Read Ngiemboon Megàŋ ntúm 24 Bible Online

Megàŋ ntúm 24 - Ngiemboon bible

Megàŋ ntúm 24

¹É tɔ́g lyɛ̌’ tʉ̀a, Ananias, tándá pànuŋe pwɔ́’, cwóŋ nê Sezare. Pâ tsɔ́ mekěm lá’, ńgÿo Tertulus, á gwɔ́ ntàg nzèm wɔ́b jʉ’e ntsaŋ. Pɔ́ tóo wó ésẅiŋe Pɔl mvfò ngúmnɔ́ɔn Felese.

²Mé gÿo Pɔl tó, Tertulus zye légɔɔn nò twó yé ngie: ANdè, peg ee lá’ɔɔn fʉ̀’ɔɔn ńgwaa ńnéŋe kwà’ tsɛ̀ɛ mbʉ́lè, ńzẅɛ́’ɛ gú nà menò mie ɔ̀ ka lɔgɔ zsè nò jú ńzáb ngie mé kúbe tsɛ̀ɛ lá’a yég.

³Peg ne ńgwaa jÿó pì mɛ̌ menò, á jʉ’ ntsèm, éfʉ̀’ ntsèm ḿbú ne sie gú tà ńgɔɔn shwóŋó nò.

⁴Tá’, n te ne ńkwoŋo létyé mvfò Ndè séen ńtseŋe nà shwóŋè tseŋe wɔ́. Á cʉa pú’u, tá mèŋ n ne sẅíŋte ngie Ndè lɔgɔ pòŋo ntʉ́m ńzẅí’te nò gie mèŋ n ge ná’a píte shwóŋó yé.

⁵Peg ka gyǎ nyìŋ wɔɔn á gwɔ́ nyìŋ gẅie à lɔɔn ńgwɔ́ mé pɔ́gɔ yé tɛ’. À ne ḿma’a tág tsetsɛ̀ɛ pà Yuda metsèm, á jʉ’ ntsèm ndùmo ssé tsetsá’. Àa pɛ́’ɛ̀ ńgwɔ́ tándá tsɔ́ pàfag nnɛ́ pie mé tóŋo lê pà Nazaréen.

⁶Á ka zɔɔn ńcʉ́’ʉ mejʉ’ à zába tsɔ́ nò. À kɔ̌ɔn ge ńnéŋe *lɔ̌’ nà jʉ’e Ssé tá peg lêen ńké ńgwoon yé. [Peg ka ne fá’a lélɔg kwà’ *lepʉ̌ lá’ seg ńŋaga yé.

⁷Tá Lisias, tándá metándá ncù tó ńdɔg metʉ̀ sa’a yé mbwo peg,

⁸ḿbiŋ ńtsẅi ngie pʉ̀a pie é sẅiŋe yé pɔ́ lɔg ntsaŋ ńtó pɔ́ mvfò gú]. Zɛ́te nyìŋ wɛ nò, tà ɔ̀ lɔɔn séen tè gyá ngie menò mie peg sẅiŋe yé mǒ ée jʉ’ó ńgwɔ́ nénʉ́ wɔ́.

⁹Á gɔɔn pá’ɔɔn Pà Yuda tóonte nò yé ngie: Oon à shwóŋó nò.

¹⁰Ngúmnɔ́ɔn Felese lɔgɔ tsɔ́ liŋé ńtsẅi ngie Pɔl gɔɔn nò. Pɔl gɔɔn ngie: Ée fʉ̀’ɔɔn ńgwɔ́ mengù’ tà ńgyɔ́ɔn pá’ ɔ̀ ne sá’a lá’ yɔɔn. Á cʉa pú’u, tá ńgwɔ́ gie mèŋ n dɔɔn ńtyé mvfò gù ne ńgee ńzoŋo twó yɔ́ɔn, n de pɔ́g.

¹¹Anò gie n gee ngɔ̌ɔn, ɔ̀ ku’u léfa’ jú lê twó mbùm ɔ̀ ńgyá kà aa nénʉ́ wɔ́, ée lyɛ̌’ɔɔn pá’ɔɔn ńdɔgɔ ńgwɔ́ ndà’ lyɛ̌’ ntsɔ̀b pʉ́a nê legém pá’ mèŋ n ka gʉa Yerósalem légu’te Ssé.

¹²Mèŋ n ka tè kúu wó mé gyá peg tsɔ̌ nyìŋ tyé ne ńzoŋo tsɔ́ nò wɔ́. Mé ké tè gyá n ne sẅite lá’ gwɔ́, kà pɔ́ tsɛ̀ɛ jʉ’e Ssé wɔ́, kà pɔ́ tsɛ̀ɛ *mendá cú’tè pà Yuda wɔ́, kà pɔ́ tsɛ̀ɛ tÿǒsoŋ wó wɔ́.

¹³Menò mɛ mie pʉ̀a tÿɔ́gɔ twó mèŋ lɛ, mé lɔɔn ngie megàŋ píte pɔ́ le zsé lépíte wɔ́.

¹⁴Tá’, anò gie n ge tyé mvfò gù, éshʉ̀ashʉ̀a zẅíŋ á gwɔ́ ngie: Mèŋ fa’a mbwo Ssé pàmangʉa njʉ’ pega pɔ̌. N ne ńgiŋe pɔ́ ná mánzsè gẅie pɔ́ lʉ’ʉ ngie aa we pʉ̀a pie pɔ́ fǎg nnɛ́, tà mbɔɔ pá’ mèŋ n ne ńzẅíŋe kɔ̀ɔkɔ́ɔ gie mé la ŋwe’e tsɛ̀ɛ ŋwà’ne *lepʉ̌ Mǒsê mbɔɔ tsɛ̀ɛ meŋwà’ne pà *ntsẅì nkʉ̀ Ssé.

¹⁵Á cʉa pú’u, atsɔ́ mmó gwɔ́ wó gie mèŋ n ne ńzẅí’te. Tà mbɔɔ pʉ̀a pie pɔ́ sẅiŋé wɔ̀ɔn mɛ gíŋe ne ńzẅí’te yɔ́b pɔ́ yɛ̌. Á gwɔ́ ngie e Ssé ge lá’ zím mepfó, é zím pʉ̀a pie pɔ́ la gÿo pá’ à ne ńkwoŋo, tà mbɔɔ pʉ̀a pie é la tè gÿo pú’u wɔ́.

¹⁶Áa mmó gie á gÿo tá mèŋ n ne ńkaga tʉ̀ légiŋ ndʉŋ ndʉŋ á mvfò Ssé, mbɔɔ mvfò pʉ̀a mesoŋ.

¹⁷N ka ńnéŋe túm tɛ’. N kaa pá’ɔɔn, mbà mèŋ m biŋé Yerósalem pɔ́ léná nkáb ńdɔg ńkẅéte lá’a yég, mbɔɔ lénáa mmó lélɔg ńgu’te Ssé.

¹⁸N ka léen ńké ńgwɔ́ tsɛ̀ɛ jʉ’e Ssé, tá pɔ́ tóo wó ńgyá wɔ̀ɔn, ńgwaa wɔ́, mbà mèŋ n kě fóo légÿo mmó gie mèŋ n dɔgɔ sɔgɔ pʉ̀ ná mèŋ. Alá’ ka tè wó wɔ́. Atsɔ́ tág piŋ ńké tè kẅɛ.

¹⁹Á ka gwaa gwɔ́ etsɔ́ ntá’ pà Yuda pie pɔ́ fóo ná pàga ngwòŋ Azia gwɔ́ yɔ́b jʉ’ó. Tà á kaa pé’è ńgwɔ́ gie mèŋ n ka fʉa tsɔ́ nò, mbà pɛ̌ pʉ̀a ŋwɛ́ zɔ kɔ’ɔ́ gwɔ́ jʉ’ɔɔn lésẅiŋe wɔ̀ɔn mbwo gù.

²⁰Kà à lɔɔn ńgwɔ́ pʉ̀a pɔɔn pie ée jʉ’ɔɔn lɔɔn, gɔɔn mmó gie mé ka lɔgɔ wɔ̀ɔn ńgʉa mvfò pàsá’a lá’ pà Yuda pé’è, pàsá’a lá’ ŋwɛ́ gyá ngie mèŋ fʉ̌a wɔ́?

²¹Tà’a nò aa wó ńgwɔ́ gẅie n da tyé mvfò pɔ́b, ńkwé’e ngyè yɔɔn tÿǒ ńgɔɔn á gwɔ́ pá’ n da gɔɔn ngie, mé lɔ́ɔn sẅiŋe wɔ̀ɔn mvfò pɔ́b lyɛ̌’ó ńtí nue mèŋ n zẅǐŋ ngie e Ssé ge lá’ zím mepfó.

²²Pá’ á la gwaa gwɔ́ Felese cwoŋo ne ńzsé nò ná mánzsè Yěsô la, á tsɔ́’ɔ lyɛ’ɛ́ ntsaŋ, ńgɔɔn né pà Yuda ngie: Lisias, tándá metándá ncù ge taa tó tá mèŋ n ŋag ntsaŋ gi,

²³ńgɔɔn pú’u, ḿbiŋ ńtsẅii mbwo tándá ncù ngie à lɔ́gɔ Pɔl ńgʉa ńde’e yé ndá tsǎŋ. Tè ke ńkwɛ́ɛ yé. Tè ke ńtɔ’ meshǔ pé létó ńkẅéte yé.

²⁴É cʉa lyɛ̌’ shÿɔ́’ɔ tsɔ́ wɔ́, angúmnɔ́ɔn Felese pɔ́ zwě we Ndelẅisile gẅie aa mûɔ Yuda tó. Ngúmnɔ́ɔn tsẅi mé gʉa fa’a Pɔl né yé. Pá’ à ge zẅí’te nò gie Pɔl ge shwóŋó yé nà lézáb ntʉ́m ná Yěsô Kristo.

²⁵Pɔl tó tà ńzye lékyagte ntí gie nyìŋ lɔɔn ńdɔg ńnéŋe, mbà ngàŋ ge gwɔ́ nyìŋ gẅie à gÿo mmó gie á poŋo mbwo Ssé, ńne ńkyagte mbɔɔ pá’ à lɔɔn ńgwɔ́ nyìŋ kú’te mbùm ye pú’u, ńne ńkyagte shwóŋó yé ngie Ssé ge gÿo ŋag pʉ̀a metsèm. Ngúmnɔ́ɔn Felese jú’ pú’u, ńcʉ́’ʉ ńcÿɔ’ɔ cÿɔ’, ńgɔɔn né Pɔl ngie: Á nà fʉ̀’ɔɔn, fó lejʉ́ŋ mèŋ ńgʉa. Afʉ̀’ gÿo ńgíŋe ńku’, tá mèŋ n gíŋe ńtsẅi mé tóŋo gú ńné mèŋ.

²⁶Á gwaa gwɔ́ pú’u, ngúmnɔ́ɔn Felese gíŋe ne ńtsɔɔn ngie Pɔl ná nkáb lé yé. Áa mmó gie á gÿo á ńnéŋe ńgwá ńtsẅii mé gÿo Pɔl tóo pɔ́ yé shwóŋó,

²⁷ńgwá ńgÿo pɔ́ pú’u, tà é gwaa gwɔ́ ngù’ pʉ́a, mé lɔgɔ ngúmnɔ́ɔn Porsius Festus ńkúbe Felese. Pá’ Felese la ne ńkwoŋo légÿo mmó gie á ge poŋ pà Yuda la, à nyé Pɔl pɔ́ ndá tsǎŋ.