Read Ngiemboon Megàŋ ntúm 26 Bible Online

Megàŋ ntúm 26 - Ngiemboon bible

Megàŋ ntúm 26

¹Fùɔ Agrippa gɔɔn mbwo Pɔl ngie: Mèŋ n nǎ shwóŋè mbwo gù pá’ ɔ̀ ge píte ncwò gú nà menò mie mé sẅiŋe gú mǒ n jú’. Pɔl ma’ mbwó, ńzye lépíte ncwò wé, ńgɔɔn ngie:

²Nɔ́ɔn temà’, mèŋ n gee lyɛ̌’ɔɔn ḿbú ne ńkága tɛ’ létyé mvfò fùɔ ḿbíte ncwò wɔ̀ɔn nà menò mie pà Yuda zàba twó mèŋ,

³ńkága tɛ’, mélà’mie kwà’ nkwɔbɔ́ yé máŋwɛ́ ne ńzsé mà lá’ gwɔb, ńgíŋe ne ńnyɛte ńzsé menò mie pɔ́ zoŋo. Áa pú’u, tá mèŋ n ne sẅíŋte nkwɔbɔ́ ngie à shÿɔg, ńcwoŋo ńju’u nò gie mèŋ n gee ngɔ̌ɔn.

⁴Pà Yuda metsèm pú ne ńzsé pá’ mèŋ n gee ńnéŋe pú’u, tá fó pá’ n da lu ssé. Pɔ́ ée ssé ne ńzsé pá’ méŋ n dɔ̌ɔn ńnéŋe pú’u, tsɛ̀ɛ lá’a yégè mbɔɔ tsɛ̀ɛ tÿǒsoŋ Yerósalem.

⁵Mèŋ, n dɔ̌ɔn ńnéŋe ná ntí gie nyìŋ ná nùɔ pà *farisay neŋé pú’u, é piŋ ńgwɔ́ pʉ̀a ńcʉŋe nà *lepʉ̌ nò Ssé yég tɛ’. Pà Yuda lɔɔn ńkwoŋ, pɔ́ shwóŋó nkwɔbɔ́ ngie, anò gie mèŋ n gɔɔn lɔɔn, áa nò nénʉ́. Pɔ́ zɔɔn ḿbú ńzsé wɔ̀ɔn tà fó tàa lyɛ̌’.

⁶Afʉ̀’ɔɔn, ammó gie mé ŋaga wɔ̀ɔn mǒ à yɔɔn: Ńgwɔ́ Ńgie e Ssé la ka’a nò á mbwo pàmangʉa njʉ’ pégè, m biŋ ne ńzẅí’te pá’ á ge gÿo pumte.

⁷Mengẅɛ̀ ndá mégè ntsɔ̀b pʉ́a nê legém pú ne ńzẅí’te yɔ́b pɔ́ lyɛ̌’ gie Ssé ge gÿo yɛ̌ nò pumte. Tà ńgwɔ́ fʉ̀’e zsǒ mbɔɔ letsẅɛ́’, ńne sẅíŋte Ssé, ńké ńzẅí’te pɔ́ yɛ̌. Ankwɔbɔ́, pà Yuda sẅiŋe wɔ̀ɔn pá’ɔɔn ńtí pɔ́ nue mèŋ n ne ńzẅí’te yɛ̌ mmó.

⁸Pi pie pi ne ńzẅí’te nò gie mèŋ n gɔɔn lɔɔn, pi lʉ’ʉ lézẅíŋ ngie e Ssé lɔɔn ńgwɔ́ á zím pʉ̀a ná legwé mélà’a kɔ́?

⁹Mbɔɔ mèŋ yɔ́ɔn, n ka ne ńkwaŋa ngie, n ge lɔg ncù lÿɔ́’ lezíŋ Yěsô mûɔ Nǎzarɛd, á nà meshÿó ntsèm.

¹⁰Áa mmó gie n da gÿo tÿǒsoŋo Yerósalem. N da gwoon pʉ̀a pé tà é gyɔ́ɔn gyɔ̌ɔn, ḿmá’a ndá tsǎŋ, ńzɔɔn ńgwaa gÿo pú’u, metándá pànuŋe pwɔ́’ zɔ túmo wɔ̀ɔn. Mé gwɔ́ tà ne ńgee ńzẅéte pɔ́b mèŋ n záb wɔ̀ɔn ncwò mǒ.

¹¹N da ne ńtɔ́gɔ tsɛ̀ɛ *mendá cú’tè pà Yuda, ńyɛɛ pʉ̀a Yěsô ngɔ́’. Mèŋ n da ne ńtsóte wɔ́b ngie pɔ́ zoonte lezíŋ Yěsô. N da pú ḿbʉa wɔ́b pʉa tà ńgee mbɔɔ tsɛ̀ɛ metÿǒsoŋ lá’a ndyɛ̀’ɛ, éfa’a wɔ́b, ńnyɛɛ wɔ́b ngɔ́’.

¹²N da ne ńgÿo pɔ́ pú’u, tà ńgwɔ́ tsɔ́ lyɛ̌’, ńne ńgee lê Ndamas, ńgẅiin meŋwà’ne mie metándà pànuŋe pwɔ́’ ně ńnáa mbwo mèŋ, ńdɔg ńtúmo wɔ̀ɔn wó.

¹³Nɔ̀ɔn temà’, mèŋ n gwɔ́ mánzsè pú’u, á nà mmó tsɛ̀ɛ zsǒ, ńgyá atsɔ́ mmó fó tÿǒ lepwó, ḿbú ńkyɛ’ jʉ’, ńŋwʉŋe tà ńcʉa lejÿɔ́g nèm, ńkyɛ’ɛ wéga pʉ̀a pie pega pɔ̌ kɔ’ɔ́ ńgwɔ́ mánzsè.

¹⁴Peg pú ńtsɔ́’ɔ ńgwete ssé métsèm. Mèŋ n jú’ ngyè nyìŋ lɔgɔ shwóŋè pà Heber ńgɔɔn né mèŋ ngie: Sɔ̂l, Sɔ̂l, ɔ̀ tsɔ́’ɔ kwò yɔ́ɔn té pòŋ mélà’a kɔ́? Ɔ̀ɔ pɛ́’ɛ̀ ne ńgÿo fʉ̌ŋ jù kẅi’i pá’ nɔ̀ɔn gẅie mé ne ńdɔgɔ twó lekwoŋ ńtsóte yé, á giŋe ḿma’a kwò yé nzèm lá.

¹⁵Mèŋ n gɔɔn ngie: Àa gù wɔ̌ Cʉ̀apʉ̀a? Cʉ̀apʉ̀a tsɔ́’ ngie, n gee Yěsô. Ɔ̀ tsɔ́’ɔ pá’a pɔ́ kwò yɔ́ɔn té pòŋ.

¹⁶Tá’, ké ńdu ssé fʉ̀’ɔɔn ńtyé tyé. Mèŋ n nyɛɛ mbùm yɔɔn mbwo gù pá’ɔɔn, mélà’mie mèŋ n tsɔ’ɔ́ gú lélɔgɔ gú ńgÿo ngàŋa fà’ wɔ̀ɔn. Ɔ̀ gẅiin légÿo mé zsé mmó gie ɔ̀ gyá lyɛ̌’ɔɔn mbɔ́ɔ menò mie mèŋ n ge gÿo tá nyɛɛ gú.

¹⁷Mèŋ n túmo gú mbwo pà Yuda mbɔɔ mbwo petsɔ́ pʉ̀a tsɛ̀ɛ melá’a ndyɛ̀’ɛ. Mèŋ n zɔ ge kábte gú tà pɔ́ légÿo tsɔ́ mmó ná gù wɔ́.

¹⁸Mèŋ n túmo gú pú’u, ɔ̀ gʉa ńnyɛ́’ nÿɔ́g mɔ́b, ńgÿo pɔ́ fó tsɛ̀ɛ nzěm ńkẅɛ, ńkúu nà jʉ’ gie á ne fɔ́gɔ. Á lɔgɔ ńgwɔ́ ngie ɔ̀ ge gÿo gÿo pɔ́ fó nà mbwó Sátà ńkẅɛ, ḿbiŋe nà mbwó Ssé, é záb ntʉ́m wɔ́b ná mèŋ, e Ssé lege menò tepòŋ mɔ́b ńnáa mbwó pɔ́b, é piŋ náa yɔ́b jʉ’ á tsetsɛ̀ɛ pʉ̀a pé.

¹⁹Nɔ̀ɔn temà’ fùɔ Agrippa, á la fó pú’u, n daa tʉʉ twó nà nò gie e Ssé la nyɛ́’ nÿɔ́g mɔ́ɔn n jú’ wɔ́.

²⁰Tà ńcʉ́’ pú’u, mbà mèŋ n da zye ná pʉ̀a Ndamas létsẅii nò yé, ḿbɔ́ɔnte ńkú pʉ̀a pe Yerósalem, éfó wó ńkúu nà pàga ngwòŋ Jẅidea ntsèm, éfó wó ńkúu nà pʉ̀a pie é té pà Yuda wɔ́, ńne ńtsẅii mbwo pʉ̀a metsèm ngie: Pɔ́ kúbe mà wɔb, ḿbiŋe mbwo Ssé, ńne ńgÿo menò mie é lá’te ngie pi kubé mà.

²¹Gyá mmó gie á ka gÿǒ tá pà Yuda gwoon wɔ̀ɔn tsɛ̀ɛ jʉ’e Ssé tà fa’a lézẅé wɔ̀ɔn.

²²Tà mèŋ n nyé wó lyɛ̌’ɔɔn pá’ɔɔn, e Ssé zɔ̌ ne ńkábte wɔ̀ɔn. Mèŋ m biŋ ne shwóŋó kɔ̀ɔkɔ́ɔ wɔ́ gie mèŋ n zsé ná yé, á mbwo melÿò mbɔɔ mbwo pènkʉ́. Mé la tʉ́ njÿó ńgɔɔn menò mie é ge lá’ tá tó tsɛ̀ɛ ŋwà’ne pà *ntsẅì nkʉ̀ Ssé, mbɔɔ tsɛ̀ɛ ŋwà’ne Mǒsê. Mèŋ n kě ne ńgɔɔn pɔ́ yɛ̌.

²³Mé la gɔɔn ngie, *Nzà’nkÿo pù’ ge gÿo tó, é gyá ngɔ́’, ńgie yé zɔ ge gÿo gwɔ́ ndùŋ mvfò nyìŋ lézíme ná legwé, ńgie yé zɔ ge gÿo gɔɔn shwóŋè gie á ge kyɛ’ pà Yuda mbɔɔ pʉ̀a pie pɔ́ té pà Yuda wɔ́, pɔ́ tsẅɛ́.

²⁴Pɔl ne ḿbíte ncwò wé pú’u, ngúmnɔ́ɔn Festus kwé’e ngyè ye ńgɔɔn ngie: Pɔl, ɔɔ pʉa. Ɔ̀ léen ḿbú, ńzí’i mmó zí’i tà á cʉŋte twó jú.

²⁵Pɔl tsɔ́’ ngie: A Ndè, mèŋ n tè pʉa wɔ́. Menò mie mèŋ n gɔɔn ée jʉ’ó ńgwɔ́ pú’u. Mbà mèŋ n zɔ̌ɔn ńkwaŋ, tá ńgɔɔn.

²⁶Tà nɔ̀ɔn temà’ Agripa neŋé pɛ́’ɛ̀ ḿbú ne ńzsé pɔ́ ntsèm. Áa mmó gie á gÿo mèŋ n tyé mvfò yé ńgɔɔn nò té pɔ́g, mélà’mie mèŋ n zsé ngie, atsɔ́ nò gie áa mǒ, á ne ḿmoŋe, á té wó wɔ́. Á zɔɔn ńgwaa gwɔ́, mbà mɛ̌ menò kà tè cʉate pɔ́ jʉ’e lelyěen wɔ́.

²⁷Nɔ̀ɔn temà’ fùɔ Agrippa, tà ɔ̀ zǎb ntʉ́m gú nà menò mie pà *ntsẅì nkʉ̀ Ssé la ŋwe’e? N zsé ngie à lɔɔn ńgwɔ́ nɔ̀ɔn temà’ le nyé té záb ntʉ́m wé mǒ wɔ́.

²⁸Fùɔ Agrippa tsɔ́’ɔ mbwo Pɔl ngie: Ɔ̀ kwǎŋ ngie ɔ̀ ge ná’a lɔg pɔ́ pɛ́’ɛ̀ é gÿo n cʉ́’ʉ nyìŋ Kristo keen?

²⁹Pɔl tsɔ́’ɔ mbwo yé ngie: Kà mé ge lɔg pɔ́ nò gie á sag sag wɔ́, kà pɔ́ gie á vɔ́g vɔ̌g wɔ́, mbà yɔ́ɔn mmó gie méŋ n ne ńdúɔ mbwo Ssé á gwɔ́ pɔ́ ngie: Nɔ̀ɔn temà’ tà mbɔɔ pi métsèm pie pi ne ńjú’u nò gie mèŋ n gɔɔn lyɛ̌’ɔɔn, pi cʉ́’ pá’ mèŋ. Tá metsɛ̂n mɔɔn, é le ná pi wɔ́.

³⁰Fùɔ Agrippa, mbɔɔ ngúmnɔ́ɔn pɔ́ Mbelenis, pâ pʉ̀a pie é kě ńgwɔ́ jʉ’ó lu ssé,

³¹ńgwaa kẅɛ, ńne ńgɔɔn tsetsɛ̀ɛ pɔ́b ngie: Nyìŋ wɔɔn kà tè gÿo tsɔ́ mmó gie à lɔɔn ńgwɔ́ mé cʉa mǒ ńzẅé yé wɔ́. Tà mbɔ́ɔ léńnéŋe yé tsǎŋ.

³²Fùɔ Agrippa gɔɔn né Festus ngie: Nyìŋ wɛ̂ kaa pé’è à tè gɔɔn ngie Kása zɔ ge ŋaga yé wɔ́, mbà mé cʉ́’ ńkyɛɛ yé ńnyé nyé á gʉa.