Read Ngiemboon 1 Korento 14 Bible Online

1 Korento 14 - Ngiemboon bible

1 Korento 14

¹Pú’u lá pi vɔg ńkag tʉ̀ ńgÿo tà’a mmó, à gwɔ́ lékwoŋo nyìŋ mesoŋ, pi piŋ ńtsɔ́ɔn shúm ntí ntí sie Zẅìge Ndʉalʉ̌a lɔg ńcÿó gem pʉ̀a, ńtʉʉ lelÿò ńtsɔ́ɔn létsẅi nkʉ̀ gẅie é fóo mbwo Ssé,

²á nue nyìŋ lɔɔn ńdɔg meshwóŋè mie mé té ne ńzsé wɔ́ ńgɔɔn nò, mbà à těen ńgɔɔn nò mbwo pʉ̀a mesoŋ wɔ́. À gɔɔn pɔ́ mbwo Ssé, á nue tsɔ̌ nyìŋ mesoŋ tè ne ńjú’u nò gie à gɔɔn wɔ́, angàŋ ne ńdɔgɔ metʉ̀ Zẅìge Ndʉalʉ̌a ńgɔɔn nò nà shúm sie ée lelyěen.

³Tá á gʉa ná nyìŋ gẅie à tsẅii nkʉ̀ gẅie é fóo mbwo Ssé, á gɔɔn nò mbwo pʉ̀a mesoŋ, ńdɔg ńkẅéte wɔ́b pɔ́ kẅi’i ńzáb ntʉ́m nà Ssé, ńdɔg ńkẅiŋte wɔ́b mbɔɔ lélɔg ńnéŋ ntʉ́m wɔ́b.

⁴Nyìŋ gẅie à ne shwóŋó meshwóŋè mie mé té zsé, à fó pú’u, ńkẅéte pɔ́ twó mbùm yé lékẅi’i ńzáb ntʉ́m nà Ssé. Tá á gʉa ná nyìŋ gẅie à tsẅii nkʉ̀ gẅie é fóo mbwo Ssé, à lɔg pú’u, ńkẅéte cú’tè pʉ̀a Kristo ntsèm lékẅi’i ńzáb ntʉ́m nà Ssé.

⁵Mèŋ n gyá yɔ́ɔn ngie áa mbòŋ ngie pi metsèm shwóŋó meshwóŋè mie pi laa zí’i, tá’ mèŋ n tʉ̌ lelÿò ńkwoŋ pɔ́ ngie pi tsẅi pɔ́ nkʉ̀ gẅie é fóo mbwo Ssé. Letsẅi nkʉ̀ gẅie é fóo mbwo Ssé aa mbòŋ ńcʉa léshwóŋó meshwóŋè mie mé té ně ńzsé wɔ́, tà ńdí ndà’ pá’ nyìŋ gwaa shwóŋó, wetsɔ̌ nyìŋ gwɔ́ ssé ne ńkyagte shwóŋó cú’tè tá á lêen ńké ńkẅéte pʉ̀a lékẅi’i ńzáb ntʉ́m nà Ssé.

⁶Mefɛ́ pɔ́ɔn, pege gɔɔn ngie ngwɔ́ n tó tà ńkúu tsetsɛ̀ɛ pi, ńcʉ́’ʉ légɔɔn nò né pi, ńdɔgɔ shwóŋè gie pi tè ne ńzsé wɔ́, mbà á ge kẅéte gẅi lêkɔ́? Mèŋ lékẅéte gẅí, aa pi léfó nà mmó gie n gɔɔn ńzsé mmó gie e Ssé nyɛɛ wɔ̀ɔn á gwɔ́ lelyěen, mèŋ n gÿo pi zsé nò nénʉ́ nà tsɔ́ nò. Pi gíŋe ńzẅɛ́’ɛ wɔ̀ɔn, ńjú’ tsɔ́ nkʉ̀ gẅie é fóo mbwo Ssé. Mèŋ fó nà nò gie n gɔ̌ɔn ńzí’i gẅi tsɔ́ nò.

⁷Á gíŋ ńgwɔ́ ndʉŋ ndʉŋ ná màndèle pɔ́ kekÿɛ́, éshúm sie mé lɔgɔ ḿbú’u leluŋó. Á la gwé’e pé’e mengyè mie é fóo nà sɛ̌ shúm pú ńgwɔ́ pɔ́ tà’a mmó, mbà ńgwɔ́ mé gwɔ́ zsé leluŋó sie mé lɔgɔ màndèle ḿbú’ ńgÿo lêkɔ́, ńgwɔ́ zsé se kekÿɛ́ ńgÿo lêkɔ́,

⁸ńgwɔ́ gie ngyè ntàŋ lɔɔn tè kẅɛ mboŋó wɔ́, mbà ńgwɔ́ awɔ̌ nyɛte mbùm ye légʉa ḿma’ ncù?

⁹Áa mbwo pi ńgíŋ ńgwɔ́ pɔ́ pú’u, pi lɔɔn shwóŋó meshwóŋè mie mé té ne ńjú’u wɔ́, mbà mé ge gǎ tá jú’u nò gie pi gɔɔn yɛ̌? Mbà pi zẅɛɛ zẅɛ pá’ fefà la.

¹⁰Meshwóŋè ée ndùmo ssé tsetsá’ mentí tà ńgyɔ́ɔn, tá’ mé lɔgɔ yɛ̌ wɔ́ ńgɔɔn pɔ́ nò.

¹¹Tá’ ńgwɔ́ gie nyìŋ lɔɔn ńne ńgɔɔn nò né mèŋ, mèŋ m biŋ tè ne ńzsé shwóŋè yé wɔ́, mbà mèŋ n gee mvfò yé ńgwɔ́ pɔ́ ngʉ̀, á gíŋe ńgwɔ́ yé mvfò mèŋ, ńgwɔ́ pɔ́ ngʉ̀.

¹²Á gíŋ ńgwɔ́ mbwo pi ńgwɔ́ pɔ́ pú’u. Pá’ pi ee ssé ne ńtsɔ́ɔn tɛ’ ngie Zẅìge Ndʉalʉ̌a lɔgɔ fù’ ntí ntí ńcÿó gem gí la. Pi gwɔ́ ne tsɔ́ɔn ngie à kẅi’i ńgyɔ́ɔn, á gwɔ́ pɔ́ lélɔg ńgÿo acú’tè ntsèm kẅi’i ńzáb ntʉ́m nà Ssé.

¹³Áa mmó gie á gÿo tá nyìŋ gẅie à shwóŋó shwóŋè gie mé té ne ńzsé wɔ́, à gẅiin lésẅíŋte Ssé ngie à lɔgɔ lékyagte ńgíŋe ńcÿó gem yé,

¹⁴á nue n dɔɔn ńcʉ́’ʉ lésẅíŋte Ssé, ńdɔgɔ shwóŋè gie mé té ne ńzsé wɔ́, mbà mèŋ n ne ńdɔgɔ zẅìge yɔ́ɔn é sẅíŋte Ssé tá ńké tè ne ńjú’u nò gie mèŋ n ne ńgɔɔn wɔ́.

¹⁵Tà áa pú’u, pá’ɔɔn ńgwɔ́ mèŋ n gÿo lêkɔ́? N gyǎ ngie n ge sẅíŋte Ssé nà ntí gie Zẅìge ne ńtsóte wɔ̀ɔn ngie mèŋ sẅíŋte pú’u, tá’ é gíŋe sẅíŋte nà ntí gie ńgwɔ́ nyìŋ jú’u nò gie n gɔ̌ɔn. Mèŋ n ge zɔb ntse nà ntí gie Zẅìge ne ńtsóte wɔ̀ɔn ngie mèŋ n zɔb pú’u, tá’ é gíŋe zɔb á nà ntí gie ńgwɔ́ nyìŋ jú’u mmó gie azɔ́b gɔɔn yɛ̌,

¹⁶á nue nyìŋ lɔɔn ńgwɔ́ pé’e ésíe Ssé pɔ́ ndà’ nà ntí gie Zẅìge tsóte yé ngie à gÿo, mbà nyìŋ gẅie à ńnéŋe ssé à tè ne ńzsé nò nà yɛ̌ ntí wɔ́, à ge gwaa gɔɔn ngie *amen, é lɔg cʉ́me nò gie ngàŋ lɔgɔ síe Ssé é gÿo lêkɔ́ pá’ à tè ne ńjú’u nò gie à gɔɔn wɔ́?

¹⁷Yɛ̌ ntí lesíe Ssé tsɛ ńgwɔ́ mbòŋ tɛ’ tá’, e tè kẅéte wetsɔ̌ nyìŋ lékẅi’i ńzáb ntʉ́m nà Ssé wɔ́.

¹⁸Mèŋ n ne síe Ssé ná pá’ à la gÿo mèŋ shwóŋó meshwóŋè mie mèŋ n da tè zí’i, tà ńcʉa gẅi métsèm.

¹⁹Tá’ á gʉa fʉ̀’ gie mèŋ n gee tsɛ̀ɛ Cú’tè pʉ̀a Kristo, mèŋ n kwoŋo légɔɔn nò metwó méntʉ̀a á gwɔ́ gie mé ge jú’, ńzsé ngie n dɔgɔ ńzí’i pʉ̀a mmó, ńcʉa légɔɔn nò metwó ntsá’ legém á gwɔ́ gie mé ké té jú’ wɔ́.

²⁰Mefɛ́ pɔ́ɔn, tà pi cʉ́’ʉ lésáŋa nò, ésáŋ pá’ pènkʉ́ la. Pi gʉa nà nò tepòŋ ńgwɔ́ pɔ́ mecʉ̀cʉ̀ŋ. Tá’ ńgʉa nà lesaŋá nò, ńnyɛ ngie pi cÿɔgté.

²¹Áa tsɛ̀ɛ ŋwà’ne Ssé, Cʉ̀apʉ̀a gɔɔn ngie: Mèŋ n ge gÿo cʉ́’ʉ légɔɔn nò mbwo pʉ̀a Israel É lɔg pʉ̀a méndyɛ̀’ɛ Pie pɔ́ shwóŋó meshwóŋè ndyɛ̀’ɛ. Tà mbɔɔ pú’u, pɔ́ le kwoŋo lé jú’u nò gie mèŋ n gɔɔn wɔ́.

²²Á lɔg pú’u, ńgwɔ́ ngie, e Ssé cʉa nà leshwoŋó meshwóŋè mie mé la tè zí’i, ńda’te tsɔ́ liŋé pɔ́ mbwo pʉ̀a pie é té záb ntʉ́m ná ye wɔ́, à ké tè la’te pú’u, mbwo pʉ̀a pie é záb ntʉ́m ná ye wɔ́. Letsẅi nkʉ̀ gẅie é fóo mbwo Ssé, à la’te tsɔ́ mmó pɔ́ mbwo pʉ̀a pie pɔ́ záb ntʉ́m nà Ssé, á ké tè mbwo pʉ̀a pie pɔ́ té záb ntʉ́m nà Ssé wɔ́ wɔ́.

²³Pi pʉ̀a Kristo lɔɔn ńgwɔ́ pé’e ńcú’te métsèm, wɔ̌wɔ́ɔ ná pi gwɔ́ zye léshwóŋó shwóŋè gie à laa zí’i, epʉ̀a pie é té zsé nò ná yɛ̌ ntí leshwóŋó wɔ́, tà mbɔɔ pʉ̀a pie pɔ́ té záb ntʉ́m nà Ssé wɔ́, é zyɛ́’ ńkúu ndá, mbà pɔ́ té lɔgɔ gẅi é tóŋ mepʉ̀a wɔ́?

²⁴Tá ńgwɔ́ gie pi metsèm lɔɔn ne ńtsẅii pɔ́ nkʉ̀ gẅie é fóo mbwo Ssé, nyìŋ kúu ndá, kà gwɔ́ pɔ́ nyìŋ gẅie à tè záb ntʉ́m nà Ssé wɔ́ wɔ́, kà nyìŋ gẅie à tè zsé nò ná yɛ̌ ntí wɔ́ wɔ́, mbà kɔ̀ɔkɔ́ɔ gie à ne ńjú’u á ge gÿo à sáŋa nò, à shwóŋè ŋwɛ́ ntsèm à gɔɔn nò mbwo ye.

²⁵Eshúm sie é kɔ’ɔ́ tsɛ̀ɛ ntʉ́m yé, á lelyěen, é kẅɛɛ mángyɛ̌, á kẅí’te ssé, ésɔb shÿó wé ssé, ńgwɔ ne gu’te Ssé, é ne gɔɔn ngie: Áa nénʉ́ e Ssé kwà’ ńgwɔ́ tsetsɛ̀ɛ pi.

²⁶Mefɛ́ pɔ́ɔn pá’ áa pá’ɔɔn lɔɔn pege gÿo lêkɔ́? Pi lɔɔn ńgwɔ́ tà ńcú’te nyìŋ gẅi gẅiin zɔ́bɔ ntse á zɔb, nyìŋ gẅiin mmó gie à ge zí’i petsɔ́ pʉ̀a á zí’i, nyìŋ gẅiin mmó gie e Ssé ne ńnyɛɛ yé, á shwóŋ, nyìŋ gẅiin nò gie à ge gɔɔn lê shwóŋè gie mé té ne ńzsé wɔ́ á gɔɔn, nyìŋ gẅiin lékyagte á kyagte. Tá’ á ne ńzɛ́te ngie sɛ̌ shúm ntsèm e kẅéte lélɔg ńgÿo à cú’tè pʉ̀a Kristo ntsèm kẅi’i ńzáb ntʉ́m nà Ssé.

²⁷À lɔɔn ńgwɔ́ léshwóŋó meshwóŋè mie mé té zsé, pʉ̀a mépʉ́a shwóŋó. Mé gɔɔn ngie mé shwoŋó tɛ’ pʉ̀a métá shwóŋó. Tà’ nyìŋ shwóŋó tà ńtsẅé jʉ’, tá wetsɔ̌ nyìŋ shwóŋó yé, á zɔɔn ńgíŋ ńzɛ́te ngie tsɔ̌ nyìŋ kyagte.

²⁸Nyìŋ gẅie à ge kyagte meshwóŋè mie mé té ne ńzsé wɔ́ lɔɔn tè ssé wɔ́, mé pɔ́ɔn légɔɔn nò tsɛ̀ɛ cú’tè tà ngyè kwɔ́’ɔ tÿǒ. Á gwɔ́ pú’u, nyìŋ gɔɔn nò pɔ́ tsɛ̀ɛ ntʉ́m ye á mbwo Ssé.

²⁹Á gʉa nà letsẅi nkʉ̀ gẅie é fóo mbwo Ssé, epʉ̀a mépʉ́a kà métá wɔ́, pɔ́ gɔɔn nò, petsɔ́ pʉ̀a sáŋa nò ńnáa nà nò gie pɔ́ gɔ̌ɔn.

³⁰Tá’ ńgwɔ́ gie nyìŋ lɔɔn ne ńgɔɔn nò, e Ssé tsẅii nò mbwo wetsɔ̌ nyìŋ gẅie aa jʉ’ó, angàŋ zá’a légɔɔn nò.

³¹Pú’u, pi metsèm gẅiin shÿó létsẅi nkʉ̀ gẅie é fóo mbwo Ssé, nyìŋ tsẅi tà ńgwɔ tsẅé jʉ’ wetsɔ̌ nyìŋ tsẅi yé. Pú’u, ńzsé ngie pʉ̀a metsèm ge zẅɛ́’ é zí’i nò Ssé, nkʉ̀ gẅie mé tsẅi é kẅiŋte wɔ́b.

³²E Ssé la gÿo ngie à gʉa tsetsɛ̀ɛ pʉ̀a pie pɔ́ tsẅii nkʉ̀ gẅie é fóo mbwo ye, awɔ̌wɔ́ɔ ná pɔ́b zsé yé fʉ̀’ gie à ge gɔɔn nò, ayé nò á le tsẅiŋe yé tsẅiŋ wɔ́,

³³á nue Ssé tè kwoŋ ngie mé néŋ ḿvéle nkàŋ wɔ́, à kwoŋ pɔ́ mbʉ́lè. Á gʉa ná pànzwě, mbà pi gẅiin léké ńgÿo pɔ́ ndʉŋ ndʉŋ pá’ áa tsɛ̀ɛ *mendá cú’tè pʉ̀a Kristo ntsèm ńgwɔ́ pú’u la,

³⁴pi lɔɔn ńgwɔ́ tsɛ̀ɛ cú’tè, pànzwě ná’a ńdáŋte. Pɔ́ té gẅiin lékẅé shwóŋè ńgɔɔn nò wɔ́. Pɔ́ gẅiin lépʉ́le ńnéŋe, ńzẅí’te nò gie mé ne ńgɔɔn, á gwɔ́ pá’ *lepʉ̌ Mǒsê é gɔɔn pú’u.

³⁵Pɔ́ lɔɔn ńjú’u tsɔ́ nò, tà ne fa’a lécwoŋo ńzsé, pɔ́ gʉa ńkúu mbʉ̀a tá ńzɛ́te melúm pɔ́b. Á té poŋ pá’ à lɔɔn ńgwɔ́ pʉ̀a Kristo cú’te tà’a jʉ’, manzwě gɔɔn nò wɔ́.

³⁶Anò Ssé á la sá’ pɔ́ lá’ pi ka? Kà mé la gɔɔn pɔ́ ndà’ mbwo pi?

³⁷Nyìŋ lɔɔn ńne ńkwaŋa ngie à tsẅii nkʉ̀ gẅie é fóo mbwo Ssé, kà pɔ́ mbwo Zẅìge Ndʉalʉ̌a wɔ́, mbà à gẅiin lézsé ngie yɔɔn nò gie mèŋ n ŋwe’e ńnáa mbwo pi lɔɔn ée *lepʉ̌ sie é fóo mbwo Cʉ̀apʉ̀a.

³⁸Tá ńgwɔ́ gie nyìŋ lɔɔn ḿmoŋe, mbà e Ssé moŋé ye yé.

³⁹Mefɛ́ pɔ́ɔn, pá’ aa pú’u la, pi tsɔ́ɔn tɛ’ légwɔ́ pàntsẅì nkʉ̀ pie é fóo mbwo Ssé ḿbiŋ ḿbɔ́ɔn létáte petsɔ́ pʉ̀a léshwóŋó meshwóŋè mie pɔ́ laa zí’i.

⁴⁰Tá’ mé lɔg pɔ́ mbʉ́lè ńgÿo kɔ̀ɔkɔ́ɔ, tà nyìŋ néŋ ḿvéle nkàŋ.