Read Ngiemboon 1 Korento 9 Bible Online

1 Korento 9 - Ngiemboon bible

1 Korento 9

¹Mèŋ n gee pá’ɔɔn ńgwɔ́ n de gÿo mmó nà ntí gie mèŋ n zsé wɔ́ ka? N te ngàŋ ntúm Yěsô wɔ́ ka? Mèŋ n da tè gyá yɔ́ɔn Cʉ̀apʉ̀a wege Yěsô wɔ́ ka? Pi ka tè gwaa zsé Cʉ̀apʉ̀a, éfóo pɔ́ nà fà’ gie mèŋ fa’a mbwo ye wáa?

²Petsɔ́ pʉ̀a lɔɔn ne ńdʉ’ʉ ngie n te ngàŋ ntúm Yěsô wɔ́, mbà á fó ńgʉa mbwo pi, mèŋ n gwɔ́ wɛ̌. Pá’ pi la nnɛ́ ná Cʉ̀apʉ̀a la, pi lɔg pú’u, ńgwɔ́ liŋé gie á la’te ngie n gee ngàŋ ntúm Yěsô Kristo.

³Pi jú’u nò gie n ge gɔɔn lélɔg ńkẅé twó yɔ́ɔn mbwo pʉ̀a pie pɔ́ túu *lɔ̌’ nà yɔɔn ntí lélɔg fa’.

⁴Peg tè gẅiin yég lékẅé mmó ḿpfɛ́, ḿbiŋ ńnú ńtí fà’a yég wɔ́ ka?

⁵Mbɔɔ wɛ̌ nyìŋ wɔ́ ná peg tè gẅiin yé légwɔ giŋ, pɔ́ tsɔ̌ fɛ́ wege nyìŋ Kristo we manzwě gwɔ́, á gwɔ́ nzwě we wɔ́ ka? Á té pá’ Kéfas, laa petsɔ́ megàŋ ntúm, mbɔɔ mefɛ́ Cʉ̀apʉ̀a gÿo wáa?

⁶Kà á gwɔ́ pɔ́ ngie peg Panebâse gílé peg yé zɔ gẅiin léfa’ tá ńjÿó?

⁷Pi lǎ jú’u nzɔ̌ nyìŋ gwɔ́ ndÿɔ́’ ncù, ésele ḿpfɛ́ɛ pɔ́ pɔ̀ɔn ye? Kà ńgyá nzɔ̌ nyìŋ pye tÿǒ nzěm, à tè jÿó ntɔ̌ɔn mǒ wɔ́? Kà ńgyá nzɔ̌ nyìŋ gwɔ́ mpfèle mefòŋ, à tè ńnéŋe ńkyéen mbʉ́ ńnúu wɔ́?

⁸Ndyɛ̌’ pi gɔɔn ngie mèŋ m bǐ fʉ̀’ pɔ́ nà menò mie é ne ńcʉate pɔ́ tsetsɛ̀ɛ pʉ̀a mesoŋ. *Lepʉ̌ Mǒse té gíŋe ńgɔɔn yé pɔ́ pú’u wɔ́ ka?

⁹Mé la ŋwe’e tsɛ̀ɛ *lepʉ̌ Mǒsê ngie: «Tè kwɛ́ ncwò fòŋ gie ɔ̀ ne ńdɔgɔ yé ḿbú’u ngesáŋ ntsíŋ». Tà Ssé lɔgɔ pú’u, ńtsɔ́ɔn pɔ́ mezìŋe fòŋ?

¹⁰À lɔ̌ɔn tě ńgɔɔn pá’ɔɔn ńtí pɔ́ wégè wáa? N kwǎŋ ngie à gɔɔn ntí pɔ́ wégè. Mé la ŋwe’e yɔɔn nò, ńtí pɔ́ wégè, á zɔɔn ne ńzɛ́te ngie njʉ̀’ ngwóŋ, pɔ́ ndàg shúm, pɔ́ ne ńzẅí’te yɔ́b mmó nà shúm sie é ge kẅɛɛ nká’.

¹¹Peg ka pye mbyè mmó gie e fóo mbwo Ssé á tsetsɛ̀ɛ pi. Peg lɔɔn ńgwɔ́ pá’ɔɔn ńgʉa nà shúm sí, ńgẅiin tsɔ́ pá’ pʉ̀a pie pɔ́ fóo nká’, ńdag shúm la, mbà peg lɔgɔ séen ńjÿó pi gí tà á cʉa cʉa lá?

¹²Á lɔɔn ńgwɔ́ gie petsɔ́ pʉ̀a ne ńkẅé shúm mbwo pi, mbà peg zɔ̌ kɔ’ɔ́ tè zɔɔn gẅiin lévɔg ńkẅé wáa? Tà mbɔɔ pú’u, peg ka ké tè kẅé. Tà ńcʉ́’ pú’u, mbà peg ne shÿɔgɔ ná kɔ̀ɔkɔ́ɔ shÿɔg, ḿbɔ́gɔ légÿo mmó gie á ge táte pʉ̀a lé jú’ nkʉ̀ mbòŋo Kristo.

¹³Pi tè ne ńzsé ngie jʉ’e Ssé zɔ̌ jÿɔ́g pʉ̀a pie pɔ́ fa’a tsoló wɔ́ ka? MÀbiŋ tè ne ńzsé ngie pʉ̀a pie pɔ́ nuŋe pwɔ́’ jʉ’ gie mé nuŋe pwɔ́’ wó jʉ’e Ssé, pɔ́ gẅiin yɔ́b mmó nà shúm pwɔ́’ sie mé lɔ̌g ńtóo mvfò Ssé wɔ́ ka?

¹⁴Áa ndʉŋ ndʉŋ pá’ Cʉ̀apʉ̀a la záb ngie pʉ̀a pie pɔ́ ne ńtsẅii nkʉ̀ mboŋo, pɔ́ ge ne jÿó shúm sie é fóo ná fa’a létsẅi nkʉ̀ mbòŋo.

¹⁵Á lɔgɔ ńgwɔ́ ngie mèŋ n da gẅiin lézɛ́te shúm mbwo pi, tá n kě laa zɛ́te. Mèŋ n ké tě ńŋwe’e pá’ɔɔn ńdɔgɔ ńzɛ́te ngie mé ná shúm né mèŋ wɔ́. À cʉ́’ gie n zẅíŋ nyìŋ gÿo mèŋ n nyé yɔɔn nò, gie mèŋ n dɔgɔ ńka’te, mèŋ n kwé.

¹⁶Áa mbwo mèŋ, letsẅi nkʉ̀ mbòŋo Yěsô Kristo, á té gwɔ́ pɔ́ tsɔ́ mmó lɔg ńŋá’te wɔ́. Á gwɔ́ pɔ́ mmó gie mèŋ n ké ńgẅiin pɔ́ légÿo. N dɔɔn ńdʉ’ʉ létsẅi nkʉ̀ mbòŋo Yěsô Kristo, mbà mèŋ n kǎ ndòon.

¹⁷Á laa pé’è mèŋ n zɔ̌ kaŋa yɔɔn fà’, mbà mèŋ n gẅiin lézẅí’te ntsɔ’ɔ́ fà’. Tá’, pá’ áa fà’ gie mèŋ n ké ńgẅiin pɔ́ léfa’ la, áa mbwo mèŋ ńgwɔ́ pɔ́ pì’ gie n kě ńgẅiin pɔ́ lékaa.

¹⁸Ewɔ̀ɔn ntsɔ’ɔ́ fà’ ée pá’ɔɔn ńgwɔ́ kɔ́? À gwɔ́ pɔ́ mèŋ létsẅi nkʉ̀ mbòŋo pɔ́ tè kẅě mmó, pɔ́ tè zɛté shúm sie mèŋ n gẅiin lélɔg pá’ mèŋ n gee nyìŋ gẅie à tsẅii nkʉ̀ mbòŋo ńzɛ́te.

¹⁹Pá’ mèŋ n ně ńgɔɔn la, mèŋ n gẅiin légÿo kɔ̀ɔkɔ́ɔ nà ntí gie mèŋ n zsé, tá’ mèŋ n déen ńzẅíŋ nkwɔɔn pʉ̀a metsèm, ńzsé ngie n ge lɔg pú’u, gÿo pʉ̀a tà ńgyɔ́ɔn cʉ́’ pʉ̀a Kristo.

²⁰Mèŋ n gee fʉ̀’ gie mèŋ n ne fa’a tsetsɛ̀ɛ pà Yuda, mèŋ n ńnéŋe pá’ nyìŋ Yuda la, ńzsé ngie n ge lɔg pú’u, é gÿo pà Yuda cʉ́’ pʉ̀a Kristo. Ńgwɔ́ fʉ̀’ gie n gee tsetsɛ̀ɛ pʉ̀a pie *lepʉ̌ Mǒse ne sá’a wɔ́b, mèŋ n ńnéŋe pá’ nyìŋ gẅie *lepʉ̌ ne sá’a yé la, ńzsé ngie n ge lɔg pú’u, é gÿo pʉ̀a pie *lepʉ̌ ne sá’a wɔ́b é cʉ́’ pʉ̀a Kristo, ńnéŋe pú’u, tá *lepʉ̌ Mǒse ké tè ne sá’a wɔ̀ɔn mɔ́.

²¹Mèŋ n gee fʉ̀’ gie mèŋ n ne fa’a tsɛtsɛ̀ɛ pʉ̀a pie *lepʉ̌ Mǒse té ne sá’a wɔ́b gwɔ́, mèŋ n ńnéŋe pá’ nyìŋ gẅie *lepʉ̌ té ne sá’a yé wɔ́ la, ńzsé ngie n ge lɔg pú’u, é gÿo pʉ̀a pie *lepʉ̌ té ne sá’a wɔ́b gwɔ́, e cʉ́’ pʉ̀a Kristo, ńnéŋe pú’u, á té ńdɔgɔ ńgɔɔn pɔ́ ngie *lepʉ̌ Ssé té ne sá’a wɔ̀ɔn mɔ́, é ne sá’a wɔ̀ɔn sá’, á nue mèŋ n neŋé pɔ́ ná pá’ *lepʉ̌ Kristo ne ńzɛ́te.

²²Mèŋ n gee fʉ̀’ gie mèŋ n ne fa’a tsetsɛ̀ɛ pʉ̀a pie pɔ́ nyé ḿbÿɛ́ɛ pÿɛ̌ nà lezǎb ntʉ́m ná Kristo, mèŋ n ńnéŋe pɔ́ pá’ nyìŋ gẅie à nyě ḿbÿɛ́ɛ yé pÿɛ̌ la, ńzsé ngie n ge lɔg pú’u, é gÿo pɔ́ cʉ́’ kwà’ pʉ̀a Kristo. Nyìŋ lɔɔn ńgwɔ́ pɔ́ lêkɔ́ wɔ́, á gwɔ́ pɔ́ lêkɔ́ wɔ́, n cʉ́’ pá’ yé, ńzsé ngie n ge lɔg pú’u, é gÿo ná ntí gie ńgwɔ́ á tsẅɛ́.

²³Mèŋ n gÿo wɛ̌ ngwòŋo nò ntsèm pɔ́ pá’ nkʉ̀ mbòŋo ge sa jʉ’, mbɔɔ pá’ mèŋ n ne ńzẅí’te sɔ́ɔn shúm mbòŋo sie é fóo ná nkʉ̀ mbòŋo.

²⁴Pi ne ńzsé gí ngie á gʉa jʉ’ gie mé kÿo ndʉ̌ wó, pàkÿo ndʉ̌ kÿo pɔ́ metsèm, tá tà’ nyìŋ wémɔ’ɔ́ ná pɔ́b zɔ̌ kaa mmó gie mé ně ńzáb. Wɔ̌wɔ́ɔ ná pi gwɔ́ à kÿo nà ntí gie à ge kaa mmó gie mé ně ńzáb.

²⁵Pàgÿo metɔ́ɔntè mie nò metʉ̀ áa mǒ, pɔ́ lʉ’ shúm tɛ’, ńzsé pá’ pɔ́ ge gẅiin mbùm yɔb pú’u, ńdɔgɔ ńtsɔ́ɔn pɔ́ pá’ mé ge lá’ tɔ’ *ngǔ’[5] yɔb. Yɛ̌ ngǔ’ gwɔ́ gie e ge lá’ cʉŋte. Tá ńgʉa ná pege, pege gwaa gÿo pú’u, ńtsɔ́ɔn ngǔ’ gie e těen ńdá’a ńcʉŋte wɔ́.

²⁶Áa mmó gie á gÿó mèŋ n gee pá’ɔɔn ńně ńkÿo ndʉ̌. Tá ne ńkÿo nÿɔ́g mɔ́ɔn tyé nà mmó gie n dʉŋe yɛ̌. Mèŋ n gǐŋ ńgwɔ́ pá’ɔɔn ńgwɔ́ pɔ́ pá’ nyìŋ gẅie à ne tsẅiŋe nkwɛ̀ la, tá ńké tè ne ḿma’a pwó ńcúa jʉ’ʉ sẅɛ̀ɛ wɔ́.

²⁷Mèŋ n ne ńgẅiin mbùm yɔɔn pá’ɔɔn tɛ’, ńkú’te tà ńzsé mmó gie mèŋ n gÿo yɛ̌, ḿbɔgɔ létsẅi Nkʉ̀ Mbòŋo mbwo pʉ̀a, mé piŋ ńgÿo ḿbe’e wɔ̀ɔn ńnáa nzèm.