Read Ngiemboon 1 Korento 8 Bible Online

1 Korento 8 - Ngiemboon bible

1 Korento 8

¹Á gʉa nà nò pfwɔ́’ɔ mbab[4] gie mé nǎ nà shúm sie mé gu’te ngie ee messé, mbà áa nénʉ́ ngie pi metsèm zɔ́gɔ ńgɔɔn ngie pi zɔ zsé nò mǒ. Tá’ yɛ̌ ntí zsé nò gÿo nyìŋ ŋá’te ŋa’té. Tá mmó gie á gÿo mé kẅi’i ńzáb pɔ́ ntʉ́m nà Ssé, aa nyìŋ lé ně ńkwoŋo fɛ́ we.

²Nyìŋ lɔɔn ne ńkwaŋa ngie à ne ńzsé tsɔ́ mmó, mbà à nyě tè zsě pá’ á kɔ’ɔ́ ne ńzɛ́te ngie à zsé pú’u.

³Tá ńgwɔ́ gie nyìŋ lɔɔn ne ńkwoŋo Ssé, mbà ngàŋ aa nyìŋ gẅie e Ssé ně ńdá’ ńzsé yé.

⁴Á ké ńgʉa nà nò pfwɔ́’ɔ mbab gie mé nǎ nà shúm sie mé gu’te ngie ée messé, mbà pege ne ńzsé ngie atsɔ́ mmó gie à lɔɔn ńgwɔ́ mé gu’te ngie ée tsɔ́ ssé à té tsɛ̀ɛ njÿó wɔ́. Pege ne ńzsé ngie e Ssé gwɔ̌ pɔ́ yémɔ’ɔ́.

⁵Tà mbɔɔ pá’ eshúm ée léfaŋ mbɔɔ ndùme ssé tsetsá’ etsɔ́ pʉ̀a gɔɔn ngie ée messé, ńdɔg pú’u, ńgÿo messé ńgyɔ́ɔn, mecʉ̀apʉ̀a ńgíŋe ńgyɔ́ɔn yɔ́b,

⁶tá á ké ńgwɔ́ mbwo pege, tà’ Ssé wémɔ’ɔ́ nzɔ̌ wɔ́ wó, ńgwɔ́ Tá gẅie kɔ̀ɔkɔ́ɔ fóo pɔ́ mbwo yé. Pege piŋ ńgwɔ́ wó ńtí pɔ́ ye. Tà’ Cʉ̀apʉ̀a gwɔ́ wó ńgwɔ́ Yěsô Kristo gẅie à kɔ̀ɔkɔ́ɔ gwaa gwɔ́ wó wɔ́ɔ yé zɔ̌ gÿo. Pege piŋ ńgwaa gwɔ́ wó ńzẅɛ́’ɛ pɔ́ ye.

⁷Tá mânyìŋ ntsèm tsetsɛ̀ɛ pege zɔ tè zsé ngie messé zɔɔn tè kwa’ ńgwɔ́ wó wɔ́. Ntyě kaa sag pá’ tsɔ́ ntá’ pʉ̀a kɔ́ɔn ńgee jʉ’e shúm sie mé gu’te ngie ée tsɔ́ messé wɔ́. Á cʉa pú’u, ńgwɔ́ gie pɔ́ lɔɔn ńne ḿpfɛ́ɛ pfwɔ́’ɔ mbab gie mé nǎ nà shúm ŋwɛ́ pé’e, á gwɔ́ mbwo pɔ́b, pɔ́ ne ńzsé ngie mé nǎ mbwo kwà’ messé, mbùm yɔ́b cúa wɔ́b. Ntʉ́m wɔ́b gẅie é nyé ḿbÿɛ́ pÿɛ́ jú’, mbà é kǎ ncÿǒ.

⁸Pi zɔɔn ńzsé ngie ammó léjÿó té gÿo tá Ssé kẅi’i ńkwoŋo wégè wɔ́. Pege lɔɔn tè pfɛ́, mbà pege kaa tsɔ́ mmó pyé, ḿpfɛ́, mbà tsɔ́ mmó kaa ná pege kẅi’i.

⁹Tá, pi ké ḿbɔ́ɔn pá’ à lɔɔn ńgwɔ́ gí mmó gie pi ne ńzsé ngie pi ku’u légÿo, cʉ́’ʉ mmó gie pʉ̀a pie é nyé mbÿɛ́ pÿɛ́ ge kwɔɔnte mǒ é gwe ssé,

¹⁰á nue nyìŋ lɔɔn ńgyá gú gẅie ɔ́ɔ nyìŋ gẅie à zsé nò, ɔ̀ ńnéŋe ssé, ńne ḿpfɛ́ɛ mmó, nà tsɔ̌ jʉ’e messé ŋwɛ́, mbà wɛ̌ légwɔ́ tè tsóte nyìŋ gẅie à nyě ḿbÿɛ́ pÿɛ́ lépfɛ́ɛ pfwɔ́’ɔ mbab gie mé nǎ nà shúm sie mé gu’te ngie ée messé wɔ́?

¹¹Á gwɔ́ pú’u, à cʉa nà mmó gie ɔ̀ ne ńzsé, nyìŋ gẅie à nyě ḿbÿɛ́ pÿɛ́, à kúu pyé. Tá ńgwɔ́ fɛ́ wege gẅie Kristo la kwé nà twó yé.

¹²Pi gÿo nò tepòŋ ná yɔɔn ntí á nà mefɛ́ pi, á légÿo mmó gie á ge gege wɔ́b tsɛ̀ɛ ntʉ́m wɔ́b gẅie é nyé ḿbÿɛ́ pÿɛ́, mbà pi gÿo nò tepòŋ pɔ́ ná Kristo.

¹³Áa yɛ̌ tá ńgwɔ́ gie n dɔɔn ńjÿó mmó léjÿó, le gwɔ́ gẅie mèŋ n jÿǒ gÿo fɛ́ wɔ̀ɔn gwe ssé, mbà á cʉ́’ gie mèŋ n ké ńgÿo fɛ́ wɔ̀ɔn gwe pɔ́ ssé, n de lá’ ńgíŋe ḿpfɛ́ mbab wɔ́.