Read Ngiemboon 1 Korento 5 Bible Online

1 Korento 5 - Ngiemboon bible

1 Korento 5

¹Mé ne ńjú’u mé gwɔ́ nzɔ̌ nzɔ̌ éshwóŋó ngie áa tsetsɛ̀ɛ pi, atsɔ́ nyìŋ gwɔ́ wó é fʉ’ʉ tsɔ́ ntí menò tɛ’, Yɛ̌ ntí tsẅé pǔ ḿbÿág pÿág tà pàtè zsé Ssé zɔɔn tè pú’u, gÿo. N ne ńjú’u ngie atsɔ́ nyìŋ tsetsɛ̀ɛ pi kéen ńnéŋe nzwě tá we ndá.

²Pi gwɔ́ jʉ’ó ńne ńŋá’te, tá mbà pi kěen lúŋ yɛ̌ ntí nò lǔŋ, é piŋ fóo tsetsɛ̀ɛ pi jwoŋo nyìŋ gẅie à ka gÿo pú’u.

³Pi tè ne ńgyá wɔ̀ɔn lenÿɔ́g tsetsɛ̀ɛ pi wɔ́. Tá á cʉa ná tà’ ncwò wege ńgwɔ́ pɔ́ tsetsɛ̀ɛ pi. Á gʉa ná mèŋ, mbà mèŋ n kéen ndá’ ńŋaga nyìŋ gẅie à ka gÿo yɛ̌ nò pɔ́ pá’ fʉ̀’ gie n ka gwɔ̌ pɔ́ ssé tsetsɛ̀ɛ pi la, ńzáb ngie:

⁴Pi lɔɔn ńcú’te nà lezíŋ Cʉ̀apʉ̀a Yěsô. Mbà á cʉa ná tà’ ncwò wege n gwɔ́ yɔ́ɔn pɔ́ ssé. Pi lɔg metʉ̀ Cʉ̀apʉ̀a Yěsô,

⁵ńtsege wɛ̌ nyìŋ náa mbwo Sátà. À tágte mbab nnɛ́ ngàŋ légwɔ́ gie á ge lá’a lyɛ̌’ gie Cʉ̀apʉ̀a ge lá’ tó, àzẅìge ngàŋ tsẅɛ́.

⁶Á té poŋ pi ŋá’te lé yɛ̌ ntí nò tsetsɛ̀ɛ pi wɔ́. Pi tè ne ńzsé ngie méjʉ’ʉ *mvòŋ gÿo à feléwa ntsab pú ńkwɔ́’ wɔ́ ka?

⁷Pi kẅile *mvòŋ nzẅìŋe mà tsetsɛ̀ɛ pi, ńzsé ngie pi ge gwɔ́ té *lɔ̌’. À fó pú’u, pi gwɔ́ feléwa ntsab gie á nyé pɔ́ ye sẅé, té tsɔ̌ *mvòŋ mǒ. Pi kéen ńzɔɔn ńdá’ ńgwɔ́ pú’u, á nue mé lá lɔgɔ Kristo ńnuŋe pwɔ́’, á gwɔ́ pá’ wege mûɔ *njʉ̀njÿò línɔ́ɔn *Páskà la.

⁸Pú’u la, pege jÿó línɔ́ɔn *páskà nê *mbelég té mvòŋ, nê ntʉ́m ndʉalʉ̌a, é ntʉ́m gẅie é shwóŋó nò nénʉ́. Tà pege pfɛ́ mbelég gie mé lɔgɔ́ *mvòŋ nzẅìŋe mà ńdɔg ńnyɛte, ée mefà’ tepòŋ, ńgíŋe ńgwɔ́ ye nò tepòŋ.

⁹N da túmo ŋwà’ne mbwo pi ńgɔɔn tsoló ngie: Pi pɔ́ɔn légwɔ́ gie pia pʉ̀a pie é púmo wɔ̌wɔ́ɔ pâ pɔ̌ núŋe nuŋe teme nò.

¹⁰N dɔ̌ɔn tě ńgɔɔn pʉ̀a metsèm pie pɔ́ ée tsɛ̀ɛ yɔɔn njÿó ḿbumo wɔ̌wɔ́ɔ pâ pɔ̌ nuŋe nuŋe wɔ́, ńké tě ńgɔɔn metsǒŋ métsèm wɔ́, ńké tě ńgɔɔn ngàŋ kègɔ́’ métsèm wɔ́, ńké tě ńgɔɔn pàgu’te shúm ngie ee messé metsèm wɔ́. Á nue á laa pú’u, mbà pi ka cʉ́’ ńgẅiin pɔ́ lefóo tsɛ̀ɛ njÿó ńkẅɛ.

¹¹Ngǎŋ, n kɔ̌ɔn ńŋwe’e ńgɔɔn mbwo pi pɔ́ ngie, pi pɔ́ɔn nyìŋ gẅie aa tsetsɛ̀ɛ pi ńně ńgɔɔn ngie aa fɛ́ gẅi nzèm Kristo, ḿbiŋe ḿbumo wɔ̌wɔ́ɔ pɔ́ ye nuŋe nuŋe, ńgwɔ́ ntsǒŋ, kà ńgwɔ́ pɔ́ nyìŋ gẅie à gu’te shúm ngie ee messé wɔ́, kà pɔ́ nyìŋ gẅie à shwoŋo té poŋ nà mezíŋ pʉ̀a wɔ́ɔ, kà pʉ̀a melù’ wɔ́, kà pɔ́ nyìŋ gẅie à kwoŋ nkáb tɛ’ wɔ́. Tà pi lâ yɛ̌ ntí nyìŋ fó ńzɔɔn ńteme mmó ńjÿó.

¹²Pega pʉ̀a pie é té pʉ̀a Kristo wɔ́ zɔɔn ńgẅiin kɔ́ tà mèŋ n ŋaga wɔ́b? Pi gẅiin pɔ́ léŋag pʉ̀a pie pia pɔ̌ pú ńgwɔ́ ndá.

¹³E Ssé ge lá’ ŋag pʉ̀a pie é té pʉ̀a Kristo wɔ́. Pi fóo nùɔ pi ńjwoŋo nyìŋ tepòŋ.