Read Ngiemboon 1 Korento 10 Bible Online

1 Korento 10 - Ngiemboon bible

1 Korento 10

¹Mefɛ́ pɔ́ɔn, mèŋ n te ne ńkwoŋo ngie pi lege nò ná mmó gie á la gÿo metá pégè á fʉ̀’ gie pâ Mǒse la ne ńgiŋe wɔ́, pɔ́b métsèm la gyá melɔ́ɔn Ssé lejʉ́ŋ pɔ́b. Pɔ́b métsèm la tɔ́gɔ tsɛ̀ɛ ntse té pàa,

²ńdɔg pú’u, ńkẅé ntse, ńcʉ́’ pʉ̀a Mǒsê.

³Pɔ́b métsèm la púte ńjÿó tà’a twó mmó léjÿó gie á lɔ́ɔn fóo mbwo Ssé.

⁴Mbɔɔ pá’ pɔ́ la gíŋe ḿbúte ńnú ntse gẅie é gíŋe fóo mbwo Ssé. Pɔ́ lɔ́ɔn ńnúu wɛ̌ ntse é fóo ná máa tóon gẅie e Ssé la gÿo ngie à gwɔ́ nzèm pɔ́b. Wɛ̌ máa tóon laa pú’u, ńdɔgɔ ńgwɔ́ Kristo.

⁵Pɔ́ la tsɛ ńgyá mɔɔn menò tá’ lelÿò pʉ̀a tsetsɛ̀ɛ pɔ́b tè gÿo mmó gie á poŋ Ssé wɔ́. Áa mmó gie á la gÿo pɔ́ gwete nkwòŋo tsẅɛ ńkwéte.

⁶Mɔɔn menò la gÿo pá’ɔɔn pá’ pege ge fó mǒ é laga twó yégè. Tá à cʉa pú’u, pege e le tsɔ́ɔn shúm tepòŋ pá’ pɔ́b wɔ́.

⁷Á gíŋe tè ne ńzɛ́te ngie pi gu’te shúm sie mé gu’te ngie ée messé wɔ́. Á piŋ ńgwɔ́ mmó gie tsɔ́ pʉ̀a tsetsɛ̀ɛ pɔ́b la gÿo. Á fó mǒ mé ŋwe’e tsɛ̀ɛ ŋwà’ne Ssé ngie: «Alá’ sẅɛ̌’ ńnéŋe ssé, ḿpfɛ́ shúm, ńnúu mmó. Afʉ̀’ ku’ pɔ́ lu ssé ńgÿo megʉa».

⁸Pege pɔ́ɔn lékẅɛ́te wɛ̌ nyìŋ wɔ́ pega pɔ́ nuŋe nuŋe. Á piŋ ńgwɔ́ pá’ tsɔ́ pʉ̀a tsetsɛ̀ɛ pɔ́b la gÿo. Tà á tyé tà’a lyɛ̌’ nyìŋ mesoŋ ntsá’ ntsɔ̀b tá nê móm mbʉ́a gwete tsetsɛ̀ɛ pɔ́b ńkwéte.

⁹Pege pɔ́ɔn létsiŋe Cʉ̀apʉ̀a tsiŋé. Á piŋ ńgwɔ́ pá’ tsɔ́ pʉ̀a tsetsɛ̀ɛ pɔ́b la gÿo tá menú tsɔ́gte wɔ́b pɔ́ kwéte.

¹⁰Tà pi zẅɛ́te ná Cʉ̀apʉ̀a. Á piŋ ńgwɔ́ pá’ tsɔ́ pʉ̀a tsetsɛ̀ɛ pɔ́b la gÿo. Á cʉa pú’u, *cÿɔ́’ Ssé gẅie aa ńzẅéte pʉ̀a tó ńzẅéte wɔ́b.

¹¹Mɔɔn menò la gÿo wɔ́b pá’ɔɔn ńdɔgɔ ńnyɛɛ fʉ̀’ʉ nò. Mé la piŋ ńŋwe’e pá’ pege pie pege cʉ̌’ ńgwɔ́ pɔ́ nà fʉ̀’ʉ nzsòté lɔɔn ge fó mǒ zsé nò.

¹²Pege fǒ ná yɔɔn nò ńjú’ ngie lenyě ńgee ge ńzɔb, à tè poŋ[6]

¹³Menkwà’te mie é ka kúu gẅí, ée mie é kúu nyìŋ mesoŋ. E Ssé gẅie à tè gɔɔn nò ḿbiŋ ńkúbe wɔ́, à tè zẅíŋ ngie nkwà’te kúu gẅi tà ńgá’ metʉ̀ mí wɔ́. Nkwà’te ge gwɔ́ tà tó, à náa gẅi metʉ̀ lélɔg shÿɔg ḿbiŋ ńnáa gẅi shÿó lélɔg fó tsoló ńkẅɛ.

¹⁴Á gʉa nà menò mɔɔn ntsèm, mbà meshǔ pɔ́ɔn pentʉ̀ nzẅìŋ, tà pi gẅiin tsɔ́ nò ná legu’te shúm sie mé gu’te ngie ée messé.

¹⁵Mèŋ n gɔɔn nò pá’ɔɔn ná ntí gie à lɔɔn ńgwɔ́ mé gɔɔn nò mbwo pʉ̀a pie pɔ́ sáŋa nò. Kwà’ pi líe gí tá ńgyá kà nò gie mèŋ n gɔɔn áa nénʉ́ wɔ́?

¹⁶Pege ne ńnúu ntú’ melù’ gie pege nǎ ndǎg mbwo Ssé mǒ, pege tě ńdɔgɔ pú’u, ńtemte ná metse Kristo wáa? Mbelég gie pege pwɔ́’te ńgaba, e tě ńtemte wégè ná mbab nnɛ́ Kristo wáa?

¹⁷Pá’ tà’ mbelég wémɔ’ɔ́ zɔɔ ssé la, pege metsèm púte ḿpfɛ́ɛ wɛ̌ tà’ mbelég á lɔgɔ ńnyɛɛ ngie pege puté ńgwɔ́ pɔ́ tà’ mbùm nnɛ́ yémɔ’ɔ́.

¹⁸Pi líe pà Israel tá ńgyá, áa tsetsɛ̀ɛ pɔ́b, pʉ̀a pie pɔ́ pfɛ́ɛ yɔ́b mbab ná shúm pwɔ́’ sie mé lɔ̌g ńtóo mvfò Ssé, pâ Ssé gẅie jʉ’e pwɔ́’ áa yé lɔgɔ pú’u, ńtemte ńgwɔ́ tà’ nyìŋ.

¹⁹N dɔgɔ pá’ɔɔn n gɔɔn ngie kɔ́ nà mbab gie mé náa nà shúm sie mé gu’te ngie ée messé? Mbab ŋwɛ́ zɔɔn fa’a tsɔ́ fà’? Messé ŋwɛ́ zɔɔn ńgwɔ́ wó?

²⁰Ngǎŋ! É té wó wɔ́. Mèŋ n gɔɔn pɔ́ ngie pʉ̀a pie é té Ssé zsé gwá’a pwɔ́’ pɔ́ mbwo *messé tepòŋ. Pɔ́ téen ńnuŋe pwɔ́’ mbwo Ssé wɔ́. Mèŋ n te ne ńkwoŋo ngie pi lâ *messé tepòŋ temte wɔ́[7].

²¹À lɔɔn ngwɔ́ pi é le gwɔ́ pʉ̀a pie pi núu ntú’ Cʉ̀apʉ̀a, ńgíŋe ńgwɔ́ pʉ̀a pie pɔ́ núu ye *messé tepòŋ wɔ́. Ngwɔ́ pi é le gwɔ́ pʉ̀a pie pi jÿó shúm léjÿó Cʉ̀apʉ̀a, ńgíŋe ńgwɔ́ pʉ̀a pie pɔ́ jÿó shúm léjÿó *messé tepòŋ wɔ́.

²²Pege lɔɔn ńgÿo pú’u, mbà pege tě ńdɔgɔ fa’a ngie lóŋ Cʉ̀apʉ̀a gyáŋ ńtí wégè wɔ́? Tsye pege tʉ ńcʉa yé ka?

²³Tsɔ́ pʉ̀a ée tsetsɛ̀ɛ pi, ńne ńgɔɔn ngie ńgwɔ́ nyìŋ gÿo kɔ̀ɔkɔ́ɔ wɔ́ té pɔ́g *lepʉ̌. Áa nò tá’, eshúm ntsèm té kẅéte. Áa nò ngie ńgwɔ́ nyìŋ gÿo kɔ̀ɔkɔ́ɔ wɔ́ té pɔ́g *lepʉ̌, tá’ shúm ntsèm sie mé gÿo é té kẅéte pʉ̀a lékẅi’i ńzáb ntʉ́m nà Ssé wɔ́.

²⁴Tà nyìŋ fà’ pɔ́ mmó gie á ge kẅéte pɔ́ twó mbùm yé. Nyìŋ fa’a mmó gie á ge kẅéte fɛ́ we.

²⁵Á gʉa nà nò mbab, mbà pi tóo metʉ̌a ńgyá mbab pi jú, ńkúu mbʉ̀a ḿpfɛ́ té gẅiin tsɔ́ nkwaŋá, té zɛ́te tsɔ́ nò.

²⁶«Ŋwà’ne Ssé gɔɔn ngie: Njÿó tà mbɔɔ shúm tsèm sie ée tsoló zɔɔn ńgwɔ́ pɔ́ mbwo Cʉ̀apʉ̀a».

²⁷Nyìŋ gẅie à tè nyìŋ Kristo wɔ́ lɔɔn ńtóŋo gẅi ndá ye ngie pia pɔ̌ jÿó mmó, pi zẅíŋ, pi tóo wó mé náa kɔ́ né pi wɔ́, pi jÿó té gẅiin tsɔ́ nkwaŋá, té zɛ́te tsɔ́ nò.

²⁸Tá ńgwɔ́ gie nyìŋ ké ńgɔɔn ngie mbab yɔɔn, ee pá’ɔɔn ńgwɔ́ pfwɔ́’ɔ mbab gie mé nǎ nà shúm sie mé gu’te ngie ée messé, pi lêen ńké ńdʉ’ʉ lépfɛ́, ńdʉ’ʉ ńtí nyìŋ gẅie à shwoŋó gẅi jʉ’ gie e fóo lê wó. Mbɔɔ légwɔ́ gie ntʉ́m té jú’ kékáŋ tsoló wɔ́.

²⁹Mèŋ n tě ńgɔɔn pá’ɔɔn ngie e gú ntʉ́m zɔ̌ ge jú’ kékáŋ wɔ́, n gɔɔn pɔ́ we nyìŋ gẅie à shwoŋó gú. Ńgwɔ́ ɔ̀ zɛ́te ngie mélà’a kɔ́ ɔ̀ gÿo mmó pɔ́ nà gù lekwòŋ, ntʉ́m tsɔ̌ nyìŋ ndyɛ̀’ɛ piŋ ńŋaga yɛ̌ mmó?

³⁰Mèŋ n dɔɔn ńgwaa jÿó mmó léjÿó, ńzɔɔn ḿvɔg ńná ndǎg mbwo Ssé, mbà mélà’a kɔ́ nyìŋ ndyɛ̀’ɛ ge tém shʉ́ ná mèŋ tí yɛ̌ mmó tá mbà mèŋ n gwaa jÿó, ńná ndǎg mbwo Ssé?

³¹N ge gɔɔn yɔ́ɔn ngie, pi lɔɔn ne ńjÿó pɔ́ mmó, kà ne ńnúu pɔ́ mmó wɔ́, kà ne ńgÿo pɔ́ kɔ́ wɔ́, pi gÿo sɛ̌ shúm ntsèm pɔ́ nà ntí gie mé ge gu’te Ssé.

³²Tà pi gÿo mmó gie nyìŋ Yuda kà nyìŋ Gelekia wɔ́, kà nyìŋ cú’tè pʉ̀a Ssé wɔ́, ge kwɔɔnte mǒ gwe ssé.

³³Áa pá’ mèŋ n ne ńgÿo yɔ́ɔn. Mèŋ n ne fa’a shÿó légwɔ gÿo kɔ̀ɔkɔ́ɔ wɔ́, á gwɔ́ gie á ge poŋo mânyìŋ ntsèm. Mèŋ n te fá’ pɔ́ mmó gie á ge kẅéte pɔ́ wɔ̀ɔn mɔ́. Mèŋ fá’ pɔ́ mmó gie á ge kẅéte pʉ̀a tà ńgyɔ́ɔn, ńzsé ngie e Ssé ge gÿo pɔ́ tsẅɛ́.