Read Ngiemboon 1 Korento 13 Bible Online

1 Korento 13 - Ngiemboon bible

1 Korento 13

¹N dɔɔn ńzsé léshwóŋó meshwóŋè mie mé shwóŋó tsɛ̀ɛ mengwòŋ ntsèm tà mbɔɔ mie *mecÿɔ́’ Ssé shwóŋó, tá ḿbiŋ tè kwoŋo nyìŋ mesoŋ wɔ́, mbà mèŋ m bege pɔ́ jʉ’ pá’ mmó tʉ̌ gie mé pǔ’, mbɔɔ pá’ kẅì’ fùɔ gẅie à zẅɛ zẅɛ.

²Á lɔɔn ńgwɔ́ e Ssé cÿó gem yɔ́ɔn mèŋ n tsẅi nkʉ̀ gẅie é fóo mbwo ye, ńzsé nò nà kɔ̀ɔkɔ́ɔ gie áa lelyěen, ḿbiŋ ńzsé nò nà shúm ntsèm. À lɔɔn ńgwɔ́ mèŋ n záb ntʉ́m wɔ̀ɔn nà Ssé, tà ńku’u légÿo mekwɛ́ sẅɛ́’te nnɛ́, tá ńké ńgwɔ́ gie n dɔɔn tè kwoŋo nyìŋ mesoŋ wɔ́, mbà mèŋ n tè tsɔ́ mmó wɔ́.

³À lɔɔn ńgwɔ́ mèŋ n gabte shúm sɔ́ɔn ntsèm ńnáa mbwo pʉ̀a pie nzyè ne ńgyáŋa wɔ́b, à lɔɔn ńgwɔ́ n zẅíŋ ngie mé túɔ wɔ̀ɔn, tá á gwaa gwɔ́ pú’u, n tè kwoŋo nyìŋ mesoŋ wɔ́, mbà á té kẅéte wɔ̀ɔn nà tsɔ́ mmó wɔ́.

⁴Nyìŋ gẅie à kwoŋo nyìŋ mesoŋ, à gẅiin kwɔgɔ nnɛ́, à kẅete pʉ̀a, à tè gẅiin kègɔ́’ wɔ́, à tè nyɛ nnɛ́ wɔ́, à tè ŋá’te,

⁵à tè gÿo menò shʉ́ wɔ́, à tè kim, à tè lwo ńgyáŋa lóŋ wɔ́, à tè gẅiin nyìŋ lóŋ ye wɔ́,

⁶à tè kága nà cÿɔ̌ nò wɔ́, à kǎg yé pɔ́ nà nò nénʉ́.

⁷Nyìŋ gẅie à kwoŋo nyìŋ mésoŋ, nyìŋ fʉa pɔ́ yɛ̌ nò mbwo ye wɔ́, á lege lege, á gʉa nà kɔ̀ɔkɔ́ɔ wɔ́ á záb ntʉ́m wé pɔ́ nà Ssé, ńnéŋe ně ńzẅí’te yé pɔ́ ngie kɔ̀ɔkɔ́ɔ ge gÿo má’a twó pɔ́ mboŋó, à gyá ngɔ́’ lêkɔ́ wɔ́ ńkwé pɔ́ ntsème tsème.

⁸Nkwòŋe gie nyìŋ mesoŋ gẅiin nzèm wetsɔ̌, e ge lá’a gwɔ́ pɔ́ wó. Tá á gʉa nà pá’ e Ssé cÿó geme pʉ̀a, pɔ́ tsẅi nkʉ̀ gẅie é fóo mbwo ye, wɛ̌ le gwɔ́ à mag, leshwoŋó meshwóŋè mie mé laa zí’i à mag yé, le zsé mmó gie áa lelyěen á le gíŋe ńgwɔ́ wó wɔ́,

⁹á nue pege fʉ̀’ɔɔn ńzsé pɔ́ tsɔ́ gwǒŋ, e Ssé tè nyɛɛ wégè shúm ntsèm tá pege tsẅi nkʉ̀ gẅie é fóo mbwo ye wɔ́.

¹⁰À ge ké lá’ gwɔ́ tà nyɛɛ wégè shúm ntsèm, múɔ mézsé nò we fʉ̀’ɔɔn à mag.

¹¹Á laa fʉ̀’ gie n da nyé mûɔ mémûɔ, mèŋ shwóŋó pá’ mûɔ mémûɔ, ńkwaŋa nò pá’ mûɔ mémûɔ, legyè sɔ́ɔn sáŋa nò pá’ se mûɔ mémûɔ. Áa fʉ̀’ɔɔn n cʉ́’ ńgwɔ́ pɔ́ ndÿò, mèŋ n tè gíŋe ně ńgÿo menò pá’ mûɔ mémûɔ wɔ́.

¹²Áa fʉ̀’ɔɔn pege ne ńgyá shúm é tele tele pɔ́ pá’ fʉ̀’ gie pege gyá tsɛ̀ɛ nzẅìŋe gya shÿó la. Á ge lá’a tsɔ́ fʉ̀’ pege kwà’ ńgyá, e gwɔ́ fʉ̀’ó ńgwɔ́ mvfò pege, áa nà fʉ̀’ɔɔn n tè zsé shúm ntsèm wɔ́, tá’ n ge lá’a tsɔ́ fʉ̀’ é zsé shúm nà nti gie e Ssé ne ńzsé wɔ̀ɔn fʉ̀’ɔɔn pú’u.

¹³Pege lɔgɔ pá’ɔɔn ńgyá ngie eshúm sie é ge lá’a gwɔ́ pɔ́ wó ée sétá: Wɔɔn aa lezǎb ntʉ́m nà Ssé, wɔɔn gwɔ́ léńnéŋe ńně ńzẅí’te mmó mbwo Ssé, ńgÿo lékwoŋo nyìŋ mesoŋ. Tá’, atwó ye lÿò nà shúm sɔɔn sétá à gwɔ́ pɔ́ lekwoŋo nyìŋ mesoŋ.