Read Ngiemboon Megàŋ ntúm 2 Bible Online

Megàŋ ntúm 2 - Ngiemboon bible

Megàŋ ntúm 2

¹Alyɛ’ɛ́ línɔ́ɔn gie mé tóŋo le Paŋtekɔ̂d[1] gÿo ńtó, á gwɔ gwɔ, mbà megàŋa kwò Yěsô cu’té tà’a jʉ’ métsèm.

²Mé ńnéŋe tà ńjú’ jʉ’ fó tÿǒ lépwó ńzye lénʉ’ʉ, ńnʉ’ʉ pá’ fʉ̀’ gie ntʉ̀ fóm ne ńcʉa lá, ńnʉ’ʉ nʉ’ʉ tà mbú ńjÿó ndá gie pɔ́ lá ńnéŋe wó.

³Pɔ́ gyá tsɔ́ shúm kẅɛ, ńgwɔ́ pá’ lʉ́me mmɔ̌g lá, éshʉ́ate ńtyé nà wɔ̌wɔ́ɔ tsetsɛ̀ɛ pɔ́b.

⁴À Zẅìge Ndʉalʉ̌a pú ńjÿó wɔ́b métsèm. Pɔ́ zye leshwóŋó meshwóŋè melá’a ndyɛ̀’ɛ, éshwóŋó pá’ Zẅìge nǎ tʉ̀ ngie pɔ́ shwóŋó pú’u.

⁵Á laa ná mɛ̌ melyɛ̌’, pà Yuda pie pɔ́ gÿo mekù’ Ssé, mbà pɔ́ ka fó tsɛ̀ɛ métúm ntsèm ńtó ńgwɔ́ Yerósalem.

⁶Pɔ́ jú’ pá’ jʉ’ nʉ’ʉ pú’u, ńnɔ́ɔnte ńtó ńcú’te tà ńgwɔ́ pɔ́ nùɔ. Á gwaa kʉ’ʉ wɔ̌wɔɔ, á jú’ megàŋ ntúm lɔgɔ pɔ́ kwà’ shwóŋó yɔ́b lá’ gie à fóo né wó ńgɔɔn nò.

⁷Á gwaa kʉ’ʉ wɔ́b pɔ́ gíŋe ne saŋa nÿɔ́g ńgɔɔn ngie: Pʉ̀a pie é shwóŋó lɛ̀ té gwɔ́ pɔ́ pʉ̀a Galilea métsèm gwɔ́ lê?

⁸Á piŋ ńgÿo lêkɔ́ wɔ̌wɔɔ nà pege cʉ́’ʉ ńjú’u, pɔ́ shwóŋó pɔ́ kwà’ shwóŋe lá’ ye?

⁹Epʉ̀a pie pɔ́ fóo Parte mbɔɔ pe Medes, ńgÿo pe Elam ée tsetsɛ̀ɛ pege jʉ’ɔɔn. Mbɔɔ pʉ̀a pie é ńnéŋe Mesopotamia lâ pie ée Jẅidea. Epʉ̀a Kapadosia mbɔɔ pʉ̀a Pôŋ lâ pʉ̀a nà pàga ngwòŋ Azia gwɔ́ pɔ́ ssé.

¹⁰Pàfó Filigia pɔ́ Panfilia pɔ́ Egipto, pàfó Sirɛne á nà pàga ngwòŋ Libia, pàfó *Roma gwɔ́ pɔ́ ssé. Lâ pà Yuda pie pɔ́ ée lá’ɔɔn nà melyɛ̌’ mɔɔn.

¹¹Etsɔ́ pʉ̀a tsetsɛ̀ɛ pɔ́b gwɔ́ pà Yuda lyɛ’ɛ́ nzyé, petsɔ́ gwɔ́ pʉ̀a pie pɔ́ la zẅíŋe nò Ssé pà Yuda. Té tʉ́ pàfó Kelɛt lâ Arabia. Á gÿo lêkɔ́ pege metsèm jú’u kwà’ nà meshwóŋe mégé mie ée mentí mentí, pá’ pʉ̀a pɔɔn gɔɔn pá’ mefà’ Ssé fáŋ pú’u?

¹²Á pú ńkʉ’ʉ wɔ́b tɛ’. Pɔ́ kwaŋ pɔ́ té cʉ́me, ńcʉ́’ sele ńzɛ́te tsetsɛ̀ɛ pɔ́b pɔ́ ngie: Yɔɔn nò lɔgɔ ńgɔɔn ngie kɔ́?

¹³Tá petsɔ́ pʉ̀a ně ńgẅe *ngàŋa kwò Yěsô gẅe, ńgɔɔn ngie: Pʉ̀a pɛ̂ pʉ̌a melù’.

¹⁴Piɛ pâ megàŋ ntúm ntsɔ̀b yémɔ’ɔ́ lêen ńké ńdu ssé. Piɛ lɔg kwà’ ngyè te tʉ̀ ńgɔɔn né lá’ ngie: Pi pà Yuda, tà mbɔɔ mânyìŋ ntsèm gẅie aa Yerósalem lyɛ̌’ɔɔn, pi zẅí’te, mèŋ n ge shwóŋó gẅi mmó gie áa yɛ̌.

¹⁵Pʉ̀a pɔɔn kaa pʉ̌a melù’ pá’ pi kwaŋa lɛ̀ wɔ́. Wɔɔn zɔɔn ńnyé ńgwɔ́ pɔ́ nèm lepfwɔ’ɔ́ mba’ámba’[2].

¹⁶Anò gie Joel, *ntsẅì nkʉ̀ Ssé la tʉ́ njyó ńgɔɔn zɔ̌ pá’ɔɔn ńdɔgɔ ḿbumte.

¹⁷À la gɔɔn ngie Cʉ̀apʉ̀a gɔ̌ɔn ngie: Alyɛ’ɛ́ nzsònzèm ge lá’ ně ku’u, n ńnéŋe Zẅìge yɔ́ɔn ná nyìŋ mésoŋ ntsèm; gubé gí yé mbàŋa mbɔɔ yé pànzwě ge lá’ cʉ́’ pà Ntsẅì nkʉ̀ pɔ́ɔn. Mèŋ n ge gÿo púɔ ngwàshùm pí gyá menkʉ̀’ʉ nò, n dɔg njÿòon ńgɔɔn nò mbwo mezẅìŋe pʉ̀a pie ée tsetsɛ̀ɛ pi.

¹⁸Oon, mèŋ n ge táa ná mɛ̌ melyɛ̌’, é gÿó Zẅìge yɔ́ɔn kúu na menkwɔɔn pɔ́ɔn pe mbàŋa mbɔɔ pe pànzwě. Pɔ́ cʉ́’ pà ntsẅì nkʉ̀ pɔ́ɔn.

¹⁹Mèŋ n ge lá’ gÿo ndàa gyá nò kẅɛɛ lefàŋ. Menò mmɔɔn mmɔɔn kẅɛɛ ndùmo ssé tsetsá’. Mé gyá metse, ńgyá mmɔ̌g, ńgyá pá’ ndyé fu’u,

²⁰Alyɛ’ɛ́ lá’ Cʉ̀apʉ̀a ge lá’ gwaa tó, lejÿɔ́g nèm zɔɔn sele síŋ, lejÿɔ́g saŋ sele mbaŋ pá’ metse lá. Yɛ̌ lyɛ’ɛ́ lá’ ge lá’ gwɔ́ kwà’ lyɛ’ɛ́ nò, é gwɔ́ lyɛ̌’ gie e Ssé nyɛɛ mmó gie aa yɛ̌.

²¹À ké ńgwɔ́ pú’u, mânyìŋ ntsèm gẅie à ga’te ńtóŋo Cʉ̀apʉ̀a, à tsẅɛ́.

²²Piɛ gíŋe ńgɔɔn ngie: Pà Israel, pi teŋe tuŋo gí ńjú’u nò yɔɔn gie mèŋ n gee gɔɔn lɔɔn. Yěsô múɔ Nǎzarɛd, aa pá’a ńgwɔ́ nyìŋ gẅie Ssé ka kwà’ ńnyɛɛ mbwo pi ngie yé zɔ ka tumo yé. À ka lɔg pá’ à ka cʉa na yé ńgÿo menò mmɔɔn mmɔɔn, ńgÿo ndaa gyá, ńgíŋ ńnyɛɛ gẅi meliŋé menò ntí ntí. Tà pi cwoŋo ne ńzsé.

²³Wɔɔn aa nyìŋ gẅie mé la ńnéŋe mbwo pi, á gwɔ́ pɔ́ pá’ e Ssé la lá’ ńkwaŋte ńzáb. Pi lêen ńké gÿo pàtezsě Ssé kime yé nà tÿǒ nkǐ, ńzẅé yé.

²⁴Tá e Ssé la kyɛ́’te menkÿo legwé nà yé, ńzíme yé mélà’ mie, á la zɔɔn ńtʉ́ pà’ à lɔɔn ńgwɔ́ legwé ńnéŋe yé ndá tsǎŋ.

²⁵Pi zɔɔn ńju’u nò gie fùɔ Ndavíd la gɔɔn ńtí ye, à la gɔɔn ngie: N da ne ńgyá Cʉ̀apʉ̀a, à gwɔ́ mvfò mèŋ fʉ̀’ ntsèm, Á gwɔ́ nà gwǒŋo pwó yɔ́ɔn yé tʉ̀, nně ńtóonte wɔ̀ɔn, légwɔ́ gie ntʉ́m wɔ̀ɔn té vege wɔ́.

²⁶Áa yɛ̌ tá ntʉ́m wɔ̀ɔn ńnéŋe ńjú’ mboŋó, ngyè lekág zɔ kẅɛɛ ncwò mèŋ. N zɔɔn fó ńkwé kwé, mbà pfó yɔ́ɔn ge nuŋe ne pyɛ́bɛ pyɛ̌b,

²⁷mélà’mie à lɔɔn ńgwɔ́ ɔ́ légwá’a wɔ̀ɔn lá’ mepfó wɔ́, ḿbiŋ ké lezẅíŋ ngie nyìŋ gẅie ɔ̀ la tsɔ́’ɔ yé à lʉ́ʉ tsɛ̀ɛ lesyè wɔ́.

²⁸Ɔ̀ ka nyɛɛ wɔ̀ɔn memánzsè mie n ge pfó mǒ tá tsẅɛ́. Mèŋ n ge tó gwɔ́ jʉ’ gie ɔ́ɔ wó, anò poŋo wɔ̀ɔn. M bú ńkág tɛ’.

²⁹Mefɛ́ pɔ́ɔn, pi zẅíŋ ngie n zyɛ́b zyɛ́b shwóŋó gẅi nò á ná mangʉa njʉ̀’ wégè fùɔ Ndavíd. À la kwé, mé tuŋo yé tà lesyè sé ké ńgwɔ́ pɔ́ lá’ɔɔn ta ńkú lyɛ̌’ɔɔn.

³⁰Tá’ à laa *ntsẅì nkʉ̀ Ssé, ḿbiŋ ne ńzsé nò gie Ssé la ká’a mbwo yé tà ńkʉa ngie yé Ssé ge lá’ gÿo, múɔ gẅie à kẅɛɛ nà ngẅɛ̀ yé zɔ ńnéŋe nà leŋe lefùɔ yé.

³¹Á laa pú’u, mbà fùɔ Ndavíd tʉ́ njÿó ńzsé ngie *Nzà’nkÿo ge lá’ zíme nà legwé. Áa yɛ̌ tá à la gɔɔn nà *Nzà’nkÿo ngie: E Ssé ka té gwá’a yé, á zsó lá’ mepfó wɔ́, ḿbiŋ nke te zẅíŋ ngie à lʉ́ʉ tsɛ̀ɛ lesyè wɔ́.

³²*Nzà’nkÿo aa Yěsô. E Ssé ka zíme yé nà legwé, peg pɔɔn metsèm ne shwóŋó yɔɔn nò, á gwɔ́ nò gie peg ka gyá.

³³E Ssé ka gÿo, á kwɔ́’ tà ńnéŋe nà gwǒŋo pwó yé ye tʉ̀. Áa fʉ̀’ɔɔn pá’ɔɔn, mbà Tá wé Ssé cʉmé Zẅìge Ndʉalʉ̌a mbwó yé, á gwɔ́ pá’ yé Ssé la ka’. Ammó gie pi jú’u ḿbiŋe ńgyá lɛ̀, áa Zẅìge Ndʉalʉ̌a ŋwɛ́ gie Yěsô nǎ né pʉ̀a pé.

³⁴Fùɔ Ndavíd lé twó yé léen ńké tè tÿǒ lépwó kwɔ́’. Tá ńké ńgɔɔn nò ńtí *Nzà’nkÿo ńgie: «Cʉ̀apʉ̀a Ssé gɔ̌ɔn mbwó wɔ̀ɔn Ndè ngie: Néŋe nà gwǒŋo pwó yɔ́ɔn yé tʉ̀.

³⁵Ńzẅí’te mèŋ n dɔg megàŋ mbù pú, ńgÿo ntÿɔ́gɔ mekwò mú».

³⁶Pú’u la, ngwòŋ ngẅɛ ndá Israel, pi gẅiin lekwà’ ńzsé mboŋó ngie, Yěsô gẅie pi ka kime yé nà tyǒ nkǐ la, àa yé gẅie e Ssé ka lɔgɔ yé ńgÿo Ndè, ńgíŋe ńdɔgɔ yé ńgÿo *Nzà’nkÿo.

³⁷Pʉ̀a jú’u yɔɔn shwóŋè, á pú ńkúte wɔ́b tɛ’. Pɔ́ zɛ́te Piɛ pâ petsɔ́ megàŋ ntúm ngie: Mefɛ́ mefɛ́, tà peg ge gÿo lêkɔ́?

³⁸Piɛ tsɔ́’ɔ mbwó pɔ́b ngie: Pi kúbe mà. Wɛ̌ nyìŋ wɔ́ nà pi zẅíŋ mé nu’u ye ntse nà lezíŋ Yěsô Kristo. Légwɔ́ gie e Ssé ge lege menò tepoŋ mé é naa mbwó yé. E Ssé lêen ńké ńnáa Zwìge Ndʉalʉ̌a né pi.

³⁹Méla’mie eshúm sie e Ssé la ka’, à lɔ̌ɔn ńka’a mbwo pi, mbɔɔ mbwo gubé gí. À lɔ̌ɔn ńka’a mbɔɔ mbwó pʉ̀a pie pɔ́ ńnéŋe ngʉ̀a shʉ̀shʉ̀a, é ngwòŋ pʉ̀a metsèm pie Cʉ̀apʉ̀a Ssé yégè ge gÿo tóŋo wɔ́b.

⁴⁰Piɛ la gíŋ ńcwoŋo ńgɔ́ɔn nò mbwo pɔ́b lelɔg shwóŋó wɔ́b mmó gie à ne ńzsé nà Yěsô, ńně ńkẅiŋte wɔ́b ńgɔɔn ngie: Pi fó nùɔ pʉ̀a pie ée tsɛ̀ɛ njÿó fʉ̀’ɔɔn gie á léen fʉa mánzsè ńkẅɛ ńzsé ngie pi ge tsẅɛ́.

⁴¹Pʉ̀a tà ńgyɔ́ɔn la jú’u nò gie Piɛ gɔ̌ɔn, ńzẅíŋ, mé nu’u wɔ́b ntse. Mé la nu’ pʉ̀a ntse lyɛ’ó tà ńgwaa ńgwɔ́ pɔ́ gwɔ́ ntsá’ tá. Pɔ́ kẅi’i nà nùɔ pʉ̀a Yěsô.

⁴²Pɔ́ lɔ́ɔn ńtóo fʉ̀’ ntsèm té tsó, megàŋ ntúm zí’i wɔ́b nò Ssé, ńně ńtemte ńnéŋe pá’ pùɔ memá la, ḿbúte ḿpfɛ́ɛ mmó, ḿbiŋe ńcú’te sẅíŋte Ssé.

⁴³Megàŋ ntúm la ně ńgÿo menò mmɔɔn mmɔɔn mbɔɔ pâ ndàa gyá. Pʉ̀a métsèm gyá pú’u, ńcʉ́’ʉ ḿmɔɔn mmɔɔn.

⁴⁴Pàzẅíŋe nò Yěsô metsèm la gẅiin pɔ́ tà’ ntʉ́m, ńteme shúm sɔ́b tem.

⁴⁵Pɔ́ lɔ́ɔn ně sẅiŋe metsetsá’ mɔ́b mbɔɔ shúm tʉ̀ nzẅìŋ sɔ́b, ńdɔgɔ nkáb ńtóo mé gábte ńná ye wɔ̌wɔ ɔ pɔ́ pá’ e ge ku’u nà yé nò.

⁴⁶Á lɔ́ɔn ńgwɔ́ ngwòŋ lyɛ̌’ ntsèm, lelè’e wɔ́b gwɔ́ ngie pɔ́ cú’te *jʉ’ʉ Ssé. Pɔ́ kúu mendá ḿbute ḿpfɛ́ shúm, ńjyó shúm lejÿo pɔ́ nê lekág. Wɔ̌wɔɔ gẅiin pɔ́ ntʉ́m mbòŋo.

⁴⁷Pɔ́ lɔ́ɔn ńgu’te Ssé tɛ’. Alá’a ntsèm kwoŋ yɔ́b ntí leńnéŋe. Á gwɔ́ lyɛ̌’ ntsèm, Cʉ̀apʉ̀a ně ńdɔgɔ pʉ̀a pie à gyǒ pɔ́ tsẅɛ́, ńdɔgɔ ńkẅi’i nùɔ yɔ́b.