Read Ngiemboon 1 Korento 3 Bible Online

1 Korento 3 - Ngiemboon bible

1 Korento 3

¹Mefɛ́ pɔ́ɔn, mèŋ n ka cʉ́’ʉ légɔɔn nò mbwo pi, ńgyá ngie à lɔɔn ńgwɔ́ ń de gɔɔn pá’ ngwɔ́ n gɔɔn nò mbwo pʉ̀a pie pɔ́ jú’u ncwò Zẅìge Ssé wɔ́. Mèŋ ka gɔɔn pɔ́ nà ntí gie ngwɔ́ n gɔɔn nò mbwo pʉ̀a pie pɔ́ nyé ńjú’u pɔ́ mmó gie mbùm yɔ́b ne ńgɔɔn. N gɔɔn pɔ́ pá’ à lɔɔn ńgwɔ́ n gɔɔn nò mbwo pʉ̀a pie pɔ́ ée nà lezǎb ntʉ́m ná Kristo, ńnyé ńgwɔ́ pɔ́ pûɔ mepÿɛ́.

²N ka náa gẅi lepʉ́. N tè ná shúm lejÿó mpfɛ́ pfɛ̌ né pi wɔ́, mélà’mie pi ka nyé tè ku’u lépfɛ́ɛ mmó. Tà mbɔɔ fʉ̀’ɔɔn pi nyě pɔ́ tè ku’u lé jú’u nò gie á tʉʉ lé jú’,

³anue mbùm gí zɔ nyé sá’a gẅí, kègɔ́’ zɔɔn nyé ńgwɔ́ pɔ́ tsetsɛ̀ɛ pi, pi nyě ńzoŋo nò zoŋ. Mbùm gí zɔ tě ńdɔgɔ ńnyé sá’a gẅi wɔ́? Pi tě ńdɔgɔ pú’u, ńnyé ńgÿo pɔ́ pá’ pʉ̀a njÿó gÿo wɔ́?

⁴Nyìŋ gẅi neŋé tà ńgɔɔn ngie yé gwɔ́ pɔ́ nyìŋ we Pɔl, wetsɔ̌ gɔɔn ngie à gwɔ́ yé pɔ́ nyìŋ we Apolos, mbà á téen ńdɔgɔ nyé ńgwɔ́ pɔ́ shwóŋè pʉ̀a njÿó wɔ́ ka?

⁵Apolos aa pá’ɔɔn ńgwɔ́ wɔ́? Pɔl gwɔ́ wɔ̌? Tá pi gɔɔn pú’u? Peg ye gwɔ̌ pɔ́ pafa’a fà’ Ssé pie pi la zẅɛ́’ɛ wég tá ńzáb ntʉ́m ná Yěsô Kristo. Awɔ̌wɔ́ɔ ná peg yé gÿo pɔ́ mmó gie Cʉ̀apʉ̀a la ná shÿó ngie à gÿo.

⁶Mèŋ n ka paa tÿǒ ssé, Apolos pfɛte ntse mǒ. Tá e Ssé zɔ̌ gÿo á kẅág.

⁷Á gwɔ́ pú’u, nyìŋ gẅie à paa tÿǒ pɔ́ nyìŋ gẅie à pfɛte ntse téen ńdɔgɔ ńgwɔ́ tsɔ́ mmó wɔ́. E Ssé gẅie à gÿó á kẅága zɔ gẅiin nò ntsèm.

⁸Nyìŋ gẅie à paa tÿǒ pɔ́ nyìŋ gẅie à pfɛte ntse mǒ pú ńgwɔ́ pɔ́ ndʉŋ ndʉŋ. Awɔ̌wɔ́ɔ ná pɔ́b gwɔ́ gÿo ńkẅé wé ntsɔ’ɔ́ fà’ é ku’u nà fà’ gie à fǎ’.

⁹Á nue peg puté ńně fa’a pɔ́ fà’a Ssé. Pi gwɔ́ nká’ Ssé, ńgíŋ ńgwɔ́ ndá gie Ssé ne ńkwɛ́ɛ.

¹⁰E Ssé ka cÿó gem yɔ́ɔn, mèŋ n nuŋe cÿó ndá pá’ ngàŋ levfò we mbòŋo. Mèŋ n ka nuŋe cÿó ndá, wetsɔ́ nyìŋ ne ńdɔgɔ fà’ ńgee mvfò. À ne ńkwɛ́ɛ ndá ndùmó. Tá’ awɔ̌wɔ́ɔ laga twó yé nà ntí gie à lɔgɔ ńkwɛ́ɛ ndá ndùmó.

¹¹Á gʉa nà cÿó ndá, mbà á kéen ndá’ ńgwɔ́ ssé, ńgwɔ́ Yěsô Kristo. Nyìŋ lɔɔn ńgwɔ́ á legíŋ ńnuŋe tsɔ́ ye ndyɛ̀’ɛ wɔ́.

¹²Ngwɔ́ nyìŋ cʉ́’ʉ lépwoon ndá nà cÿó ŋwɛ́ ńdɔgɔ tʉ̌ gɔ́l ḿbwóon. Wetsɔ̌ nyìŋ lɔgɔ tʉ̌ nkáb ḿbwóon. Wetsɔ̌ lɔgɔ tʉ̀ nzẅìŋ metóon ḿbwóon. Wetsɔ̌ nyìŋ lɔg yé pɔ́ metÿǒ ńkwɛ́. Wetsɔ̌ lɔgɔ legǐ njǔm kà pǐŋ wɔ́ ḿbá’.

¹³Mbà e tè tsɔ̌ ntsaŋ wɔ́. Afà’ ye wɔ̌wɔ́ɔ ge lá’ kẅɛɛ mángÿɛ̌. Mé ge lá’ gyá á nà lyɛ̌’ gie mé tsɔ́’te mentsaŋ. Á nue mmɔ̌g ge lá’ cʉa nà fà’ ye wɔ̌wɔ́ɔ tá mé gyá pá’ áa jʉ’ó ńgwɔ́ pú’u.

¹⁴Ammó gie nyìŋ la lɔg ńkwɛ́ ndá nà cÿó ndá ŋwɛ́, lɔɔn ńdá’ tè shÿó, mbà ngàŋ ge lá’ kẅé ntsɔ’ɔ́ fà’.

¹⁵Tá fà’ ye nyìŋ lɔɔn ńké ńdá’ shÿó, mbà ngàŋ ge lá’ táŋa pyé, é ké tsẅɛ́ tsẅɛ́ tá’, é tsẅɛ́ pá’ nyìŋ gẅie à tɔgɔ́ tsɛ̀ɛ lʉ́me mmɔ̌g tá ńtsẅɛ́ la.

¹⁶Pi tè ne ńzsé ngie pi ee pɛ́’ɛ̀ ńgwɔ́ *jʉ’ʉ Ssé, à Zẅìge Ssé tsẅé tsoló wɔ́ ka?

¹⁷Nyìŋ lɔɔn ńtágte *jʉ’ʉ Ssé, mbà Ssé ge gÿo tágte ngàŋ é gwá’. Á nue *jʉ’ʉ Ssé á gwɔ́ pɔ́ yé gílé ye. Pi piŋ ńgẅiin le zsé ngie *jʉ’ʉ Ssé ŋwɛ́ á lɔgɔ ńgwɔ́ pɔ́ gẅi wɛ̂.

¹⁸MÀbɔ́ɔn nyìŋ léfʉte twó mbùm yé. Nyìŋ lɔɔn ńgwɔ́ tsetsɛ̀ɛ pi ńne ńkwaŋa ngie pʉ̀a njÿó ne ńgyá ngie áa nzsé nò, á zɔɔn ḿvɔg sele ńcʉ́’ʉ pʉ̀a tá ńdeen ńké ńgwɔ́ kwà’ nzsé nò.

¹⁹Á nue anò gie áa tsɛ̀ɛ yɔɔn njÿó ńgwɔ́ zsé nò, áa mvfò Ssé ńgwɔ́ pɔ́ menò pʉ̀a. Ŋwà’ne Ssé zɔɔn ńgɔɔn ngie: «E Ssé lɔg pɔ́ lejÿɔ́’ nzsé nò ńdɔg ńgwoon yé».

²⁰Ŋwà’ne Ssé gíŋe ńgɔɔn ngie: «Cʉ̀apʉ̀a zsé nkwaŋá nò pàzsé nò. À zsě ngie é té tsɔ́ mmó ku’».

²¹Pú’u la, tà nyìŋ gẅi lɔg pá’ aa nyìŋ we mákyè ńdɔg ńka’te. Á nue akɔ́ɔkɔ́ɔ wɔ́, gwɔ́ pɔ́ gí.

²²À lɔɔn ńgwɔ́ pɔ́ Pɔl, ńgwɔ́ pɔ́ Apolos, ńgwɔ́ pɔ́ Kéfas, ńgwɔ́ pɔ́ njÿó, ńgwɔ́ pɔ́ le gwɔ́ wó ka pɔ́ lekwé wɔ́, ńgwɔ́ pɔ́ yɔɔn kème njÿó ka gie à nyé tá ńtóo wɔ́, mbà kɔ̀ɔkɔ́ɔ wɔ́, gwɔ́ pɔ́ mbwo pi.

²³Tá á gʉa ná pi, pi gwɔ́ mbwo Kristo, Kristo piŋ ńgwɔ́ mbwo Ssé.