Read Ngiemboon Megàŋ ntúm 7 Bible Online

Megàŋ ntúm 7 - Ngiemboon bible

Megàŋ ntúm 7

¹Tándá pànuŋe pwɔ́’ zɛ́te Etien ngie: Anò gie n jú’u mé gɔɔn ná gù áa nò?

²Etien tsɔ́’ ngie: Metá pɔ́ɔn, mefɛ́ pɔ́ɔn, pi jú’u nò gie mèŋ n gee gɔ̌ɔn. Á laa fʉ̀’ gie mangʉa njʉ’ wégè Ábalam la nyé Mesopotamia, tà ńnyé té gee Haraŋ, e Ssé gẅie à gẅiin shʉshÿɔ́g nyɛ mbùm ye mbwo yé,

³ńgɔɔn né yé ngie: Nye tsìŋe ndá gí, éfó tsɛ̀ɛ ngwòŋ gẅi ńkẅɛ, ńgʉa le nà tsɔ́ lá’ gie mèŋ n ge nyɛɛ gú.

⁴Ábalam lêen ńké fó ngwòŋ pà Kaldea, ńgʉa ńnéŋe Haraŋ, ńnéŋe wó tà tá wé lá’ ńkwé. E Ssé tsẅi á fó Haraŋ ńtó lé tsɛ̀ɛ wɔɔn ngwòŋ gẅie pi tsẅê wó fʉ̀’ɔɔn lɔɔn.

⁵À la kúu jʉ’ɔɔn, e Ssé fó tè nká’ wé ná, tà mbɔɔ ntÿɔ́gɔ kwò. Tá ńké ńká’a mbwó yé ngie à ge lá’ ná wɔɔn ngwòŋ mbwo yé, e cʉ́’ wé, mbàa we gubé yé á fʉ̀’ gie à ge lá’ cʉ́’ʉ gwɔ́ wó wɔ́, ńké ńgwaa ka’ pú’u, Ábalam tè múɔ gẅiin.

⁶E Ssé ké ńgɔɔn mbwó yé ngie: Gubé jú ge lá’ gʉa tsɔ́ túm tsẅé. E kúu wó mé lɔgɔ wɔ́b ńgÿo menkwɔɔn, ńnyɛ́ɛ wɔ́b ngɔ́’ nyɛ nà ngù’u lá’ nkÿo lekùɔ.

⁷Tá mèŋ Ssé n ké ŋag wɛ̌ ngwòŋ, ńzáb ngɔ́’ twó pɛ̌ pʉ̀a pie é lɔgɔ wɔ́b ńgÿo menkwɔɔn. Tá ngẅɛ̀ ndá jù fó wó ńkẅɛ ńtó, ńnéŋe ńgú’te wɔ̀ɔn jʉ’ɔɔn.

⁸E Ssé gɔɔn pú’u, pɔ́ Ábalam gíŋe ńgwa mbɔɔ *kʉ̀a, à liŋé yɛ̌ *kʉ̀a gwɔ́ lépú’u mûɔ mbàŋa. Á cʉa pú’u, tá Ábalam tǎ ḿbú’u Esâg pá’ mé la zyé yé tà é gwɔ́ lyɛ̌’ lefɔ̌ɔn. Esâg tǎ ḿbú’u míŋ wé Yakwɔ́b. Yakwɔ́b tǎ ḿbú’ púɔ pé pe mbàŋa pie ée pàmangʉa njʉ’ pégè ntsɔ̀b pʉ́a nê legém la.

⁹Pàmangʉa njʉ’ pégè gÿo ńdíe fɛ́ wɔ́b Yesyɛ̂b ésíŋe shÿó tà sẅiŋe yé. Á cʉ́’ nkwɔɔn tsɛ̀ɛ ngwòŋ Egipto. Tá Ssé ke ńgwɔ́ né yé,

¹⁰ńkẅile yé tsɛ̀ɛ ngʉ̀ngʉ̀ ntsèm gie é la kúu yé, ńgíŋe ńnáa yé legye tà Faraon fùɔ Pà Egipto, kwóŋo yé, ńdɔgɔ yé ńgÿo ŋwálá’ twó mbùm pá’ à ge líe ngwòŋ Egipto tà mbɔɔ menò mie é tswé’e nɔ’.

¹¹Atsɔ̌ cÿó gÿo ńgwé tsɛ̀ɛ ngwòŋ Egipto mbɔɔ tsɛ̀ɛ lá’a Kanaan ntsèm. Pʉ̀a mésoŋ gyá ngɔ́’ tɛ’. Pàmangʉa njʉ’ pégè pú ńzág shúm léjÿó.

¹²Yakwɔ́b lêen ńké ńjú’ mé yé shúm léjÿó ée tsɛ̀ɛ ngwòŋ Egipto. Á túm pàmagʉa njʉ’ pégè á wó á nà nduŋ mvfò légʉa.

¹³Pɔ́ tǎ ńgíŋe ḿbiŋe wó nà mbɔ́ɔntè yépʉ́a, Yesyɛ̂b lêen ńké ḿbÿé mbùm yé mbwo mefɛ́ pé. Fùɔ Faraon lɔg fó pú’u, ńzsé tsìŋe ndá pà Yesyɛ̂b.

¹⁴Yesyɛ̂b túm ngie mé gʉa fa’a tá wé Yakwɔ́b, à lɔg ngẅɛ̀ ye ntsèm ńtó. Pɔ́ gwɔ́ fʉ̀’ó mbú ńcú’te ńgwɔ́ nyìŋ mésoŋ ntsɔ̀b tʉ̀a nê móm sɔɔn mbʉ́a.

¹⁵Yakwɔ́b gʉa Egipto, ńnéŋe wó tà ndá’ ńkwé. Pàmangʉa njʉ’ pégè gÿo ńgíŋe ńkwéte yɔ́b.

¹⁶Mé gÿo ńkaa mekẅǐ mɔ́b, ńgʉa Sikem ńnéŋe tsɛ̀ɛ lesyè sie Ábalam la lɔg nkáb yé ńjúu mbwo púɔ Emor. E gwɔ́ ndè’e mepfó.

¹⁷Afʉ̀’ gie Ssé lɔ̌ɔn ńge gÿo mmó gie à la ká’a mbwo Ábalam la gwɔ́ tà ńne ńkú’u, epʉ̀a pégè shʉ́a ngẅɛ̀ yɔb tsɛ̀ɛ ngwòŋ Egipto pá’ɔɔn tɛ’.

¹⁸Atsɔ̌ fùɔ gÿo ńne sá’a pà Egipto, ńgwɔ́ gẅie à la tè Yesyɛ̂b zsé,

¹⁹éfʉte pʉ̀a lá’ pégè, ńgÿo nò tepòŋ nà pàmangʉa njʉ’ pégè, tà ńtsẅi né pɔ́b ngie pɔ́ gʉa tsɛ̀ɛ megǐ ńgwa’ pûɔ mepÿɛ́ pɔ́ kwéte.

²⁰Á gwɔ́ fʉ̀’ó ŋwɛ́, mé lêen ńké zyé Mǒsê, á gwɔ́ múɔ, kwáŋ shÿó we lʉ́ate tɛ’[4]. Mé gẅiin yé pɔ́ ndá tá we nà mesaŋ métá,

²¹ńgÿo ńgʉa tsɛ̀ɛ megǐ ńgwá’a yé. Tá míŋ fùɔ Faraon we manzwě kaa yé ńdɔg ńgʉa né mbʉ̀a yé, ńkwé’te yé ńdɔg ńgÿo míŋ we.

²²Mǒsê tsẅe wó, mé pú ńzí’i yé zsé nò pà Egipto, ńgú’ tà ńgwɔ́ nyìŋ, ńcʉ́’ʉ légɔɔn nò kà légÿo wɔ́, ńgÿo pá’ nyìŋ gẅie à zsé mmó gie à gÿo yɛ̌.

²³Á gÿo ńgwɔ́ tà ńgẅiin ngù’u lá’ móm lekùa, akwàŋte légyá mefɛ́ pé pà Israel, tóo twó ye.

²⁴Á kúu lejʉ́ŋ pɔ́b, ńgyá tsɔ̌ nyìŋ Egipto ně ńcúa nyìŋ Israel. Á tág nzèm nyìŋ Israel, ńzẅé nyìŋ Egipto.

²⁵Mbà legye sé shwoŋó yé ngie mefɛ́ pé ge gyá yé, é zsé ngie e Ssé zɔ tumó yé ngie à gʉa ńkẅile wɔ́b tsɛ̀ɛ ngɔ́’. Tá nyìŋ wɔ́b tè zsé.

²⁶Njÿó gÿo ńdʉ́a, á gíŋe ḿbiŋe wó, ńgwɔ́ tó, pʉ̀a Israel mepʉ́a ně ńcúa nkwɛ̀. Á ně faga wɔ́b, ńgɔɔn né pɔ́b ngie: Meshǔ pɔ́ɔn, pi ée mefɛ́ mefɛ́, ḿbiŋ sele ńcúa nkwɛ̀ tsetsɛ̀ɛ pi mélà’a kɔ́?

²⁷Tá nyìŋ gẅie à ně ńzye mèlà’, pe’e Mǒsê ńgɔɔn né yé ngie: Kwà’ wɔ́ zɔ ka lɔgɔ gú ńgÿo fùɔ pá’ ɔ̀ ge ŋag mentsaŋ még?

²⁸Ɔ̀ fa’a lézẅé wɔ̀ɔn pá’ ɔ̀ ka zẅé nyìŋ Egipto jǔɔ la keen?

²⁹Mǒsê jú’ pú’u, ńkÿo ńgʉa né túm, á tsɛ̀ɛ ngwòŋ Madiaŋ, ńnéŋe wó, ńgÿo ńzyé pûɔ mbàŋa mepʉ́a.

³⁰E gÿo ńcʉa ngù’u lá’ móm lekùa, Mǒsê gʉa ngʉ̀ŋe lekwɔ’ɔ́ Sinay, á nkwòŋo tsẅɛ, ńtóo wó ńgyá *cÿɔ́’ Ssé, á gwɔ́ tsɛ̀ɛ mmɔ̌g, gẅie é la ně nkÿó na tsɔ̌ mûɔ métÿǒ.

³¹Mǒsê gyá wɛ̌ mmɔ̌g, é kʉ’ʉ yé. Á sẅɛ’te nnɛ́, ńně ńdíe, ńjú’ ngyè Cʉ̀apʉ̀a gɔɔn né yé ngie:

³²Aa mèŋ Ssé pàmangʉa njʉ’ pí, é Ssé Ábalam, é Ssé Esâg, ńgíŋe ńgwɔ́ Ssé Yakwɔ́b. Mǒsê jú’ ḿbɔ́g, ńzye lévɛ. À tè gíŋe ńkwoŋo lélíe jʉ’ó wɔ́.

³³Cʉ̀apʉ̀a gɔɔn mbwo yé ngie: Sẅɛ melɔ̌ɔn mie ée mekwò gù lɛ̀, á nue ajʉ’ gie ɔ̀ tyé wó lɛ, áa jʉ’ yɔ́ɔn mie mèŋ n gee Ssé.

³⁴Mèŋ n gyǎ ngʉ̀ngʉ̀ pʉ̀a pɔ́ɔn tsɛ̀ɛ ngwòŋ Egipto, ńgíŋe ńjú’ pá’ pɔ́ ga’te. Mèŋ sẅɛ̌’ ńtóo légÿo pɔ́ fó tsɛ̀ɛ ngɔ́’ ńkẅɛ. Á nà fʉ̀’ɔɔn la, mèŋ n ge túmo gú ngwòŋ Egipto.

³⁵E Ssé gɔɔn pú’u, ńdêen ńké ńtúm pɔ́ Mǒsê wa pá’ à ge gʉa kẅile pà Israel tsɛ̀ɛ ngɔ́’ gie pɔ́ la ne ńgyá. *Cÿɔ́’ Ssé gẅie Mǒsê ka gyá yé tsɛ̀ɛ mûɔ métÿǒ la ne ńkẅéte yé. Á ně sá’a wɔ́b. Tá mbà pɔ́ la lʉ’ʉ yé, tà ńzɛ́te yé ngie à wɔ́ ka zábá yé ngie à cʉ́’ʉ fùɔ wɔ́b, ńŋaga wɔ́b gwɔ́?

³⁶Mǒsê la gʉa tà ńkúu ngwòŋ Egipto, ńgÿo menkʉ̀’ʉ nò, lâ menò mmɔɔn mmɔɔn ńdɔg ńdá’te metʉ̀ Ssé. Yé zɔ̌ lêen ńké ńgÿo fó wó ńkẅile wɔ́b, ńgíŋe ńgÿo tsɔ́ menò mmɔɔn mmɔɔn ngʉ̀ŋe pàŋ ntse, ńtóo nkwòŋo tsẅɛ, ńgÿo gÿo nà ngù’ móm lekùa.

³⁷Yé zɔ la gíŋe ńgɔɔn mbwó púɔ pà Israel ngie: «E Ssé ge lá’ gíŋe náa tsɔ̌ *ntsẅì nkʉ̀ Ssé né pi. À gwɔ́ pá’ mèŋ. À ge lá’ kẅɛ pɔ́ tsetsɛ̀ɛ pi.»

³⁸Mǒsê zɔ gíŋe ńgwɔ́ nyìŋ gẅie á laa fʉ̀’ gie pàmangʉa njʉ’ pégè la cú’te nkwòŋo tsẅɛ, á tyé tsetsɛ̀ɛ pɔ́b lâ *cÿɔ́’ Ssé gẅie à lɔ̌ɔn cʉ́me nò mbwo yé á ndùm lekwɔ’ɔ́ Sinay. Kwà’ yé Mǒsê zɔ la kẅé shwóŋe gie á gÿo mé gwɔ́ wó léná né pege.

³⁹Tá’ pàmangʉa njʉ’ pégè pɛ̌, la tè kwoŋo le jú’ ncwò Mǒsê wɔ́, ḿbe’e yé pe’e. Tà ńtsɔ́ɔn le gíŋe ḿbiŋe ngwòŋ Egipto,

⁴⁰ńgɔɔn né Aroŋ ngie: Peg tè ne ńzsé mmó gie á kéen ńgÿo Mǒsê gẅie à ka kẅile weg tsɛ̀ɛ ngwòŋ Egipto wɔ́. Nyɛte tsɔ́ messé, é gwɔ́ mvfò peg ńnyɛɛ wég nzsè.

⁴¹Pâ pɔ̌ lêen ńké ńnyɛte tútú. Á gwɔ́ pá’ mûɔ fòŋ la. Pɔ́ gwa menɔ̀ɔn ńdɔg ńgwá’ pwɔ́’ mbwo yé. Anò seen ḿboŋo wɔ́b nà mmó gie pɔ́ lɔ̌g mbwó mɔ́b ńnyɛte tà pɔ́ jÿó línɔ́ɔn.

⁴²Pɔ́ la gÿo pú’u, e Ssé tém nzèm yɔb, ńnyé wɔ́b. Pɔ́ zye légu’te shúm sie ée lefaŋ. Ndʉŋ ndʉŋ pá’ mé la ŋwe’e tsɛ̀ɛ ŋwà’ne pà *ntsẅì nkʉ̀ Ssé ngie: Púɔ pà Israel, pi la giŋe nkwòŋo tsẅɛ ngù’u lá’ móm lekùa pé’e, ńgwa menɔ̀ɔn ńdɔg ńgu’te wɔ̀ɔn mɔɔn ka?

⁴³Ngǎŋ! Tá’ pi la ké ńkaa pɔ́ ntàb ssé Molog ńgíŋ ńkaa cÿɔ́’ saŋ, á gẅie mé lɔgɔ fʉ’ʉ ssé gi gie mé tóŋo lê Refaŋ é gwɔ́ shúm sie pi zɔ la nyɛte pá’ pi ge gu’te. Áa mmó gie á ge gÿo mèŋ fó lá’ ńjwoŋo gẅí pi gʉa tà ńtɔ́g ngwòŋ Mbabilonia.

⁴⁴Pàmangʉa njʉ’ pégè laa nkwòŋo tsẅɛ pú’u, ńgẅiin ntàb gẅie é nyɛɛ ngie e Ssé ee nùɔ pɔ́b. E Ssé zɔ la nyɛɛ Mǒsê ntí gie à ge lɔg nyɛte wɛ̌ ntàb pú’u, ńgɔɔn mbwo yé ngie à ke ńnyɛte pɔ́ ndʉŋ ndʉŋ pá’ à ne ńgyá é gwɔ́.

⁴⁵Epúɔ pàmangʉa njʉ’ pégè táa ńgẅiin yɔ́b wɔɔn ntàb ńdɔg ńtó tà ńkúu jʉ’ɔɔn. Á gwɔ́ ná fʉ̀’ gie Yeshua la ne sá’a wɔ́b, e Ssé ne ńjwoŋo pʉ̀a tsɛ̀ɛ melá’ tá pɔ́ ńnéŋe, wɛ̌ ntàb la lá’ ńgwɔ́ pɔ́ jʉ’ɔɔn tà ńkúu nà fʉ̀’ gie fùɔ Ndavíd la ne sá’a lá’.

⁴⁶E Ssé la pú ńkwoŋo fùɔ Ndavíd tɛ’. Á sẅíŋte yé ngie à zẅíŋ à kwɛ́ɛ jʉ’ yé gẅie aa Ssé Yakwɔ́b.

⁴⁷Tá míŋ we fùɔ Salomo zɔ̌ lá’ ńcʉ́’ tá ńkwɛ́ɛ jʉ’ ná né Ssé.

⁴⁸Á ké tě ńdɔgɔ ńgɔɔn ngie e Ssé gẅie à pi’i kɔ̀ɔkɔ́ɔ lɔɔn ńgwɔ́ á ńnéŋe tsɛ̀ɛ jʉ’ gie pʉ̀a mésoŋ zɔ̌ kwɛ́ wɔ́. Tsɔ̌ ntsẅì nkʉ̀ we la zɔɔn ńgɔɔn ngie:

⁴⁹Cʉ̀apùa gɔ̌ɔn ngie: Atÿǒ lepwó áa lʉŋe lefùɔ yɔ́ɔn atsetsá’ gwɔ́ ntÿɔgɔ́ mekwò mɔ́ɔn pi ge kwɛ́ɛ jʉ’ yɔ́ɔn à gwá’a la? ajʉ’ gie á lɔɔn ńgwɔ́ n zẅɛte wó, áa wó?

⁵⁰Mèŋ n zɔ la tè nyɛte shúm ntsèm wâ?

⁵¹Etien la pú ḿbíte tà á ku’, á gɔɔn mbwo pàŋag ntsaŋ ngie: Pi tʉʉ twó tɛ’. Ntʉ́m gẅi pâ nkwaŋá nò gẅi gwɔ́ we pʉ̀a pie pɔ́ té Ssé zsé. Pi giŋé ńdʉ’ʉ nò gie Zẅìge Ssé zɔ̌ gɔ̌ɔn, ńdɔgɔ ńgÿo pɔ́ pá’ pàmangʉa njʉ’ pí.

⁵²Metá pí la tè wɛ̌ *ntsẅì nkʉ̀ Ssé kʉ́e? Pɔ́ la zẅéte pʉ̀a pie pɔ́ la tʉ́ njÿó ne ḿbÿé ngie nyìŋ gẅie aa ndʉŋ ndʉŋ gílé yé ge gÿo tó. A kéen ńtó, pi pɛ̂ sẅiŋe yé, ńgÿo mé zẅé yé.

⁵³N gɔɔn pi pɛ̂ pie *cÿɔ́’ Ssé la lɔg mbʉ̌ Ssé ńtó ńnáa mbwo pi, pi ké tè mǒ giŋ.

⁵⁴Pàsá’ ntsaŋ la jú’ pú’u, lóŋ wɔb ffó. Pɔ́ lu ssé nzèm Etien,

⁵⁵A Zẅìge Ssé jÿó Etien. Á pʉ’ʉ twó yé ńdíe tÿǒ lepwó, ńgyá legú’ Ssé, ńgíŋe ńgyá Yěsô, á tyé nà gwǒŋo pwó Ssé ye tʉ̀.

⁵⁶Etien gɔɔn ngie: Mèŋ n ne ńgyá pá’ ncwò tÿǒ lepwó tsɔ’ɔ́ ńtyé. *Míŋ Nyìŋ tyé nà gwǒŋo pwó Ssé ye tʉ̀.

⁵⁷Pɔ́ jú’ pú’u, ńziŋe metuŋó mɔ́b, ńga’te lê tʉ̀, ńzyɛ́’ ḿbʉle ná yé,

⁵⁸éshwoŋo yé, ńdɔgɔ yé fó tÿǒsoŋ ńkẅɛ, ńzye lélɔg metóon ńtémte yé. Á gwaa gwɔ́, mbà pʉ̀a pie pɔ́ ně sẅiŋe Etien, ně sẅɛ menzsǒ fÿɔ́g mɔ́b, ńde’e mbwo tsɔ̌ mûɔ shùm gẅie mé tóŋo yé lê Sɔ̂l.

⁵⁹Pɔ́ la gwaa ně lɔgɔ metóon témte Etien, á sẅíŋte Ssé ńgɔɔn ngie: Cʉ̀apʉ̀a Yěsô, azẅìge yɔ́ɔn yɛ nà mbwo mú.

⁶⁰À la gɔɔn pú’u, ńkẅí’te ssé, ńga’te lê tʉ̀ ngie: Cʉ̀apʉ̀a, tè líe mmó gie pʉ̀a pɛ ne ńgÿo, ńgɔ́ɔn pú’u, ńkwé.