Read Ngiemboon Megàŋ ntúm 21 Bible Online

Megàŋ ntúm 21 - Ngiemboon bible

Megàŋ ntúm 21

¹Pega pɔ̌ gwɔ́ tà fege, peg kúu *máamáa kanú’, ńzyɛ́b zyɛ́b ńgʉa lê Kos. Njÿó gÿo ńdʉ́a, peg gʉa tà ńkúu Rhode, éfó wó ńgʉa tà ńkúu Patara,

²ńgyá *máamáa kanú’ gẅie à gee nê Fenicia, ńkúu tsoló ńgʉa,

³ńgiŋ giŋ tà ne ńgyá Shʉ̀pele, é gwɔ́ ngwòŋ gẅie ntse la kéle ńnéŋe soŋ, peg lɔg ye gwǒŋo ntsíŋ, ńké ńgiŋ giŋ tà ńcʉ́’ʉ lékúu ngwòŋ Siria, ńnyé tsetsá’ nà gwǒŋo pwó kyɛ̀bɛ, ńtéŋe nà gwǒŋo pwó tʉ̀. Á gwɔ́ jʉ’ gie mé ge tyé wó, ésẅé’e shúm metʉ̌a tsɛ̀ɛ *máamáa kanú’.

⁴Peg kúu wó, ńgyá pʉ̀a Kristo. Pega pɔ̌ ńnéŋe lyɛ̌’ sɔɔn mbʉ́a. A Zẅìge Ssé shwóŋó wɔ́b nò, pɔ́ gɔɔn né Pɔl ngie: Pɔ́ɔn lé gʉa Yerósalem.

⁵Yɛ̌ ngàb mag, peg gíŋ ńcʉ́me mánzsè. Pʉ̀a Kristo metsèm lâ pànzwě lê gubé yɔ́b gʉa ńtsege wég. Pega pɔ̌ gʉa tà ńkúu ngʉ̀ŋe ntse té pàa, ńkẅí’te ssé, ésẅíŋte Ssé,

⁶ńde’e, peg gwaa kúu tsɛ̀ɛ *máamáa kanú’, pɔ́ piŋ nê membʉ̀a mɔ́b.

⁷Peg fó Tir ńgʉa tà ńkúu Petolemayis, ńtsyɛ’te mefɛ́ mefɛ́ pie ée wó. Pega pɔ̌ ńnéŋe tà’a lyɛ̌’.

⁸Njÿó gÿo ńdʉ́a, peg lu ssé, ńgʉa tà ńkúu Sezare, ńgʉa mbʉ̀a Filib gẅie aa Ntsẅì nkʉ̀ mbòŋo. Á gwɔ́ tsɔ̌ tà’ nyìŋ ná pʉ̀a sɔɔn mbʉ́a pie mé la tsɔ́’ɔ Yerósalem la. Pega pɔ̌ ńnéŋe.

⁹Á gẅiin gubé yé púɔ pànzwě lekùa, mbà pɔ́ laa zɔ́’ɔ. Pɔ́ ńnéŋe ńtsẅii nò gie á fóo mbwo Ssé, a mbwo lá’.

¹⁰Peg tóo wó, tà ńnéŋe lyɛ̌’ shÿɔ́’ɔ tsɔ́ wɔ́, atsɔ̌ nyìŋ gẅie à ńnéŋe ńtsẅi nkʉ̀ gẅie é fóo mbwo Ssé, mé tóŋo yé lê Agabus, á fó Jẅidea ńtó,

¹¹ńtó pú’u, légyá wég, ńtó ḿbí nkÿo nzsǒ gẅie Pɔl lɔgɔ ńcúu nzsǒ ye, ńdɔg sele ńkwɛ́ mekwò mé lâ mbwó mé ńgɔɔn ngie: Anò gie a Zẅìge Ssé tsẅǐ à yɔɔn: Mé ge kúu Yerósalem, pà Yuda gwoon ngàŋ nkÿo nzsǒ wɔɔn, ńkwɛ́ɛ yé pá’ɔɔn, ńnáa yé mbwo pʉ̀a pie é té pà Yuda wɔ́.

¹²Pega mefɛ́ mefɛ́ pie pɔ́ ée Sezare jú’ pú’u, ńcwoŋo sẅíŋte Pɔl ngie à pɔ́ɔn lépʉʉ Yerósalem.

¹³Tá Pɔl tsɔ́’ ngie: Pi lɔgɔ lelʉa ńdɔgɔ ḿvege wɔ̀ɔn mélà’a kɔ́. N tyé pá’ɔɔn, mbà mèŋ n taŋté mbùm yɔɔn tà ńgwɔ́ gie mé lɔɔn ńkúu Yerósalem, ńkwɛ́ɛ wɔ̀ɔn kwɛ́, ńzẅé wɔ̀ɔn zẅé ńtí Ndè wege Yěsô n de lʉ’.

¹⁴Peg fa’ shÿó pá’ peg ge tɔ’ɔ yé kékáŋ, éfó ńtsẅé jʉ’, ńcʉ́’ ńgɔɔn pɔ́ ngie: Á poŋ ngie Cʉ̀apʉ̀a gÿo mmó gie à ně ńzáb ngie à ge gÿo.

¹⁵É piŋ ńgwɔ tɔ́g lyɛ̌’ shÿɔ́’ɔ tsɔ́ wɔ́, peg cwoŋte mbùm yeg ḿbʉ nê Yerósalem.

¹⁶Etsɔ́ ntá’ pʉ̀a Kristo pe Sezare gʉa ńtsege wég, ńkúu wó ńdɔgɔ wég ńgʉa mbʉ̀a Mnasoŋ. Á gwɔ́ nyìŋ ngwòŋ Shʉ̀pele, mbà à la záb ntʉ́m wé ná Yěsô tà mbà ntyě sǎg. Peg gʉa wó pú’u, lélá’a mbʉ̀a yé.

¹⁷Peg kúu Yerósalem pú’u, mefɛ́ mefɛ́ pú ńkúe wég lê lekág.

¹⁸Njÿó gÿo ńdʉa, pega Pɔl gʉa mbʉ̀a Jâg, ńkúu wó pàkẅé mvfò tsɛ̀ɛ cú’tè pʉ̀a Kristo ye Yerósalem pú ńtó yɔ́b.

¹⁹Pɔl tsyɛ’te wɔ́b tà á ku’, á pú ḿbíte menò mie Ssé ka lɔgɔ yé ńgÿo tsetsɛ̀ɛ pʉ̀a pie é té pà Yuda wɔ́ éshwóŋó wɔ́b.

²⁰Pàkẅé mvfò tsɛ̀ɛ cú’tè pʉ̀a Kristo jú’u yɔɔn nò á poŋo wɔ́b tɛ’. Pɔ́ kwé’e lezíŋ Ssé ńnáa tÿǒ, ńgɔɔn né Pɔl ngie: Afɛ̌ weg, gyá jú. Pà Yuda ntsá’ tà ńgyɔ́ɔn kéen ńcʉ́’ pʉ̀a Kristo, ḿbiŋ ńgwɔ́ kwà’ pàkú’te *lepʉ̌ Mǒsê té kʉ́a.

²¹Tá’ pɔ́ ké ne ńjú’u mé gɔɔn ná gù ngie: Ɔ̀ ne ńzí’i mbwo pà Yuda pie ée túmo túm ngie pɔ́ gwá’ *lepʉ̌ Mǒsê. Ngie ɔ̀ ne ńtsẅi ngie tà pɔ́ gíŋe ḿbú’ gubé yɔ́b. Ngie ɔ̀ ne ńtɔ’ɔ wɔ́b légíŋ ńgiŋe ná pá’ mà lá’ wege né ńzɛ́te.

²²Pege ée pá’ɔɔn, é gÿo lêkɔ́? Pɔ́ ge gǎ wɔ́ é zsé ngie ɔ̀ tǒ tà ńgwɔ́ jʉ’ɔɔn.

²³Áa yɛ̌, á poŋ ɔ̀ gÿo mmó gie peg ge gɔɔn mbwo gù. Epʉ̀a ée jʉ’ɔɔn lekùa pie pɔ́ ka ka’a nò mbwo Ssé.

²⁴Lɔgɔ wɔ́b ńgʉa, pia pɔ̌ gʉa sɔgɔ pʉ̀ ná pi. Gù zɔ ké ńná yɔ́b nkáb gie pɔ́ gẅiin lénáa mǒ, ńzsé ngie pɔ́ ge kwóon twó sɔ́b. Ɔ̀ gÿo pú’u, mbà pʉ̀a metsèm ge gyá ngie anò gie mé píte ná gù á té nò wɔ́, é zsé ngie ɔ̀ kě ńkú’te *lepʉ̌ Mǒsê kú’te.

²⁵Á gʉa nà *lepʉ̌ ŋwɛ́, mbà peg la ŋwe’e ŋwà’ne ńnáa mbwo pʉ̀a Kristo pie é té pà Yuda wɔ́, lélɔg shwóŋó wɔ́b mmó gie peg ka zǎb ngie pɔ́ ne ńgÿo, ńgɔɔn tsoló ngie pɔ́ pɔ́ɔn lépfɛ́ pfwɔ́’ɔ mbab gie mé lɔ̌g ńgwá’ messé, ḿbɔ́ɔn lézẅí’ metse, ḿbiŋ ḿbɔ́ɔn lépfɛ́ mbab nɔ̀ɔn gẅie mé fomé yé fóme, ńgie pɔ́ pɔ́ɔn lépumo wɔ̌wɔɔ pâ pɔ̌ nuŋe nuŋe.

²⁶Pɔl lêen ńké ńdɔg pʉ̀a pá lekùa ńgʉa. Njÿó lʉ́a, pɔ́ zye légÿo línɔ́ɔn gie mé gÿo ńdɔg sɔgɔ pʉ̀, ńgÿo tà ńtsẅé jʉ’, ńgʉa tsɛ̀ɛ jʉ’e Ssé, ńkúu wó ńgɔɔn lyɛ̌’ gie lésɔgɔ *lɔ̌’ ge lá’ mag. Á lyɛ̌’ó gwɔ́ gie mé ge nuŋe pwɔ́’ é tí twó mâwɔ̌wɔ́ɔ tsetsɛ̀ɛ pɔ́b.

²⁷Elyɛ̌’ sɔɔn mbʉ́a sie mé lɔg sɔgɔ pʉ̀ ná nyìŋ cʉ́’ʉ ńgee pɔ́ nku’ú, etsɔ́ pà Yuda pie pɔ́ fóo ná pàga ngwòŋ Azia gyá Pɔl gwɔ́ jʉ’e Ssé, pɔ́ ma’a và’ á tsetsɛ̀ɛ nùɔ lá’, ńgwoon Pɔl,

²⁸ńkwé’e ngyè yɔb tÿǒ ńga’te ngie: Pʉ̀a Israel, pi tó ńkẅéte wég! Nyìŋ wa wɔɔn. À ne ńgwá ńgiŋe jʉ’ ntsèm ndùmo ssé tsetsá’ ńkíme pʉ̀a lá’ pégè té pòŋ, éshwóŋó té pòŋ ná *lepʉ̌ Mǒsê. Tà mbɔɔ ná jʉ’e Ssé yɔɔn. À wɔɔn, mbà à zɔ̌ɔn ńdɔg pʉ̀a pie é té pà Yuda wɔ́, ńtó, ńdɔgɔ wɔ́b ńkúu tsɛ̀ɛ jʉ’e Ssé, ńdɔgɔ pú’u, ńnéŋe *lɔ̌’ mǒ,

²⁹ńgɔɔn pú’u, mélà’mie pɔ́ ka gya Pɔl pɔ́ Torofine, mûɔ Efeso gwɔ́ tÿǒsoŋ ne ńgiŋe. Pɔ́ ne ńkwaŋa ngie Pɔl lɔgɔ́ yé ńtó ńkúu tsɛ̀ɛ jʉ’e Ssé.

³⁰Avà’ pú ńjÿó tÿǒsoŋ ntsèm. Alá’ fó meshÿó meshÿó ńnɔ́ɔnte ńkÿo ńtó. Pɔ́ kẅi’i ńkú’te Pɔl, éshwoŋo yé ńdɔg fó tsɛ̀ɛ jʉ’e Ssé ńkẅɛ́ tà ńkúu pǐ, mé gwóon ńjÿɔ́’ mencwò kɔ̀’.

³¹Pà Yuda gwɔ́ pú’u, ne fa’a lézẅé Pɔl. Tá yɔɔn nò fóon ńgwe letuŋó Tándá metándá ncù pà *Roma. Á jú’ ngie và’ pǔ ńjÿó tÿǒsoŋ Yerósalem,

³²ńgwóon ńcú’te pàlÿɔ́’ ncù pâ mentándá pɔ́b. Pâ pɔ̌ nɔ́ɔnte ńgʉa lê jʉ’ gie àlá’ cú’te wó. Alá’ gwɔ́ tà ńgyá pá’ Tándá metándá ncù pâ pàlÿɔ́’ ncù tóo, pɔ́ té gíŋe ńcúa Pɔl wɔ́.

³³Á tó ńtsẅi mé gwoon Pɔl ńdɔg metsɛ̂n mémbʉ́a ńkwɛ́ɛ yé, ḿbiŋ ńzɛ́te ngie: Nyìŋ wɔɔn aa wɔ̌? À gÿǒ lêkɔ́?

³⁴Tá’, alá’ ne ńga’te pɔ́ mengyè mengyè. Á pú tè tsɔ́ nò jú’, ńtí shwǒŋ. Á tsẅi ngie mé lɔgɔ Pɔl ńgʉa lê mbʉ̀a pàlÿɔ́’ ncù.

³⁵Mé lɔgɔ Pɔl ńgʉa tà ńcʉ́’ʉ lékúu jʉ’e mesetɔ̂b, alá’ nÿɔgɔ lézẅé yé. Tá pàlÿɔ́’ ncù fó ńcʉ́’ ńkaa yé kaa.

³⁶Á gwaa gwɔ́, alá’ gwɔ́ nzèm ńga’te ńgɔɔn ngie: Mé zẅé yé.

³⁷Mé gʉa tà ńcʉ́’ʉ léńnéŋe Pɔl á mbʉ̀a pàlÿɔ́’ ncù, á gɔɔn mbwo Tándá metándá ncù ngie: Tà à lɔɔn ńgwɔ́ mé zẅíŋ mèŋ n gɔɔn nò? Andÿò ŋwɛ́ tsɔ́’ ngie ɔ̀ fǒon ńzsé léshwóŋó Gelekia ka?

³⁸Ńzsé ngie ɔ̀ lɔgɔ tě ńgwɔ́ nyìŋ Egipto wa gẅie á ka tóo jʉ’ɔɔn, ńnuŋe nzòŋ, ńcú’te pʉ̀a ntsá’ lekùa ńdɔg ńcʉ́me nkwòŋo tsẅɛ wa wɔ́ keen?

³⁹Pɔl tsɔ́’ ngie: Mèŋ, n gee nyìŋ Yuda, mé zyé wɔ̀ɔn tsɛ̀ɛ tÿǒsoŋ Tarso, á nà pàga ngwòŋ Silisia. Mèŋ n gee nyìŋ tÿǒsoŋ gie mé ée nzɔ̌ nzɔ̌ ńzsé lezíŋ sé. Tsetsɔ́’, léen ńzẅíŋ mèŋ n gɔɔn nò mbwo lá’.

⁴⁰Tándá metándá ncù zẅíŋ. Pɔl tyé nà mesetɔ̂b, ńka’a pwó yé ńnáa tÿǒ. Ejʉ’ lêen ndáŋa, á lɔgɔ shwóŋè pà Yuda ńgɔɔn né lá’ ngie: