Read Ngiemboon 1 Korento 12 Bible Online

1 Korento 12 - Ngiemboon bible

1 Korento 12

¹Mefɛ́ pɔ́ɔn, á gʉa ná pá’ Zẅìge Ndʉalʉ̌a á cÿó geme wɛ̌ nyìŋ wɔ́, ńnáa yé fù’, mbà mèŋ n ne ńkwoŋo ngie pi zsé nò nénʉ́ nà fù’ ŋwɛ́.

²Pi ne ńzsé ngie, á laa fʉ̀’ gie pi la nyé tè zǎb ntʉ́m ná Yěsô Kristo, atsɔ́ mmó ne ńtsó gẅi pi gu’te messé, tà mbɔɔ pá’ ée shúm sie é lɔɔn ńgwɔ́ é le nò gɔɔn.

³Áa yɛ̌ tá mèŋ n ne ńkwoŋo ngie pi zsé ngie: A Zẅìge Ssé zɔ̌ lɔɔn ńtsóte nyìŋ légɔɔn nò, mbà ńgwɔ́ ngàŋ á le néŋ ndòon twó Yěsô wɔ́. A Zẅìge Ndʉalʉ̌a lɔɔn ḿbiŋ tè ne ńtsóte nyìŋ légɔɔn nò wɔ́, mbà ńgwɔ́ ngàŋ á le gɔɔn ngie Yěsô aa Cʉ̀apʉ̀a wɔ́.

⁴Afù’ gie Zẅìge Ndʉalʉ̌a lɔg ńcÿó geme nyìŋ, áa mentí mentí, tá Zẅìge Ndʉalʉ̌a gie á cÿó gem ké ńgwɔ́ pɔ́ yémɔ’ɔ́.

⁵Mefà’ mie Cʉ̀apʉ̀a náa mbwo pʉ̀a, é gwɔ́ pɔ́ mentí mentí. Tá Cʉ̀apʉ̀a gẅie à náa ké ńgwɔ́ pɔ́ wémɔ’ɔ́.

⁶Pàmánzsè lélɔg fa’ mefà’, ée mentí mentí. Tá’ tà’ Ssé wémɔ’ɔ́ zɔ náa metʉ̀ mbwo wɛ̌ wɛ̌ nyìŋ wɔ́.

⁷Pú’u la, a Zẅìge Ndʉalʉ̌a lɔgɔ fù’ ńcÿó geme wɛ̌ nyìŋ wɔ́, ńdɔg pú’u, ńnyɛ ngie áa ná ngàŋ. Yɛ̌ fù’ gwɔ́ pɔ́ lélɔg ńkẅéte pʉ̀a métsèm.

⁸Áa yɛ̌ tá à Zẅìge cÿó geme wetsɔ́ nyìŋ, á gwɔ gẅiin shÿó lélɔgɔ zsě nò ḿbÿɛɛ nò, wetsɔ́ gẅiin shÿó lépÿɛ nò ná ntí gie mé ge zsé nò nénʉ́, tà’a zẅìge zɔ ké ńgÿo.

⁹A Zẅìge ŋwɛ́ zɔ̌ gíŋe ńgÿo wetsɔ́ nyìŋ gwɔ záb ntʉ́m wé nà Ssé tɛ’, wetsɔ̌ gẅiin légÿo megùɔ zeŋe.

¹⁰Á tóo nà tsɔ́ nyìŋ yé fù’ gie à lɔg ńcÿó gem ngàŋ á gwɔ́ ngàŋ légÿo menò mmɔɔn mmɔɔn, ńtóo nà wetsɔ̌ ńcÿó gem yé á gwɔ́ létsẅi nkʉ̀ gẅie é fóo mbwo Ssé, ńtóo nà wetsɔ̌ ńcÿó geme yé á zsé mmó gie á fóo mbwo Zẅìge Ndʉalʉ̌a mbɔɔ gie á fóo mbwo *messé tepòŋ, ńgʉa ná wetsɔ̌ ńcÿó gem yé á shwóŋe meshwóŋè mie à laa zí’i, ńgʉa ná wetsɔ̌ ńcÿó gem yé á zsé shÿó lélɔg ńkyagte mɛ̌ meshwóŋè.

¹¹Tà’ Zẅìge Ndʉalʉ̌a, ńké ńgwɔ́ pɔ́ yɛ̌, zɔ̌ gÿo mɛ̌ menò, ńne ńcÿó geme wɛ̌ nyìŋ wɔ́ pɔ́ pá’ yé Zẅìge á kwǒŋ.

¹²Ndʉŋ ndʉŋ pá’ mbùm nnɛ́ e gwɔ́ pɔ́ tà’ la, tà mbɔɔ pá’ e gẅiin mekèm mbùm tà é gyɔ́ɔn gyɔ̌ɔn la, mekèm mbùm tsɛ ńgyɔ́ɔn tɛ’ tá’, ńké ńcú’te ńgwɔ́ pɔ́ tà’ mbùm nnɛ́ la, á gíŋe ńgwɔ́ pɔ́ pú’u, ná Kristo.

¹³Á nue e Ssé la lɔgɔ tà’ Zẅìge wémɔ’ɔ́ ḿbú ńtemte[11] wégè metsèm légwɔ́ gie pege ge lɔg pú’u, é gwɔ́ tà’ mbùm nnɛ́, epʉ̀a lɔɔn ńgwɔ́ pɔ́ pà Yuda, kà pɔ́ pʉ̀a pie é té pà Yuda wɔ́ wɔ́, ńgwɔ́ pɔ́ menkwɔɔn kà púɔ lá’ gwɔ́, mbà Ssé la pú ńnéŋe[12] tà’ Zẅìge wémɔ’ɔ́ á ntʉ́m pege pɔ́ metsèm.

¹⁴Pege zɔɔn ne ńzsé ngie mbùm nnɛ́ tè gwɔ́ pɔ́ tà’a kèm wɔ́, e gẅiin mekèm nnɛ́ tà é gyɔ́ɔn gyɔ̌ɔn.

¹⁵Akwò lɔɔn ńgwɔ́ pé’è ńgɔɔn ngie pá’ yé tè pwó wɔ́ la, à tě ńdɔgɔ ńtswé’e ná mbùm nnɛ́ wɔ́, mbà á té gɔɔn pú’u, é lɔg nyé té gwɔ́ pɔ́ nà mbùm nnɛ́ wɔ́.

¹⁶Letuŋó lɔɔn ńgwɔ́ pé’è ńgɔɔn ngie pá’ yé tè lejÿɔ́g wɔ́ la, é té ńdɔgɔ ńtswé’e ná mbùm nnɛ́ wɔ́, mbà é té gɔɔn pú’u, é lɔg nyé té gwɔ́ pɔ́ nà mbùm nnɛ́ wɔ́.

¹⁷Mbùm nnɛ́ ntsèm laa pé’è ńgwɔ́ pɔ́ ndà’ lejÿɔ́g, mbà à lɔɔn ńgwɔ́ mé lɔgɔ kɔ́ ńjú’u nò? É laa pé’è ńgwɔ́ pɔ́ ndà’ letuŋó, mbà à lɔɔn ńgwɔ́ mé lɔgɔ kɔ́ ńjú’u gyě mmó?

¹⁸Tá’ e Ssé la kwoŋ, ńtÿɔ́gɔ yɛ̌ kème nnɛ́ wɔ́ pɔ́ nà yé jʉ’.

¹⁹Mbùm nnɛ́ laa pé’è ńgwɔ́ pɔ́ tà’a kèm wémɔ’ɔ́ gílé yé, mbà mé tóŋ lê mbùm nnɛ́?

²⁰Mekèm nnɛ́ tsɛ ńgyɔ́ɔn tɛ’ tá’ ńké ńcú’te ńgwɔ́ pɔ́ tà’ mbùm nnɛ́.

²¹À lɔɔn ńgwɔ́ lejÿɔ́g le gɔɔn lê pwó ngie ńgwɔ́ á le yé zẅɛ́’ wɔ́, à twó á ké le gɔɔn né mekwò ngie ńgwɔ́ á le mekwò zẅɛ́’ wɔ́.

²²Tà ńcʉ́’ pú’u, mbà mbɔɔ mekèm mbùm nnɛ́ mie mé kwaŋ ngie yɔ́b fà’ té gyɔ́ɔn, é kẅéte kẅetě.

²³Mekèm mbùm nnɛ́ mie mé piŋ tè néŋ mekù’ mǒ mboŋó wɔ́, mé zɔ́bte mɛ̌ tɛ’. Metsɔ́ mie mé zɔɔn tè ńnéŋe ńkím mbɔɔ kǐm wɔ́, pege líe nò náa mǒ tɛ’,

²⁴ńgʉa ná mie mé zɔɔn ńnéŋe ńkíme nò náa mǒ, mé té líe nò ńnáa mǒ nzẅìŋ wó wɔ́. Tá’ e Ssé la cʉ́’ʉ lé nyɛte mbùm nnɛ́, ńná mekù’ ná mekèm nnɛ́ mie mé gwága nò ńnáa mǒ gwág,

²⁵ńzsé ngie mbùm nnɛ́ tè ńnéŋe mesǎ mesǎ wɔ́, tà ńcʉ́’ pú’u, kème mbùm nnɛ́ gwɔ́ fa’a yé fà’, éfa’ pá’ metsɔ́ mekèm mbùm nnɛ́ ge zẅɛ́’.

²⁶Tá ńgwɔ́ gie tsɔ́ kème mbùm nnɛ́ lɔɔn ne ńgyá ngɔ́’, metsɔ́ mekèm mbùm nnɛ́ gíŋ ńgyá yɔ́b ngɔ́’ pɔ́ pá’ yɛ̌, ńgwɔ́ gie mé lɔɔn ne ńnáa mekù’ tsɔ́ kème mbùm nnɛ́, metsɔ́ mekèm mbùm nnɛ́ gíŋ ńkág yɔ́b pɔ́ pá’ yɛ̌.

²⁷Á gʉa nà mbùm Kristo, mbà pi pɛ lɔgɔ ńgwɔ́ yɛ̌, wɛ̌ nyìŋ wɔ́ ná pi, gwɔ́ tà’a kèm nà mbùm ŋwɛ́.

²⁸E Ssé la cʉ́’ʉ létaŋte cú’tè yé, ḿvɔg ńzáb megàŋ ntúm, ḿbɔ́ɔnte ńzáb pà ntsẅì nkʉ̀ pie é fóo mbwo yé, ḿbɔ́ɔnte ńtÿɔ́g pà zí’i pʉ̀a nò Ssé, mé fó ná pɔ́b ńgyá pʉ̀a pie à la cÿó gem yɔ́b, á gwɔ́ pá’ pɔ́ ge gÿo menò mmɔɔn mmɔɔn, ḿbɔ́ɔnte ńgyá pʉ̀a pie à la cÿó gem yɔ́b, á gwɔ́ pá’ pɔ́ ge gÿo megùɔ zeŋe, mé fó ná pɔ́b ńgyá pʉ̀a pie ayɔ́b fù’ áa lékẅéte petsɔ́ pʉ̀a mbɔɔ pʉ̀a pie pɔ́ táŋte cú’tè, tà mbɔɔ pʉ̀a pie à la cÿó gem yɔ́b á gwɔ́ pá’ pɔ́ ge shwóŋó meshwóŋè mie pɔ́ laa zí’i.

²⁹Pʉ̀a metsèm tsɛ̀ɛ cú’tè é té megàŋ ntúm wɔ́, ńké tè pà Ntsẅì nkʉ̀ pie é fóo mbwo Ssé wɔ́, ńké tè pàzí’i pʉ̀a nò Ssé wɔ́, e Ssé la tè cÿó gem pʉ̀a metsèm pá’ pɔ́ ge gÿo menò mmɔɔn mmɔɔn wɔ́,

³⁰kà pɔ́ légÿo megùɔ zeŋe wɔ́, kà pɔ́ léshwóŋó meshwóŋè mie pɔ́ laa zí’i wɔ́, kà pɔ́ lékyagte mɛ̌ meshwóŋè wɔ́.

³¹Pú’u la, pi ne ńtsɔ́ɔn ngie e Ssé lɔg shúm sie é kẅéte tɛ’ ńcÿó geme gí. Tá’, mèŋ n ge ké nyɛɛ gẅi mánzsè gẅie à cʉa petsɔ́ métsèm.