Read Ngiemboon Megàŋ ntúm 3 Bible Online

Megàŋ ntúm 3 - Ngiemboon bible

Megàŋ ntúm 3

¹Á gwɔ́ tsɔ̌ mbÿɛ̀ njÿó, tà nèm tá fʉ̀’ gie mé tsyɛ’te Ssé ne ńku’u. Piɛ pɔ́ Jâŋ pʉ ńgʉa jʉ’e Ssé.

²Á gwɔ́ gwɔ́, mbà mé lɔ́ɔn ńkaa tsɔ̌ ngàŋa kwʉ́’te ńdɔgɔ ńtóo lyɛ̌’ ntsèm, ńnéŋe yé ncwò kɔ̀’ gẅie mé tóŋ le ncwò ndá meshùm. Pá’ à ge lúɔ shúm mbwo pʉ̀a pie pɔ́ cʉa jʉ’ó ńgee tsɛ̀ɛ jʉ’e Ssé. Wɛ̌ nyìŋ gwɔ́ gẅie mé la gwɔ́ zyé yé á gwɔ́ pɔ́ ngàŋa kwʉ́’te.

³Á gyá Piɛ pɔ́ Jâŋ ně ńcʉa ńgee tsɛ̀ɛ jʉ’e Ssé, á lúɔ nkáb mbwo pɔ́b.

⁴Piɛ pɔ́ Jâŋ tÿɔ́g menÿɔ́g ná yé. Piɛ gɔɔn mbwo yé ngie, líe weg.

⁵Ngàŋa kwʉ́’te nyɛte ńtÿɔ́g menÿɔ́ ná pɔ́b, ńně ḿbyɛ́bɛ, ńně ńkwaŋa ngie á ge gÿo lêkɔ́ wɔ́ pɔ́ náa mmó né yé.

⁶Piɛ lêen ńké ńgɔɔn mbwó yé ngie: N te tsɔ́ lagá nkáb gẅiin, tá’, ammó gie mèŋ n gẅiin, mèŋ n ge náa mbwo gù. Mèŋ, n tsẅii nà lezíŋ Yěsô Kristo múɔ Nǎzarɛd: Lu ssé ńgiŋ,

⁷ńgɔɔn pú’u, ńkibe pwó yé ye tʉ̀, ńně ḿbʉ’ʉ yé, mekwò mé pâ mejÿɔgɔ́ mekwò mé gwóon ńtʉte.

⁸Á lu ssé letʉ̀, ńzye légiŋ. Pâ ngàŋ ntúm Yěsô pú ńcʉa ńgee tsɛ̀ɛ *jʉ’ʉ Ssé. Á giŋe ńkyɛ́te, ńně ńgu’te Ssé.

⁹Alá’ gie á laa jʉ’ó gyá pá’ à ne ńgiŋe ḿbiŋe ne ńgu’te Ssé.

¹⁰Pɔ́ nyɛte ńdíe ńgyá á gwɔ́ pɔ́ kwà’ ngàŋ kwʉ́’te gẅie àa ńnéŋe ncwò ndá meshùm ńdúɔ shúm la, á kʉ’ʉ wɔ́b. Pɔ́ mɔɔn. Pɔ́ té zsé mmó gie á gÿǒ tá á giŋ wɔ́.

¹¹Àndÿò ŋwɛ́ ké té ne fóo lejʉ́ŋ Piɛ pɔ́ Jâŋ ésẅɛ’te nnɛ́ wɔ́, alá’ ntsèm gwaa mɔɔn, ńnɔ́ɔnte ńtó ńcú’te lejʉ́ŋ pɔ́b, á ncwò kɔ̀’, é gwɔ gie mé lɔ́ɔn ńtóŋo le ncwò kɔ̀’ Salomo.

¹²Piɛ gyá pá’ pɔ́ ne ńcú’te lejʉ́ŋ pɔ́b pú’u, ńgɔɔn né là’ ngie: Pʉ̀a Israel, pi mɔɔn pá’ à zeŋé mélà’ a kɔ́? Pi né ndie wég pɔ́ pá’ fʉ̀’ gie pég lɔ̌g pɔ́ meg metʉ̀ ka pɔ́ meg mefà’ nzèm Ssé tá ńdɔg ńgÿo wɔɔn nyìŋ giŋ ńtí kɔ́?

¹³Á gwɔ́ pɔ́ ngie e Ssé Ábalam, ńgwɔ́ Ssé Esâg, mbɔɔ yé Yakwɔ́b, ńgwɔ́ Ssé pàmangʉa njʉ’ pégè, kéen náa legú’ á mbwo ngàŋa fà’ we Yěsô. Mbà pi ka sẅíŋe yé mbwo pàsá’a lá’, ḿmoŋe yé mvfò *Pilato. Tá, mbà à la ŋag ntsaŋ ye tà ńzáb ngie mé nyé yé.

¹⁴Pi ka moŋe nyìŋ gẅie e Ssé la tsɔ́’, á gwɔ́ ndà’ nyìŋ gẅie aa ndʉŋ ndʉŋ, ḿbiŋ sẅíŋte *pilato ngie à nyé fÿɛ́ né pi.

¹⁵Pi ka gÿo pú’u, ńzẅé nyìŋ gẅie yé zɔ gÿo tá mé gwɔ́ wó. Tá e Ssé ké ńzíme yé nà legwé tà peg gyá yé lê nÿɔ́g még, peg ne sá’a shwóŋó gẅí.

¹⁶Áa nà fʉ̀’ɔɔn, pi ne ńgyá nyìŋ wɔɔn, ḿbiŋ ne ńzsé yé. Á cʉ̌a pɔ́ nà wég lézáb ntʉ́m nà Yěsô ŋwɛ́ tá lezíŋ sé ná metʉ̀ mbwo yé, á lɔg ńdu ssé ńtyé mvfò pi. Á cʉ̌a pɔ́ nà lezǎb ntʉ́m ná Yěsô tá á gwɔ́ ntentʉ́ pá’ pi ne ńgyá lɛ̀.

¹⁷Mefɛ́ pɔ́ɔn, mèŋ n cwoŋo ne ńzsé mboŋó ngie pi lâ mefùɔ pí ka lɔg pɔ́ gʉ̀gʉ̀ tá ńgÿo yɔɔn ntí nò nà Yěsô.

¹⁸Tá’, e Ssé fó mǒ ńgÿo anò gie à la tʉ́ njÿó ńdɔg ncwò pà Ntsẅì nkʉ̀ pé métsèm ńgɔɔn á pumte. Yɛ̌ nò gwɔ́ ngie *Nzà’nkÿo we kɔ̌ɔn ńge lá’ gyá ngɔ́’.

¹⁹Pú’u lá, pi ké ńkúbe mà gẅi, ḿbiŋe mbwo Ssé. À lege menò tepòŋ mí.

²⁰À cʉa pú’u, Cʉ̀apʉ̀a gÿo pi gwɔ́ tsɛ̀ɛ sẅétè. À gÿo ńtumo *Nzà’nkÿo gẅie à la tʉ́ njÿo ńtsɔ́’ɔ yé ntí twó sí, á gwɔ́ Yěsô.

²¹Áa nà fʉ̀’ɔɔn Yěsô ké ńgẅiin pɔ́ léńnéŋe tÿǒ lépwó. Tà lá’ ku lyɛ̌’ gie e Ssé ge lá’ gÿo akɔ́ɔkɔ́ɔ sele ńcʉ́’ ńgwɔ́ pɔ́ ye sẅe. Pá’ à la lá’ ńdɔg ncwò kwà’ pà Ntsẅì nkʉ̀ pé ńgɔɔn tà ntyě sǎg.

²²Mǒsê la zɔɔn ńgɔɔn ngie: «Cʉ̀apʉ̀a Ssé gi ge lá’ túmo tsɔ̌ Ntsẅì nkʉ̀ we. À gwɔ́ pá’ mèŋ, ńkẅɛ pɔ́ tsetsɛ̀ɛ pi. À lɔɔn ndà’ ńgɔɔn ngie pi gÿo lêkɔ́ wɔ́ pi jú’.

²³Á gʉa ná nyìŋ gẅie à té lá’ jú’ ncwò wɛ̌ *ntsẅì nkʉ̀ Ssé wɔ́, mé fó nùɔ pʉ̀a pie Ssé la tsɔ́’, ńkẅile yé, ńzẅé yé».

²⁴Pà *ntsẅì nkʉ̀ Ssé pie pɔ́ la gɔɔn nò tà fó ná Samîɛ, ńkúu nà pʉ̀a pie é lá pɔ́ɔnte nzèm ye métsèm, pɔ́ la la’te yɔ́b pá’ mɔ̀ɔn melyɛ̌’ ge lá’ gwɔ́ pú’u.

²⁵E Ssé lɔ̌ɔn ńdɔgɔ ncwò pà *ntsẅì nkʉ̀ Ssé ŋwɛ́ ńgɔɔn né pi. Pi gẅiin gí mmó nà *kʉ̀a gie Ssé la gwa tsetsɛ̀ɛ pàmangʉa njʉ’ pí. Á gwɔ́ pá’ à la gɔɔn né Ábalam ngie: Mèŋ n ge lá’ cʉa pɔ́ nà ngẅɛ̀ jù tá néŋ mbʉ́lè nà metsìŋe ndá ntsèm mie ée ndùmo ssé tsetsá’.

²⁶Áa yɛ̌ tá Ssé la gwaa tsɔ́’ɔ ngàŋa fà’ wé é túm, ńzɔɔn ntíi pɔ́ twó sí, ńtúmo yé ngie à tó ńnéŋ mbʉ́lè nà pi, ńgÿo awɔ̌wɔɔ tsetsɛ̀ɛ pi wɔ́ gwá’ mefà’ tepòŋ.