Read Ngiemboon Megàŋ ntúm 4 Bible Online

Megàŋ ntúm 4 - Ngiemboon bible

Megàŋ ntúm 4

¹Piɛ pɔ́ Jâŋ la nyé ńgɔɔn nò mbwo lá’ gɔɔn, pànuŋe pwɔ́’, ńgÿo pàpyɛ̀bɛ *jʉ’ʉ Ssé lâ pà *sadukay tó.

²Anò pú ne ḿbÿɔ́gɔ wɔ́b tɛ’, mélà’mie Piɛ pɔ́ Jâŋ la ne ńzi’i lá’ ngie e Ssé ge gÿo zím pʉ̀a nà legwé pɔ́ ndʉŋ ndʉŋ pá’ à ka zíme Yěsô.

³Pɔ́ gwoon wɔ́b. Á gwɔ́ gwɔ́ ńcʉ́’ ńgwɔ́ pɔ́ ncwò nzèm. Pɔ́ ńnéŋe wɔ́b ndá tsǎŋ légwɔ́ gie pɔ́ ge lá’a wó tá njÿó lʉ́a.

⁴Á gwɔ́ gwɔ́, mbà á gʉ̌a ná pʉ̀a pie pɔ́ jú’u shwóŋó Piɛ pɔ́ Jâŋ, lelÿò zẅíŋ. Tà pɔ́ gwɔ́ fʉ̀’ó ńgwɔ́ mbàŋa mmó ntsá’ tʉ̀a.

⁵Njÿó lá lʉ́a, pàsa’á lá’ pà Yuda lâ melÿò, pâ *pàkyagte lepʉ̌ Mǒsê pú ńcú’te Yerósalem.

⁶Kwà’ pʉ̀a pie é laa jʉ’ó, wɔɔn laa Ánnɔ́ɔn, *tándá pànùŋe pwɔ́’, ńgÿo Kaifa, mbɔɔ Jâŋ lê Alekzáŋdele, lâ pʉ̀a metsèm nà tsìŋe ndà *tándá pànuŋe pwɔ́’.

⁷Pɔ́ tsẅi, mé lɔ́gɔ Piɛ pɔ́ Jâŋ ńtóo mvfò pɔ́b. Pɔ́ zɛ́te wɔ́b ngie: Metʉ̀ ka fó nzɔ̌ pi lɔg ńgÿo mmó gie pi ka gÿo li? Pi kaa pe’e ńdɔg lezìŋ wɔ́ tá ńgÿo pú’u?

⁸À Zẅìge Ndʉalʉ̌a jÿó Piɛ. Á lêen ńké ńgɔɔn ngie:

⁹Mefùɔ lá’ pég pâ mekěm pég, peg ka gÿo nò mbòŋo á ná tà’ nkÿǒon. Mé piŋ ńgwɔ́ lyɛ̌’ɔɔn ne ńzɛ́te wég pá’, peg ka gÿo tá á zeŋe.

¹⁰Pi metsèm tà mbɔɔ pà Israel tà ḿmag, á ké ně ńzɛ́te ngie pi zsé tà’a nò. Yɛ̌ nò gwɔ́ ngie peg ka lɔg pɔ́ lezíŋ Yěsô Kristo mûɔ Nǎzarɛd tá ńgÿo nyìŋ wɔɔn gwɔ́ ntentʉ́ pá’ pi gyá lɔɔn. Á Yěsô Kristo wa gẅie pi la kime ye nà tÿǒ nkǐ lá. E Ssé kéen ńgÿo á zíme nà legwé.

¹¹Yé zɔ lɔgɔ ńgwɔ́ tóon gẅie ŋwà’ne Ssé gɔɔn nò nà yé ngie: «Tóon gẅie pàkwɛ́ ndá la gwá’, à kéen ńcʉ́’ʉ tóon lezẅé ndá».

¹²Epʉ̀a ké ńgẅiin lécʉa pɔ́ ná Yěsô tá ńtsẅɛ, á nue atsɔ̌ nyìŋ ndyɛ̀’ɛ tè tsɛ̀ɛ yɔɔn njÿó ńgwɔ́ gẅie e Ssé la zába yé légwɔ́ gie pege ge cʉa nà yé tsẅɛ wɔ.

¹³Epʉ̀a pie la ńnéŋe ssé ně ŋaga wɔ́b, gyá ntí gie Piɛ pɔ́ Jâŋ lɔ̌g ńgɔɔn nò té pɔ́g á kʉ’ʉ wɔ́b, mélà’mie pɔ́ la ne ńzsé ngie pɔ́ gwɔ́ pɔ́ memeen pʉ̀a, mbà pɔ́ la té zí’i sekúd tɛ’ wɔ́. Pɔ́ léen ńké ńdiŋ ngie pɔ́ gÿo pu’u, á nue pâ Yěsô kɔ́ɔn ńteme kwò ńgiŋe.

¹⁴Ńně ńgyá pá’ nyìŋ gẅie à ka zeŋe tyé lejʉ́ŋ Piɛ pɔ́ Jâŋ, pɔ́ té gíŋe ńzsé tsɔ́ nò gie pɔ́ ge gɔɔn wɔ́,

¹⁵ńdêen ńké ńtsẅi mé gÿo pɔ́ fó jʉ’ʉ ntsaŋ ńkẅɛ. Pɔ́ kwaŋte pá’ pɔ́ ge gÿo,

¹⁶ńgɔɔn ngie: Pege ge gÿo lêkɔ́ ná pʉ̀a pɔɔn? Pʉ̀a metsèm, ee Yerósalem wɔɔn ne ńzsé yɔɔn nò mmɔɔn mmɔɔn gie pɔ́ ka gÿo. Tà à lɔɔn ńgwɔ́ pege é le moŋe.

¹⁷Tá’, pege vege wɔ́b, ḿbebe wɔ́b, ngie tà pɔ́ gíŋe ńkẅi’i ńdɔg lezíŋ Yěsô ńgɔɔn nò mbwo tsɔ́ sɔɔn nyìŋ á lá’ yɔɔn. À cʉa pú’u, yɔɔn nò le gíŋe sa jʉ’ wɔ́.

¹⁸Pɔ́ lêen ńké ńtóŋo Piɛ pɔ́ Jâŋ, ńgɔɔn né pɔ́b ngie: MÀbɔ́ɔn pi le gíŋe ńkím lezíŋ Yěsô. Ta pi gíŋe ńzí’i nò yé mbwo pʉ̀a.

¹⁹Tá’ Piɛ pɔ́ Jâŋ tsɔ́’ɔ mbwo pɔ́b ngie: Ammó gie e Ssé ne ńkwoŋo gwɔ́ ngie mé jú’ pɔ́ ncwò gẅi kà wé? Pi gyá gí ngie kɔ́?

²⁰Á gʉa nà peg, mbà à lɔɔn ńgwɔ́ peg léláŋte nà nò gie peg la jú’ ḿbiŋ ńgyá wɔ́.

²¹Pàsá’ ntsaŋ é gíŋe ńnyɛte ḿbebe wɔ́b, ńnyé wɔ́b pɔ́ gʉa. Mbà pɔ̀ fǎ’ shÿo gẅie pɔ́ ge fó mǒ lɔg nyɛɛ wɔ́b ngɔ́’, pɔ́ té gyá ńtí lá’. Á nue pʉ̀a metsèm laa jʉ’ó, ńně ńgu’te Ssé nà mmó gie á ka cʉa.

²²Á gíŋ ńgwɔ́ gwɔ́ nyìŋ gẅie à la zeŋe nà ntí ye mmɔɔn mmɔɔn lɔɔn, la gwaa gwɔ́, mbà à tɔ̌g ngù’ móm lekúa.

²³Mé la gwɔ́ tà nyé wɔ́b, Piɛ pɔ́ Jâŋ gʉa ńkẅɛte pʉ̀a pɔ́b. Mbú ḿbíte menò mie metándá pànuŋe pwɔ́’ lâ pàsá’a lá’ ně ńgɔɔn né pɔ́b, éshwóŋó wɔ́b.

²⁴Pɔ́ jú’ pú’u, ńdêen ńké mbú ńcú’te ssé ńdɔgɔ tà’ ncwò ńzye lésẅíŋte Ssé ńgɔɔn ngie: Cʉ̀apʉ̀a, gù zɔ la nyɛte lefàŋ pɔ́ tsetsá’, ńnyɛte ntse, ńnyɛte kɔ̀ɔkɔ́ɔ wɔ́ gie áa ná mɔɔn mejʉ’.

²⁵Ɔ̀ la gÿo Zẅìge Ndʉalʉ̌a jÿó mangʉa njʉ̀’ wég fùɔ Ndavíd gẅie à laa ngàŋa fà’ gù, á gɔɔn ngie: Atúmo túm kwé’e mekẅi mɔ́b mvfò Ssé mélà’a kɔ́? Melá’ melá’ fa’a nò pá’ɔɔn á gwɔ́ mélà’a kɔ́?

²⁶Mefùɔ ndùmo ssé tsetsá’ ne ńtáŋte ncù, pàsá’a lá’ gíŋe ne ńcú’te yɔ́b ńtáŋa ngie pɔ́ ge lÿɔ́’ɔ Cʉ̀apʉ̀a Ssé le ncù, mbɔɔ nyìŋ gẅie à la zɔ́’ɔ yé ńdɔg ńgÿo fùɔ

²⁷Áa kwà’ nò. *Herôd pɔ́ Ponte *Pilato kéen ńcú’te á tsɛ̀ɛ tÿǒsoŋ yɔɔn pâ pàtúm tà mbɔɔ tsɔ́ metsìŋe ndá Israel, ńcú’te pú’u, lélÿɔ́’ɔ Yěsô, á ngàŋa fà’ gù gẅie ɔ̀ la tsɔ́’, ńzɔ́’ɔ yé.

²⁸Pɔ́ la táŋa yé pú’u, ńdêen ḿbú ńgÿo kɔ̀ɔkɔ́ɔ gie gù Ssé, ɔ̀ lá lá’ ńtʉ́ njÿó ńkwaŋte ńzáb ngie á ge lá’ gwɔ́ pú’u.

²⁹Cʉ̀apʉ̀a, líe fʉ̀’ɔɔn tá ńgyá pá’ pɔ́ ne ḿbebe weg. Náa shÿɔ́g mbwo ngàŋa fà’ jú, pɔ́ shwóŋó nò jú té pɔ́g.

³⁰Náa weg metʉ̀ lélɔg ńgÿo pʉ̀a zeŋe, lélɔg ńgÿo menò mmɔɔn mmɔɔn pâ ndàa gyá, á ná lezíŋ Yěsô, á ngàŋa fà’ gú gẅie ɔ̀ la tsɔ́’.

³¹Pɔ́ la sẅíŋte Ssé ta ńtsẅé jʉ’, ajʉ’ gie pɔ́ la cú’te wó cʉ’ʉ. À Zẅìge Ndʉalʉ̌a pú ńjÿo wɔ́b métsèm. Pɔ́ zyé leshwóŋó nò Ssé té pɔ́g.

³²Anùɔ pʉ̀a Yěsô lɔ́ɔn ńgẅiin pɔ́ tà’ ncwò, ńgẅiin pɔ́ tà’ ntʉ́m. Atsɔ̌ nyìŋ ná pɔ́b lɔ̌ɔn tě ńgẅiin mmó ngie á gwɔ́ pɔ́ yé wɔ́. Pɔ́ lɔ́ɔn ńteme shúm tem.

³³Á fó mǒ e Ssé náa máamáa metʉ̀ né megàŋ ntúm Yěsô, pɔ́ lɔg ńkẅi’i sá’a ná ntí gie pʉ̀a ge ju’ e zsé ngie e Ssé ka zíme Cʉ̀apʉ̀a Yěsô nà legwé. E Ssé ne ńnéŋe mbʉ́lè nà pʉ̀a Yěsô metsèm pá’ɔɔn tɛ’.

³⁴Tsɔ̌ nyìŋ na pɔ́b lɔ̌ɔn tě ńzága mmó wɔ́, mélà’mie pʉ̀a metsèm tsetsɛ̀ɛ pɔ́b pie pɔ́ la gẅiin mendá lâ menká’ lá ne ńgee sẅiŋe ńdɔgɔ nkáb ńtóo,

³⁵ńnuŋe mekwò megàŋ ntúm. Mé gabte náa yé wɔ̌wɔɔ pá’ e ge ku’u nà yé nò.

³⁶À tsɔ̌ nyìŋ gwɔ́ wó, lezíŋ sé gwɔ́ le Yesyɛ̂b, á gwɔ́ nyìŋ nà ngẅɛ̀ Lěvi, mbà mé la zyé yé á ngwòŋ Shʉ̀pele. Ngàŋ ntúm lɔ́ɔn ńgíŋe ńtóŋo yé le Panebâse, é lɔgɔ ńgɔɔn ngie: Nyìŋ gẅie à kẅiŋte pʉ̀a.

³⁷À la sẅiŋ wé nká’, ńdɔg nkáb ńtó nùŋe mekwò megàŋ ntúm.