Read Ngiemboon Megàŋ ntúm 6 Bible Online

Megàŋ ntúm 6 - Ngiemboon bible

Megàŋ ntúm 6

¹Á láa nà yɛ̌ fʉ̀’, anùɔ pʉ̀a Kristo ně ńkẅi’i tɛ’. Atsɔ́ gwǒŋ gwɔ́ pà Yuda pie pɔ́ shwóŋó Gelekia, yetsɔ́ gwɔ́ yé pà shwóŋó kwà’ shwóŋè lá’. Pàshwóŋe Gelekia zyé lézẅɛ́te nà pàshwóŋe kwà’ shwóŋè lá’ ngie: Pɔ́ ne ńgaba shúm lyɛ̌’ ntsèm, pɔ́ téen náa sé mepfɔ̌g pɔ́b wɔ́.

²Ngàŋ ntúm ntsɔ̀b pʉ̀a nê legém lêen ńké ńtóŋo cú’tè pʉ̀a Kristo metsèm ńgɔɔn ngie: Á té poŋ ngie peg nyé léshwóŋó nò Ssé, ńcʉ́’ʉ ńgwá ńgaba pɔ́ shúm lejÿó wɔ́.

³Pú’u lá, mbà mefɛ́ mefɛ̀, pi gʉa tsetsɛ̀ɛ pi, éfa’ pʉ̀a sɔɔn mbʉ́a pá’ pɔ́ ge ně fa’a yɛ̌ fà’. Pi cʉ́’ʉ letsɔ́’, ńdíe pʉ̀a pie tsẅé yɔ́b poŋ. Epʉ̀a pie Zẅìge Ssé léen ńjÿó letʉ́m sɔ́b. Pɔ́ piŋ ńgẅiin zsé nò. Peg cʉ́me fà’a shúm léjÿó mbwo pɔ́b,

⁴ńgʉa nà peg, peg ké ńzsé yég pɔ́ lésẅíŋte Ssé, ḿbiŋ ne shwóŋó pʉ̀a pɔ́ nò yé.

⁵Pʉ̀a Kristo jú’, á pú ḿboŋo wɔ́b tɛ’. Pɔ́ lêen ńké ntsɔ́’ɔ Etien. Á gwɔ́ nyìŋ ńzáb ntʉ́m wé nà Ssé tɛ’, mbà Zẅíge Ssé léen ńjÿó yé. Mé gíŋe ńtsɔ́’ɔ Filib, ńtsɔ́’ɔ Porokɔr, ńtsɔ́’ɔ Nikanor, ńtsɔ́’ɔ Timon, ńtsɔ́’ɔ Parmenas pɔ́ Nikola gẅie a laa nyìŋ Antiokia. Mbà à la kúu nà nò Ssé pà Yuda.

⁶Pɔ́ la tsɔ́’ pʉ̀a pɔɔn, ńdɔgɔ wɔ́b ńtó, ńnyɛɛ mbwo megàŋ ntúm. Megàŋ ntúm sẅíŋte Ssé, ńzáb mbwo twó pɔ́b.

⁷Ashwóŋè Ssé la ne ńkẅi’i saa pɔ́ jʉ’. Anùɔ pàzáb ntʉ́m ná Yěsô ně ńkẅi’i ńgyɔ́ɔn Yerósalem. Pànuŋe pwɔ́’ tà ńgyɔ́ɔn záb ntʉ́m nà Yěsô.

⁸Etien gẅie mé la tsɔ́’ɔ yé la, à laa nyìŋ, mbà Ssé la tsẅagte pwó yé, ńně náa yé metʉ̀. Á lɔgɔ ńgÿo menkʉ̀’ʉ menò lâ menò mmɔɔn mmɔɔn tsetsɛ̀ɛ pʉ̀a.

⁹Etsɔ́ ntá’ pʉ̀a gÿo ńzyé lézoŋo nò gie Etien gɔɔn. Atsɔ́ gwǒŋ gwɔ́ pà Yuda pie pɔ́ fóo Sirɛne mbɔɔ Alekzáŋdeli, ńgwɔ́ pʉ̀a pie pɔ́ gee nà *ndá cú’tè gie mé lɔ́ɔn ńtóŋo le *ndá cú’tè pàkẅɛɛ ndá nkwɔɔn. Yetsɔ́ gwǒŋ gwɔ́ pà Yuda pie pɔ́ fóo nà pàga ngwòŋ Silisia mbɔɔ nà pàga ngwòŋ Azia.

¹⁰Pâ pɔ̌ ně ńzoŋo pú’u, atsɔ̌ nyìŋ té ŋaga yé tà ńjÿó wɔ́, mélà’mie Zẅìge Ssé lɔ́ɔn náa yé legye lélɔg ńgɔɔn nò.

¹¹Pɔ́ gyá kékáŋ, ńdúŋ pʉ̀a, ńtsẅi né pɔ́b ngie pɔ́ gɔɔn ngie pɔ́ ka jú’ pá’ Etien shwóŋó té pòŋ nà Mǒsê mbɔɔ nà Ssé.

¹²Pɔ́ gÿo pú’u, ńdɔg sẅite lá’, ésẅite mekěm mbɔɔ *pàkyagte lepʉ̌ Mǒsê, ḿma’a nzèm Etien. Mé lêen ńké ńgwoon yé, ńdɔgɔ yé ńgʉa mvfò cú’tè pàsá’a lá’ pá’ mé ge ŋaga yé.

¹³Pɛ̌ pʉ̀a lɔg mbɔɔ tsɔ́ megàŋa cÿɔ̌ nò, ńgʉa wó. Pɔ́ tó ńgɔɔn ngie: Nyìŋ wɔɔn zɔgɔ pɔ́ léshwóŋó té pòŋ á nà ndá Ssé yégè gie ee Yerósalem wɔɔn, mbɔɔ nà mbʉ̌ Mǒsê.

¹⁴Peg ka fó ńzɔɔn ńjú’ á gɔɔn ngie Yěsô nyìŋ Nǎzarɛd áwɛ̌ ge gÿo sa’ ndá Ssé yege[3], é piŋ kúbe mà gẅie Mǒsê la náa mbwó pege.

¹⁵Pàsá’a lá’ pie laa ndá métsèm lêen ńké ně ńtÿɔ́gɔ menÿɔ́g nà Etien, ńgwaa gyá eshÿó wé cʉ́’ ńgwɔ́ pɔ́ pá’ we *cÿɔ́’ Ssé lá.