Read Ngiemboon 2 Korento 11 Bible Online

2 Korento 11 - Ngiemboon bible

2 Korento 11

¹N kwǎŋ ngie n dɔɔn ńgɔɔn yɔ́ɔn nò mbwo pi pá’ nyìŋ gẅie à pʉ̌a la, mbà pi ge zẅíŋ, pi ké ńcʉ́’ n gɔɔn ná yɛ̌ ntí.

²Pi zsé ngie n kwoŋo gẅi tà mèŋ n te zẅíŋ ngie nyìŋ gwaa gÿo mmó ná pi n ne ńgyá wɔ́. Yɛ̌ ntí nkwòŋo gie mèŋ n gẅiin nzèm pi e fóo pɔ́ mbwo Ssé, mélà’mie pi ée mbwo mèŋ, ńgwɔ́ pá’ múɔ manzwě gẅie mèŋ n da pÿé mbwo tà’ nyìŋ wémɔ’ɔ́, angàŋ gwɔ́ Kristo. Mèŋ n ne ńda’te gẅi mbwo yé ngie pi ee pá’ mûɔ ngùɔ gẅie à kaa tsɔ́ *lɔ̌’ kaa.

³Tá’ n kě ḿbɔ́gɔ pɔ́ ngie, à lɔɔn ńgwɔ́ tsɔ̌ nyìŋ cʉŋte twó gí pá’ nnú la pá’ legyè, éfʉte Eva, pi le gíŋe ńgwɔ́ pʉ̀a pie pɔ́ gwɔ gɔɔn ngie pɔ́ zsé yɔ́b pɔ́ ndà’ nò Kristo ńgɔɔn shwóŋó nò wɔ́.

⁴Mèŋ n gɔɔn pá’ɔɔn nue mèŋ n ne ńgyá ngie nyìŋ léen ńgwɔ́ tà ńtó, éshwóŋó gẅi nò ná tsɔ̌ Yěsô, á ké tè gẅie peg la gɔɔn nò ná yé wɔ́, pi gwóon ńzẅíŋ, ńgíŋe ne ńgyá, nyìŋ tó ńgɔɔn nò ndyɛ̀’ɛ ná Zẅìge Ndʉalʉ̌a, kà pɔ́ nà nkʉ̀ mbòŋo wɔ́, á ké tè pumte nà menò mie pi la vɔg ńzẅíŋ wɔ́, pi zẅíŋ zẅǐŋ.

⁵Tá n ne ńkwaŋa yɔ́ɔn ngie pʉ̀a pie pi gyá ngie pɔ́ ée memǎ megàŋ ntúm Yěsô lɛ, pɔ́ té cʉa wɔ̀ɔn nà tsɔ́ mmó wɔ́.

⁶Ndyɛ̌’ áa nò ngie mèŋ m bubte pubte tá’, ńgʉa nà le zsé nò Ssé, atsɔ́ *lɔ̌’ té kẅɛ. Peg léen ńnyɛɛ wɛ̌ le gwɔ́ mbwo pi á nà mentí tà ńgyɔ́ɔn, ngwòŋ fʉ̀’ ntsèm gẅie á la ná shÿó.

⁷N da gwɔ tsẅi nkʉ̀ mbòŋo nò Ssé mbwo pi, ńtsẅi pɔ́ sẅɛ̀ɛ sẅɛ̀ɛ. Esẅí’i mbùm yɔ̀ɔn ńnáa ssé, lélɔg ńka’a pwó gí ńnáa tÿǒ pé’è á lɔgɔ ńgwɔ́ pɔ́ tsɔ́ *lɔ̌’ keen?

⁸N da ne fa’a lá’ pi, ńzẅíŋ petsɔ́ mecú’tè pʉ̀a Kristo zɔ̌ ne ńnáa nkáb né mèŋ, ńdɔgɔ ńtóonte wɔ̀ɔn tà ńgwɔ́ mé gɔɔn ngie n da gÿo pɔ́ fÿɔg.

⁹N daa lá’ pi, á gwɔ́ fʉ̀’e n zága mmó, n te kẅé mmó mbwo tsɔ̌ nyìŋ gẅi wɔ́. Mefɛ́ mefɛ́ pie é la fó Makedonia la náa kɔ̀ɔkɔ́ɔ gie á la ne ńzága mbwo mèŋ. Á la gʉa nà kɔ̀ɔkɔ́ɔ, n te zẅíŋe légwɔ́ pì’ á mbwo tsɔ̌ nyìŋ gẅi wɔ́, é ké le lá’a tsɔ́ lyɛ̌’ tá gwɔ́ pì’ mbwo tsɔ́ nyìŋ gẅi wɔ́.

¹⁰Mèŋ n ge fó nà nò nénʉ́ Kristo gie áa tsɛ̀ɛ ntʉ́m mèŋ, é gɔɔn mbwo pi ngie, n dɔɔn ńgʉa pɔ́ nzɔ̌ jʉ’ á tsɛ̀ɛ Akay wɔ́, n de gwá’a wɛ̌ le gwɔ́ gẅie n dɔg ńka’te wɔ́. N te lá’a tsɔ́ lyɛ̌’ é kẅé mmó mbwo nyìŋ gẅì wɔ́.

¹¹N gɔɔn pú’u, mélà’a kɔ́? Áa nue mèŋ n te gẅi kwoŋ keen? Ngǎŋ, e Ssé ne ńzsé ngie mèŋ n kwoŋo gẅí.

¹²Áa mmó gie n ne ńgÿo, n ge gíŋe kẅi’i gÿo pɔ́ pú’u, lɔg gʉa lê mvfò, ńzsé ngie n ge lɔg zá’ mekwò pʉ̀a pie pɔ́ ne fa’a ndilétáŋ lélɔg ńka’te ńgɔɔn ngie pega pɔ́ pǔ fa’a pɔ́ tà’ ntí.

¹³Epʉ̀a ápɛ̌ é té kwà’ megàŋ ntúm Kristo wɔ́, pɔ́ cÿɔ nò ngie pɔ́ fa’a fà’ Kristo. Mbà pɔ́ léen ńgÿo tà ńgwɔ́ gie mé lɔɔn ńgyá wɔ́b mé gɔɔn ngie ée megàŋ ntúm Yěsô.

¹⁴Á té pú’u, ńgwɔ́ pɔ́ tsɔ́ nò mmɔɔn mmɔɔn wɔ́, á nue Sátà giŋé ńnéŋe yé tà sele ńcʉ́’ ńgwɔ́ pɔ́ pá’ *cÿɔ́’ Ssé gẅie à fóo jʉ’ gie kyɛ̀’ áa wó la.

¹⁵Pi lɔgɔ ńgyá ngie, á té tʉʉ mbwo pafa’ fà’ Sátà lésele tà mé cʉ́’ ńgyá wɔ́b ńgɔɔn pɔ́ ngie pɔ́ ée pafa’a fà’ Ssé wɔ́. Tá’ á ge ké lá’ cʉ́’ʉ nzsòte, pɔ́ kẅé ntsɔ’ɔ́ fà’ é gwɔ́ pɔ́ pá’ mefà’ mɔ́b gwɔ́.

¹⁶Tà méŋ n gíŋe shwóŋó gẅí, ḿbɔ́ɔn nyìŋ gẅì lékwaŋ ngie n gee pʉ̀a, ńkwoŋ pi kwaŋ, ńzẅíŋ ngie n gÿo pá’ pʉ̀a la, n zẅɛ́’ yɔ́ɔn ńná’a ńka’te mêjʉ’.

¹⁷Pá’ á gwɔ̌ légwɔ́ gie mèŋ n ge ka’te la, ammó gie n gee ńgɔɔn fʉ̀’ɔɔn, n tě ge gɔɔn ná ntí gie Cʉ̀apʉ̀a ne ńkwoŋo wɔ́. N ge gɔɔn pɔ́ pá’ fʉ̀’ gie n kwǎ’ ḿbʉ́a la.

¹⁸Pʉ̀a tà ńgyɔ́ɔn ne ńdɔgɔ pɔ́ shúm sie é gwɔ́ pɔ́ se pʉ̀a mesoŋ ńka’te, pú’u la, n ge ka’te yɔ́ɔn.

¹⁹Pi ne ńkwaŋa ngie legyè sí ée wó, tá á ké yɛ̂ gie pi zẅiŋé nò mepʉ̀a lɛ!

²⁰Epʉ̀a ne ńdɔgɔ gẅi ńgÿo menkwɔɔn pɔ́b, pi fa’a pɔ́ jÿó, pɔ́ ne ńjʉʉ shúm sí, ńne ńnwile gẅí, ńtúu pwó legɔ̌’ pi, pi zẅíŋe zẅǐŋ.

²¹Eshʉ́ kwa’ ne ńkúu wɔ̀ɔn pá’ n da tè gẅiin shÿɔgɔ ntʉ́m lényɛɛ gẅi nò pá’ pɔ́b wɔ́. Tá’, nyìŋ lɔɔn ńná’a fʉ’ʉ fʉ’ʉ ńdɔgɔ tsɔ́ mmó ńka’te, mbà mèŋ n ge ka’te cʉa yé, é gɔɔn nò pá’ pʉ̀a la.

²²Pɔ́ lɔgɔ pɔ́ pá’ pɔ́ ée pʉ̀a Heber ńka’te keen? Mbɔɔ mèŋ yɔ́ɔn n gwɔ́ pɔ́ tsɔ̌. Kà pɔ́ pá’ pɔ́ ée pʉ̀a Israel? Mbà mèŋ n tyě pá’ɔɔn ńgwɔ́ pɔ́ tsɔ̌. Kà pɔ́ pá’ pɔ́ ée pʉ̀a ná ngẅɛ̀ Ábalam? Mbɔɔ mèŋ yɔɔn n gwɔ́ pɔ́ tsɔ̌.

²³Kà pɔ́ pá’ pɔ́ ée pafa’a fà’ Kristo? Mbà mèŋ n ge gɔɔn nò kwà’ pá’ pʉ̀a la, é gɔɔn ngie n gee nyiŋ gẅie a fà’ Kristo tà ńtɔ́gɔ wɔ́b métsèm, é gɔɔn pú’u, éfóo ná pá’ n dǎ téŋe zì’i ńcʉa wɔ́b, éfóo ná nzẅìŋ gẅie n dǎ kúu tsǎŋ ńcʉa wɔ́b, éfóo ná nzẅìŋ gẅie mé lǎ cúɔ wɔ̀ɔn ńcʉa wɔ́b, éfóo ná nzẅìŋ mengʉ̀a tà ńgyɔ́ɔn mie legwé la ńnÿɔgɔ wɔ̀ɔn ńcʉa wɔ́b,

²⁴ée ngʉ̀a méntʉ̀a pá’ pà Yuda cǔa wɔ̀ɔn mengwɔ̀ɔn ntsɔ̀b lepfwɔ’ɔ́ lê móm tá,

²⁵ée ngʉ̀a ntá pá’ pà *Roma lǎ lɔgɔ tsěme mmó ńcúa wɔ̀ɔn, mé la lɔg mentóon ńtéme wɔ̀ɔn tà’ legʉ̀a, éfa’a lézẅé wɔ̀ɔn, ée ngʉ̀a ntá pá’ á lǎ cʉ́’ʉ mêjʉ’, stima lɔgɔ wɔ̀ɔn fÿɛ́ɛ ntse. N dǎ lá’a ndùm ntse tà ńgíŋe ńzɔ́g.

²⁶N dǎ giŋ tɛ’, legwé nÿɔgɔ wɔ̀ɔn tɛ’, ńgwá ńgyá ngɔ́’ mentse mie é kwɔ̌’ tà sa jʉ’, ńgwá ńgwe nà mbwo mesèm ncwò, ńgwá ńgwe nà mbwo mefɛ́ pɔ́ɔn pà Yuda, ńgwá ńgwe nà mbwo pʉ̀a pie é té pà Yuda wɔ́, ńgwá ńkúu nò tsɛ̀ɛ metÿǒsoŋ, ńgwá ńkúu nò kwòŋo tsẅɛ, ńgwá ńkúu nò tsɛ̀ ntse té pàa, ńgwá ńkúu nò mbwo pʉ̀a pie pɔ́ cÿɔ nò ngie pɔ́ ée pʉ̀a Kristo,

²⁷ńgwá fa’ mefà’ mie é tʉ̀ tà ńjú’ ńkʉ́a tɛ’, ńgwá ńdá’ té lyé. Nzyè gwá ńgyáŋa wɔ̀ɔn, agág yɔ́ɔn gwá shÿó, ńgwɔ́ tsɔ́ fʉ̀’, eshúm léjÿó pú ḿmaga mbwo mèŋ, efÿɔ́g gwá ńkúu wɔ̀ɔn, mbà mèŋ n zǎg nzsǒ.

²⁸N kaa tʉ́ ntsèm wɔ́, áa lyɛ̌’ ntsèm mèŋ n ne sáŋa nò ná mecú’tè pʉ̀a Kristo mie ée jʉ’ ntsèm,

²⁹ńgwɔ́ gie nyìŋ Kristo lɔɔn ḿbÿɛ́ n jú’ á gwɔ́ pɔ́ pá’ fʉ̀’ gie mèŋ m bÿɛ̌ yɔ́ɔn ma, ńgwɔ́ gie nyìŋ Kristo lɔɔn ńgÿo nò tepòŋ, á gege wɔ̀ɔn tɛ’.

³⁰Á gwé’e ne ńzɛ́te ngie mé ka’te, mbà ńgwɔ́ ńdɔg pɔ́ pá’ m bÿɛ́ pÿɛ̌ ńka’te.

³¹E Ssé gẅie aa tá pà Ndè wege Yěsô Kristo, yé Ssé gẅie á ne ńzɛ́te ngie mé gu’te yé té zá’a pàa, à ne ńzsé ngie n tě ńgɔɔn pá’ɔɔn ńdɔgɔ ńcÿɔ nò wɔ́.

³²Á laa fʉ̀’e n daa tÿǒsoŋo Ndamas, ngúmnɔ́ɔn gẅie fùɔ Aristate la zába yé, á tsẅi mé ne ḿbyɛ́bɛ mencwò nká’a tÿǒsoŋ, éfa’a légwoon wɔ̀ɔn.

³³Tá mé ńnéŋe wɔ̀ɔn tsɛ̀ɛ kekág, éfó nà tsɔ́ tɔ́g gie áa nà nká’ ńtsege wɔ̀ɔn, ésẅí’i wɔ̀ɔn ńtÿɔ́gɔ ssé, tá mèŋ n tsẅɛ́ɛ yé.