Read Ngiemboon 1 Korento 2 Bible Online

1 Korento 2 - Ngiemboon bible

1 Korento 2

¹Mefɛ́ pɔ́ɔn, á laa fʉ̀’ gie kwà’ mèŋ n da tóo lá’ pi létsẅii nò Ssé, á gwɔ́ nò gie á la zɔɔn ńgwɔ́ pɔ́ lelyěen, n gwaa tsẅii mbwo pi, n tè lɔgɔ tsɔ́ shwóŋè gie á tʉ tʉ ńtsẅi wɔ́, ńké tè lɔg pɔ́ lényɛɛ gẅi tsɔ́ mmó gie mèŋ sěen ńzsé tɛ’ ńdɔg ńtsẅi wɔ́.

²Á nue n da záb ngie n tě ńgee zsé tsɔ́ nò ndyɛ̀’ɛ tsetsɛ̀ɛ pi tà á le gwɔ́ pɔ́ nò Yěsô Kristo, á Yěsô Kristo gẅie mé la kime yé nà tÿǒ nkǐ wɔ́.

³N da tyé tsetsɛ̀ɛ pi, ńjú’ ḿbú ḿbÿɛ́ pÿɛ́, ńjú’ ḿbɔ́g pɔ́g tà ne ḿvɛɛ.

⁴Ashwóŋè gie á lɔ̌ɔn ńkẅɛɛ ncwò mèŋ, mbɔɔ nò Kristo gie n da ne sá’a mbwo pi, lɔ́ɔn tě ńnyɛɛ zsé nò nyìŋ mesoŋ gie mé lɔg ńgÿo nyìŋ zẅíŋe nò wɔ́. Metʉ̀ Zẅìge Ssé zɔ̌ la ne ńgÿo epʉ̀a gyá ngie áa nò nénʉ́.

⁵Pú’u légwɔ́ gie gẅi lezáb ntʉ́m nà Ssé tè jʉ́’ʉ nà zsé nò pʉ̀a mesoŋ wɔ́. Á ge jʉ́’ʉ pɔ́ nà metʉ̀ Ssé.

⁶Peg pìŋ ńké ńgʉa ná pʉ̀a Kristo pie pɔ́ cÿɔgté nà lezǎb ntʉ́m nà Ssé, ńzí’i wɔ́b zsé nò. Tá yɛ̌ zsé nò ké tè zsé nò yɔɔn njÿó wɔ́, ńké tè zsé nò gie á fóo mbwo shúm tepòŋ sie é sá’a yɔɔn njÿó, ńgwɔ́ sie mé ge gÿo pyág wɔ́.

⁷Á gʉa ná peg, mbà peg la’te yég pɔ́ zsé nò Ssé gie ee nkʉ̀’ʉ nò gie e kɔ̌ɔn ńgwɔ́ pɔ́ lelyěen, mbà Ssé la lá’ ńnyɛte ńzáb tà njÿó nyé té gwɔ̌ wó légwɔ́ gie, à ge lá’ lɔg ńnáa legú’ wege.

⁸Tsoon tà’ nà shúm tepòŋ sie é sá’a yɔɔn njÿó laa zsé yɛ̌ zsé nò wɔ́. Pɔ́ la gwé’e ńzsé yɛ̌ zsé nò, mbà pɔ́ la tè gÿo mé kime Ndè nà tÿǒ nkǐ, á Ndè gẅie à gẅiin legú’ wɔ́.

⁹Mé la zɔɔn ńŋwe’e tsɛ̀ɛ ŋwà’ne Ssé ngie: Ammó gie nyìŋ mesoŋ laa gyá ńké te jú’, Mbà à laa fó ńkwaŋte wɔ́ E Ssé la nyɛte yɛ̌ mmó ńzáb Légwɔ́ gie pʉ̀a pie é kwoŋo yé ge gÿo zẅɛ́’.

¹⁰E Ssé ka piŋ ńgÿo Zẅìge Ndʉalʉ̌a gÿo pege zɔ̌ zsé yɛ̌ nò gie á laa lelyěen. À Zẅìge Ndʉalʉ̌a zɔɔn mwoon zẅi nò ntsèm, tà mbɔɔ menò mie Ssé nyě ńgẅiin pɔ́ tsɛ̀ɛ mvwɔ́’.

¹¹À lɔɔn ńgwɔ́ awɔ̌ zsé nò gie nyìŋ mesoŋ ne ńkwaŋa ntʉ́m ye té gwɔ́ pɔ́ ngàŋ? Á gíŋ ńgwɔ́ ndʉŋ ndʉŋ pá’ tsɔ̌ nyìŋ lɔɔn ńgwɔ́ á le zsé nò gie e Ssé ne ńkwaŋa té gwɔ́ pɔ́ Zẅìge Ssé wɔ́.

¹²Á gʉa ná pege, mbà mé la tè náa zẅìge njÿó né pege wɔ́. Mé la ná pɔ́ Zẅìge gie á fóo mbwó Ssé né pege pá’ á ge gÿo pege zsé fù’ gie e Ssé la lɔg ńcÿó gem yégè.

¹³Pege tè gwaa gɔɔn nò ná sɛ̌ shúm sie Ssé la náa mbwo pege ńdɔg pɔ́ shwóŋè gie pʉ̀a mesoŋ la lɔgɔ zsé nò yɔ́b ńzí’i wégè wɔ́. Pege lɔg pɔ́ shwóŋè gie Zẅìge Ssé zí’i wégè tá ńgɔɔn nò mǒ. Á cʉa pú’u, pege cʉ́’ʉ lé gwɔ́ kyagte nò nà shúm sie é fóo mbwo Zẅìge Ssé, ńdɔg pɔ́ shwóŋè gie á fóo mbwo Zẅìge Ssé tá ńkyagte[1].

¹⁴Nyìŋ mesoŋ lɔɔn nyé ńgwɔ́ pɔ́ nà ntí gie mé la zyé yé á gwɔ́, mbà à lɔɔn ńgwɔ́ á le jú’u mmó gie á fóo mbwo zẅìge Ssé wɔ́. Áa mbwo ye ńgwɔ́ pɔ́ menò pʉ̀a. À tè ku’u lé jú’u nò gie á gɔɔn wɔ́. Á nue à Zẅìge Ndʉalʉ̌a zɔ gÿo tá mé jú’u nò gie yɛ̌ mmó lɔgɔ ńgɔɔn.

¹⁵Nyìŋ gẅie à Zẅìge Ndʉalʉ̌a áa ná ye, à ku’u létsa’a yɛ̌ nò wɔ́ ntsèm ńdíe. Tá ńgʉa ná ye, mbà à lɔɔn ńgwɔ́ tsɔ̌ nyìŋ letsa’a yé nò ńdíe wɔ́.

¹⁶Á lɔgɔ ńcʉ́me nà pá’ ŋwà’ne Ssé gɔɔn ngie: Awɔ̌ zsé mmó gie Cʉ̀apʉ̀a aa ndá ńkwaŋa? Ngwɔ́ wɔ̌ náa yé ntÿɔgɔ́? Tá á ké ńgʉa ná pege, mbà à lɔɔn ngwɔ́ gie Kristo ne ńkwaŋa kɔ́ wɔ́, mbà pege zsě.