Read Ngiemboon Roma 10 Bible Online

Roma 10 - Ngiemboon bible

Roma 10

¹Mefɛ́ pɔ́ɔn, ammó gie m bǔ ne ńtsɔ́ɔn nê ngwòŋ ntʉ́m wɔ̀ɔn ntsèm, ḿbiŋ ńne ńdúɔ mbwo Ssé ńtí pà Yuda, á gwɔ́ ngie à gÿo pɔ́ tsẅɛ́.

²Mèŋ n cwoŋo ne ńzsé ngie, pɔ́ kwa’ ne ńkwoŋo léfa’a fà’ Ssé pɔ́ lê zeŋe nnɛ́, tá pɔ́ té ne ńjú’u kwà’ mánzsè wɔ́.

³Á gwɔ́ nue pɔ́ té ne ńkwoŋo lézẅíŋ ntí gie e Ssé lɔg ńgÿo pʉ̀a gwɔ́ ndʉŋ ndʉŋ mvfò yé wɔ́ mbɔɔ nue pɔ́ fa’a pɔ́ wɔb mánzsè. Pɔ́ té zẅíŋe mánzsè gẅie e Ssé fó mǒ ngie epʉ̀a ée ndʉŋ ndʉŋ mvfò yé wɔ́.

⁴Kristo la zɔɔn ńtó, nkẅɛ̌ ndá *lepʉ̌ lɔg ḿbumte[3]. Pú’u, nyìŋ záb ntʉ́m ná Kristo tá e Ssé cʉ́’ ńdíe yé á gwɔ́ pɔ́ ndʉŋ ndʉŋ mvfò yé.

⁵Pi jú’u mmó gie Mǒsê la ŋwe’e nà nò mánzsè gẅie aa nyìŋ léfó ná pá’ à kú’te *lepʉ̌, ńgwɔ́ ndʉŋ ndʉŋ mvfò Ssé. «À la gɔɔn ngie: Nyìŋ lɔɔn ńkú’te nò ntsèm gie *lepʉ̌ la tsẅi, tá mbà à ge zẅɛ́’ *lepʉ̌ é tsẅɛ́»

⁶Tá à nò nà mánzsè gẅie aa lézáb ntʉ́m ná Kristo tá ńgwɔ́ ndʉŋ ndʉŋ mvfò Ssé aa ndyɛ̀’ɛ. Mé la ŋwe’e tsɛ̀ɛ ŋwà’ne Ssé ngie: Tè gíŋe ńgɔɔn tsɛ̀ɛ ntʉ́m gú ngie: «Awɔ́ ge kwɔ́’ɔ tÿǒ lepwó»? Wɛ̂ aa lélɔg ńgɔɔn ngie wɔ́ ge gʉa fó wó é sẅí’i Kristo wó wɔ́.

⁷Tè ké ńgíŋe ńgɔɔn mbɔɔ ngie: «Awɔ́ ge gʉa lá’ mepfó ssé wɔ́ wɔ́»? Wɛ̂ aa lélɔg ńgɔɔn ngie wɔ́ ge gʉa é fó wó é kwé’e Kristo wó wɔ́.

⁸Ŋwà’ne Ssé gɔɔn pɔ́ ngie ashwóŋè Ssé áa lejʉ́ŋ gù, áa ncwò gù, ńgwɔ́ ntʉ́m gù. Yɛ̌ shwóŋè áa nò gie peg sá’a mbwo pʉ̀a ngie mé záb ntʉ́m ná Kristo.

⁹Á lɔgɔ ńgwɔ́ ngie ɔ̀ lɔɔn ńtyé mvfò lá’, éshʉa shʉa ńtsɔ́’ ncwò gú ńgɔɔn ngie Yěsô aa Cʉ̀apʉ̀a, ńgwɔ́ tsɛ̀ɛ ntʉ́m gù ńne ńzẅíŋe ngie e Ssé la gÿo á zíme ná legwé, mbà e Ssé ge gÿo gÿo ɔ̀ tsẅɛ́.

¹⁰Á nue nyìŋ záb ntʉ́m wé ná Kristo, e Ssé cʉ́’ ńdíe ngàŋ á gwɔ́ pɔ́ ndʉŋ ndʉŋ mvfò yé. Nyìŋ piŋ ńtyé tsetsɛ̀ɛ lá’ ńtsɔ́’ ncwò wé, éshʉa shʉa ńgɔɔn ngie aa nyìŋ Yěsô, e Ssé gÿo á tsẅɛ́.

¹¹Á lɔgɔ ńzɔɔn ńcʉ́me nà pá’ ŋwà’ne Ssé la gɔɔn ngie: «Nyìŋ lɔɔn ńzáb ntʉ́m ná yé, mbà shʉ́ té gÿo kúu ngàŋ wɔ́»

¹²Pú’u la, atsɔ́ tyɛ’te té gíŋe ńgwɔ́ tsetsɛ̀ɛ nyìŋ Yuda pɔ́ nyìŋ gẅie à tè nyìŋ Yuda wɔ́ wɔ́. Pɔ́ métsèm pú ńgẅiin pɔ́ tà’ Cʉ̀apʉ̀a wémɔ’ɔ́ gẅie à gÿo menò mbòŋo mé ná pʉ̀a metsèm pie é lʉa ńtóŋo yé.

¹³Á lɔgɔ ńcʉ́me ná pá’ ŋwà’ne Ssé gɔɔn ngie: «Nyìŋ lɔɔn ńdá’ ńdʉa ńtóŋo Cʉ̀apʉ̀a Ssé, mbà ngàŋ ge tsẅɛ́.»

¹⁴Tá’ ngwɔ́ pʉ̀a le záb ntʉ́m ná Cʉ̀apʉ̀a wɔ́, ńgÿo lêkɔ́ tá ńdʉa ńtóŋo yé? Ngwɔ́ pʉ̀a piŋ ńgÿo lêkɔ́ ńzáb ntʉ́m ná Cʉ̀apʉ̀a té gwɔ́ gie pɔ́ jǔ’ pá’ nyìŋ shwóŋó nò Cʉ̀apʉ̀a á mbwo pʉ̀a? Ngwɔ́ pʉ̀a piŋ ńjú’ pá’ mé shwóŋó nò Cʉ̀apʉ̀a lêkɔ́, té gwɔ́ gie nyìŋ gẅie à ge shwóŋó nò Cʉ̀apʉ̀a àa wó?

¹⁵Ngwɔ́ mé piŋ shwóŋó nò Cʉ̀apʉ̀a lêkɔ́ té gwɔ́ gie mé tǔm pʉ̀a pie pɔ́ ge shwóŋ? Á sẅé nò gie áa tsɛ̀ɛ ŋwà’ne Ssé, ńgwɔ́ ngie: Mântúm gwɔ́ tà ńtó, éshwóŋ pʉ̀a nò mbòŋo, lekág gwɔ́ ssé fʉ̀’ó.

¹⁶Tá’ pʉ̀a metsèm la tè jú’ nkʉ̀ mbòŋo ńzẅíŋ wɔ́. *Ntsẅì nkʉ̀ Ssé Esǎya la zɔɔn ńgɔɔn ngie: «Cʉ̀apʉ̀a, peg la gɔɔn nò jú à wɔ̌ ké ńzẅíŋ»?

¹⁷Pege lɔgɔ pá’ɔɔn ńgyá ngie, lézáb ntʉ́m ná Kristo à fóo pɔ́ nà nkʉ̀ gẅie nyìŋ jǔ’. Nyìŋ gwaa jú’ wɛ̌ kʉ̀, mbà nyìŋ tsẅǐ.

¹⁸Á fó ńgwɔ́ tà ńgwɔ́ gie ńgwɔ́ mèŋ n zɛ́te ngie tà pà Yuda la zɔɔn ńkwa’ ńjú’ wɔɔn nkʉ̀ wɔ́? N gyǎ ngie pɔ́ la jú’ jǔ’. Á gwɔ́ pá’ mé la ŋwe’e tsɛ̀ɛ ŋwà’ne Ssé ngie: Mé jǔ’ ngyè yɔb, pɔ́ ne shwóŋó nò Ssé á jʉ’ ntsèm ndùmo ssé tsetsá’. Anò gie pɔ́ gɔ̌ɔn gǐŋ giŋ tà ńkúu nzsòte tsetsá’.

¹⁹Pú’u n gíŋe ńzɛ́te ngie: Pà Yuda ée pá’ɔɔn, mbà pɔ́ la jú’u yɔɔn nò pɔ́ té liŋ keen? Pɔ́ la liŋ tá ńdʉ’ lʉ’. Á gwɔ́ pá’ Mǒsê la ŋwe’e ngie e Ssé gɔ̌ɔn né pà Yuda ngie: Mèŋ n ge gÿo gÿo lóŋ gẅi kwɔ́’ Ńtí pʉ̀a lá’ pie mèŋ n tè lɔgɔ wɔ́b ńtóŋo tsɔ́ mmó wɔ́ Mèŋ n ge lá’ gÿo nò gyáŋa gẅí Ńtí pà túm pie pi gɔɔn ngie legyè sɔ́b té wó wɔ́

²⁰*Ntsẅì nkʉ̀ Ssé Esǎya la fó shʉa shʉa ńgíŋe ńgɔɔn ngie e Ssé gɔ̌ɔn ngie: E pʉ̀a pie pɔ́ la zɔɔn fó tè ne fa’a wɔ̀ɔn mɔ́ Kéen ńzsé wɔ̀ɔn Mèŋ n ka piŋ ńnyɛ mbùm yɔɔn mbʉ̀a pʉ̀a pie Pɔ́ ka tè ne ńdúɔ tsɔ́ mmó mbwo mèŋ wɔ́.

²¹Tá ńgʉa nà pà Israel, e Ssé gɔɔn ngie: Mèŋ n zɔgɔ lyɛ̌’ ntsèm pɔ́ létsíŋe pwó ńdɔgɔ ńtóŋo wɔ́b, pɔ́ tʉʉ twó tʉ, ésa shÿó nò gie n gɔ̌ɔn sa.