Read Ngiemboon Roma 13 Bible Online

Roma 13 - Ngiemboon bible

Roma 13

¹Á ne ńzɛ́te ngie wɛ̌ nyìŋ wɔ́ tsetsɛ̀ɛ pi jú’ ncwò pʉ̀a pie é sá’a ngwòŋ, mélà’mie lesǎ’ ngwòŋ fóo pɔ́ mbwo Ssé. E Ssé zɔ la záb pàsá’ ngwòŋ pie ée wó.

²Pú’u la, ńgwɔ́ gie nyìŋ lɔɔn ńtʉʉ twó mbwo pàsá’ ngwòŋ, mbà à lɔgɔ ńdʉ’ʉ pɔ́ mmó gie e Ssé la záb. Yɛ̌ ntí pʉ̀a ee pú’u, ńdɔgɔ sele ńtóŋte ntsaŋ ńnéŋe twó pɔ́b.

³Pàgÿo nò mbòŋo té gẅiin lépɔ́g pàsá’ ngwòŋ wɔ́, pàgÿo nò tepòŋ zɔ̌ gẅiin lépɔ́gɔ wɔ́b. Ɔ̀ lɔɔn tè ne ńkwoŋo lépɔ́g pàsá’ ngwòŋ wɔ́, ɔ̀ gÿo nò mbòŋo, pɔ́ ná ngɔ́ɔnte jù.

⁴Á nue pɔ́ fa’a pɔ́ fà’a Ssé gẅie à ge tsóte gú légÿo nò mbòŋo. Tá’, ɔ̀ ke fʉa nò ɔ̀ ńnéŋe ḿbɔ́gɔ wɔ́b, á nue metʉ̀ mie e Ssé náa né pɔ́b, à tě ńnáa sẅɛɛ sẅɛɛ wɔ́. Pɔ́ lɔgɔ lénéŋ ngʉ̀ngʉ̀ á twó nyìŋ gẅie à fʉ̌a nò, ńdɔgɔ fa’a fà’a Ssé, ńgíŋe ńdɔgɔ ńnyɛɛ ngie e Ssé gyáŋa lóŋ nà megàŋ mefʉa.

⁵Áa mmó gie á gÿo tá á ne ńzɛ́te lésẅí’i mbùm ńnáa ssé mvfò pàsá’ ngwòŋ. Mé lě ńnáa á gwɔ́ pɔ́ ndà’ lélɔg ḿbɔ́g ngie Ssé ge gyáŋa lóŋ wɔ́, á gíŋe ńgwɔ́, mélà’mie ntʉ́m wégè ne ńzɛ́te ngie pege gÿo pú’u.

⁶Áa mmó gie á gíŋe ńgÿo tá pi ma’ ncùb ngwòŋ, á nue e Ssé zɔ la záb pàfà’a yɛ̌ fà’, pá’ pɔ́ ge cÿó nnɛ́ fa’a fà’ yɔ́b.

⁷Pú’u la, á gʉa nà pàsá’ ngwòŋ, pi náa mmó gie á ne ńzɛ́te ngie pi náa mbwo wɛ̌ nyìŋ wɔ́ né yé. E lɔɔn ńgwɔ́ ncùb ngwòŋ, pi náa mbwo nyìŋ gẅie à kẅé ncùb ngwòŋ, ńgwɔ́ nkáb gie *lepʉ̌ ne ńzɛ́te mbwo pi ná tsɔ́ nò, pi náa mbwo nyìŋ gẅie à kẅé yɛ̌. Pi jú’ ncwò nyìŋ gẅie á ne ńzɛ́te ngie mé jú’ ncwò wé, ńná mekù’ nyìŋ gẅie á ne ńzɛ́te ngie mé ná mekù’ mé.

⁸Tà nyìŋ gẅi gẅiin tsɔ̌ njǔ ndyɛ̀’ɛ tà ndí ndà’ lékwoŋo nyìŋ, ee njǔ gie mefɛ́ mefɛ́ gẅiin létoŋo tsetsɛ̀ɛ pɔ́b á nue nyìŋ lɔɔn ńkwoŋ petsɔ́ pʉ̀a, mbà à lɔgɔ ńkú’te *lepʉ̌ Ssé ntsèm.

⁹Pi zɔɔn ńzsé mbʉ̌ mie é gɔɔn ngie: «Tè gÿo gÿɛ́. Tè zẅé nyìŋ. Tè jʉ. Tè tÿɔ́g nÿɔ́g nà mmó nyìŋ». Lɔg ńkwá metwó mɔɔn mbʉ̌ tà mbɔɔ metsɔ́ gwɔ́ ngie: «Kwoŋo fɛ́ gù nyìŋ mesoŋ pá’ ɔ̀ kwoŋo twó mbùm jú».

¹⁰Nyìŋ lɔɔn ne ńkwoŋo fɛ́ we nyìŋ mesoŋ, mbà à tě ńdɔgɔ ńgÿo tsɔ́ nò tepòŋ ná ngàŋ wɔ́, à lɔgɔ pú’u, ńkú’te *lepʉ̌ Ssé ntsèm.

¹¹Pi kag tʉ̀, ńgÿo mɛ̌ menò á nue pi ne ńzsé kème njÿó gie pege ee mǒ. Yɔɔn áa fʉ̀’ gie á zɛ́te ngie pi zyeen. Á nue áa fʉ̀’ɔɔn, mbà fʉ̀’ gie Ssé ge gÿo pege tsẅɛ́, á pɔɔnté, ńtɔ́g pá’ á laa fʉ̀’ gie pege lá nyé ńzyete lézáb ntʉ́m nà Ssé.

¹²Letsẅɛ́’ zyě ńgiŋ, njÿó ne ńdʉ́a. Pú’u la, pege gwá’ mefà’ mie mé fa’a pɔ́ tsɛ̀ɛ nzěm, pege kaa shúm ncù sie mé tyé ná jʉ’e kyɛ̀’, ńdɔg ńdÿɔ́’ ncù.

¹³Pege gẅiin tsẅé mbòŋo ná pá’ á ne ńzɛ́te ngie mé gẅiin pú’u, fʉ̀’ gie jʉ’ ne fɔ́gɔ, ḿbɔ́ɔn lé pfɛ́ɛ mmó kà lé nú melù’ wɔ́ lê gʉ̀gʉ̀, ḿbɔ́ɔn lé pumo wɔ̌wɔ́ɔ pega pɔ̌ nuŋe nuŋe, ḿbɔ́ɔn shúm sie shʉ́ ge kúu wégè mǒ, ḿbɔ́ɔn lé tág melà’, ḿbɔ́ɔn kègɔ́’.

¹⁴Pi kaa le gwɔ́ we sẅé gẅie Yěsô Kristo Cʉ̀apʉ̀a wege náa, ḿma’. Tà pi gíŋe ńnéŋe ńkwaŋa nò ná shúm tepòŋ sie mbab nnɛ́ gi tsóte gẅi pi tsɔ́ɔn léná né yé.