Read Ngiemboon Roma 15 Bible Online

Roma 15 - Ngiemboon bible

Roma 15

¹Ammó gie pege gẅiin légÿo áa ngie pʉ̀a pie pɔ́ lɔgɔ nò Ssé ńzsé mmó gie pɔ́ ge gÿo, gẅiin lélɔg ntʉ́m mbòŋo ńkẅéte pʉ̀a pie pɔ́ té ne ńzsé pá’ pɔ́b wɔ́. Nyìŋ tè gẅiin légÿo mmó gie á poŋ pɔ́ yé wɔ́.

²Á zɛ́te ngie wɔ̌wɔ́ɔ tsetsɛ̀ɛ pege fa’ pá’ à ge gÿo mmó gie á poŋ petsɔ́ pʉ̀a, pú’u ńdɔgɔ ńtsɔ́ɔn nò mbòŋo ná pɔ́b, é lɔg kẅéte wɔ́b pɔ́ kẅi’i ńzáb ntʉ́m nà Ssé.

³Kristo la zɔɔn tè fa’ pɔ́ mmó gie á poŋ pɔ́ ndà’ yé wɔ́. Tà ńcʉ́’ pú’u, mbà à la zẅíŋe mmó gie mé gɔɔn tsɛ̀ɛ ŋwà’ne Ssé ngie: «Nzòon pà zoonte gú la gwe twó mèŋ».

⁴Á zɔɔn ńgwaa gwɔ́, mbà kɔ̀ɔkɔ́ɔ gie mé la lá’ ńtʉ́ njÿó ńŋwe’e tsɛ̀ɛ ŋwà’ne Ssé, mé lɔ́ɔn ńŋwe’e pɔ́ lélɔgɔ ńnéŋe ńzí’i wégè mmó, légwɔ́ gie á ge lɔg pá’ á ne ńkẅiŋte wégè, ḿbiŋ ne ńgÿo ngie tà pege kʉ́a, pege zsé ngie pege gẅiin mmó gie e Ssé la ka’a mbwo pege.

⁵Mèŋ ne ńdúɔ mbwo Ssé ngie yé gẅie à kẅiŋte wégè, ńgÿo ngie tà pege kʉ́a, á gÿo pi gẅiin tà’ nkwaŋá tsetsɛ̀ɛ pi, á lɔgɔ pú’u, ńgwɔ́ mmó gie Yěsô Kristo la zí’i gẅí.

⁶À cʉa pú’u, pi lɔgɔ tà’ ncwò, ńdɔgɔ tà’ ngyè ńgu’te Ssé Tá pà Cʉ̀apʉ̀a wege Yěsô Kristo.

⁷Pú’u la, wɔ̌wɔ́ɔ tsetsɛ̀ɛ pi wɔ́ zẅíŋ petsɔ́ pʉ̀a lejʉ́ŋ yé, ndʉŋ ndʉŋ pá’ Kristo la zẅíŋe gẅi lejʉ́ŋ yé, pi gÿo pú’u, epʉ̀a gyá ńgu’te Ssé.

⁸Áa mmó gie á la gÿo Kristo tó fa’a mbwo pà Yuda, légÿo menò mie e Ssé la ka’a mbwo pà mangʉa njʉ’ pɔ́b pumte. Ndʉŋ ndʉŋ pá’ kɔ̀ɔkɔ́ɔ gie e Ssé gɔɔn wɔ́ ké ḿbumte pumte.

⁹Kristo lɔ̌ɔn ńgíŋe ńtóo légwɔ́ gie epʉ̀a pie é té pà Yuda wɔ́ ge gu’te Ssé é tíi pòŋo ntʉ́m yé ná pɔ́b. Á zɔɔn ńgwaa gwɔ́ ŋwà’ne Ssé gɔɔn ngie: Áa mmó gie á ge gÿo mèŋ n tyé tsetsɛ̀ɛ pʉ̀a pie é té pà Yuda wɔ́ ńgu’te gú MÀbiŋ ńzɔb ńgu’te lezíŋ shú.

¹⁰Ŋwà’ne Ssé gíŋe ńgɔɔn ngie: Pi pʉ̀a pie é té pà Yuda wɔ́, pi kág. Pia pʉ̀a Cʉ̀apʉ̀a temte ḿbú ńkág.

¹¹Á gíŋe ńgɔɔn ngie: Pi melá’ mie é té pà Yuda wɔ́, pi gu’te Cʉ̀apʉ̀a. Á poŋ ngie pʉ̀a melá’ ntsèm pú ńkwé’e lezíŋ Cʉ̀apʉ̀a ńnáa tÿǒ.

¹²*Ntsẅì nkʉ̀ Ssé Esǎya la ŋwe’e yé ngie: Nyìŋ ná ngẅɛ̀ ndá Jesé ge lá’ tó. É gwɔ́ nyìŋ gẅie à ge sá’ pʉ̀a pie é té pà Yuda wɔ́ Pɔ́ tÿɔ́g nÿɔ́g mɔ́b pɔ́ ná yé, ńne ńzẅí’te ngie à gÿo pɔ́ gwɔ́ wó.

¹³Pú’u, mèŋ n ne ńtsɔ́ɔn ngie e Ssé gẅie yé zɔ gÿo tá mé ńnéŋe ne ńzẅí’te mmó, à cʉa ná pá’ pi záb ntʉ́m ná yé, ńgÿo lekág pɔ́ sẅéte à pú ńjÿó ntʉ́m gẅí, ńzsé ngie Zẅìge Ndʉalʉ̌a ge lɔg metʉ̀ mé é gÿo pi gwɔ́ kwà’ pà ńnéŋe ńzẅí’te mmó gie Ssé la ká’.

¹⁴Mefɛ́ pɔ́ɔn, kwà’ mèŋ n ne ńzsé ngie pi gẅiin pòŋo ntʉ́m tɛ’, ńne ńnyɛte ńzsé mmó gie á zɛ́te ngie mé zsé, ḿbiŋ ńku’u létÿɔ́gte mennɛ́ mí pi né pi.

¹⁵N ne zsé pú’u tá’, n gʉ̌a nà tsɔ́ mejʉ’ tsɛ̀ɛ yɔɔn ŋwà’ne, ńgyá ngie n ge nyɛte gɔɔn tsɔ́ menò, lélɔg ńkímte gẅi menò mie mé la zí’i gẅí. Mèŋ n gɔɔn pú’u, ńcʉa ná pá’ e Ssé la cÿó gem yɔ́ɔn,

¹⁶ńdɔgɔ wɔ̀ɔn ńgÿo nyìŋ gẅie à ge ne fa’a fà’ Yěsô Kristo á nùɔ pʉ̀a pie é té pà Yuda wɔ́. À la tsɔ́’ɔ wɔ̀ɔn légwɔ́ gie n ge cʉ́’ʉ tsẅii pɔ́ nkʉ̀ mbòŋo mbwo pɔ́b, Zẅìge Ndʉalʉ̌a lɔgɔ wɔ́b ńgÿo pʉ̀a Ssé, mèŋ n náa wɔ́b mbwo Ssé, pɔ́ gwɔ́ pá’ shúm pwɔ́’ sie é poŋ Ssé.

¹⁷Mèŋ n dɔg pá’ n da nnɛ́ ná Yěsô Kristo, ńku’u lélɔgɔ fa’a Ssé gie mèŋ n ne fa’a ńka’te.

¹⁸Á nue n dɔɔn ńgɔɔn kɔ́ wɔ́ gie n dǎ gÿo ná fa’a Ssé, mbà á gwɔ́ pɔ́ gie Kristo zɔ la lɔgɔ wɔ̀ɔn ńgÿo. Pú’u, légÿo pʉ̀a pie é té pà Yuda wɔ́ pɔ́ jú’ ncwò Ssé, á cʉa nà shwóŋè gie mèŋ n gɔɔn mbɔɔ ná mefà’ mie mèŋ fa’a,

¹⁹ńcʉa nà meliŋé menò lâ menò mmɔɔn mmɔɔn, ńgíŋe ńcʉa nà metʉ̀ Zẅìge Ssé. Yɔɔn ee ntí gie n da lɔg ńnyɛte ńtsẅi nkʉ̀ mbòŋo Kristo jʉ’ ntsèm, léfó Yerósalem ńgʉa ńkúu Ilirie.

²⁰Tá’, n da kag tʉ̀ léké ńtsẅi Nkʉ̀ Mbòŋo pɔ́ jʉ’ gie mé zɔ̌ɔn kaa Kristo wó kíme, ḿbɔ́gɔ lékwɛ́ ndá nà cÿǒ ndá gie tsɔ̌ nyìŋ ndyɛ̀’ɛ ka nuŋe.

²¹N dɔ̌ɔn ńdɔgɔ pú’u, ńgÿo pá’ ŋwà’ne Ssé ne ńgɔɔn ngie: Pʉ̀a pie mé la tè shwóŋó wɔ́b nò ná yé wɔ́ pɔ́ ge záb lejÿɔ́g ná yé. Epʉ̀a pie pɔ́ la tè jú’u tsɔ́ nò ná yé wɔ́, ge gÿo jú’.

²²Legwǎ ńgiŋ ńtsẅi Nkʉ̀ Mbòŋo áa mmó gie á la vele wɔ̀ɔn mengʉ̀a tà ńgyɔ́ɔn létó ńgyá gẅí.

²³Tá á ké ńgwɔ́ nà fʉ̀’ɔɔn, mbà mèŋ n kéen ḿmaga fà’ yɔ́ɔn ná mɔɔn mepàga ngwòŋ, ée fʉ̀’ɔɔn ńgwɔ́ mengù’ tà ńgyɔ́ɔn pá’ mèŋ n ne ńtsɔ́ɔn létó ńgyá gẅí.

²⁴Mèŋ n ké ne ńgyá fʉ̀’ɔɔn ngie mèŋ n ge gwɔ́ gʉa Spana, étóo lá’ pi. Mèŋ n zɔɔn ne ńtsɔ́ɔn légwɔ́ cʉa, ńgyá gẅí, pi kẅéte wɔ̀ɔn légʉa wó. Á ge gÿo wɔ́ lêkɔ́ wɔ́ pege gÿo ḿbú ńná’a ńnéŋe méjʉ’.

²⁵Tá’ áa nà fʉ̀’ɔɔn mèŋ n ne ńgee nê Yerósalem léná nkáb mbwo pʉ̀a Ssé pie ée tsɛ̀ɛ yɛ̌ tÿǒsoŋ.

²⁶Á nue pʉ̀a Kristo pie ée Makedonia mbɔɔ pe Akay ka gyǎ ngie pɔ́ ge ma’ nkáb lɔg kẅéte pʉ̀a Kristo pie ée Yerósalem, ńgwɔ́ mepóŋ.

²⁷Pɔ́ zɔ ka pʉlé ńgyá pú’u tá’, é zɔɔn ńgwɔ́ pɔ́ njǔ gie pɔ́ gẅiin létoŋo mbwo pɔ́b. Á nue á lɔɔn ńgwɔ́ gie pʉ̀a pie é té pà Yuda wɔ́ kéen ńgẅiin yɔ́b mmó nà shúm sie Ssé la pu’ ssé ńná pɔ́ né pà Yuda, mbà pɛ̌ pʉ̀a gẅiin pá’ pɔ́ ge gʉa ná shúm sie ée sɔ́b, é pi tsɔ́ é ná mé lɔg ńkẅéte pà Yuda.

²⁸Mèŋ n ge gÿo gwɔ́ tà gʉa cʉ́me yɔɔn nkáb gie mé ka ma’ lɔɔn, é gʉa Spana, é gwɔ́ gʉa cʉa yé lá’ pi.

²⁹M biŋ ne ńzsé ngie n ge gÿo tó, e Ssé cʉa ná mèŋ, ńnéŋ mbʉ́lè ná pi tɛ’.

³⁰Mefɛ́ pɔ́ɔn, á cʉa ná Cʉ̀apʉ̀a wege Yěsô Kristo mbɔɔ ná pá’ a Zẅìge Ndʉalʉ̌a ne ńgÿo pege gẅiin nkwòŋe tsetsɛ̀ɛ pege la, mèŋ sẅíŋte gẅi ngie pi lɔgɔ lésẅíŋte Ssé ńkẅéte wɔ̀ɔn. Pi sẅíŋte Ssé nà twó yɔ́ɔn, ńcʉ́’ʉ lésẅíŋte, ésẅíŋte lê ngwòŋ ntʉ́m gẅi ntsèm,

³¹légwɔ́ gie n tè gwe ná mbwo pʉ̀a Jẅidea pie pɔ́ tě ńzába ntʉ́m ná Kristo wɔ́ wɔ́, ńgíŋ sẅíŋte Ssé ngie à gÿo pʉ̀a Kristo pie ée Yerósalem lɔg ntʉ́m mbòŋo ńkẅé mmó gie ń dɔgɔ ńgee wó lékẅéte wɔ́b.

³²Pú’u, n gwɔ́ tóo mbʉ̀a pi, ntʉ́m wɔ̀ɔn ne ńkága, e Ssé zẅíŋ, mbà n ge nèŋe tsetsɛ̀ɛ pi, é zẅɛ́te.

³³Á poŋ ngie Ssé gẅie à náa sẅéte à ne ńgwɔ́ né pi metsèm. *Amen.