Read Ngiemboon Megàŋ ntúm 8 Bible Online

Megàŋ ntúm 8 - Ngiemboon bible

Megàŋ ntúm 8

¹Sɔ̂l tyé jʉ’ó, ńzẅíŋe mmó gie mé gÿǒ ná Etien Á la fó lyɛ̌’ ŋwɛ́, mé zye lényɛ pʉ̀a Kristo ngʉ̀ngʉ̀ á Yerósalem tɛ’. Pɔ́ pú ńkÿo, ésa jʉ’ ná shÿó Jẅidea lâ Samalîɛ tà é cʉ́’ pɔ́ ndà’ megàŋ ntúm Yěsô á Yerósalem.

²Á la gwaa gwɔ́, mbà tsɔ́ pà Yuda pie pɔ́ gÿo mekù’ Ssé ka ńnéŋe pfó Etien tsɛ̀ɛ lesyè, ḿbiŋ mbú ńdʉa legwé sé tɛ’.

³Sɔ̂l ne ńkaga yé pɔ́ tʉ̀ lépyága cú’tè pʉ̀a Kristo, ńně ńkúu mendá mendá éfa’a pʉ̀a Kristo, ńgwoon mbàŋa lâ pànzwě, ńnáa mé ma’a wɔ́b ndá tsǎŋ.

⁴Pʉ̀a Kristo pie pɔ́ la sa jʉ’, gʉa jʉ’ ntsèm tsɛ̀ɛ lá’, ńgiŋe ńtsẅii nkʉ̀ mbòŋo Yěsô.

⁵Filib gʉa tsɛ̀ɛ tsɔ́ tÿǒsoŋo Samalîɛ, ńkúu wó, ésá’a nò *Nzà’nkÿo.

⁶Menùɔ lá’ la ne ńcwoŋo ńzẅí’te shwóŋè gie á lɔ́ɔn ńkẅɛɛ ncwò Filib. Á nue pɔ́ la ne ńjú’u mé kíme menò mmɔɔn mmɔɔn mie à ne ńgÿo, ńgíŋe ne ńgyá tsɔ́ lê nÿɔ́g.

⁷Pʉ̀a tà ńgyɔ́ɔn pie *messé tepòŋ la ne ḿbue wɔ́b la ne ńzeŋe. *Messé tepòŋ gwaa ně fóo ná pɔ́b kẅɛɛ ńga’te lê tʉ̀. Megàŋa kwʉ́’te lâ pàpwɔ́’te mekwò tà ńgyɔ́ɔn la ne ńzeŋe yɔ́b.

⁸Mé lêen ńké ńgwɔ́ tsɛ̀ɛ yɛ̌ tÿǒsoŋ, ḿbú ńcʉ́’ʉ ńkága kǎg tɛ’.

⁹Atsɔ̌ nyìŋ gwɔ́ tÿǒsoŋo Samalîɛ ŋwɛ́, lezíŋ sé gwɔ́ le Símo. À yé fà’ gwɔ́ légÿo lekàŋ. Pʉ̀a Samalîɛ gwá ńdie yé ḿmɔɔn mɔɔn. Á gwá ngie aa máa nyìŋ,

¹⁰Pʉ̀a metsèm tà fó nà ngwàshùm ńgʉa ńkúu nà mezẅìŋe pʉ̀a ne ńcʉ́me nzèm yé ńgɔɔn ngie: Nyìŋ wɔɔn ée ssé yá gie mé tóŋo le máamaa metʉ̀ la.

¹¹Pɔ́ lɔ́ɔn ńcwoŋo ńzẅí’te shwóŋè yé, mélà’mie tà fó tàa lyɛ̌’, á ně ńdɔgɔ lekàŋ ńgÿo menò mie é kʉ’ʉ pʉ̀a kʉ’ʉ.

¹²Filib lêen ńké ńtó yé, ńne ńtsẅii nkʉ̀ mbòŋo Yěsô Kristo, ńne ńkyagte pá’ *lefùɔ Ssé ée pú’u. Pʉ̀a tà ńgyɔ́ɔn, mbàŋa pâ pànzwě zẅí’te shwóŋè yé, ńzẅíŋ, ńgÿo mé nu’u wɔ́b ntse.

¹³Mbɔɔ Símo ŋwɛ́ jú’, ńzẅíŋ yé, mé nu’u yé ntse. À tè gíŋe fó lejʉ́ŋ Filib sẅɛ’te nnɛ́ wɔ́, ńne ńgyá menò mmɔɔn mmɔɔn pâ ndaa gyá mie à lɔgɔ lezíŋ Ssé ńgÿo, é pú ńkʉ’ʉ yé tɛ’.

¹⁴Megàŋ ntúm Yěsô gÿo ńnéŋe Yerósalem, ńjú’ pá’ pʉ̀a Samalîɛ zẅiŋé shwóŋè Ssé, ńtúmo Piɛ pɔ́ Jâŋ mbwo pɔ́b.

¹⁵Pɔ́ gʉa ńkúu wó, ésẅíŋte Ssé nà twó pɛ̌ pʉ̀a Samalîɛ légwɔ́ gie e Ssé ge ńnéŋe Zẅìge yé ná pɔ́b,

¹⁶mélà’mie a Zẅìge Ssé la nyé tè kǔ nà tsoon tà’ nyìŋ wɔb. Mé la nu’u wɔ́b tsɛ̀ɛ ntse pɔ́ ndà’ ná lezíŋ Cʉ̀apʉ̀a Yěsô.

¹⁷Piɛ pɔ́ Jâŋ záb mbwo twó pɔ́b, à Zẅìge Ndʉalʉ̌a lêen ńké ńkúu ná pɔ́b.

¹⁸Símo gyá pá’ ngàŋ ntúm Yěsô ne ńzába mbwo twó pʉ̀a, à Zẅìge Ndʉalʉ̌a kúu ná pɔ́b, ḿbÿé wɔ́b nkáb,

¹⁹ńgwɔ pÿé ńgɔɔn ngie: Pi gÿo mèŋ n ku’ yɔ́ɔn pá’ ngwɔ́ n záb mbwo twó nyìŋ, à Zẅìge Ssé kúu ná ngàŋ.

²⁰Tá Piɛ gɔɔn né yé ngie: Tà pia nkáb ɔ̀ ŋwɛ́ pú ńdége, mélà’mie ɔ́ɔ pɛ́’ɛ̀ ńkwaŋa ngie à lɔɔn ńgwɔ́ ɔ̀ lɔg nkáb, ńjúu mmó gie e Ssé náa mbwo pʉ̀a nǎ.

²¹Ɔ̀ tè nyìŋ gẅie à lɔɔn ngwɔ́ pege teme nò wɔ́. Menò mie mé gÿo jʉ’ɔɔn, ɔ̀ tè nò mǒ gẅiin, mélà’mie ntʉ́m gú ée mvfò Ssé, é té tyé ndʉŋ ndʉŋ wɔ́.

²²Ké kúbe nkwaŋá tepòŋ gẅie ée ntʉ́m gú lɛ, ésẅíŋte Cʉ̀apʉ̀a ka à lɔɔn ńgwɔ́ á lege, ńnáa mbwo gù á ná pá’ ɔ́ zɔ̌ɔn ńkwaŋ pɛ́’ɛ̀ wɔ́.

²³Mèŋ n zɔɔn ne ńgyá ngie kègɔ́’ léen ńcʉŋte ntʉ́m ɔ̀. Ɔ̀ cʉ́’ nkwɔ̀ɔn nò tepòŋ.

²⁴Símo tsɔ́’ ngie: Kwà’ pi zɔ sẅíŋte Cʉ̀apʉ̀a ná twó yɔ́ɔn. À cʉa pú’u, ànò gie pi gɔɔn á le gÿo wɔ̀ɔn mɔ́.

²⁵Ngàŋ ntúm Yěsô yɛ̌ yépʉ́a lɔgɔ lésá’ nkʉ̀ mbòŋo Cʉ̀apʉ̀a shwóŋ pʉ̀a, ńgÿo mé zsé nyìŋ gẅie Yěsô aa wɛ̌, ńgwɔ piŋ nzèm né Yerósalem, ńgiŋe mánzsè ńtsẅii nkʉ̀ mbòŋo á tsɛ̀ɛ melá’ pà Samalîɛ.

²⁶Atsɔ̌ *Cÿɔ́’ Cʉ̀apʉ̀a gÿo ńtó, ńgɔɔn né Filib ngie: Lu ssé ńdɔg shÿó ntsíŋ ńgʉa, ńcwóŋo ná mánzsè gẅie à fóo Yerósalem ńgee Gaza. Mé té lwo ńcʉa wó wɔ́.

²⁷Filib gwóon ńdu ssé, ńcʉ́me mánzsè, ńgiŋ tà ńkẅɛɛ nà tsɔ̌ nyìŋ Etiopia, á gwɔ́ nyìŋ, mbà mé la shʉ́ʉ yé, mbà à ka gʉ̌a Yerósalem ńgu’te Ssé. À laa ŋwâlá’ twó mbúm, á lá’ manzwě gẅie à lɔ̌ɔn sá’a Etiopia. Lezíŋ lefùɔ manzwě ŋwɛ́ gwɔ́ le Kandas. Nyìŋ Etiopia ŋwɛ́ zɔ lɔ̌ɔn ḿbú ḿbyɛ́be ntaŋ fùɔ.

²⁸À la ne fóo Yerósalem ḿbiŋe, ńnéŋe tsɛ̀ɛ kélêg, ńne ńtóŋo ŋwà’ne Ntẅì nkʉ̀ Ssé Esǎya.

²⁹A Zẅìge Ssé gɔɔn né Filib ngie: Jwoŋte kélêg wɛ.

³⁰Filib jwoŋte kélêg tà ńkẅɛ́te, ńjú’ nyìŋ Etiopia ŋwɛ́ ne ńtóŋo ŋwà’ne *ntsẅì nkʉ̀ Ssé Esǎya. Filib zɛ́te yé ngie: Tà ɔ̀ tóŋo pɛ́’ɛ̀ tà ne ńjú’u mmó gie mé lɔgɔ ńgɔɔn?

³¹Á tsɔ́’ ngie: À lɔɔn ńgwɔ́ mèŋ n gÿo lêkɔ́ ńjú’ té gwɔ́ gie nyìŋ kyagté shwóŋó wɔ̀ɔn? Ńdeen ńké ńtóŋo Filib ngie à kwɔ́’ ńtó ńnéŋe lejʉ́ŋ yé tsɛ̀ɛ kélêg.

³²Á gwaa gwɔ́, mbà jʉ’e ŋwà’ne gie á ké ne ńtóŋo áa gie á gɔɔn ngie: Mé la ne ńdɔgɔ yé ńgee, á pú tè kẅág, ńgiŋ yé pɔ́ pá’ *njʉ̀njÿò gie mé lɔgɔ yé ńgee legwǎ mbab ńzẅe ńdáŋte pɔ́ pá’ mûɔ *njʉ̀njÿò gẅie mé ne ńkwóon menòŋ mé.

³³Mé la tém shʉ́ twó yé, ńzá’ ye ntsaŋ té poŋ. Ngwɔ́ mé kè ńgwaa kím ngẅɛ̀ yé, éfóo nzɔ̌ pá’ mé la zá’a yé zǎ’ ńzẅé.

³⁴Nyìŋ Etiopia ŋwɛ́ zɛ́te Filib ngie: Tsétsɔ́’, léen ńkyagte shwóŋó wɔ̀ɔn. A *ntsẅì nkʉ̀ Ssé gɔɔn nò pá’ɔɔn ná wɔ̌? À gɔɔn pɔ́ nà twó mbùm yé ka nà ye tsɔ́ nyìŋ ndyɛ̀’ɛ?

³⁵Filib lêen ńké ńgwɔ gɔɔn nò lélɔg ńtsẅi nkʉ̀ mbòŋo ná Yěsô, ńzye pɔ́ kwà’ ná yɔɔn jʉ’e ŋwà’ne ŋwɛ́.

³⁶Pɔ́ yé la nyé ńgiŋe giŋ, ńkẅɛɛ nà tsɔ́ jʉ’, ntse gwɔ́ wó. Nyìŋ Etiopia ŋwɛ́ gɔɔn né Filib ngie: Ntse wɛ, à lɔɔn ńgwɔ́ kɔ́ táte tà mé le wɔ̀ɔn ntse nu’u?

³⁷[Filib gɔɔn ngie: Ɔ̀ lɔɔn ḿbú ńzáb ntʉ́m ɔ́ ná Yěsô Kristo, mbà tsɔ́ mmó té ge taté gú wɔ́. Nyìŋ Etiopia wa tsɔ́’ ngie: N zẅǐŋ ngie Yěsô Kristo aa Míŋ Ssé,]

³⁸ńdeen ńtsẅi, mé gÿo kélêg tyé. Pɔ́ Filib pú sẅɛ́’, ńcwóŋ, ńkúu ntse. Filib lêen ńké ńnu’u yé ntse.

³⁹Pɔ́ la gwɔ́ tà fó ntse ńkẅɛ, a Zẅìge Cʉ̀apʉ̀a lɔgɔ Filib ńgʉa tà nyìŋ Etiopia tè gíŋe ńgyá yé wɔ́, ńké ńgwɔ gíŋe cʉ́me mánzsè, ńgiŋe ńkága kǎg.

⁴⁰Á gʉa ná Filib, á gwɔ gyá, ńgwɔ́ Azɔ́d, éfó wó, ńgwaa kúu Sezare, ńgiŋe ńtsẅii nkʉ̀ mbòŋo tsɛ̀ɛ metÿǒsoŋ ntsèm mie à tɔgɔ́ wó.