Read Ngiemboon Megàŋ ntúm 23 Bible Online

Megàŋ ntúm 23 - Ngiemboon bible

Megàŋ ntúm 23

¹Pɔl nyɛte ńtÿɔ́g menÿɔ́g mé ná pàŋag ntsaŋ ńgɔɔn ngie: Mefɛ́ pɔ́ɔn, mèŋ n gee ńzɔ́gɔ ńgwɔ́ pɔ́ mvfò Ssé tà ńkú lyɛ̌’ɔɔn. Atsɔ́ mmó té tsɛ̀ɛ ntʉ́m mèŋ ne ńgege wɔ̀ɔn mɔ́,

²ńgɔɔn pú’u, Ananias, tándá pànuŋe pwɔ́’ tsẅii mbwo pʉ̀a pie ée lejʉ́ŋ Pɔl ngie pɔ́ cúa yé ncwò yé.

³Pɔl lêen ńké ńgɔɔn né yé ngie: E Ssé ge cúa pɔ́ gú mè ngàŋ mepàb. Ɔ̀ wɛ̂ ńnéŋe ssé ne ńdɔgɔ *lepʉ̌ ńŋaga wɔ̀ɔn. Ɔ̀ pǐŋ ńtsẅi ngie mé cúa wɔ̀ɔn. Á ké tè mmó gie *lepʉ̌ ne ńzɛ́te wɔ́.

⁴Epʉ̀a pie pɔ́ tyé lejʉ́ŋ Pɔl gɔɔn né yé ngie: Ɔ̀ zoonte tándá pànuŋe pwɔ́’ gẅie Ssé la záb la?

⁵Pɔl tsɔ́’ ngie: Mefɛ́ pɔ́ɔn, mèŋ n zɔ̌ɔn kaa zsé ngie wɛ̂ aa tándá pànuŋe pwɔ́’ wɔ́. Ŋwà’ne Ssé zɔɔn ńgɔɔn ngie tè lá’ shwóŋe té pòŋ ná fùɔ lá’ gẅi.

⁶Pɔl ne ńzsé ngie áa tsetsɛ̀ɛ pʉ̀a pie pɔ́ né ńŋaga ntsaŋ yé, petsɔ́ pʉ̀a gwɔ́ pà *sadukay, petsɔ́ gwɔ́ pà *farisay, ńdeen ńké ńtyé mvfò pɔ́b ńdɔg ngyè tetʉ̀ ńgɔɔn ngie: Mefɛ́ pɔ́ɔn, mèŋ n gee nyìŋ *farisay. Mbà tá wɔ̀ɔn laa nyìŋ *farisay. Mèŋ n ne ḿbyɛ́bɛ lyɛ̌’ gie mepfó ge lá’ zíme nà legwé. Mé ée jʉ’ɔɔn ńŋaga wɔ̀ɔn pá’ɔɔn ńtí pɔ́ yɛ̌ nò.

⁷Pɔl ka’a twó ńnyé té cʉ́me. Pà *farisay lâ pà *sadukay zye lézoŋ. Acú’tè gab nzsè pʉ́a.

⁸Á zɔɔn ńgwaa gwɔ́, pà *farisay gɔɔn ngie mepfó ge lá’ zím, ńgie *mecÿɔ́’ Ssé mbɔɔ *messé tepòŋ ée wɔ́, tá ńgʉa ná pà *sadukay pɔ́ té zẅíŋ yɔ́b pú’u wɔ́.

⁹Pʉ̀a metsèm zye léshwóŋó shwǒŋ. Petsɔ́ pà kyágte *lepʉ̌ Mǒsê nà nùɔ pà *farisay lu ssé ńgɔɔn nê metʉ̀ ngie: Peg kaa gyá nò tepòŋ gie nyìŋ wɛ̂ gÿǒ wɔ́. Ndyɛ̀’ tsɔ́, mbà tsɔ̌ Zẅìge kà pɔ́ tsɔ̌ *cÿɔ́’ Ssé wɔ́ zɔ gɔ̌ɔn nò mbwo yé.

¹⁰Mé pú ńga’a lézoŋ. Tándá metándá ncù pà *Roma gyá ḿbɔ́g, ńgie pɔ́ ge tsyete Pɔl mekèm mekèm, ńdeen ńké ńtsẅi né pàlÿɔ́’ ncù ngie pɔ́ lwo sẅɛ́’, ńgÿo mé lɔgɔ Pɔl fó jʉ’ gie mé sá’a ntsaŋ wó ńkẅɛ, ńgie pɔ́ lɔgɔ yé ńgʉa lê mbʉ̀a pɔ́b.

¹¹Á gÿo ńgwɔ́ letsẅɛ́’, Cʉ̀apʉ̀a tó ńgɔɔn né Pɔl ngie: Kag pɔ́ tʉ̀. Ɔ̀ ka gɔɔn nyìŋ gẅie mèŋ n gee wɛ̌ Yerósalem wɔɔn. Á gíŋe ne ńzɛ́te ngie ɔ̀ gìŋ ńgɔɔn nyìŋ gẅie mèŋ n gee wɛ̌ á tÿǒsoŋo *Roma.

¹²Njÿó gÿo ńdʉ́a, etsɔ́ pà Yuda tÿɔ́g ntsèm, ńtyé mvfò Ssé ńkʉa ngie: Pɔ́ té jÿó mmó wɔ́, é ké le ntse nú. Tà lá’ zẅé Pɔl!

¹³Pʉ̀a pie é la kʉa pá’ɔɔn la tɔ́g pʉ̀a móm lekùa.

¹⁴Pɔ́ gʉa ńgyá metándá pànuŋe pwɔ́’ pâ mekěm ńgɔɔn né pɔ́b ngie: Peg ně ńtyé mvfò Ssé ńkʉa ngie peg tě ge jÿó mmó té gwɔ́ gie peg zẅě Pɔl wɔ́.

¹⁵Áa nà fʉ̀’ɔɔn pá’ɔɔn ne ńzɛ́te ngie; pia petsɔ́ pàŋag ntsaŋ túm mé gʉa mbʉ̀a Tándá metándá ncù, ńzɛ́te yé ngie à gÿo mé lɔgɔ Pɔl ńtóo mvfò pi, ńgie mé tó shwóŋó yé ngie pi ne fa’a lényɛte ńdíe nò ná ntsaŋ nyìŋ ŋwɛ́ kwà’ mboŋó, ńgʉa ná peg, mbà peg tyé lézẅé yé tà á le tó tà ńkúu jʉ’ɔɔn wɔ́.

¹⁶Pɔ́ gwaa gɔɔn pú’u, tsɔ̌ mûɔ mbàŋa, ńgwɔ́ míŋ fɛ́ Pɔl we manzwě, ne ńjú’u pá’ pɔ́ lʉ̌’ lejÿɔ’, ńdu ssé ńgʉa mbʉ̀a pàlÿɔ́’ ncù, ńkúu ndá ńtʉ́ njÿó shwóŋó Pɔl.

¹⁷Pɔl tóŋo tsɔ̌ tà’ tándá ncù, ńgɔɔn né yé ngie: Lɔgɔ mûɔ shùm wɔɔn, ńgʉa ńtsege yé mbʉ̀a tándá gẅì. À gẅiin nò gie à gee shwǒŋ yé.

¹⁸Á lɔgɔ yé ńgʉa ńtsege mbʉ̀a tándá wɔ́b, ńgɔɔn ngie: Pɔl, ngàŋa tsǎŋ, à toŋó wɔ̀ɔn, ńcʉ́me ngie mèŋ n dɔgɔ wɔɔn mûɔ shùm ńtó, ńtsege yé mbwo gù, ńgie à gẅiin nò gie à gee shwǒŋ gù.

¹⁹Tándá metándá ncù kíbe pwó mûɔ shùm pɔ́ yé gʉa nzèm. Á zɛ́te yé ngie: Ɔ̀ gẅiin kɔ́ gie ɔ̀ gee shwǒŋ mèŋ?

²⁰Á tsɔ́’ ngie: Pà Yuda é kwɛ̌ ngie, njÿó ge lʉ́a, pɔ́ tó ńzɛ́te gú ngie ɔ̀ gÿo mé lɔgɔ Pɔl ńtóo mvfò pàsá’ ntsaŋ, é lɔg pú’u, epaba gú ngie pɔ́ fa’a lényɛte ńdíe nò ńnáa nà ye ntsaŋ kwà’ mboŋó.

²¹Tá’ pɔ́ lɔɔn ńtó ńgɔɔn ɔ̀ pɔ́ɔn lézẅíŋ, mélà’mie pʉ̀a tà ńtɔ́g móm lekùa ge lʉ’ lejÿɔ’ lélɔg ńgwoon Pɔl. Pɔ́ ně ńgɔɔn tà ńkʉa ngie, pɔ́ lɔɔn nyé té zẅé Pɔl, pɔ́ le mmó zẅí’, é ké le ntse nú. Pɔ́ ée nà fʉ̀’ɔɔn, mbà pɔ́ nyɛté mbùm yɔ́b ne ńzẅí’te pɔ́ ngie ɔ̀ zẅíŋ.

²²Tándá metándá ncù jú’ pú’u, ńgɔɔn né mûɔ shùm ngie: Tè gíŋe shwóŋó tsɔ̌ nyìŋ ndyɛ̀’ɛ nò gie ɔ̀ lu ssé léshwóŋó wɔ̀ɔn mɛ, ńdeen ńké ńtsẅi á gʉa.

²³MÀbiŋ ńgʉa nà metándá ncù pé, ńtsɔ́’ pe mépʉ́a, ńtsẅi né pɔ́b ngie pɔ́ nyɛte pàlÿɔ́’ ncù nkÿo pʉ́a, ńgÿo pàkwɔ́’ melÿoon móm sɔɔn mbʉ́a, lê pàgẅiin mekwoŋ nkÿo pʉ́a. Pɔ́ tyé pá’ nèm lepfwɔ’ɔ́ letsẅɛ́’ ge lêen gwaa ku’ pɔ́ lu ssé ńgʉa nê Sezare.

²⁴Pi gíŋe ńnyɛte metsɔ́ melÿoon pie Pɔl ge kwɔ́’ɔ ndùmó é lɔg giŋ, ḿbiŋ ńgʉa ńtsege yé mvfò ngúmnɔ́ɔn Felese tà nkǐb le yé kʉa.

²⁵Á gɔɔn pú’u, ńŋwe’e ŋwà’ne ńnáa mbwo ngúmnɔ́ɔn Felese, ńgɔɔn tsoló ngie:

²⁶Àa mèŋ Kɔlɔde Lisias. Mèŋ n ŋwe’e yɔɔn ŋwà’ne ńnáa mbwo gù ngúmnɔ́ɔn Felese. Màkwáŋ weg, n tsyɛ’té.

²⁷Áa pá’ɔɔn, mbà pà Yuda ka gwoon nyìŋ gẅie mèŋ n túmo yé ńnáa mbwo gù lɛ, ńne fa’a lézẅé yé. Mèŋ n jú’ mé gɔɔn ngie aa mûɔ lá’ pà *Roma, n deen ńké ńdɔg pàlÿɔ́’ ncù pɔ́ɔn ńtó ńkẅé yé mbwo pɔ́b.

²⁸Mèŋ m biŋ ne fa’a lécÿó nnɛ́ ńzsé mmó gie pɔ́ kẅé mbwo yé, ńdɔgɔ yé ńgʉa mvfò pàŋag ntsaŋ pɔ́b.

²⁹Tá ńdeen ńké ńgyá ngie pɔ́ sẅiŋe yé pɔ́ nà tsɔ́ mejʉ’ nà mbʉ̌ mɔ́b mie pâ pɔ̌ té shwóŋe ńjú’e mǒ wɔ́. Mèŋ m biŋ ńké té gyá tsɔ́ mmó gie ńgwɔ́ mé cʉa mmó ńzẅé yé kà ńnéŋe yé pɔ́ tsǎŋ wɔ́.

³⁰Mé tǒ shwóŋó wɔ̀ɔn ngie pà Yuda ne fa’a lézẅé nyìŋ ŋwɛ́. Áa mmó gie á gÿǒ, n gwǒon ńtúmo yé ńnáa mbwo gù té láte. N zɛté mbwo pʉ̀a pie pɔ́ sẅiŋé yé ngie pɔ́ gʉa sẅiŋ ntsaŋ pɔ́ kwà’ mbwo gù. [Mèŋ n cʉmé ŋwà’ne jʉ’ɔɔn, à cʉ́’ʉ wɔ́gɔ́]

³¹Pàlÿɔ́’ ncù gÿo mmó gie tándá wɔ́b tsẅǐ né pɔ́b, ńdá’a lá’ ńdɔgɔ Pɔl ńgʉa tà ńkúu Antipatelis.

³²Njÿó gÿo ńdʉ́a, petsɔ́ pàlÿɔ́’ ncù nyé Pɔl mbwo pʉ̀a pie é gẅiin melÿoon. Pɔ́ gwɔ́ lɔgɔ yé gʉa, pɔ́ piŋ nzèm lê membʉ̀a mɔ́b.

³³Pàkwɔ́’ melÿoon lɔgɔ yé ńgʉa tà ńkúu Sezare, ńnáa ŋwà’ne mbwo ngúmnɔ́ɔn, ńgíŋe nyé Pɔl mbwo yé.

³⁴Ngúmnɔ́ɔn tóŋo ŋwà’ne, ńzɛ́te Pɔl ngie: Ɔ̀ fóo nà yɛ̌ pàga ngwòŋ? Pɔl tsɔ́’ ngie: Mèŋ fóo ná pàga ngwòŋ Silisia.

³⁵Ngúmnɔ́ɔn gɔɔn mbwo yé ngie: Mèŋ n ge zẅí’te tà pʉ̀a pie pɔ́ sẅiŋé gù tó tá mèŋ n zɛ́te gú nò, ńgɔɔn pú’u, ńtsẅi ngie mé gʉa ńde’e Pɔl á nɔ’ fùɔ *Herôd.