Read Ngiemboon 1 Korento 15 Bible Online

1 Korento 15 - Ngiemboon bible

1 Korento 15

¹Mefɛ́ pɔ́ɔn, tà mèŋ n kímte gẅi nkʉ̀ mbòŋo gẅie mèŋ n da tsẅi mbwo pi, é nkʉ̀ gẅie pi la jú’ ńzẅíŋ, pi ee ńké ńzába ntʉ́m mǒ záb tà ńkú lyɛ̌’ɔɔn.

²E Ssé ne fóo nà nkʉ̀ mbòŋo ŋwɛ́ ńgÿo pi tsẅɛ́ɛ, pá’ pi lɔɔn ńké ne ńkú’te kwà’ mmó gie n da tsẅi mbwo pi kú’te. Tà á té pú’u wɔ́, mbà gẅi lézáb ntʉ́m nà Ssé gwɔ́ pɔ́ sẅɛ̀ɛ sẅɛ̀ɛ.

³N da cʉ́me nò gie mé la cʉ́me pɔ́ mbwo mèŋ á mbwo pi, á gwɔ́ ná nkʉ̀ mbòŋo ńgwɔ́ kwòŋ. Yɛ̌ nò gwɔ́ ngie: Kristo la kwé nà menò tepòŋ mégè, á gwɔ́ pá’ ŋwà’ne Ssé la tʉ́ njÿó ńgɔɔn.

⁴Mé la ńnéŋe yé tsɛ̀ɛ lesyè, á gwaa gwɔ́ lyɛ̌’ sétá á zíme nà legwé, pá’ ŋwà’ne Ssé la tʉ́ njÿó ńgɔɔn.

⁵À la nyɛ mbùm ye mbwo Piɛ, mbɔɔ mbwo yetsɔ́ *ngàŋa kwò yé ná pʉ̀a ntsɔ̀b pʉ́a,

⁶ḿbɔ́ɔnte ńnyɛ mbùm ye mbwo mefɛ́ mefɛ́ tà é tɔ́g pʉ̀a nkÿo tʉ̀a, pɔ́ pú ńgyá yé tà’ legʉa. Áa ná pɔ́b lelÿò nyé pɔ́ ntentʉ́, tá mbà etsɔ́ ntá’ kéen ńkwéte.

⁷À la gÿo ḿbɔ́ɔnte ńnyɛ mbùm ye mbwo Jâg ńgíŋe ńnyɛɛ mbwo megàŋ ntúm métsèm.

⁸Ńcʉ́’ nzsòté, pá’ à nyɛ̌ mbwo petsɔ́ pʉ̀a tà ńtsẅé jʉ’, á nyɛ mbùm ye mbwo mèŋ. Mèŋ n gee pá’ɔɔn ńgwɔ́ pɔ́ pá’ tsege múɔ,

⁹á nue mèŋ n gee tsetsɛ̀ɛ megàŋ ntúm ńgwɔ́ we nkʉ́. N zɔɔn tè ku’u légwɔ́ gie ńgwɔ́ mé tóŋo wɔ̀ɔn lê ngàŋ ntúm wɔ́, á nue n dɔ̌ɔn ńnyɛɛ cú’tè pʉ̀a Ssé ngɔ́’.

¹⁰Á la ké ńcʉa pɔ́ ná pá’ e Ssé cÿǒ gem yɔ́ɔn, ńnéŋe ńkẅéte wɔ̀ɔn tá mèŋ n cʉ́’ʉ mmó gie mèŋ n gee yɛ̌ lɔɔn. Yɛ̌ ntí lecÿó gem yɔ́ɔn e la tè cʉa sẅɛ̀ɛ wɔ́, mèŋ fa’a fà’ ńcʉa petsɔ́ megàŋ ntúm, tá mèŋ n zɔ tě ńdɔgɔ mɔ́ɔn metʉ̀ fa’a wɔ́. E Ssé zɔ kẅéte wɔ̀ɔn ńnáa metʉ̀ n dɔgɔ fa’a.

¹¹Pá’ áa pá’ɔɔn la, pɔ́ zɔ̌ lɔɔn ńgɔɔn nò ná nkʉ̀ mbòŋo, kà mèŋ wɔ́, mbà pi ju’ú mmó gie pega pɔ́ pǔ sá’a éshwóŋó pʉ̀a. Á piŋ ńgwɔ́ yɛ̌ gie pi la záb ntʉ́m mǒ.

¹²Pega pɔ́ lɔɔn ḿbiŋ ne sá’a éshwóŋó pʉ̀a ngie Kristo la zíme nà legwé, mbà á ge gǎ etsɔ́ ntá’ pʉ̀a tsetsɛ̀ɛ pi gɔɔn ngie mé té kwé ńgíŋ ńzím wɔ́ wɔ́?

¹³Á lɔɔn ńgwɔ́ gie mé té kwé ńgíŋe ńzíme nà legwé wɔ́, mbà mbɔɔ Kristo la tè zím yé nà legwé wɔ́.

¹⁴Á lɔɔn ḿbiŋ ńgwɔ́ gie Kristo la tè zíme nà legwé wɔ́, mbà nò gie peg sá’a éshwóŋó pʉ̀a á gwɔ́ pɔ́ sẅɛ̀ɛ nò, mbɔɔ gẅi lézáb ntʉ́m nà Ssé á gwɔ́ pɔ́ sẅɛ̀ɛ nò.

¹⁵Á lɔɔn ńgwɔ́ gie mé té kwé ńgíŋ ńzíme nà legwé wɔ́, mbà peg pie peg ne ńgɔɔn nò gie peg zsé nà Ssé, peg lɔgɔ ńgwɔ pɔ́ megàŋa cÿɔ̌ nò, á nue peg cÿɔ pɔ́ nò tá ńgɔɔn ngie peg ne ńzsé ngie e Ssé la zíme Kristo nà legwé á gwɔ́ jʉ’ó ńké tè pú’u wɔ́,

¹⁶á nue á lɔɔn ńgwɔ́ gie mé té kwé ńgíŋ ńzíme nà legwé wɔ́, mbà mbɔɔ Kristo la tè zíme nà legwé wɔ́.

¹⁷Á piŋ ńgwɔ́ gie Kristo la tè zíme nà legwé wɔ́, mbà gẅi lézáb ntʉ́m nà Ssé à gwɔ́ pɔ́ sẅɛ̀ɛ nò, pi piŋ, ńnyé ńgwɔ́ pɔ́ tsɛ̀ɛ menò tepòŋ mí.

¹⁸Á gíŋ ńdɔgɔ ńgwɔ́ ngie, epʉ̀a pie é la gwɔ kwé, letʉ́m sɔ́b zébe ná Kristo, pɔ́ léen ḿbyé.

¹⁹Á lɔɔn ńgwɔ́ gie pege zẅí’te mmó gie á ge fóo mbwo Kristo, ńtí pɔ́ ndà’ fʉ̀’ɔɔn gie pege nyé ndùmo ssé tsetsá’ lɔɔn, mbà pege ee tsetsɛ̀ɛ pʉ̀a mesoŋ ńgwɔ́ kwà’ megàŋ ngɔ́’.

²⁰Tá’ á ké tè pú’u wɔ́, Kristo la kwa’ ńzíme nà legwé ńgwɔ́ ndùŋ mvfò, ńdɔgɔ ńnyɛɛ ngie epʉ̀a pie é la kwé ge lá’ gíŋ zím yɔ́b nà legwé.

²¹Á lɔgɔ ńgwɔ́ ngie, pá’ legwé la cʉ́’ʉ létóo tsɛ̀ɛ njÿó, ńcʉa ná tà’ nyìŋ la, *lezimé nà legwé la gíŋe ńcʉa yé pɔ́ ná tà’ nyìŋ tá ńtóo tsɛ̀ɛ njÿó.

²²Ndʉŋ ndʉŋ pá’ pʉ̀a mesoŋ metsèm lɔg pá’ pɔ́ la tswé’e ná Adam ńkwéte la, pɔ́ métsèm ge gíŋ lɔg pá’ pɔ́ tswé’e ná Kristo é zíme nà legwé.

²³Tá’ wɔ̌wɔ́ɔ zím pɔ́ nà yé fʉ̀’. Kristo la vɔg ńzím. Epʉ̀a pé ge lá’ zím yɔ́b, á fʉ̀’ gie à ge lá’ gíŋ tó.

²⁴Á pɔ́ɔnte ńgwɔ́ fʉ̀’ gie njÿó maga. Kristo pyága kɔ̀ɔkɔ́ɔ gie á ne sá’a njÿó, ḿbyág mbɔɔ tándá wɔ́b, mbɔɔ kɔ̀ɔkɔ́ɔ wɔ́ gie á gẅiin tʉ̀ tsɛ̀ɛ njÿó, ḿbyág pú’u, ńdeen ńké ńná lefùɔ mbwo Ssé Tá.

²⁵Kristo zɔɔn ńgẅiin lé ne sá’a njÿó tà ńkú fʉ̀’ gie Tá we lɔ̌g megàŋ mbù pé ńgÿo jʉ’ gie yé kristo ge tÿɔ́gɔ mekwò mé wó.

²⁶Anzsò nzèm ngàŋ mbù gẅie e Ssé ge lá’ pyága yé aa legwé gẅie à lɔgɔ pʉ̀a.

²⁷Á zɔ́ɔn ńgwɔ́ tsɛ̀ɛ ŋwà’ne Ssé, e Ssé gɔɔn ngie: «Yé Léen ḿbú ńdɔgɔ kɔ̀ɔkɔ́ɔ wɔ́ ńgÿo ntÿɔgɔ́ mekwò Kristo». E Ssé gɔɔn pú’u, pá’ɔɔn, á té ńdɔgɔ ńgwɔ́ ngie yé Ssé ge lá’ gwɔ́ nà mbwo Kristo wɔ́, á nue e Ssé zɔ zɔɔn ńnáa metʉ̀ né Kristo tá á lɔgɔ sá’a kɔ̀ɔkɔ́ɔ.

²⁸Eshúm ntsèm piŋ ńdá’ ńgwɔ́ tà ńcʉ́’ʉ ńjú’u pɔ́ mbwo ye Múɔ, kwà’ yé Múɔ lêen ńké ńcʉ́’ʉ ńjú’u pɔ́ mbwo Ssé gẅie à la náa yé kɔ̀ɔkɔ́ɔ, ńzsé ngie e Ssé ge kwà’ sá’ shúm ntsèm.

²⁹Á lɔɔn ńgwɔ́ gie mé kwé mé té gíŋe ńzíme nà legwé wɔ́, mbà tsɔ́ pʉ̀a kẅé ntse á nà twó mepfó pie pɔ́ la tè ntse kẅé pé’e ńtsɔ́ɔn kɔ́? Mbà mélà’a kɔ́ pɛ̌ pʉ̀a kẅé ntse ná twó mepfó?

³⁰Mbà peg zẅiŋé léńnéŋe fʉ̀’ ntsèm ńgwɔ́ pɔ́ ncwò legwé mélà’a kɔ́?

³¹Mefɛ́ pɔ́ɔn, lyɛ̌’ ntsèm mèŋ n tsẅíle ncwò legwé tsẅíle, n gɔɔn pá’ɔɔn, ammó gie n dɔg ńzá’ nkwèen ngie áa nénʉ́, á gwɔ́ pá’ n dɔgɔ gẅi ńka’te tɛ’, ńcʉa ná pá’ pege pǔ ńgwɔ́ nzèm Cʉ̀apʉ̀a wege Yěsô Kristo.

³²N da tóo Efeso wɔɔn pega pʉ̀a ma’, yɔ́b ntí gwɔ́ tà pâ menɔ̀ɔn tsẅɛ gwɔ́ pɔ́ tà’a mmó. Á lɔɔn ńgwɔ́ gie pega pɔ́ lɔ̌ɔn ḿma’a pú’u, e sɔ́ɔn legyè tyé pɔ́ nà shúm sie ée tsɛ̀ɛ yɔɔn njÿó, mbà pì gie n da jÿó mǒ áa kɔ́? Á lɔɔn ńgwɔ́ gie mé kwé mé té gíŋe ńzíme nà legwé wɔ́, mbà á cʉ́’ʉ ńzɛ́te pɔ́ ngie pege gÿo pá’ sag legʉa la gɔɔn la ngie: Aye nyìŋ áa ye ncwò wé, á nue njÿó ge lʉ́a mé gʉa.

³³Tà pi zẅíŋ mé fʉʉ gẅí, pi legé ngie mbàŋ tepòŋ cʉ́ŋe pʉ́a ka?

³⁴Pi gwoonte mbùm gí nà ntí gie e poŋ Ssé, tà pi gíŋ ńgÿo menò tepòŋ. N gɔɔn nue mèŋ n ne ńgyá e tsɔ́ pʉ̀a ée tsetsɛ̀ɛ pi pɔ́ té Ssé zsé, n gɔɔn pá’ɔɔn ńtsɔɔn ngie eshʉ́ kúu gẅí.

³⁵Ńgwɔ́ nyìŋ zɛ́te ngie mepfó zíme nà legwé lêkɔ́ wɔ́? MÀbiŋ ńgẅiin yɛ̌ ntí mbùm nnɛ́ fʉ̀’ó wɔ́?

³⁶Nyìŋ zɛ́te pú’u, mbà aa gʉ̀gʉ̀, á nue nyìŋ pye mmó, á vɔg ńdʉ́, tá ńdeen ńké sá’ ńná letsìŋe mmó se sẅé.

³⁷Ammó gie nyìŋ piŋ ḿbye ssé é gwɔ́ pɔ́ mvòmo mmó sẅɛ̀ɛ sẅɛ̀ɛ, kà ye ngesáŋ wɔ́, kà ye tsɔ́ mmó ndyɛ̀’ɛ wɔ́, é té letsìŋe mmó sie é ge tó kẅɛɛ ssé wɔ́.

³⁸E Ssé pɔ́ɔnte ńná ntí letsiŋé sie à kwǒŋ né mbyè mmó ŋwɛ́, ńná kwà’ ntí letsiŋé ye yɛ̌ mbyè mmó wɔ́ né ye.

³⁹Áa ndʉŋ ndʉŋ pá’ mbab nnɛ́ tsɔ́ mmó e tè ye yetsɔ́ sẅé, mbab nnɛ́ pʉ̀a mesoŋ ee ndyɛ̀’ɛ, eye menɔ̀ɔn gwɔ́ ndyɛ̀’ɛ, eye meshʉ́ŋ gwɔ́ ndyɛ̀’ɛ, eye messó gwɔ́ ndyɛ̀’ɛ.

⁴⁰Eshúm gíŋ ńgwɔ́ tÿǒ lefaŋ, etsɔ́ gwɔ́ ndùmo ssé tsetsá’. Lesí we shúm sie ée tÿǒ lefaŋ á gwɔ́ pɔ́ ndyɛ̀’ɛ, awe shúm sie ée ndùmo ssé tsetsá’ á gwɔ́ pɔ́ ndyɛ̀’ɛ.

⁴¹Lesí we nèm aa ndyɛ̀’ɛ, awe sàŋ gwɔ́ ndyɛ̀’ɛ, awe mecÿɔ́’ saŋ á gwɔ́ ndyɛ̀’ɛ. Wɛ̌ cÿɔ́’ saŋ wɔ́, à sǐ pɔ́ ye ntí nà petsɔ́.

⁴²Á ge lá’ gíŋ gwɔ́ pɔ́ pú’u, á fʉ̀’ gie mepfó ge lá’ zíme nà legwé. Ammó gie mé pye ssé ee mbùm gie e lʉ̌, tá mbùm gie e zíme nà legwé e tè lá’ ńgíŋe ńdʉ́ wɔ́.

⁴³Mé gwaa néŋ yɔɔn mbùm nnɛ́ ssé, e tè ku’u nà tsɔ́ nò wɔ́, ńgÿo ńgwɔ́ tà ńzíme nà legwé, ńgẅiin legú’. Mé gwaa ńnéŋe ssé é gwɔ́ pɔ́ pepÿɛ́ɛ, ńgÿo ńgwɔ́ tà ńzíme nà legwé ńgẅiin metʉ̀ tɛ’.

⁴⁴Mé gwaa ńnéŋe ssé, é gwɔ́ pɔ́ mbùm nnɛ́ nyìŋ mesoŋ, ńgÿo ńgwɔ́ tà ńzíme nà legwé, ńgwɔ́ mbùm nnɛ́ gie e fóo mbwo Zẅìge gie á gÿo mé gwɔ́ wó, á lɔgɔ pá’ɔɔn ńgwɔ́ ngie etsɔ̌ mbùm nnɛ́ e gwɔ́ pɔ́ ye nyìŋ mesoŋ, yetsɔ́ piŋ fóo mbwo Zẅìge.

⁴⁵Áa mmó gie á la gÿo mé ŋwe’e ngie: Ádam gẅie à laa ndùŋ mvfò nyìŋ mesoŋ, e Ssé la gÿo tá á gwɔ́ wó, tá’ nzsò nzèm Adam tó ńgwɔ́ pɔ́ Zẅìge gie á gÿo mé gwɔ́ wó.

⁴⁶Mé té vɔg ńgyá pɔ́ mbùm nnɛ́ gie e fóo mbwo Zẅìge gie á gÿo mé gwɔ́ wó wɔ́, mé vɔg ńgyá pɔ́ mbùm nnɛ́ nyìŋ mesoŋ. Mbùm nnɛ́ gie e fóo mbwo Zẅìge gÿo ḿbɔ́ɔnte tá ńgwɔ́ wó.

⁴⁷E Ssé la cʉ́’ʉ lépwóon ndùŋ mvfò nyìŋ mesoŋ, ńdɔgɔ tsetsá’ ḿbwóon yé. Wɛ̌ nyìŋ lɔgɔ pú’u, éfóo ndùmo ssé tsetsá’, tá’ nyìŋ mbɔ́ɔntè yépʉ́a á fóo pɔ́ tÿǒ lepwó.

⁴⁸Epʉ̀a pie ée ndùmo ssé tsetsá’, ésẅé nyìŋ gẅie e Ssé la lɔgɔ tsetsá’ ḿbwóon yé, epʉ̀a pie ée tÿǒ lepwó é sẅé nyìŋ gẅie à la fó tÿǒ lepwó ésẅɛ́’.

⁴⁹Ndʉŋ ndʉŋ pá’, pege sẅé nyìŋ gẅie e Ssé la lɔgɔ tsetsá’ ḿbwóon yé la, á ge lá’ gwɔ́ tsɔ́ lyɛ̌’, pege sẅé nyìŋ gẅie à la fó tÿǒ lepwó ésẅɛ́’.

⁵⁰Mefɛ́ pɔ́ɔn, n dɔgɔ pá’ɔɔn ńgɔɔn ngie: À lɔɔn ńgwɔ́ nyìŋ le lɔg mbùm nnɛ́ yɔɔn gie e gẅiin mbab nnɛ́ nê metse lɔɔn, ńdɔg ńkúu tsɛ̀ɛ *lefùɔ Ssé wɔ́. À lɔɔn ńgwɔ́ shúm sie é lʉ́ pâ sie é té lʉ́ le teme tà’a jʉ’ wɔ́.

⁵¹Pi cʉ́’ mèŋ shwóŋó gẅi tsɔ́ nò gie á la zɔɔn ńgwɔ́ pɔ́ lelyěen, pege metsèm tè lá’ pú kwé wɔ́, tá’ pege metsèm ge lá’ pú gẅiin tsɔ̌ mbùm ye sẅé,

⁵²pɔ́ tà’ legʉa, lê gàg, mbà nzsòte nzèm ngyè ntàŋ e cʉ̌m, á nue yɛ̌ ngyè ntàŋ ge lá’ cʉ́m mepfó e zíme nà legwé pá’ pɔ́ té ge lá’ gíŋe kwé wɔ́, á gwɔ́ pú’u, pege gẅiin mbùm ye sẅé.

⁵³Á lɔgɔ ńgɔɔn ngie yɔɔn mbùm gie e kwě, ńdʉ́ lɔɔn, e ge lá’ sele cʉ́’ gie e tè gíŋe kwé wɔ́, é ké le lʉ́.

⁵⁴Á ge lá’ gwɔ́ tà yɔɔn mbùm gie e kwě ńdʉ́ lɔɔn, e sele ńcʉ́’ gie e tè gíŋe kwé wɔ́, é ké le gíŋe ńdʉ́ wɔ́, ashwóŋè gie mé la ŋwe’e tsɛ̀ɛ ŋwà’ne Ssé lɔgɔ ḿbumte. Mé la ŋwe’e ngie: Legwé à tè gíŋe ńgwɔ́ wó wɔ́, mé ma’á yé tà ńjÿó ye.

⁵⁵Legwé, e mú metʉ̀ lɔg ńjÿó ncù é pfǒ nzɔ̌? Legwé, à jú sisìŋ á pfǒ nzɔ̌?

⁵⁶Sisìŋ gie legwé lɔg ńtsɔ́gɔ nyìŋ ée menò tepòŋ, metʉ̀ menò tepòŋ fóo ná *lepʉ̌ Ssé sie é nyɛ ngie nyìŋ à gwě ntsaŋ.

⁵⁷Tá’ pege ná ndǎg mbwo Ssé gẅie à gÿo pege cʉa ná Cʉ̀apʉ̀a wege Yěsô Kristo, ńgÿo pege cʉa nò tepòŋ mbɔɔ legwé.

⁵⁸Mefɛ́ pɔ́ɔn pentʉ̀ nzẅìŋ, pá’ áa pú’u la, pi tʉte tʉte, tà nyìŋ cÿɔ’, pi kẅi’i fa’ mefà’a Cʉ̀apʉ̀a ńdɔg ńgʉa pɔ́ lê mvfò, ńgwɔ fa’ ńne ńzsé ngie fà’ gie pi fà’a, ńtí nue pi ee pʉ̀a Cʉ̀apʉ̀a, á té ge cʉ̀a sẅɛ̀ɛ wɔ́.