Read Ngiemboon Megàŋ ntúm 9 Bible Online

Megàŋ ntúm 9 - Ngiemboon bible

Megàŋ ntúm 9

¹Sɔ̂l kê ńgwɔ́ fʉ’ó, ńnyé nzèm *ngàŋa kwò Cʉ̀apʉ̀a, ńzá’a pɔ́ nkwɔ̀ɔn ngie à ge zẅéte wɔ́b, ńgʉa ńgyá Tándá pànuŋe pwɔ́’,

²ńzɛ́te yé ngie à ŋwe’e meŋwà’ne ńnáa mbwó yé. À lɔg ńgʉa Ndamas, ńnáa mbwo pàtyé mvfò ná *mendá cú’tè pà Yuda mie ée wó. Á zɛ́te pú’u, lélɔg ńgẅiin pá’ à lɔɔn ńtóo wó, ńgyá pʉ̀a pie pɔ́ ée ná mánzsè Yěsô ŋwɛ́, ka é gwɔ́ pɔ́ mbàŋa wɔ́, ka pànzwě wɔ́, á ku’u légwoonte wɔ́b, ńkwɛ́ɛ wɔ́b, ńdɔg ḿbiŋ ne Yerósalem.

³Sɔ̂l nyé ńgwɔ́ pɔ́ mánzsè, tà mbà à gʉa tà ńcʉ́’ʉ lékúu Ndamas, ńgwóon ńgyá tsɔ́ mmó fó tÿǒ lepwó, ḿbú ńkyɛ’ɛ yé tɛ’.

⁴Á tsɔ́’ɔ ńgwe ssé, ńjú’ ngyè nyìŋ gɔɔn né yé ngie: Sɔ̂l, Sɔ̂l, ɔ̀ tsɔ́’ɔ kwò yɔ́ɔn té poŋ mélà’a kɔ́?

⁵Sɔ̂l zɛ́te ngie: Aa gù wɔ̌ Cʉ̀apʉ̀a? Angàŋ tsɔ́’ ngie: Mèŋ n gee Yěsô. Ɔ̀ tsɔ́’ɔ pá’a pɔ́ kwò yɔ́ɔn té poŋ.

⁶Tá’, ké ńdu ssé ńgʉa le tÿǒsoŋ. Ɔ̀ ge kúu wó, mé shwóŋó gú mmó gie á ne ńzɛ́te ngie ɔ̀ gyo.

⁷Pʉ̀a pie pâ Sɔ̂l ke ńgwɔ́ nùɔ, tyé, ńjú’ yɛ̌ ngyè, ńké tè nyìŋ gyá, ḿbiŋ tè ku’u légɔɔn tsɔ́ nò wɔ́.

⁸Sɔ̂l lu ssé, ńnyɛ́’ nÿɔ́g mé tá’, à tè gíŋe ńgyá jʉ’ wɔ́. Mé kíbe pwó yé, ńdɔgɔ yé ńgʉa le Ndamas.

⁹Á kúu wó, ńnéŋe lyɛ̌’ tá té gyá jʉ’. À tè lǎga mmó jÿó, ńké tè ntse nú.

¹⁰Atsɔ̌ *ngàŋa kwò Cʉ̀apʉ̀a gwɔ́ Ndamas, mé tóŋo yé le Ananias. Cʉ̀apʉ̀a nyɛ́’ nÿɔ́g mé, á gyá yé, á tóŋo yé ngie: Ananias! Á tsɔ́’ ngie: Wɔ́ɔn wɔɔn me Cʉ̀apʉ̀a.

¹¹Cʉ̀apʉ̀a gíŋe ńgie: Ɔ̀ ge lu ssé gʉa ná lǎŋ gie mé tóŋo le Ndʉŋ ndʉŋ, é kúu ndá Jẅidas, é zɛ́te tsɔ̌ nyìŋ gẅie mé tóŋo yé le Sɔ̂l, á gwɔ́ mûɔ Tarso. Aa wó ne sẅíŋte Ssé.

¹²Mbà mèŋ n nyɛ̌ yé ngie tsɔ̌ nyìŋ ge tó mé tóŋo yé le Ananias. À kúu ndá, ńzáb mbwo twó yé tá à lêen ńké ńgíŋe ńgyá jʉ’.

¹³Ananias tsɔ́’ ngie: Cʉ̀apʉ̀a, mèŋ n zyě ńjú’ pʉ̀a tà ńgyɔ́ɔn kíme nyìŋ gẅie ɔ̀ gɔɔn yé lɛ. Mèŋ m bǔ ńzsé nò tepoŋ gie à ka gÿǒ nà pʉ̀a pú, á Yerósalem.

¹⁴À piŋ ńgwɔ gwɔ́ jʉ’ɔɔn pɛ́’ɛ̀, mbà metándá pànuŋe pwɔ́’ zɔ̌ tumó yé. Tà à gẅiin pá’ à lɔɔn ńgwɔ́ á gwoon ngwòŋ pʉ̀a metsèm pie pɔ́ tóŋo lezíŋ shú, ńkwɛ́ɛ wɔ́b.

¹⁵Tá’ Cʉ̀apʉ̀a gɔɔn mbwó Ananias pɔ́ ngie: Gʉ̌a ńgyá nyìŋ ŋwɛ́ gyǎ, ńtí nue aa mbwo mèŋ ńgwɔ́ kwà’ mmó fà’. À ge gÿo pʉ̀a pie pɔ́ té pà Israel wɔ́ pɔ́ zsé wɔ̀ɔn, mbɔɔ mefùɔ, tà mbɔɔ púɔ Israel.

¹⁶Kwà’ mèŋ n ge zɔɔn gÿo, à pú ńzsé nzẅìŋ ngɔ́’ gie à ge gyá é tí nò yɔ́ɔn.

¹⁷Ananias lêen ńké ńgʉa tà ńkúu ndá ŋwɛ́, ńzáb mbwo twó Sɔ̂l, ńgɔɔn né yé ngie: Afɛ̌ wɔ̀ɔn, Sɔ̂l, Cʉ̀apʉ̀a Yěsô zɔ tumó wɔ̀ɔn. Á Yěsô gẅie à ka nyɛ mbùm yé mbwo gù á fʉ̀’ gie ɔ̀ kaa mánzsè ne ńtóo lê jʉ’ɔɔn la. À tumó wɔ̀ɔn ngie n gʉa ńgÿo ɔ̀ gíŋe ńgyá jʉ’. A Zẅìge Ndʉalʉ̌a pú ńjÿó gú.

¹⁸Ncwò gwɔ́ cʉ́me ssé, atsɔ́ mmó lêen fó menÿɔ́g yé ńgwete ńgwá’a mega’á ssó la. Á gíŋ ńzye légyá jʉ’, ńdeen ńké ńdu ssé, mé nu’u yé ntse.

¹⁹Á gÿo ńgwɔ́ tà ḿpfɛ́ɛ mmó, metʉ̀ mé gíŋe ńtó. Sɔ̂l ńnéŋe Ndamas tsɔ́ nzẅìŋ melyɛ̌’, á tsetsɛ̀ɛ pʉ̀a Kristo.

²⁰Á gwɔ gwɔ, mbà à ka tè zẅí’te tá ńzye légwá ńkú mendá mecú’tè pà Yuda mie ée wó, ńne sá’a ngie Yěsô aa Míŋ Ssé wɔ́.

²¹Awɔ̌wɔ́ɔ jú’ pá’ à gɔɔn, ḿmɔɔn tɛ’. Mé ne ńgɔɔn ngie: Wɛ̂ gwɔ́ pɔ́ wɔ̌, à tè nyìŋ gwá gẅie à kaa Yerósalem ńgÿo pʉ̀a pie pɔ̀ ne sẅiŋte Ssé, ńtoŋo lezíŋ Yěsô, gyá ngɔ́’ wɔ́ le? À ka tè tóo jʉ’ɔɔn légwoon wɔ́b, ńkwɛ́, ńgʉa náa mbwo metándá pànuŋe pwɔ́’ wɔ́ le?

²²Sɔ̂l ké ńnyɛte ńgɔɔn nò pɔ́ tè pɔ́g. Ńcwoŋo ńda’te mbwo pà Yuda pie pɔ́ ée Ndamas ngie Yěsô aa *Nzà’nkÿo, ńgÿo pú’u, pɔ́ té gíŋe ńzsé tsɔ́ nò gie pɔ́ ge gɔɔn mbwo yé wɔ́.

²³É cʉa tsɔ́ nzẅìŋ lyɛ̌’, pà Yuda ŋwɛ́ zába légÿo mé zẅé Sɔ̂l,

²⁴ńcʉ́’ʉ ḿbyɛ́bɛ metwó nzsè mie mé pfó mǒ tá fóo tÿǒsoŋ ńkẅɛ, ḿbyɛ́bɛ tsẅɛ́’, ḿbyɛ́bɛ zsǒ. Légwɔ́ gie à lɔɔn ńcʉa mé zẅé yé. Tá Sɔ̂l vɔg ńzsé.

²⁵*Ngàŋa kwò yé gÿo ńgwɔ́ tsɔ̌ lêtsẅɛ́’, ńnéŋe yé tsɛ̀ɛ mâ kèkàg, éfó nà ndùm nká’ gẅie mé la lɔg ńkéle tÿǒsoŋ, ńdɔgɔ kèkàg ésẅí’i yé, ńtÿɔ́gɔ ná yetsɔ̌ nzèm á gʉa.

²⁶Sɔ̂l gʉa tà ńkúu Yerósalem, éfa’ shÿó lékúu tsetsɛ̀ɛ nùɔ pʉ̀a Kristo. Tá mânyìŋ ntsèm ne ḿbɔ́gɔ yé pɔ́g, ńzɔɔn ńgwaa gwɔ́, tsɔ̌ nyìŋ pú tè ne ńzẅíŋe ngie Sɔ̂l kěen ńcʉ́’ʉ kwà’ *ngàŋa kwò Kristo wɔ́.

²⁷Á gwɔ́ tà Panebâse lɔgɔ yé ńgʉa, ńtó ńnyɛɛ yé mbwo ngàŋ ntúm Yěsô, ńtóo ńnyɛ̌ yé, ḿbíte shwóŋó wɔ́b ngie Sɔ̂l ka gyǎ Cʉ̀apʉ̀a Yěsô á mánzsè Ndamas, tà kwà’ Cʉ̀apʉ̀a yé máŋwɛ́ gɔɔn nò mbwo yé, ńgíŋ shwóŋó wɔ́b pá’ Sɔ̂l ka lɔg lezíŋ Yěsô ńtsẅi nkʉ̀ mbòŋo á Ndamas té pɔ́g.

²⁸Á fó fʉ’ó, Sɔ̂l kú yé nùɔ ngàŋ ntúm. Pâ pɔ̌ zɔ̌ cʉ́’ʉ ńgwá ńgiŋe tsɛ̀ɛ tÿǒsoŋ Yerósalem. Sɔ̂l ne ńdɔgɔ lezíŋ Cʉ̀apʉ̀a Yěsô ńtsẅii nkʉ̀ mbòŋo té pɔ́g,

²⁹ńgyá pà Yuda pie pɔ́ shwóŋe Gelekia, pâ pɔ̌ zoŋo nò mǒ zoŋ tà pɔ́ cʉ́’ʉ fa’a shÿó pɔ́ lézẅé yé.

³⁰Mefɛ́ mefɛ́ gwɔ́ tà ńzsé pú’u, ńdɔgɔ Sɔ̂l ńgʉa Sezare, ńtsege, ńkúu wó ńgÿo á lɔg ye Tarso ńgʉa.

³¹Á gwɔ́ fʉ̀’ó, à cú’tè pʉ̀a Kristo ńnéŋe tsɛ̀ɛ sẅéte. Mé té gíŋe ńgege wɔ́b nà pàga ngwòŋ Jẅidea wɔ́. Tà mbɔɔ tsɛ̀ɛ pàga ngwòŋ Galilea tà mbɔɔ Samalîɛ. Pɔ́b metsèm ne ńtóonte mennɛ́ mɔ́b, ńkẅi’i ńtʉte, ńne ńjú’u ncwò Cʉ̀apʉ̀a. A Zẅìge Ssé piŋ ně ńkẅéte wɔ́b, ḿbiŋe ńgÿo e nùɔ wɔ́b kẅi’i ńgyɔ́ɔn.

³²Piɛ gÿo ńgwɔ́ tsɔ́ fʉ̀’ ne ńgwá ńgiŋe tsɛ̀ɛ lá’, ńgwɔ́ tsɔ́ lyɛ̌’, ńgʉa mbʉ̀a pʉ̀a Kristo pie pɔ́ tsẅé Lida,

³³ńkúu wó, ńgyá tsɔ̌ nyìŋ, mé tóŋo yé le Enée. Mbà à nuŋé kǔ guɔ ngù’ lefɔ̌ɔn, ńgwɔ́ ngàŋa kwʉ́’te.

³⁴Piɛ gɔɔn né yé ńgie: Enée, Yěsô Kristo gÿǒ ɔ̀ zeŋe. Lu ssé, kwà’ gù zɔ cwoŋte kǔ ɔ́. Enée gwóon ńdu ssé.

³⁵Ngwòŋ pʉ̀a metsèm pie é tsẅé Lida, tà mbɔɔ pàtsẅé tsɛ̀ɛ fú’u Saron, pú ńgyá yé, mbà à zeŋé, pɔ́ cʉ́’ yɔ́b pʉ̀a Cʉ̀apʉ̀a.

³⁶Atsɔ̌ mánzwě gwɔ́ Jope, lezíŋ sé gwɔ́ lé Tapita[5], ńdɔgɔ ńgɔɔn ngie nɔ̀ɔn ngáb. Á gwɔ́, mbà à la zẅíŋe nò Yěsô, ńgwɔ́ fʉ̀’ ntsèm ńgÿo pɔ́ nò mbòŋo, ḿbiŋe ńkẅéte pàte mmó.

³⁷Atsɔ́ guɔ gwoon yé, nà melyɛ̌’ ámɛ̌, á kwé. Mé sɔgɔ pfó yé, ńkaa ńkwɔ́’ɔ ná ndêg we tÿǒ, ńnuŋe wó.

³⁸Pʉ̀a Kristo jú’ ngie Piɛ aa Lida, pá’ ngʉ̀a léfó Lida ńkúu Jope piŋ ńké tè sag la, pʉ̀a Kristo pe Jope túm mbàŋa yépʉ́a. Pɔ́ gʉa ńgɔɔn né Piɛ ngie: Tsétsɔ’, sẅɛte ńtó tà ńkúu mbʉ̀a peg.

³⁹Piɛ lêen ńjú’, pâ pɔ̌ cʉ́me mánzsè té láte, ńgʉa tà ńkúu wó, mé lɔgɔ yé ńgʉa tsɛ̀ɛ lûm ndá gẅie aa ná ndêg we tÿǒ. Á kúu tsoló, mepfɔ̌g pànzwě metsèm tó ńcú’te lejʉ́ŋ yé, ńne ńdʉa, ńne ḿma’a mezìŋe ńnyɛɛ yé menzsǒ mie Tapita ka nyé ntentʉ́, ńtém ńná lé pɔ́b.

⁴⁰Piɛ fóo ndá ńkẅile pʉ̀a metsèm, ésẅɛ́’ ńkẅí’te ssé, ésẅíŋte Ssé, ḿbiŋ sele nnɛ́ ńdíe mpfó, ńgɔɔn ngie: Tapita, lu ssé. Tapita lêen ńnyɛ́’ nÿɔ́g, ńgwɔ́ tà ńgyá Piɛ, ńdeen ḿbʉ’ʉ nnɛ́ ńnéŋe ńnéŋe.

⁴¹Piɛ kíbe pwó yé, ńgÿo á lu ssé. Á leen ńké ńtóŋ pʉ̀a Kristo lâ mepfɔ̌g, ńnyɛɛ Tapita mbwo pɔ́b, á gwɔ́ ntentʉ́.

⁴²Ngwòŋ pʉ̀a pie é laa Jope, jú’u yɔɔn nò gie á cʉatě, pʉ̀a tà ńgyɔ́ɔn záb ntʉ́m ná Cʉ̀apʉ̀a Yěsô.

⁴³Piɛ ná’a ńtsẅé Jope, ńne ńnéŋe ndá tsɔ̌ Símo gẅie aa ngàŋ levfò ná lelɔ́ɔn *mengùb menɔ̀ɔn.