Read Ngiemboon Megàŋ ntúm 22 Bible Online

Megàŋ ntúm 22 - Ngiemboon bible

Megàŋ ntúm 22

¹Mefɛ́ pɔ́ɔn, metá pɔ́ɔn, pi zẅí’te. Mèŋ n gee ḿbíte ncwò wɔ̀ɔn.

²Pà Yuda jú’ pá’ à ne ńdɔgɔ pɔ́ kwà’ shwóŋè lá’ yɔ́b ńgɔɔn nò, ńkẅi’i ńdáŋte. Pɔl gɔɔn ngie:

³Mèŋ n gee mûɔ Yuda. Mé zyé wɔ̀ɔn tÿǒsoŋ Tarso, á tsɛ̀ɛ pàga ngwòŋ Silisia. Tà mbà n da gú’ pɔ́ Yerósalem wɔɔn; tà Gamaliel[17] zɔ̌ gwɔ́ tsítsa wɔɔn. Á la nyɛte ńzí’i wɔ̀ɔn lepʉ̌ pàmangʉa njʉ’ pég. Mèŋ n daa nyìŋ, ńgáŋ nnɛ́ nà nò Ssé pɔ́ pá’ pi metsèm gÿo lyɛ̌’ɔɔn lɛ.

⁴Mèŋ n da gwɔ́ gwɔ̌ tà ńtsɔ́’ɔ kwò pàgiŋe ná mánzsè Yěsô té pòŋ, ńgÿo mé gwoon mbàŋa lâ pànzwě ḿma’a ndá tsǎŋ tà mbɔɔ pá’ mé lɔ́ɔn ńgwɔ́ mé tóo wó ńzẅé wɔ́b zẅé.

⁵Tándá pànuŋe pwɔ́’, mbaa cú’tè pàsá’a lá’ɔɔn, ne ńzsé ngie nò gie mèŋ n gɔɔn áa nénʉ́. Pɔ́ zɔ̌ la zɔɔn ńná meŋwà’ne ńdɔg ńtúmo wɔ̀ɔn ngie n gʉa ńnyɛɛ mbwo mefɛ́ pégè pà Yuda pie pɔ́ ée tsɛ̀ɛ tÿǒsoŋ Ndamas. Á gwɔ́ ngie n gwoon pʉ̀a Kristo, ńdɔgɔ wɔ́b ḿbiŋ nzèm nê Yerósalem. Légwɔ́ gie mé ge gÿo pɔ́ gyá ngɔ́’.

⁶Mèŋ, n cʉ́me mánzsè, ńgʉa tà ńcʉ́’ʉ lékúu Ndamas, á gwɔ́ kwà’ tsɛ̀ɛ zsǒ. Atsɔ́ mmó lêen fó tÿǒ lepwó, ḿbú ńkyɛ’ɛ wɔ̀ɔn tɛ’.

⁷Mèŋ n gwe ssé, ńgwóon ńjú’ ngyè nyìŋ gɔɔn lé mèŋ ngie: Sɔ̂l, Sɔ̂l, ɔ̀ tsɔ́’ɔ kwò yɔ́ɔn té pòŋ mélà’a kɔ́?

⁸Mèŋ n zɛ́te ngie aa gù wɔ̌ Cʉ̀apʉ̀a? Angàŋ tsɔ́’ ngie: Mèŋ, n gee Yěsô, mûɔ Nǎzarɛd. Ɔ̀ tsɔ́’ɔ pá’a pɔ́ kwò yɔ́ɔn té pòŋ.

⁹Epʉ̀a pie pega pɔ̌ ke ńgwɔ́ nùɔ gyá pá’ ammó kyɛ̌’ jʉ’ tá’, ńké tè jú’ ngyè nyìŋ gẅie à gɔɔn nò lé mèŋ wɔ́.

¹⁰N zɛ́te yé ngie: Cʉ̀apʉ̀a, mèŋ n gÿo lêkɔ́? Cʉ̀apʉ̀a tsɔ́’ɔ mbwo mèŋ ngie: Lu ssé, ńgʉa Ndamas. Ɔ̀ ge kúu wó tá mé shwóŋó gú kɔ̀ɔkɔ́ɔ wɔ́ gie á ne ńzɛ́te ngie ɔ̀ gÿo.

¹¹Mèŋ n da gwaa gwɔ́, mbà mmó pǔ ńkyɛ’ nÿɔ́g mɔ́ɔn tà mèŋ fʉ. Epʉ̀a pie pega pɔ̌ é ke ńgwɔ́ nùɔ lêen ńké ńkíbe pwó yɔ́ɔn, ńtsege wɔ̀ɔn tÿǒsoŋ Ndamas.

¹²Ńkúu wó, atsɔ̌ nyìŋ gwɔ́ wó. Mé tóŋo yé lê Ananias. Á gwɔ́ nyìŋ ńgÿo mekù’ Ssé kwà’ pá’ *lepʉ̌ ségè ne ńzɛ́te. Pà Yuda pie pɔ́ tsẅé tÿǒsoŋ Ndamas tà ḿmaga wɔ́b pɔ́ kíme yé pɔ́ mboŋó.

¹³Ananias tó ńgyá wɔ̀ɔn, ńgɔɔn né mèŋ ngie: Afɛ̌ wɔ̀ɔn Sɔ̂l, gíŋe ńzye légyá jʉ’. N gwóon ńtyé pɔ́ fʉ̀’ó, menÿɔ́g mɔ́ɔn nyɛ́’ɛ tà mèŋ n cwoŋo ńgyá Ananias

¹⁴Á gíŋe ńgɔɔn ngie: E Ssé pàmagʉa njʉ’ pégè léen ntʉ́ njÿó ńtsɔ́’ɔ gú, á lé lɔgɔ gú ńgÿo nyìŋ gẅie à ge zsé mmó gie à la zába légÿo, mbɔɔ légÿo ɔ̀ gyá nyìŋ gẅie aa ndʉŋ ndʉŋ gílé yé, mbɔɔ lé jú’ ngyè wɛ̌ nyìŋ.

¹⁵Ɔ̀ zɔɔn ńtyé pɛ́’ɛ̀, ńgẅiin légʉa jʉ’ ntsèm ndùmo ssé tsetsá’, éshwóŋ pʉ̀a nò gie ɔ̀ zsé ná yé. Á gie ɔ̀ gyǎ, mbɔɔ gie ɔ̀ jǔ’.

¹⁶Ɔ̀ɔ fʉ̀’ɔɔn ńnyé ńzẅí’te kɔ́. Lu ssé ńtó mé lɔg lezíŋ sé ńnu’u gú ntse, ńdɔg sɔg menò tepòŋ mú.

¹⁷M bɔ́ɔnte ḿbiŋe Yerósalem, ńgwɔ́ lyɛ̌’ ńgwɔ́ tsɛ̀ɛ jʉ’e Ssé ne sẅíŋte Ssé, Yěsô tó ńnyɛ mbùm yé mbwo mèŋ.

¹⁸Mèŋ n gyá yé, á gɔɔn né mèŋ ngie: Sẅɛte fó Yerósalem wɔɔn ńgʉa, mélà’mie pʉ̀a pie é tsẅe wó té ge zẅíŋe nò gie ɔ̀ ge shwóŋó wɔ́b é tí wɔ̀ɔn mɔ́.

¹⁹Mèŋ n tsɔ́’ ngie: Cʉ̀apʉ̀a, pɔ́ ne ńzsé mboŋó pá’ mèŋ n dɔ̌ɔn ńgwá ńkʉ́’ʉ tsɛ̀ɛ *mendá cú’tè pà Yuda ńgwoon pʉ̀a pie pɔ́ záb ntʉ́m ná gú, ńnéŋe wɔ́b ndá tsǎŋ, ḿbiŋ ńgÿo mé lɔgɔ mengwɔ̀ɔn ńcúa wɔ́b.

²⁰Mé la gwaa pfɛte metse Etien gẅie à la ne shwóŋó pʉ̀a nò gie à zsé ná gú, n gwɔ́ yɔ́ɔn ssé. Pega pʉ̀a pie pɔ́ la zẅé yé laa tà’ ncwò; tà pɔ́ gwɔ témte yé lê metóon ézẅé, mèŋ n ne ḿbyɛ́bɛ menzsǒ mɔ́b.

²¹Cʉ̀apʉ̀a lêen ńké ńgɔɔn né mèŋ ngie: Lwo, mèŋ n túmo gú pá’ɔɔn ngʉ̀a shʉ̀shʉ̀a, á tsetsɛ̀ɛ pʉ̀a ntí ntí pie é té pà Yuda wɔ́.

²²Pà Yuda pie pɔ́ la zẅí’te nò gie Pɔl ne ńgɔɔn, tà ńjú’ á gɔɔn pá’ à gɔ̌ɔn lɔɔn, la lêen ńkwé’e ngyè yɔ́b, ńnáa tÿǒ ńgɔɔn ngie: Mé véle shÿó ntí nyìŋ wɛ̂ ndùmo ssé tsetsá’. À tè gẅie à lɔɔn ńgwɔ́ mé nyé yé á gíŋe ńgwɔ́ wó wɔ́,

²³ńgÿo pɛ́’ɛ̀, ńne ńdíte ngwòŋ, ńne ńcʉ’te menzsǒ mɔ́b, ńŋwaa pfepfɔ́b ḿma’a tÿǒ.

²⁴Tándá metándá ncù pà *Roma, lêen ńké ńtsẅi ngie pàlÿɔ́’ ncù lɔgɔ yé ḿbiŋe mbʉ̀a pɔ́b, ńdɔg ngwɔ̀ɔn ńnyɛte ńcúa yé, ńtsóte yé à gɔɔn mmó gie alá’ kwʉŋe yé mǒ.

²⁵Mé zye lékwɛ́ɛ Pɔl pá’ mé gee ńcúa yé. Á gɔɔn mbwo tándá ncù gẅie aa jʉ’ó ngie: Mé ge líe líe pi cúa mûɔ lá’ pà *Roma té mé zɔɔn fó ńŋaga yé wɔ? À wɔ̌ tsẅi pú’u?

²⁶Á jú’ ḿvege, ńkÿote ńgʉa ńgyá tándá wɔ́b, ńgɔɔn né yé ngie: Ɔ̀ ge gÿo lêkɔ́? Ambàŋa wa aa mûɔ lá’ pà *Roma.

²⁷Tándá wɔ́b jú’ yé, ńtó tà ńkúu lejʉ́ŋ Pɔl, ńzɛ́te ngie: Shwóŋo wɔ̀ɔn, mé gɔ̌ɔn ngie ɔ́ɔ mûɔ lá’ pà *Roma lá? Pɔl tsɔ́’ ngie: Oon.

²⁸Tándá metándá ncù gɔɔn né yé ngie: Mèŋ, mé la lá’ ńgwɔ zẅíŋ ngie mèŋ n cʉ’ʉ́ mûɔ lá’ pà *Roma, ńcʉŋ nkáb mǒ tà e tè kɔ́g. Tá Pɔl tsɔ́’ yé mbwo yé ngie: Ɛɛ! Á gʉa ná mèŋ, mbà mé la zyé wɔ̀ɔn n gwɔ́ pɔ́ mûɔ lá’ pà *Roma.

²⁹Epʉ̀a pie pɔ́ kě ńtyé lécúa Pɔl, á lélɔg ńgÿo á gɔɔn nò, fó lejʉ́ŋ yé ńkÿo. Tándá metándá ncù zsé ngie à ně fʉa légÿo mé kwɛ́ɛ mûɔ lá’ pà *Roma lê metsɛ̂n, ńtyé ńcʉ́’ʉ ḿbɔ́gɔ pɔ̌g.

³⁰Njÿó gÿo ńdʉ́a, Tándá metándá ncù fa’a lékwa’ ńnyɛte ńzsé mmó gie pà Yuda ka gwaa sẅiŋe Pɔl, ésẅiŋe ńtí yɛ̌, ńtsẅi mé kyɛ́’ metsɛ̂n ná yé, ńgíŋe ńtsẅi mé tóŋ mentándá pànuŋe pwɔ́’ lâ petsɔ́ pàŋag ntsaŋ pà Yuda, ńdeen ńké ńgÿo mé lɔgɔ Pɔl ńcwóŋ ńtó ńtÿɔ́gɔ yé mvfò pɔ́b.