Read Ngiemboon Megàŋ ntúm 20 Bible Online

Megàŋ ntúm 20 - Ngiemboon bible

Megàŋ ntúm 20

¹Avà’ gÿo ńgwɔ́ tà ḿmaga Efeso, Pɔl cú’te pʉ̀a Kristo, ńkẅiŋte wɔ́b, ńdeen ńde’e wɔ́b, ńcʉ́me mánzsè ńgʉa nê Makedonia,

²ńkúu wó, ńzyɛ́’ɛ tsɛ̀ɛ yɛ̌ pàga ngwòŋ, ńgiŋe ńkẅiŋte pʉ̀a Kristo, éfó wó ńgʉa tà ńkúu tsɛ̀ɛ pàga ngwòŋ Gelekia,

³ńnéŋe wó mesaŋ métá tà ne ńkwaŋa pá’ à ge kúu *máamáa kanú’ gʉa nê Siria, ńdeen ńjú’ ngie pà Yuda ne fa’a lézẅé yé, ńcʉ́’ ńzáb pɔ́ ngie à ge lɔg ye Makedonia.

⁴Mezíŋ pʉ̀a pie pâ Pɔl lɔ́ɔn ḿbú ńgiŋe ná yɔɔn kwò legìŋ é mɔɔn. Wɔɔn laa Sopatɛɛ, míŋ Pẅirẅis ńgwɔ́ múɔ Mbelɛ, ńgÿo Alistag pɔ́ Sekondus, é gwɔ́ pʉ̀a Tesalonika, ḿbiŋ ńgÿo Gaẅis gẅie à la fó Nderbe, ńgÿo Timoté, ḿbiŋ ńgÿo Tishig pɔ́ Torofine é gwɔ́ pʉ̀a pàga ngwòŋ Azia.

⁵Yɔɔn nùɔ vɔg ńgwɔ́ mvfò, ḿbyɛ́bɛ wég Toras. Tá peg cʉ́’ ńgwɔ́ nzèm,

⁶ńgʉa ná peg, peg gÿo ńcʉ́’ ńgwaa kúu yég *máamáa kanú’ á nkʉ̀ŋ ntse tÿǒsoŋ Fillipe, mbà melyɛ’ɛ́ lá’ mie pà Yuda pfɛ́ɛ *mbelég té mvòŋ é kéen ńtɔ́g tà é gwɔ́ lyɛ̌’ tʉ̀a. Peg kẅɛ́te wɔ́b Toras, pega pɔ̌ ńnéŋe wó tà’ ngàb.

⁷Á gwɔ́ ndùŋ mvfò lyɛ’ɛ́ lá’ nà ngàba lá’, peg cú’te léjÿó shúm léjÿó Cʉ̀apʉ̀a. Njÿó ne ńgee lʉ́a Pɔl gʉa. Á ne shwóŋó nò Ssé mbwo mefɛ́ mefɛ́, ńké shwóŋó wɔ́b shwóŋ tà ńkú tsɛ̀ɛ tsẅɛ́’.

⁸Peg gwɔ́ pú’u, mbà peg cu’té tsɛ̀ɛ lûm ndá gẅie aa nà ndêg we tÿǒ. Mbà mé pǔ ńdyɛ melâm ńtÿɔ́gte ndá tà é gyɔ́ɔn gyɔ̌ɔn.

⁹Atsɔ̌ mûɔ ngwàshùm, mé tóŋo yé lê Eutig, ńnéŋe ngʉ̀ŋe gúndu. Pɔl ké ńkẅi’i ńgɔɔn nò á sag sag, á lyé tà ḿbÿɛ́, ńnyí’i éfó ná ndêg mbɔ́ɔntè yétá, ńzyɛ́bɛ ńgwe nzème pǐ. Mé gɔɔn ngie mé ge pʉ’ʉ yé, ńgyá mbà à kwě.

¹⁰Pɔl lêen ńké sẅɛ́’, ńŋwé’e ssé, ńkaa yé ńgẅiin mbwó yé, ńgɔɔn ngie tà pi pú’ mbùm gí, à gwɔ́ pɔ́ ntentʉ́,

¹¹ńdeen ńké ńgíŋe ńkwɔ́’. Pâ pɔ̌ jÿó shúm léjÿó Cʉ̀apʉ̀a. Á gíŋe shwóŋó shwóŋó tà njÿó lʉ́a, tá á lêen ńké ńgʉa.

¹²Á gʉa ná mûɔ shùm wa, mé lɔgɔ yé ḿbiŋ nzèm, á gwɔ́ pɔ́ ntentʉ́, mbùm pʉ̀a kyɛ́’ɛ tɛ’.

¹³Peg kúu *máamáa kanú’ ḿvɔgɔ Asos, á nue Pɔl la záb ngie à ge giŋ pɔ́ ssé tá kẅɛ́te wég wó, é kúu *máamáa kanú’.

¹⁴Á kẅɛ́te wég Asos, pega pɔ̌ kúu *máamáa kanú’ ńgʉa nê Mitilene,

¹⁵éfó wó, ńgíŋe ńdɔgɔ *máamáa kanú’ ńgʉa, ńdá’a lá’ ńgiŋ giŋ tà njÿó lʉ́a. Peg kúu ngʉ̀ŋe tÿǒsoŋ Cʉio ńzyɛ́’ zyɛ́’, yetsɔ́ njÿó gÿo ńgwɔ́ lʉ́a, mbà peg gʉ̌a tà ńzyɛ́’ɛ tÿǒsoŋo Samos, yetsɔ́ njÿó gÿo ńgwɔ́ lʉ́a, mbà peg gʉ̌a tà ńkúu Milet.

¹⁶Peg la gwɔ giŋ yɔɔn ntí, tà ńcʉa ngʉ̀ŋe tÿǒsoŋ Efeso cʉa, á gwɔ́ nue Pɔl la záb ngie à tě ge zɔg láte tsɛ̀ɛ pàga ngwòŋ Azia wɔ́, ńne sẅɛ́te ńtsɔ́ɔn légwɔ́ Yerósalem lyɛ’ɛ́ Paŋtekɔ̂d pá’ Ssé lɔɔn ńzẅíŋ?

¹⁷Pɔl kúu Milet, ńtúm mé gʉa ńtóŋ pʉ̀a pie é kẅé mvfò tsɛ̀ɛ *ndá cú’tè pʉ̀a Kristo ye Efeso.

¹⁸Pɔ́ tó tà ńkúu lejʉ́ŋ yé, á gɔɔn né pɔ́b ngie: Pi zsě pá’ mèŋ n ka lɔg ńnéŋe pú’u. Tà fó lyɛ̌’ gie n da kúu tsɛ̀ɛ pàga ngwòŋ Azia.

¹⁹Mèŋ n ka fa’a fà’ Cʉ̀apʉ̀a té ŋá’té nnɛ́, ńgwaa fa’ ne ńdʉa, ńne ńgyá ngɔ́’, mélà’mie pà Yuda ka ne ńkwoŋo lényɛɛ wɔ̀ɔn ngɔ́’.

²⁰Akɔ́ɔkɔ́ɔ wɔ́ gie à lɔɔn ńgwɔ́ á kẅéte gẅi wɔ́, mèŋ n ka zí’i gẅí. Mèŋ n nka ńnéŋe nà jʉ’e mecú’tè ńzí’i gẅi mmó, ńkúu tsɛ̀ɛ mendá mí ńzí’i gẅi mmó, ńda’te nò Ssé mbwo pi,

²¹ńdɔg pú’u, ńtóŋ pà Yuda, mbɔɔ pʉ̀a pie é té pà Yuda wɔ́, ńgie pɔ́ sele nnɛ́ ńcʉ́me nzèm Ssé, ńzáb ntʉ́m ná Cʉ̀apʉ̀a wege Yěsô.

²²Mèŋ n ge fʉ̀’ɔɔn ńne ńgee nê Yerósalem. A Zẅìge Ssé zɔ̌ ké ne ńtsóte wɔ̀ɔn ngie mèŋ n gʉa wó. Mèŋ m biŋ ńké té ne ńzsé mmó gie á ge kúu wó, é gÿo wɔ̀ɔn mɔ́.

²³Tá mèŋ n kě ne ńkúu tsɛ̀ɛ yɛ̌ tÿǒsoŋ wɔ́, a Zẅìge Ndʉalʉ̌a gÿo mé shwóŋó wɔ̀ɔn ngie mèŋ n ge kúu wó gyá ngʉ̀ngʉ̀ tà mé ńnéŋe wɔ̀ɔn mbɔɔ tsǎŋ.

²⁴Tá á gʉa ná mèŋ, mbà wɔ̀ɔn le gwɔ́ tè séen ńgwɔ́ pɔ́ mmó ntʉ̀ nzẅìŋ mbwo mèŋ wɔ́. Ammó gie mèŋ n ne ńtsɔ́ɔn, á gwɔ́ pɔ́ ngie, mèŋ fa’a fà’ gie mé nǎ mbwó mèŋ tà ḿmag. Á gwɔ́ légÿo ńgÿo kɔ̀ɔkɔ́ɔ wɔ́ gie Cʉ̀apʉ̀a Yěsô ka tsẅi ngie mèŋ n gÿo. Mèŋ n gɔɔn légʉa ńtsẅi nkʉ̀ mbòŋo mbwo pʉ̀a mesoŋ lélɔg shwóŋó wɔ́b pá’ e Ssé fó ná Yěsô ńcÿó gem pʉ̀a pú’u.

²⁵Mèŋ n ka cʉa tsetsɛ̀ɛ pi metsèm, ńgiŋe sá’a pá’ nò *lefùɔ Ssé áa pú’u. M biŋ ńgwɔ́ fʉ̀’ɔɔn, ńne ńzsé ngie pi tě ńdá’a ńgíŋe ńgyá shÿó wɔ̀ɔn mɔ́.

²⁶Áa pú’u, tá mèŋ n ne ńnyɛte shwóŋó gẅi ngie mèŋ n kéen ńgÿo kɔ̀ɔkɔ́ɔ wɔ́ gie mèŋ n ka ku’u légÿo ńdɔg ńkẅéte gẅí. Nyìŋ gẅi lɔɔn ḿbyé, mbà yɔ́ɔn pwó té mǒ wɔ́.

²⁷Á zɔɔn ńgwaa gwɔ́, mbà mèŋ n ka shwóŋó gẅi kɔ̀ɔkɔ́ɔ wɔ́ gie e Ssé la ka’a légÿo. Tà mèŋ n te tsɔ́ mmó lÿoon.

²⁸Pi pɔ́ɔn gí twó kwà’ mboŋó, ḿbiŋ ḿbɔ́ɔn ye nùɔ *njʉ̀njÿò gie Zẅìge Ssé ka cʉ́me mbwo pi ngie pi ne ḿbyɛ́bɛ. Pi líe cú’tè pʉ̀a Ssé mboŋó. À la pfɛte metse Míŋ we ńdɔg ńgÿo pɔ́ tsẅɛ́.

²⁹N zsé ngie mèŋ n ge gwɔ́ tá gʉa, menɔ̀ɔn ngẅi kúu nà nùɔ *njʉ̀njÿò yɔ́ɔn, ńzába nò.

³⁰Epʉ̀a kẅɛ mbɔɔ tsetsɛ̀ɛ pi, ńzye lézí’i cÿɔ̌ nò ńdɔg shwoŋte pʉ̀a Kristo ńcʉ́’ ńnéŋ pɔ́ nzèm pɔ́b.

³¹Pi pɔ́ɔn légwá’a lÿɔ̀g. Pi kímte ngie n ka lɔg ngù’ tá, á gwɔ́ pɔ́ letsẅɛ́’, ńgwɔ́ pɔ́ zsǒ, mèŋ n ne ńnáa ntÿɔgɔ́ mbwo wɔ̌wɔ́ɔ tsetsɛ̀ɛ pi té kʉ́a. Tà ńgwɔ́ ná, ńne ńdʉa.

³²Mèŋ n kě ńgwɔ́ fʉ̀’ɔɔn pà’ɔɔn ńne ńcʉ́me gẅi mbwo Ssé ḿbiŋe ne ńgɔɔn mbwo pi ngie pi zẅí’te shwóŋè yé gie á nyɛɛ pá’ à cÿó gem yégè pú’u. Yɛ̌ shwóŋè ku’u légÿo pi kẅi’i ńzáb ntʉ́m nà Ssé. E Ssé cʉa mǒ ńná shúm mbòŋo sie á la nyɛte ńzáb ńtí pʉ̀a pie ée pé.

³³N daa nkáb nyìŋ tsɔ́ɔn. N te ngɔl tsɔ́ɔn. N te menzsǒ nyìŋ tsɔ́ɔn.

³⁴Pi ne ńzsé gí ngie mèŋ n ka lɔg pɔ́ mbwó mɔ́ɔn mɔɔn, efa’a fà’ tá ńgẅiin yɔ́ɔn mmó tá mbɔɔ pʉ̀a pie pega pɔ̌ giŋe gẅiin yɔ́b mmó.

³⁵Mèŋ n kɔ̌ɔn ne ńnyɛɛ gẅi fʉ̀’ ntsèm ntí gie á ne ńzɛ́te ngie mé fa’ pú’u, ńzsé ngie mé ge kẅéte pàtè mmó. Á poŋo lékímte nò gie kwà’ Cʉ̀apʉ̀a Yěsô la gɔɔn ngie: Lenǎ mmó à gẅiin fù’ ńcʉa lékẅé.

³⁶Pɔl la gɔɔn nò tà ńgwaa tsẅé jʉ’, pâ pɔ̌ métsèm kẅí’te ssé, ésẅíŋte Ssé.

³⁷Epʉ̀a metsèm táŋte Pɔl, ńzye lélʉa.

³⁸Pɔ́ mÿɔgɔ lelÿò mélà’mie à ně ńgɔɔn né pɔ́b ngie: Pi tè gÿo gíŋe gyá shÿó wɔ̀ɔn mɔ́. Pɔ́ gÿo pú’u, ńgʉa ńtsege Pɔl ncwò *máamáa kanú’.