Read Ngiemboon Roma 16 Bible Online

Roma 16 - Ngiemboon bible

Roma 16

¹N cʉmé fɛ́ wege we manzwě gẅie mé tóŋo yé lé Febée á mbwo pi, à fa’a mefà’ tsɛ̀ɛ ndà cú’tè pʉ̀a Kristo gie aa tÿǒsoŋo Senkeré.

²Pi lɔg lezíŋ Cʉ̀apʉ̀a ńkúe yé nà ntí gie pʉ̀a Kristo gẅiin lékúe nyìŋ pú’u. Pi tyé pá’ yɛ̌ nò wɔ́ lɔɔn ńcʉa yé, tà á ga’te mbwo pi, pi kẅéte yé mǒ. Kwà’ yé léen ńkẅéte pʉ̀a tɛ’, ńgíŋ ńkẅéte wɔ̀ɔn yɔ́ɔn.

³Pi tsyɛ’te Piriska pɔ́ Akilas ńná né mèŋ, ée pʉ̀a pie pega pɔ́ pǔ fa’a fà’a Yěsô Kristo.

⁴Á ka cʉ́’ʉ méjʉ’ pɔ́ kwé nà twó yɔɔn. Mèŋ zɔ tè ndà’ nyìŋ gẅie yɔɔn nò ńnéŋe ḿboŋo yé wɔ́. Á gíŋe ḿboŋ mbɔɔ mecú’tè pʉ̀a Kristo mie ée tsɛ̀ɛ melá’ mie é té me pà Yuda wɔ́.

⁵Pi gíŋe ńtsyɛ’te cú’tè pʉ̀a Kristo gie áa ndá pɔ́b. Pi tsyɛ’te Epenete, á fɛ́ wɔ̀ɔn we ntʉ̀ nzẅìŋ. Àa ndùŋ mvfò nyìŋ lézáb ntʉ́m ná Kristo á tsɛ̀ɛ pàga ngwòŋ Azia.

⁶Pi tsyɛ’te Malîɛ. À ka téŋe zì’i tɛ’ ńtí gẅí.

⁷Pi tsyɛ’te Andelonikus pɔ́ Zunias. Pega pɔ́ pǔ ńgwɔ́ pà Yuda, mbà pega pɔ́ ka pǔ ńgwɔ́ ndá tsǎŋ. Pɔ́ ée tsetsɛ̀ɛ megàŋ ntúm mé kwoŋo nò yɔ́b tɛ’. Pɔ́ la zɔɔn ḿvɔg ńgwɔ́ pʉ̀a Kristo tá mèŋ n gÿo ńgwɔ́ yɔ́ɔn.

⁸Mèŋ n gǐŋ ńtsyɛ’te Ampliatus. Àa fɛ́ wɔ̀ɔn we ntʉ̀ nzẅìŋ nzèm Cʉ̀apʉ̀a.

⁹Pi tsyɛ’te Wirbiŋ, pega pɔ́ zɔ pǔ fa’a fà’a Kristo, ńtsyɛ’te mbɔɔ fɛ́ wɔ̀ɔn we ntʉ̀ nzẅìŋ Stakis.

¹⁰Pi tsyɛ’te Apelès, à ka nyɛ̌ ngie àa kwà’ nyìŋ Kristo. Pi tsyɛ’te pʉ̀a ndá Aristobul.

¹¹Pi tsyɛ’te *Herôdine. Àa nyìŋ Yuda pá’ mèŋ. Pi tsyɛ’te pʉ̀a ndá Narsise pie é la nnɛ́ ná Cʉ̀apʉ̀a.

¹²Pi tsyɛ’te Tirifene pɔ́ fɛ́ we Tirifose, ée pànzwě pie pɔ́ fa’a fà’a Cʉ̀apʉ̀a tɛ’. Pi tsyɛ’te Pɛrsid. Àa ntʉ̀ nzẅìŋ fɛ́ wɔ̀ɔn we manzwě. À ka fa’a yé fà’a Cʉ̀apʉ̀a tɛ’.

¹³Mèŋ n tsyɛ’té Rẅifẅis. Àa nyìŋ gẅie Cʉ̀apʉ̀a ka tsɔ’ɔ́ yé á piŋ ńnéŋe twó nà fà’ yé tɛ’. Pi gíŋ ńtsyɛ’te mbɔɔ má we, má we ŋwɛ́ gǐŋ ńgwɔ́ má wɔ̀ɔn yɔ́ɔn.

¹⁴Pi tsyɛ’te Asinkelite, lê Flégon, lê Hermes, lê Patfobas, lê Hermas, mbɔɔ mefɛ́ mefɛ́ pie pâ pɔ́ gwɔ́.

¹⁵Pi tsyɛ’te Filolog, lê Zulius, lê Neré tà mbɔɔ fɛ́ we wé manzwě, ńgÿo Olimpas, tà mbɔɔ pʉ̀a Kristo metsèm pie pâ pɔ́ gwɔ́.

¹⁶Pi tsyɛ’te mennɛ́ mí, ńcʉ́’ʉ létsyɛ’te, ńtáŋte mennɛ́ mí nà ntí ye pʉ̀a Ssé. Mecú’tè pʉ̀a Kristo metsèm ná wɔɔn shÿó pǔ ńtsyɛ’te gẅí.

¹⁷Mefɛ́ pɔ́ɔn, mèŋ n ge gɔɔn né pi ngie pi pɔ́ɔn pʉ̀a pie é ma’a fàgte tsetsɛ̀ɛ pi, ńdɔgɔ pá’ pɔ́ lʉ’ʉ mmó gie mé la zí’i gẅi ná Kristo, ńgÿo pʉ̀a fʉa mánzsè. Pi kÿo pɛ̌ pʉ̀a.

¹⁸Á nue yɛ̌ ntí pʉ̀a tě fa’a fà’a Cʉ̀apʉ̀a wege Yěsô Kristo wɔ́, pɔ́ tsɔ́ɔn pɔ́ lepfòm sɔ́b. Pɔ́ lɔgɔ shwóŋè mbʉ́lè pʉlé mbɔɔ shwóŋè lʉte, éfʉte pʉ̀a pie legyè sɔ́b vɔ́g vɔ̌g.

¹⁹Á gʉa ná pi, pʉ̀a metsèm ne ńzsé ngie pi jú’ ncwò Cʉ̀apʉ̀a. Tà ntʉ́m wɔ̀ɔn ńnéŋe nkág kág nà mmó gie pi ne ńgÿo. Tá’ mèŋ n ne ńtsɔ́ɔn ngie pi gẅiin zsě nò mbòŋo lélɔg ńgÿo nò mbòŋo, ḿbiŋ ńnéŋe ńgwɔ́ pʉ̀a pie pɔ́ lɔgɔ lékÿo nò tepòŋ ńgwɔ́ pàtè *lɔ̌’.

²⁰Pi lɔɔn ńgÿo pá’ɔɔn, mbà e Ssé gẅie à náa sẅéte, ge ma’a Sátà ssé, pi lɔg mekwò ńnéŋte yé. Cʉ̀apʉ̀a wege Yěsô Kristo ne ńgwɔ́ né pi[6].

²¹Timoté gẅie peg yé fa’a, à tsyɛ’té gẅí. Lusius mbɔɔ Jasoŋ mbɔɔ Sosipatɛɛ, pie pega pɔ́ pǔ ńgwɔ́ pà Yuda pɔ́ tsyɛ’té gẅi yɔ́b.

²²Mèŋ Tertilus gẅie mé tsẅǐ ngie mèŋ n ŋwe’e yɔɔn ŋwà’ne, n dɔ̌g pá’ n da nnɛ́ ná Cʉ̀apʉ̀a gẅie à léen ńtemte wégè, ńtsyɛ’te gẅi yɔ́ɔn.

²³Gaẅis gẅie à kúe wɔ̀ɔn, à tsyɛ’té gẅí, àcú’tè pʉ̀a Kristo áa ndá yé. Eraste, gẅie aa tÿǒsoŋ ńgwɔ́ ndè’e nkáb, mbɔɔ fɛ́ wege Kartẅis pɔ́ pǔ ńtsyɛ’te gẅí. [

²⁴Cʉ̀apʉ̀a wege Yěsô Kristo ne ńgwɔ́ né pi metsèm. *Amen]

²⁵Pege gu’te Ssé. Yé zɔ ku’u légÿo pi tʉte tʉte nzèm yé. Nkʉ̀ Mbòŋo gẅie mèŋ n tsẅii é gɔɔn nò ná Yěsô Kristo, é ge ne fa’a yɛ̌ fà’. E Ssé lɔgɔ wɔɔn Nkʉ̀ Mbòŋo, ńnyɛɛ mmó gie à la zába ná Kristo, mbà á ka zɔ̌ɔn ńgwɔ́ pɔ́ lelyěen tà fó taa mángù’.

²⁶Á piŋ ńgwɔ́ fʉ̀’ɔɔn, mbà á kéen ńkẅɛɛ mángyɛ̌. Pá’ Ssé la tsẅi la, mé ée fʉ̀’ɔɔn ne fóo ná mmó gie pà *ntsẅì nkʉ̀ Ssé la ŋwe’e, ńne sá’a légwɔ́ gie pʉ̀a pie é té pà Yuda wɔ́ ge zsé Kristo, é záb ntʉ́m ná yé, é jú’ ncwò wé.

²⁷E Ssé zɔ zsé nó gílé yé. Pege cʉa ná Yěsô Kristo ńgu’te yé nà ngù’ nkɔ́ɔn nê nkɔ̌ɔn. *Amen.