Read Ngiemboon 2 Korento 1 Bible Online

2 Korento 1 - Ngiemboon bible

2 Korento 1

¹Yɔɔn ŋwà’ne fóo mbwo mèŋ pɔl gẅie e Ssé la kwoŋ kwoŋ ńtsɔ́’ɔ wɔ̀ɔn ńdɔg ńgÿo ngàŋ ntúm Yěsô Kristo. Peg fɛ́ wege Timoté ŋwe’é yɔɔn ŋwà’ne, ńnáa mbwo cú’tè pʉ̀a Ssé á tÿǒsoŋo Korento. Mèŋ n gǐŋ ńŋwe’e ńnáa mbɔɔ mbwo pʉ̀a Ssé metsèm, pie pɔ́ ée nà shÿó Akay ntsèm.

²Tá wege Ssé mbɔɔ Cʉ̀apʉ̀a Yěsô Kristo ne ńgwɔ́ né pi ḿbiŋ ne ńnéŋe sẅétè ntʉ́m pi.

³!Pege ná ndǎg mbwo Ssé, Tá pà Cʉ̀apʉ̀a wégè Yěsô Kristo, gẅie letsɔ̌ɔn mezìŋe pʉ̀a fóo pɔ́ ne yé, letoonté wɔ́b á fóo pɔ́ ne yé.

⁴À tóonte wégè ngwòŋ fʉ̀’ ntsèm gẅie pege ée tsɛ̀ɛ ngɔ́’ légwɔ́ gie pege yege ge ku’u létóonte petsɔ́ pʉ̀a pie ée tsɛ̀ɛ ngɔ́’, é cʉ́’ʉ létóonte wɔ́b é tóonte nà ntí gie e Ssé ka tóonte wégè.

⁵Ndʉŋ ndʉŋ pá’ pege ne ńgyá ngɔ́’ tɛ’, pá’ Kristo la gyá yé ngɔ́’ tɛ’ la, e Ssé giŋé ne ńtóonte wégè tɛ’ ńcʉa nà Kristo.

⁶Peg lɔɔn ne ńgyá ngɔ́’, mbà pi ge zẅɛ́’, e Ssé cʉa mǒ, ńtóonte gẅí, pi ké ńgwɔ́ pɔ́ ná mánzsè Ssé. Á lɔɔn ńgwɔ́ gie e Ssé ne ńtóonte wég, mbà á gwɔ́ pɔ́ lélɔg ńtóonte gẅí, pú’u pi ku’u léshÿɔg á ná fʉ̀’ gie ntí ngɔ́’ gie e ne ńkúu wég, e kǔ gẅi gí.

⁷Á gʉa fʉ̀’ gie peg ne ńkwaŋte gẅi peg kwà’ ńzsé ngie à lɔɔn ńgwɔ́ peg é le gẅi pɔ́g, anue peg ne ńzsé ngie, ndʉŋ ndʉŋ pá’ pi ne ńgyá gi ngɔ́’ la, e Ssé giŋé ne ńtóonte gẅi gí pá’ peg.

⁸Mefɛ́ mefɛ́, peg ne ńtsɔ́ɔn ngie pi zsé nzẅìŋ ngɔ́’ gie peg ka gyǎ tsɛ̀ɛ pàga ngwòŋ Azia, peg la gyá ngɔ́’ wó gyá tà metʉ̀ még mag, peg cʉ́’ʉ ńjú’u ńgee pɔ́ ńkwéte.

⁹Kwà’ peg yég la zẅíŋ ngie mé záb ngie mé ge zẅéte weg, á cʉa pú’u, peg tè gíŋe ńkwaŋ ngie à lɔɔn ńgwɔ́ peg lê twó ség gíŋ ńku’u légÿo tsɔ́ mmó wɔ́, peg cʉ́’ ńgẅiin yég pɔ́ lényé wég ngwòŋo nò ntsèm mbwo Ssé gẅie à zíme mepfó nà legwé.

¹⁰Peg laa ncwò legwé mbÿág pú’u, yé zɔ̌ kẅile wég, à ge gÿo gíŋe kẅile wég tsɛ̀ɛ tsɔ́ mengʉ̀ngʉ̀. Áa nénʉ́ peg kwá’ ne ńzsé ngie à ge gÿo gíŋe kẅíle wég tsɛ̀ɛ tsɔ́ mengʉ̀ngʉ̀,

¹¹é gwaa kẅile wég, agí pwó gwɔ́ mǒ, ńtí nue pi ne sẅíŋte yé nà twó ség. Pá’ pʉ̀a tà ńgyɔ́ɔn ne sẅíŋte yé nà twó ség la, à ge gÿo cÿó gem yég, é ne tóonte wég, à gwɔ́ pú’u, pʉ̀a tà ńgyɔ́ɔn ná ndǎg mbwo Ssé yɔ́b nà twó ség.

¹²Á gʉa nà weg léńnéŋe tsetsɛ̀ɛ pʉ̀a mesoŋ, mbà yeg mmó gie peg lɔg ńka’te áa pá’ peg gÿo pɔ́ mmó gie á fóo mbwo Ssé. Peg tè ne fʉte tsɔ̌ nyìŋ wɔ́, peg ee pàshwóŋ pʉ̀a nò lê ntʉ́m Ndʉalʉ̌a, mbùm yeg neŋé shwóŋó wég pú’u. Áa pá’ peg la gÿo tsetsɛ̀ɛ pi. Peg la tè lɔg pɔ́ zsě nò pʉ̀a mesoŋ tá ńdɔg ńnéŋe pú’u wɔ́. Peg la lɔg pɔ́ pá’ e Ssé ne ńcÿó gʉm yég, ńkẅéte wég.

¹³Áa yɛ̌ tá peg tè ŋwe’e tsɔ́ mmó tsɛ̀ɛ ŋwà’ne ńná né pi á gwɔ́ ye ndyɛ̀’ɛ ná nò gie pi tǒŋ ńjú’ wɔ́, n kwǎŋ ngie pi ge pú jú’ tà cʉ́me.

¹⁴Pá’ pi ka zye lé jú’ ntí nyìŋ gẅie mèŋ n gee wɛ̌ la, á ge lá’a lyɛ̌’ gie Cʉ̀apʉ̀a Yěsô Kristo tóo, mèŋ n gwaa gwɔ́ mbwo pi é gwɔ́ gí mmó ka’te, pi gíŋe ńgwɔ́ yɔ́ɔn.

¹⁵Mèŋ n ka ne ńzsé ngie á ge gwɔ́ pɔ́ pú’u. Áa mmó gie á ka gÿo tá mèŋ fa’a lévɔg ńcʉa mbʉ̀a pi, tá ńgÿo ńgíŋ ńcʉa, ńzsé ngie n ge gÿo pi kág kág ngʉ̀a mbʉ́a.

¹⁶Mèŋ n ka ne ńkwaŋa le gwaa gʉa Makedonia ńcʉa lá’ pi, ḿbiŋ fó Makedonia ńgíŋ ńtó né lá’ pi, pi kẅéte wɔ̀ɔn légʉa tà ńkúu Jẅidea,

¹⁷ńzsé ngie n kɔ̌ɔn ńkwoŋo légÿo pú’u, ńdɔgɔ ḿma’a pɔ́ kwàŋ la? Kà pi kwǎŋ ngie n cʉ́’ʉ légɔɔn nò gie mèŋ n ge gÿo, ńdɔg pɔ́ legyè nyìŋ mesoŋ ńgɔɔn, tà á gwɔ́ ngie n gwɔ́ mèŋ n gɔɔn nò, ḿbiŋ ńkúbe?

¹⁸Ngǎŋ! Á gʉa nà nò gie peg ka shwóŋó gẅí, peg ka tè gɔɔn nò ḿbiŋ ńkúbe wɔ́. E Ssé ne ńzsé.

¹⁹N gɔɔn pá’ɔɔn nue Yěsô Kristo, Míŋ Ssé gẅie peg Silase, ńgÿo Timoté ka shwóŋó nò yé mbwo pi, à la tè tó ńgwɔ́ nyìŋ gẅie ńgwɔ́ á gɔɔn nò, ḿbiŋ ńkúbe wɔ́. À la tó ńgwɔ́ pɔ́ nyìŋ gẅie à gɔɔn nò, à té kúbe.

²⁰Yé zɔ zɔɔn ńgwɔ́ nyìŋ gẅie à gÿo ngie kɔ̀ɔkɔ́ɔ gie e Ssé la ka’ wɔ́, à pumte. Pú’u, pege lɔg lezíŋ sé, ńgɔɔn ngie *amen[1], ńdɔgɔ pú’u, ńnáa mekù’ mbwo Ssé.

²¹Kwà’ Ssé zɔ gÿo tá peg ne ńtʉte tʉte nzèm Kristo tà mbɔɔ pi. À la faga wégè,

²²ńcÿɔ́’ɔ liŋé yé ná pege, ńnéŋe Zẅìge Ndʉalʉ̌a ntʉ́m pege. Á lɔg ńgwɔ́ ndùŋ mvfò mmó nà shúm sie à ge náa mbwo pege.

²³Pi cʉ́’ mèŋ shwóŋó gẅi mmó gie á ka gÿo tá mèŋ n tè gíŋe ńtóo lá’ pi Korento wɔ́, n ka tè ne ńkwoŋo légÿo pi jú’ kékáŋ wɔ́. Mèŋ n gɔɔn pá’ɔɔn éshwóŋó nò. N dɔɔn ńcÿɔ nò, e Ssé zẅé wɔ̀ɔn.

²⁴Peg ne ńzsé ngie gẅi lézáb ntʉ́m ná Yěsô Kristo à tʉte, peg tě fa’a létó sẅɛ́ɛ gẅí, ńzáb pá’ pi ge gÿo wɔ́. Peg tsɔ́ɔn pɔ́ létó ńkẅéte gẅi pi mege ńjú’ mboŋó.