo pú’u, mé le gíŋe ńdɔgɔ máamáa ndá ssé Artémis ńtóŋo tsɔ́ mmó wɔ́. Pʉ̀a é le gíŋe ńgɔɔn ngie Artemis ee máamáa ssé yege wɔ́. Tá mânyìŋ ntsèm ne ńgu’te yé tsɛ̀ɛ pàga ngwòŋ Azia tà mbɔɔ jʉ’ ntsèm ndùmo tsetsá’.

²⁸Lóŋ pʉ̀a pie é la jú’u yɔɔn shwóŋè, la pú ffó. Pɔ́ zye lélɔg ngyè tetʉ̀ ńgɔɔn ngie: Artémis, éssé pà Efeso, e fǎŋ.

²⁹Àtÿǒsoŋ ntsèm ntsèm pú ńtága. Alá’ gwoon Gaẅis pɔ́ Alistag, é gwɔ́ pʉ̀a Makedonia pie pâ Pɔl kɔ́ɔn ńgiŋe, éshwoŋo wɔ́b ńdɔg ńgʉa nê ndùmo tsɔ̌ ntí gyɛ̌ gie mé cú’te wó, ńgÿo megʉa.

³⁰Pɔl ne fa’a lézyɛ́’ ńkúu tsɛ̀ɛ nùɔ lá’, tá pʉ̀a Kristo tɔ’ɔ yé.

³¹Etsɔ́ ngàŋa fà’ ngúmnɔ́ɔn ná pàga ngwòŋ Azia, pie ée meshǔ Pɔl, pɔ́ túm pʉ̀a pɔ́ gʉa sẅíŋte Pɔl ngie à pɔ́ɔn légʉa gyɛ̌.

³²Á gwaa gwɔ́ fʉ̀’ó, mbà jʉ’ é pǔ ńtága. Pɔɔn pʉ̀a gwɔ́ jʉ’ɔɔn ńga’te yɔb ngyè, petsɔ́ gwɔ́ jʉ’e ńga’te yɔ́b é gwɔ́ pɔ́ ndyɛ̀’ɛ. Lelÿò pʉ̀a tè zsé mmó gie mé zɔɔn ńcú’te ńtí yɛ̌ wɔ́.

³³Etsɔ́ pʉ̀a fó tsetsɛ̀ɛ lá’, ńkyagte mmó gie á ne ńcʉate, éshwóŋó Alekzáŋdele gẅie pà Yuda ně ńtsóte yé ńtÿɔ́gɔ mvfò. Á ka’a pwó yé tÿǒ, lélɔg shwóŋó lá’ ngie à gẅiin nò gie à ge ngɔ̌ɔn.

³⁴Tá lá’ jú’ ngie aa nyìŋ pà Yuda, ḿbú ńga’te lê ngyè tetʉ̀, á nà mmó menèm mépʉ́a, ngie: Artémis, éssé pà Efeso e fǎŋ.

³⁵Nyìŋ gẅie aa tÿǒsoŋ, yé fà’ gwɔ́ le ŋwe’e mmó, gÿo tà lá’ láŋte. Á gɔɔn mbwo pɔ́b ngie: Epʉ̀a Efeso, à wɔ̌ aa tsetsɛ̀ɛ pege ne ḿmoŋe ngie atÿǒsoŋo Efeso zɔ pyɛ́bɛ máamáa ndá ssé Artémis, tà mbɔɔ tútú we gẅie à la fó lefàŋ ńgwe?

³⁶Atsɔ̌ nyìŋ gẅie à lɔɔn ńgwɔ́ á lʉ’ tè wó wɔ́. Áa yɛ̌ tá mèŋ n gɔɔn ngie pi láŋte, ńgwaa gÿo nò ńkwaŋ.

³⁷Pi lɔ̌g pʉ̀a pɛ̂ ńtóo jʉ’ɔɔn, tá, mbà pɔ́ kaa cʉŋte tsɔ́ mmó á nà ndá ssé Artémis wɔ́, ńké tè yé zoonte.

³⁸Á lɔɔn ńgwɔ́ gie Ndermetelẅis pâ kwò fa’a yɔ́b gẅiin lésẅiŋe nyìŋ pá’ mé ge ŋaga yé, mbà pàsá’ ntsaŋ ée wó. Melyɛ̌’ mie mé sá’a mentsaŋ gíŋe ńgwɔ́ wó. Áa jʉ’ gie pɔ́ gẅiin légʉa wó sẅiŋ ntsaŋ!

³⁹Ńgwɔ́ gie pi zɔɔn ńgẅiin tsɔ́ nò ndyɛ̀’ɛ gie pi ge lê ńzɛ́te, pi lɔg ńtóo tsɛ̀ɛ cú’tè gie pàsá’a lá’ zɔɔn ńtáŋte menò wó,

⁴⁰ńgwɔ́ pi gÿo pɛ́’ɛ̀ tà mé záb ntsaŋ twó pege ngie pege ma’á và’. Pú’u, éfóo ná menò mie é gÿǒ lyɛ̌’ɔɔn. Á nue mé lɔɔn ńzɛ́te wégè, pege é le ku’u léshwóŋó mmó gie á gÿǒ tá lá’ pége jʉ’ nzẅìŋ wó wɔ́.

⁴¹Nyìŋ gẅie aa tÿǒsoŋ yé fa’ gwɔ léŋwe’e mmo la, gɔɔn yɔɔn nò tà ńtsẅé jʉ’, ńtsẅi ngie alá’ piŋ nê membʉ̀a mɔ́b.