Read Ngiemboon Megàŋ ntúm 27 Bible Online

Megàŋ ntúm 27 - Ngiemboon bible

Megàŋ ntúm 27

¹Mé gÿo ńgwɔ́ tà ńzáb ngie peg ge kúu máamáa kanù’, é gʉa tsɛ̀ɛ ngwòŋ Italia, ńcʉ́me Pɔl lâ tsɔ́ megàŋa tsǎŋ mbwo tsɔ̌ tándá ncù. Lezíŋ sé gwɔ́ lê Julius. Á gwɔ́ tsɔ̌ tà’ nyìŋ ná kwò pàlÿɔ́’ ncù pie pɔ́ laa pe Kása.

²Peg gwɔ kúu *máamáa kanú’, á gwɔ́ gie á fóo lê tÿǒsoŋo Andelamite, é ge gʉa ngʉ̀ŋe metÿǒsoŋ mie ée nkʉ̀ŋ ntse, á tsɛ̀ɛ pàga ngwòŋ Azia. Peg lâ tsɔ̌ nyìŋ gwɔ́ nùɔ. Lezíŋ sé gwɔ́ lê Alistag. Mbà mé la zyé yé tÿǒsoŋo Tesalonika, á tsɛ̀ɛ ngwòŋ Makedonia, peg cʉ́me mánzsè.

³Njÿó gÿó ńgwaa lʉ́a, peg gwɔ́ Sidoŋ. Julius gẅiin ntʉ́m mbòŋo ná Pɔl tà ńnyé yé ngie à gʉa ńgúɔ meshǔ pé. Pɔ́ kú, ńkẅéte yé.

⁴Peg piŋ fó nà yɛ̌ tÿǒsoŋ tà ne ńgee, fefà fó mvfò mvfò ńtɔ’ɔ wég légʉa ndʉŋ ndʉŋ. Peg lÿɔ́’ɔ fefà ńdɔg ye menkʉ̀ŋ ntse Shʉ̀pele ńgʉa, é gwɔ́ tsɔ́ ngwòŋ, mbà ntse la kéle ńnéŋe soŋ,

⁵ńgiŋ pɔ́ pú’u, ńtɔ́gɔ máa ntse gẅie ée ngʉ̀ŋe ngwòŋ Silisia, ńgíŋe ńtɔ́g gẅie ée ngʉ̀ŋe ngwòŋ Panfilia, ńdeen ńké ńkúu ngʉ̀ŋe tÿǒsoŋo Mira, á tsɛ̀ɛ pàga ngwòŋ Lici, ńtyé,

⁶ńkúu wó pú’u, tándá ncù wɛ̌ gẅie pega pɔ̌ giŋe la, á gyá tsɔ́ *máamáa kanú’ ye ndyɛ̀’ɛ, á fóo tÿǒsoŋo Alekzáŋdeli, ńdɔgɔ shÿó ngwòŋ Italia ńgee. Á gÿo peg kúu tsɛ̀ɛ yɛ̌ ŋwɛ́.

⁷Peg lɔg melyɛ’ɛ́ lá’ tà ńgyɔ́ɔn, ńké ńgiŋe pɔ́ ndɔ́ɔn ndɔ́ɔn. Tà ńgwɔ́ gyá tÿǒsoŋo Snide, mbà peg gyǎ ngɔ́’ tɛ’. Afóm pú ńtɔ’ɔ wég légʉa ndʉŋ ndʉŋ tà ndà’. Peg cʉ́’ ńtéŋe ńdɔg pɔ́ shÿó Crete ńgʉa, é gíŋe ńgwɔ́ tsɔ́ ngwòŋ gẅie ntse la kéle ńnéŋe soŋ. Peg kúu wó, ńná’a ńdÿɔ́’ɔ fóm ńdɔg ye Salmone, ńgʉa. Á gwɔ́ jʉ’e tsetsá’ Kelɛt gie á la sẅige, ńkúu ntse.

⁸Peg gwaa ne giŋe mengʉ̀ŋe ntse Kelɛt, ḿbú ńgyá ngɔ́’ tɛ’, ńgʉa tà ńkúu ná tsɔ́ jʉ’ gie mé tóŋo lé letyé *máamáa kanú’ se mbòŋo, á gwɔ́ shÿó tÿǒsoŋo Lasé.

⁹Peg gwɔ kúu wó pú’u, mbà peg tsẅě mánzsè tɛ’. Tà saŋ lepfwɔ’ɔ́ gẅie pà Yuda ée *ńkwoŋo kwoŋ ńnéŋe nzyè á tɔ́g. Pú’u, ńgwɔ́ gie nyìŋ lɔɔn ńgíŋe ńdɔgɔ *máamáa kanú’ ńgiŋ giŋ, á cʉ́’ʉ fa’a pɔ́ legwé we. Áa mmó gie á la gÿo, Pɔl zá’ njÿó shwóŋ pʉ̀a *máamáa kanú’ ngie:

¹⁰Meshǔ pɔ́ɔn, n ne ńgyá ngie pege lɔɔn ńgíŋe ńgʉa mvfò, mbà aa lenǎ twó. Mbà *máamáa kanú’ pâ shúm metʉ̌a sie ée tsoló ńgwɔ́ é pú ńcʉŋte. Ndyɛ̀’ tsɔ́ pege yégè é le tsẅɛ́.

¹¹Pɔl gɔɔn pú’u, tándá ncù jú’, à tè yé nò pá, ńjú’ pɔ́ nò gie á kẅɛɛ ncwò nyìŋ gẅie à sá’a pʉ̀a pie é fa’a tsɛ̀ɛ *máamáa kanú’ tà mbɔɔ gie ngàŋ *máamáa kanú’ gɔ̌ɔn,

¹²ńzɔɔn ńgwaa gwɔ́, ajʉ’e letyé *memáamáa kanú’ gie mé ée wó á té lìi jʉ’ gie à lɔɔn ńgwɔ́ pʉ̀a tsẅé wó nà fʉ̀’e fóm tà nò poŋo wɔ́b gwɔ́. Á cʉa pú’u, pʉ̀a metsèm pie pɔ́ laa tsɛ̀ɛ *máamáa kanú’ cʉ́’ ńzáb pɔ́ ngie mé fó jʉ’ó ńgʉa, ńne ńkwaŋa ngie á lɔɔn ńná shÿó, pɔ́ gʉa tà ńkúu nà jʉ’e letyé *memáamáa kanú’ gie áa tsɛ̀ɛ ngwòŋ Kelɛt mé tóŋ lê Fénis. Fénis gwɔ́ tÿǒsoŋ gie lezẅé tsetsá’ la tóo jʉ’ó ńkẅɛ, ayetsɔ́ sǎga tÿǒsoŋ gwɔ́ líe gwǒŋo Mbyě nèm ye kwóŋ, yetsɔ́ líe ngwǒŋo Mbyě nèm ye ntsíŋ[18]. Pɔ́ tsɔ́ɔn pú’u, lékúu wó ńdá’ ńnéŋe tà fʉ̀’e fóm tɔ́g.

¹³Epʉ̀a *máamáa kanú’ gyá fefà ná’a fó shÿó ntsíŋ ńzye lécʉ’e, pɔ́ zsé yɔ́b pɔ́ ngie anò gie pɔ́ kwǎŋ á ge giŋ, ńdeen ńkaa *máamáa kanú’ ńdɔg ńgiŋ pɔ́ ngʉ̀ŋe ngwòŋ Kelɛt.

¹⁴Tá’, ńdeen ńtóo légiŋ, atsɔ̌ máamáa fóm gẅie mé tóŋo lê Erakiloŋ fó tsɛ̀ɛ lá’, ńzye lécʉ’e kwà’ lê tʉ̀,

¹⁵ńdɔgɔ *máamáa kanú’ ḿpfó shÿó we ndyɛ̀’ɛ. Peg gyá kékáŋ, ńcʉ́’ ńnyé *máamáa kanú’. Á lɔgɔ wég ńgʉa lê jʉ’ gie fóm kwǒŋ.

¹⁶Á lɔgɔ wég ńgʉa tà ne ḿpfó tsìŋe tsɔ́ mûɔ méngwòŋ gẅie mé tóŋo lê Koda, mbà ntse la kéle ńnéŋe soŋ. Ngwòŋ ŋwɛ́ ná’a ńkʉŋe fóm ná *máamáa kanú’. Peg zẅɛ́’, ńkag tʉ̀ tà ńgwoon kanú’ gie mé lɔgɔ sẅí’i shúm metʉ̌a tsɛ̀ɛ *máamáa kanú’ ńnáa ssé,

¹⁷ńgwɔ́ tà ńkwé’e kanú’ ŋwɛ́ ńzaba tÿǒ *máamáa kanú’, megàŋa fà’ lêen ńdɔg menkÿo ńzéme *máamáa kanú’, ńkwɛ́ mboŋó, ésẅí’i máamáa kème tÿǒ gẅie mé cʉŋe ná *máamáa kanú’, ḿma’a ntse, ḿbɔ́gɔ pá’ à lɔɔn ńgwɔ́ á lɔgɔ wɔ́b ńgʉa gʉa tà shÿɔ́gɔ tsɛ̀ɛ sàŋasáŋa gie á gwá ńcú’te tsɛ̀ɛ ntse á ngʉ̀ŋe ngwòŋ Lybia.

¹⁸Njÿó gÿo ńdʉa, afóm ké ńnyé ńcʉ’e pɔ́ lê tʉ̀. Megàŋa fà’ gyá kékáŋ, ńtsẅɛ́te tsɔ́ shúm metʉ̌a, ḿma’a ntse.

¹⁹Yetsɔ̌ njÿó gÿo ńgíŋ ńdʉ́a, kwà’ pɔ́b zɔ̌ sele ńtsɔ́’ metÿǒ *máamáa kanú’ lâ menzsǒ mǒ, ńgwá’a tsɛ̀ɛ ntse.

²⁰Afóm ke ńcʉ’ pɔ́ pú’u, nà melyɛ̌’ tà ńgyɔ́ɔn. Mé té gíŋe lejÿɔ́g nèm ńgyá wɔ́, ńké tè gíŋe mecÿɔ́’ saŋ ńgyá wɔ́. Á gwɔ gwɔ́ tà peg tè gíŋe ńzsé ngie peg ge tsẅɛ́ wɔ́.

²¹Epʉ̀a ńnéŋe nzyè ná melyɛ̌’ tà ńgyɔ́ɔn. Pɔl lu ssé, ńtyé mvfò mânyìŋ ntsèm ńgɔ́ɔn ngie: Meshǔ pɔ́ɔn, pi kaa pé’è ńjú’ ncwò wɔ̀ɔn, mbà pege ka tè fó Kelɛt ńgʉa jʉ’ wɔ́. Mbà *máamáa kanú’ kà tè cʉŋte, eshúm metʉ̌a piŋ ńké tè kúu pyé wɔ́.

²²Tá’, á ké ńgwɔ́ fʉ’ɔɔn pá’ɔɔn, mèŋ n ne ńzɛ́te gẅi ngie pi shÿɔg. Á nue atsɔ̌ nyìŋ gẅi těen ńge ńkwé wɔ́. Ammó gie á ge pyé gwɔ́ pɔ́ ndà’ *máamáa kanú’

²³Mèŋ, n gɔɔn pá’ɔɔn, mbà á ně ńgwɔ́ letsẅɛ́’ lyɛ̌’ɔɔn, e Ssé gẅie mèŋ n gu’te, túmo tsɔ̌ cÿɔ́’ we mbwo mèŋ mie mèŋ n gee ngàŋa fà’ we,

²⁴Á tó ńgɔɔn né mèŋ ngie: Pɔl, pɔ́ɔn lépɔ́g. Á ne ńzɛ́te ngie mé ŋag ntsaŋ jù mvfò Kása. E Ssé ge lɔg pá’ à gÿo nò mbòŋo ná gù, é nyé pʉ̀a pie pia pɔ̌ giŋe lɛ mbwo gù tà tsɔ̌ tà’ nyìŋ ná pɔ́b á le kwé.

²⁵Meshǔ pɔ́ɔn, pi shÿɔg! Mèŋ n déen ńtém nzèm yɔɔn ńná né Ssé. Anò gie e Ssé ně ńgɔɔn mbwo mèŋ lɔɔn, á ge pumte pú’u.

²⁶Afóm ge kaa wégè pɔ́ pá’ɔɔn tà gʉa ma’a wégè tsɛ̀ɛ tsɔ́ ngwòŋ gẅie ntse la kéle ńnéŋe soŋ.

²⁷Á laa pú’u, mbà fóm cʉ̌’ cʉ’ pàletsẅɛ́’ ntsɔ̀b lekùa nê legém. Afóm ke ńnyé ńkaa wég ńdɔgɔ ńgiŋe pɔ́ tsɛ̀ɛ ntse Mediteranné. Á gÿo ńgwɔ́ tsɛ̀ɛ tsẅɛ́’, pʉ̀a pie pɔ́ fa’a tÿǒ *máamáa kanú’ jú’ á gwɔ́ pá’ fʉ̀’ gie pega pɔ̌ ne ńkúu nà tsɔ́ jʉ’e tsetsá’ la.

²⁸Pɔ́ cʉŋe mmó gie á ne ńzɛɛ ná tà’ shʉ̀a nkÿo, ésẅí’i ḿma’a ssé ntse, ńdɔg fʉ̀’ pá’ ntse cúu ssé pú’u, ńgyá é gwɔ́ mita ntsɔ̀b sɔɔn mbʉ́a lê móm ntá. Pɔ́ gíŋe ńná’a ńzye ńgiŋ, ḿma’, ńgyá á kẅɛɛ mita ntsɔ̀b lefɔ̌ɔn lê móm mbʉ́a.

²⁹Pɔ́ cʉ́’ʉ ḿbɔ́gɔ pɔ̌g ngie à lɔɔn ńgwɔ́, *máamáa kanú’ yég tú memáa metóon, ńdeen ńké sẅí’i shúm sie mé lɔgɔ ńkú’te *máamáa kanú’ tà’a jʉ’, é lekùa, ḿma’a tsɛ̀ɛ ntse á nzèm *máamáa kanú’, ńgwɔ ńnéŋe, ńne ńtsɔ́ɔn ngie njÿó la’a ńdwo ńdʉ́a wɔ́.

³⁰Megàŋa fà’ tsɛ̀ɛ *máamáa kanú’ ne fa’a lékÿo, ésẅí’i kanú’, ńtÿɔ́gɔ tsɛ̀ɛ ntse, éshwóŋ pʉ̀a ngie pɔ́ gee mvfò ḿma’ shúm sie é ge kú’te *máamáa kanú’ á le gíŋe ńgiŋ wɔ́.

³¹Pɔl gyá pú’u, ńgɔɔn mbwo tándá ncù pà *Roma laa mbwo pàlÿɔ́’ ncù ngie: Pʉ̀a pɛ̂ lɔɔn tè ńnéŋe pɔ́ tsɛ̀ɛ *máamáa kanú’ wɔ́, mbà pi tě ge tsẅɛ́ wɔ́.

³²Pàlÿɔ́’ ncù lêen ńké ńtsyete menkÿo mie é kě ńgẅiin kanú’, ńnyé á gʉa ntse.

³³Mé gwɔ́ zẅí’te ngie njÿó lʉ́a, Pɔl néŋ ntʉ́m pʉ̀a metsèm ngie pɔ́ pfɛ́ɛ mémmó, ńgɔɔn né pɔ́b ngie: Ée fʉ̀’ɔɔn ńdɔgɔ ńgwɔ́ lyɛ’ɛ́ lá’ ntsɔ̀b lekùa nê legém pá’ pi ka zye lépyɛ́b ngie jʉ’ poŋ, ḿbiŋ ńké tè ne ḿpfɛ́ɛ sɔɔn mmó wɔ́.

³⁴Áa mmó gie á gÿo tá mèŋ, n gɔɔn ngie pi pfɛ́ɛ mmó. Á nue yɛ zɔ̌ ge gÿo tá mbùm gì tʉte pi tsẅɛ́. Atsɔ́ mmó zɔɔn těen ńgee ngÿǒ pi wɔ́, tà mbɔɔ tà’ nòŋo twó gi těen ńgee mbyě wɔ́.

³⁵Pɔl gɔɔn pú’u, ḿbí mbelég, ńtyé mvfò pʉ̀a metsèm, ńná ndǎg mbwo Ssé, ḿbwɔ́’, ńzye lépfɛ́.

³⁶Epʉ̀a metsèm lêen ńké shÿɔg. Awɔ̌wɔ́ɔ pfɛ́ yé.

³⁷Peg gwɔ́ pú’u, ńgwɔ́ tsɛ̀ɛ *máamáa kanú’, nyìŋ mesoŋ nkÿo pʉ́a lê ntsɔ̀b ntɔgɔ́ lê móm sɔɔn mbʉ́a.

³⁸Pɔ́ gwɔ́ tà ḿpfɛ́ɛ mmó tà ńzẅɛ́, ésẅí’i ngesáŋ ntsíŋ ḿma’a ntse légwɔ́ gie *máamáa kanú’ ge zeŋe.

³⁹Njÿó gwɔ́ tá ńdʉ́a, mé gyá tsetsá’ tá pʉ̀a pie pɔ́ fa’a tsɛ̀ɛ *máamáa kanú’ té zsé jʉ’ gie pɔ́ tyé wó wɔ́. Tá’ ńké ńgyá tsɔ́ jʉ’e ntse gie á sẅige ńkúu nà tsetsá’. Pɔ́ záb ngie á lɔɔn ńná shÿó mé lɔgɔ *máamáa kanú’ ńgee jʉ’o,

⁴⁰ńgɔɔn pú’u, ńdeen ńkyɛ́’te shúm sie é kú’te *máamáa kanú’ tà’a jʉ’, ńnyé tsɛ̀ɛ ntse, ńgíŋe ńkyɛ́’te mbɔ́ɔ menkÿo mie é cʉŋe nà mmó gie mé lɔgɔ ńnyɛɛ *máamáa kanú’ nzsè, ḿbɔ́ɔnte, ńkyɛ́’ɛ tsɔ̌ máa nzsǒ gẅie áa mvfò *máamáa kanú’, légwɔ́ gie afóm ge kúu tsoló é tsó *máamáa kanú’ é náa nkʉ̀ŋ ntse.

⁴¹Tá’, ńne ńgee, mvfò *máamáa kanú’ shú ńkúu tsɛ̀ɛ sàŋasáŋa gie á cú’te ńkwɔ́’ɔ tsɛ̀ɛ ntse, ńdé’e tà tsɔ̌ légÿo tè gíŋe ńgwɔ́ wó wɔ́. Atsɔ̌ máamáa fóm kaa ntse ńdɔg ńcúa nzèm *máamáa kanú’, ḿbwɔ́’te.

⁴²Pàlÿɔ́’ ncù fa’a lézẅéte megàŋa tsǎŋ, ḿbɔ́gɔ pá’ à lɔɔn ńgwɔ́ tsɔ́ tà’ zɔ́’ ntse ńkÿo.

⁴³Tá’, tándá ncù piŋ tè ne ńkwoŋo ngie mé zẅé Pɔl wɔ́, ńdeen ńtɔ’ɔ wɔ́b légÿo mmó gie pɔ́ kwǎŋ, ńtsẅi né pʉ̀a pie pɔ́ zsé lézɔ́’ ntse ngie pɔ́ vɔ́g ńkúu ntse, ńzɔ́’ ntse, ńkẅɛɛ kwóŋ.

⁴⁴Petsɔ́ pʉ̀a gÿo ńgwɔ́ kẅɛ yɔ́b, kà ńcʉŋe pɔ́ nà mekèm peláŋ wɔ́, kà ná mekèm shúm mie é tsɔ’té ná *máamáa kanú’ wɔ́. Wɔɔn aa pá’ á la cʉa pú’u, mânyìŋ ntsèm pú fó ntse ńkwɔ́’ tà tsɔ̌ nyìŋ tè kwé.