Read Ngiemboon 2 Korento 6 Bible Online

2 Korento 6 - Ngiemboon bible

2 Korento 6

¹Pá’ pega Ssé zɔ puté ne fa’a la, peg ne ńkẅiŋte gẅi ngie tà pi gÿo ná ntí gie, légwɔ́ gie é Ssé tsɔ̌ɔn gẅí, ńcÿó gʉm gí, à ge cʉa sẅɛ̀ɛ.

²E Ssé la zɔɔn ńgɔɔn ngie: Afʉ̀’e lékẅéte gú la gwɔ́ tà ńku’, n jú’ ngyè jù, alyɛ’ɛ́ légÿo pʉ̀a mesoŋ tsẅɛ́ la ku’, n tó ńkẅéte gú. Pi zsé ngie yɔɔn ké ńgwɔ́ fʉ̀’ɔɔn pá’ɔɔn ńgwɔ́ fʉ̀’ʉ mbòŋo, yɔɔn áa lyɛ̌’ gie ńgwɔ́ nyìŋ tsẅɛ́.

³Á gʉa ná peg ngàŋ ntúm, peg tè ne ńgÿo tsɔ́ mmó gie ńgwɔ́ nyìŋ kwɔɔnte mǒ ńgwe ssé, mé fó mǒ ńdɔg ńzoonte fà’a yég wɔ́.

⁴Tà ńcʉ́’ pú’u, peg tyé nà kɔ̀ɔkɔ́ɔ wɔ́, ńnyɛ ngie peg ee pafa’a fà’ Ssé, ńdɔgɔ pá’ peg ne shÿɔgɔ tɛ’, á ná fʉ̀’e ngɔ́’, á nà fʉ̀’ gie nò á cʉa wég, á nà fʉ̀’ gie peg ne ńcÿɔ’ɔ tɛ’,

⁵kà pɔ́ fʉ̀’ gie mé ne ńcúa wég wɔ́, kà pɔ́ fʉ̀’ gie mé neŋé wég tsǎŋ wɔ́, kà pɔ́ fʉ̀’ gie mé pimté lá’ ḿma’a nzèm peg wɔ́, kà ná fʉ̀’ gie peg tyé nà mefà’ mie é tʉ tʉ wɔ́, kà ná fʉ̀’ gie peg ne ńdá’a té lyé wɔ́, mbɔɔ ná fʉ̀’ gie peg ne ńnéŋe té pfɛ́ɛ mmó.

⁶Peg ne ńdɔgɔ weg mà ńnyɛɛ ngie peg ee pafa’a fà’ Ssé. Peg gẅiin ntʉ́m Ndʉalʉ̌a, mbɔɔ zse nò gie á fóo mbwo Ssé, ńgÿo kwɔ́gɔ nnɛ́. Peg gẅiin pɔ́ pòŋo ntʉ́m nzèm pʉ̀a mesoŋ, ńzẅí’te yég kɔ́ wɔ́ pɔ́ mbwo Zẅìge Ndʉalʉ̌a, ńgẅiin nkwòŋe gie è tè nkwòŋ menÿɔ́g wɔ́,

⁷Peg shwóŋ yég pɔ́ nò nénʉ́, ammó gie peg gÿo á nyɛ pɔ́ metʉ̀ Ssé. Peg lɔg pɔ́ nò gie á tyé ndʉŋ ndʉŋ ńdɔg ńgÿo yég mmó lɔg ńkem ncù tà mbɔɔ yé lɔg ńdÿɔ́’ ncù.

⁸Etsɔ́ pʉ̀a ne ńgwaa náa mekù’ még, petsɔ́ ne ńtéme shʉ́ ná peg. Etsɔ́ gwaa gɔ’te mmó gie peg ne ńgÿo, petsɔ́ ne ńzoon wég zoon. Mé ne ńdɔgɔ wég ńgÿo megàŋa cÿɔ̌ nò, tá peg ké ne shwóŋó pɔ́ nò nénʉ́.

⁹Mé ne ḿmoŋe wég, tá ńké ne ńzsé wég zsé, ńdɔgɔ wég ńtóŋo mepfó tá peg kwà’ ńgwɔ́ pɔ́ ntentʉ́, ńnyɛɛ wég ngɔ́’, tá ńké tè wég zẅé.

¹⁰Mé kwaŋ ngie peg ne ḿmÿɔgɔ tsɔ́ nò, tá peg ńnéŋe fʉ̀’ ntsèm pɔ́ nê lekág. Mé ne ńdɔgɔ wég ńtóŋo mepóŋ, tá peg ne ńdɔgɔ pʉ̀a tà ńgyɔ́ɔn ńgÿo ngàŋa mmó. Mé ne ńdíe wég pá’ fʉ̀’ gie mmó yég té wó wɔ́ la, tá peg ké ńgẅiin shúm ntsèm.

¹¹Pi meshǔ peg pie ée Korento, peg shwoŋó gẅi nò té le’e mvwɔ́’, peg pǔ ńnyɛ́’ ntʉ́m wég ńnyɛɛ gẅí.

¹²Peg tè ne ńdʉ’ʉ lékwoŋo gẅi wɔ́, atsɔ́ mmó lɔɔn ńne ńtáte gẅi lékwoŋo wég, mbà à fóo né pi.

¹³Mèŋ n ge gɔɔn nò mbwo pi fʉ̀’ɔɔn pá’ nyìŋ gɔɔn nò mbwo pènkʉ́ pé. Á gwɔ́ ngie pi kwoŋo wég gí pá’ peg ne ńkwoŋo gẅi yég.

¹⁴Tà pia pàtezǎb ntʉ́m ná Yěsô temte pà’ nyìŋ pɔ́ wetsɔ̌ púte ńgiŋe tà’a kwò ńgÿo tà’a mmó la, ńgwɔ́ nò gie á tyé ndʉŋ ndʉŋ pɔ́ gie á té tyé zɔɔn ńteme kwò ńgiŋ lêkɔ́? Ńgwɔ́ kyɛ̀’ pɔ́ nzěm gwɔ́ tà’a jʉ’ lêkɔ́?

¹⁵Tà à lɔɔn ńgwɔ́ Kristo pɔ́ Bétial[2] gwɔ́ tà’ ncwò? Tà à lɔɔn ńgwɔ́ nyìŋ gẅie à záb ntʉ́m ná Kristo pɔ́ nyìŋ gẅie à kaa záb ntʉ́m ná yé wɔ́ pú ńgẅiin tà’ nkwaŋá?

¹⁶Ńgwɔ́ mé lɔgɔ jʉ’e Ssé pɔ́ shúm sie mé gu’te ngie ee messé ńdɔg ńtóŋo tà’a mmó lêkɔ́? Pege pɔɔn zɔ zɔɔn ńgwɔ́ jʉ’e Ssé gẅie aa ńgwɔ́ pɔ́ wó, pá’ kwà’ yé la gɔɔn ngie: Mèŋ n ge gÿo cʉ́’ʉ ńnéŋe pɔ́ tsetsɛ̀ɛ pɔ́b, é ne giŋe tsetsɛ̀ɛ pɔ́b. Mèŋ n ge gÿo gwɔ́ Ssé yɔ́b, pɔ́ gwɔ́ pʉ̀a pɔ́ɔn.

¹⁷Áa mmó gie á gÿo yé Cʉ̀apʉ̀a gɔɔn ngie: Pi fó tsetsɛ̀ɛ pɔ́b ńkẅɛ, éfag gi nnɛ́, Tà pi kíbe mmó gie *lɔ̌’ áa mǒ, Mèŋ n deen ńké ńkúe gẅí.

¹⁸Mèŋ n ge gÿo gwɔ́ mbwo pi é gwɔ́ tá gẅi, Pi gwɔ́ mbwo mèŋ, ńgwɔ́ púɔ pɔ́ɔn pe mbàŋa mbɔɔ pe pànzwě, Cʉ̀apʉ̀a, ngàŋa tʉ̀ ntsèm zɔ gɔɔn.