Read Ngiemboon 2 Korento 2 Bible Online

2 Korento 2 - Ngiemboon bible

2 Korento 2

¹Pi jú’u mmó gie á ka gÿo n gyá ngie mèŋ n te gíŋe piŋe lá’ pi, é gÿo pi gíŋ ḿmÿɔg wɔ́,

²á nue n dɔɔn ńgÿo pi mÿɔg, mbà pà wɔ̌ ge piŋ gÿo ntʉ́m wɔ̀ɔn kág tà á légwɔ́ pɔ́ gẅi gẅie n zɔ̌ɔn ńgÿo pi mÿɔg wɔ́?

³Áa mmó gie á ka gÿo n ŋwe’e pɔ́ ŋwà’ne ńnáa mbwo pi, á nà ntí gie n ka ŋwe’e la, n ka tè ne ńkwoŋo lé lêen tóo lá’ pi, ńgyá pʉ̀a pɔ́ gÿo mèŋ n gẅiin lémÿɔg tá mbà pɔ́ kɔ’ɔ́ gÿo ntʉ́m wɔ̀ɔn kág kág wɔ́. N ne ńzsé mboŋó ngie n dɔɔn ne ńkága, mbà pi ge kág gí.

⁴N ka gwɔ́ ŋwe’e ŋwà’ne ŋwɛ́, ńdɔg pɔ́ ntse nÿɔ́g, letʉ́m sɔ́ɔn ne ńgyáŋa tɛ’, mbùm yɔɔn ne ńtsyɛte, tá mèŋ n kɔ̌ɔn ńké tě ńŋwe’e ńdɔgɔ ńgÿo ngie pi mÿɔg wɔ́. Mèŋ n kɔ̌ɔn ńŋwe’e pú’u, pɔ́ lélɔg ńnyɛɛ gẅi máamáa nkwòŋe gie n gẅiin nzèm pi.

⁵Á gʉa nà nyìŋ gẅie à ka gÿo pi ńnéŋe nê lemÿɔg, mbà à ka tè gÿo pɔ́ ná mèŋ wɔ́, à ka gÿo pɔ́ ná pi metsèm. Ndyɛ̌’ á ka tè ná pi métsèm wɔ́, tá á ka kě ńgwɔ́ ná lelÿò pʉ̀a.

⁶Lelÿò pʉ̀a ké ńkaga yé, á ku’ pú’u.

⁷Tà á ne zɛ́te fʉ̀’ɔɔn pɔ́ ngie pi lege ńnáa mbwo yé, ńtóonte yé, ḿbɔ́g pá’ à lɔɔn ńgwɔ́ á mÿɔg séság, ńkʉ́a.

⁸Pú’u la, mèŋ n ne ńtsɔ́ɔn ngie pi gÿo nà ntí gie à ge zsé ngie pi nyě ńkwoŋo yé kwoŋ.

⁹Pi zsé ngie n ka gǐŋ ńgwaa ŋwe’e ŋwà’ne mbwo pi ńne fa’a lélʉŋte gẅi ńgyá, ka pi ku’u lé jú’ ncwò ná menò ntsèm wɔ́.

¹⁰Pi lɔɔn ńdege mefʉa nyìŋ, ńnáa mbwo yé, mbà mèŋ n degé yɔ́ɔn ńnáa mbwo ngàŋ, ńgwɔ́ gie n dɔɔn ńgẅiin lélege mefʉa nyìŋ, ńdege, mbà mèŋ n tyé mvfò Kristo ńdege pɔ́ lélɔg ńkẅéte gẅí,

¹¹ńzsé ngie pege tè nyé Sátà à cʉa wégè wɔ́, á nue pege tè ne ḿmoŋe mmó gie aa nzèm pege é fa’a wɔ́.

¹²Á gʉa nà wɔɔn legìŋ ŋwɛ́, mbà mèŋ n da kúu tÿǒsoŋo Toras létsẅi Nkʉ̀ Mbòŋo Kristo wó, Cʉ̀apʉ̀a tsɛ ńtsɔ́’ɔ mánzsè mbwo mèŋ léfa’a fà’ yé,

¹³tá’, mbùm yɔ̀ɔn ké ńtsyɛte tsyɛte, mélà’mie n da tè fɛ́ wege Titus wó gyá. Áa mmó gie á la gÿo mèŋ n de’e pʉ̀a Toras ńgʉa nê Makedonia léfa’a yé.

¹⁴Tá’, peg ge ké ná pɔ́ ndǎg mbwo Ssé, á nue peg lɔɔn ńgwɔ́ pɔ́ nzɔ̌ wɔ́, mbà à ge gÿo peg gwɔ́ pɔ́ ná mánzòŋ Kristo, mbà yé Kristo jÿǒ ncù. Yé Ssé lɔgɔ wég ńgÿo mé zsé Kristo jʉ’ ntsèm, pá’ mmó gie mé túɔ, àgyě kwɔ́’ɔ ésa jʉ’ ntsèm la.

¹⁵Peg zɔɔn ńgwɔ́ mbwo Ssé ńgwɔ́ pɔ́ pá’ gyě mmó mbòŋo gie á fóo mbwo Kristo. Á gyě gie á kwɔ́’ ńtéme mezẅé pʉ̀a, á mezẅé pʉ̀a pie pɔ́ ne ńtsẅɛ́ɛ, tà mbɔɔ ná me pʉ̀a pie pɔ́ ne ḿbyé.

¹⁶Yɛ̌ gyě áa mbwó pʉ̀a pie é ne ḿbyé ńgwɔ́ gyě legwé gie á náa legwé, ńgwɔ́ mbwo pʉ̀a pie é ne ńtsẅɛ́ɛ, ńgwɔ́ gyě le gwɔ́ wó gie á gÿo mé gwɔ́ wó, tà áa pá’ɔɔn, ńgwɔ́ wɔ̌ ku’u légwɔ́ mmó gie mé ge lɔg fa’a yɔɔn fà’?

¹⁷Tá’ peg tè pá’ tsɔ́ pʉ̀a tà ńgyɔ́ɔn pie pɔ́ lɔgɔ shwóŋè Ssé ńgÿo sɔ́b shúm metʉ̌a wɔ́, peg shwóŋ yég pɔ́ lê ntʉ́m Ndʉalʉ̌a, ńgwɔ́ pɔ́ pʉ̀a pie e Ssé ka tǔm. Peg gwɔ́ shwóŋ e Ssé ne ńgyá wég peg piŋ ńda nnɛ́ ná Kristo.