Read Ngiemboon 2 Korento 8 Bible Online

2 Korento 8 - Ngiemboon bible

2 Korento 8

¹Mefɛ́ pég, peg ne fa’a légÿo pi zsé mmó gie e Ssé ka cÿó gʉm mecú’tè pʉ̀a Kristo mie ée Makedonia pɔ́ gÿo.

²Ngʉ̀ngʉ̀ mentí mentí ne ńkúu pʉ̀a Kristo wó tá’, ntʉ́m wɔ́b ne ńkága kǎg tɛ’. Pɔ́ tsɛ ńgwɔ́ pɔ́ mepóŋ tɛ’ tá’, ńgẅiin ntʉ́m mbòŋo lénáa mmó tà á gyɔ́ɔn gyɔ̌ɔn.

³Mèŋ shwóŋó gẅi mmó gie mèŋ n ka gyá gyǎ, pɔ́ ka náa mmó gie pɔ́ ku’u léná tà ńgíŋ ńtɔ́g pá’ ńgwɔ́ pɔ́ ná, ńké ńkwoŋo kwoŋ tá ńnáa pú’u.

⁴Pɔ́ ka sẅíŋte wég tɛ’ ngie peg zẅíŋ pɔ́ náa yɔ́b mmó lélɔg ńkẅéte pʉ̀a Ssé pie ée Yerósalem.

⁵Peg la zɔɔn tè kwaŋ ngie ńgwɔ́ pɔ́ náa mmó nzẅìŋ wɔ́ wɔ́, pɔ́ kɔ́ɔn ńnáa nzẅìŋ wɔ́, mélà’mie pɔ́ ka vɔg ńnyé wɔb le gwɔ́ á mbwo Cʉ̀apʉ̀a, ńgíŋe tyé lézẅí’te kɔ̀ɔkɔ́ɔ gie peg ge gɔɔn né pɔ́b. Á gwɔ́ pá’ e Ssé kwoŋ.

⁶Áa mmó gie á ka gÿo peg sẅíŋte Titus ngie à gʉa lá’ pi, ńgÿo yɔɔn fà’a pòŋo ntʉ́m gie à la gÿo pi zye, á mege ńcʉ́me.

⁷Á tyé nà kɔ́ wɔ́ pi zɔ̌ ná fʉ̀’ mbòŋo, pi záb ntʉ́m nà Ssé mboŋó, ńzsé légɔɔn nò á kẅɛ, ńzsé nò Ssé kwà’ mboŋó, ńzeŋe nɛ́ ngwòŋ fʉ̀’ ntsèm, ńgẅiin nkwòŋe á nzèm peg, pú’u la pi gíŋ ńná fʉ̀’ mbòŋo á ná yɔɔn fà’a pòŋo ntʉ́m.

⁸N tě ńgɔɔn pá’ɔɔn ńdɔgɔ ńtsẅii pɔ́ tsɔ́ nò gie pi ge gÿo wɔ́. Mèŋ shwóŋó gẅi pɔ́ pá’ metsɔ́ mecú’tè pʉ̀a Kristo zeŋe nnɛ́ ńgÿo pú’u, ńdɔgɔ ńnáa gẅi shÿó légÿo mé zsé ngie pi gẅiin nkwòŋe tà shwóŋó nò.

⁹Pi zɔɔn ne ńzsé mmó gie Cʉ̀apʉ̀a Yěsô Kristo la lɔg pɔ́ ntʉ́m mbòŋo ńná. À la gẅiin shúm ntsèm, tá’, ńcʉ́’ʉ mbóŋ ńtí gẅí, pá’ pi ge fó nà póŋ yé, é cʉ́’ pʉ̀a pie e Ssé náa shúm sé né pɔ́b tɛ’.

¹⁰Mèŋ n gee fʉ̀’ɔɔn éshwóŋ pi mmó gie mèŋ n ne ńkwaŋa ná yɔɔn nò nkáb. Á laa fʉ̀’ pá’ɔɔn pi zɔ̌ vɔgɔ lékwaŋte ngie à lɔɔn ńgwɔ́ mé náa mmó ńdɔg ńkẅéte pʉ̀a Kristo. Pi zɔ̌ gíŋe ḿvɔgɔ lézye. Ammó gie pi lɔɔn ńgÿo fʉ̀’ɔɔn á poŋ,

¹¹áa pá’ pi ge cʉ́me yɛ̌ fà’ gie pi la zye. Pi gwɔ cʉ́me yɛ̌ fà’, awɔ̌wɔ́ɔ à ná pɔ́ mmó gie à ku’u mǒ. Ndʉŋ ndʉŋ pá’ pi la lɔgɔ zeŋe nnɛ́ ńkwaŋte, pi gíŋ ńdɔgɔ zeŋe nnɛ́ ńgÿo.

¹²Nyìŋ náa mmó ne ntʉ̀m mbòŋo, e Ssé gwɔ́ zẅíŋe mmó gie ngàŋ nǎ, éfó pɔ́ ná gie ngàŋ gẅiin, à tè fó ná gie ngàŋ tè gẅiin wɔ́.

¹³Á gʉa ná yɔɔn nò, mé téen ńdɔgɔ ńgɔɔn ngie nyìŋ náa mmó ńdɔg ńkẅéte petsɔ́ pʉ̀a tà ńzága yé wɔ́. Mé lɔgɔ ńgɔɔn pɔ́ ngie wɔ̌wɔ́ɔ gẅiin we méjʉ’.

¹⁴Á gʉa nà nò gie pege gɔɔn lɔɔn, pi zyɛ́bɛ mmó gie á zébe nà sí shúm ńnáa mbwo pʉ̀a pie pɔ́ ne ńzága, á cʉa pú’u, à lá’a tsɔ́ lyɛ̌’ pi ne ńzága gí, pɔ́ zyɛ́bɛ mmó gie á zébe nà yɔ́b ńdɔg ńdẅíŋe gí, pia pɔ́ lɔg ńgẅiin mmó ndʉŋ ndʉŋ.

¹⁵Á lɔgɔ ńcʉ́me ná pá’ mé la ŋwe’e tsɛ̀ɛ ŋwà’ne Ssé ngie: «Nyìŋ gẅie à la lag shúm tà é gyɔ́ɔn la tè gẅiin tà é cʉa wɔ́. Nyìŋ gẅie à la lag shúm é té gyɔ́ɔn la tè tsɔ́ mmó zág.»

¹⁶Pege ná ndǎg mbwo Ssé á ná pá’ à gÿo Titus zeŋe nnɛ́ nà nò gí pá’ peg.

¹⁷Áa mmó gie á ka gÿo peg gɔɔn né yé ngie à piŋe lá’ pi ńdíe gẅí, á gwóon ńzẅíŋ. À tě ńtóo ńtí pɔ́ ndà’ pá’ peg tumó yé wɔ́, à ka ne ńkwaŋte létó ńgyá gẅí, tà mbùm yé ne ńzeŋe mǒ tɛ’.

¹⁸Peg tumó wɔ́b tsɔ̌ fɛ́ wégè. Á gwɔ́ gẅie mecú’tè pʉ̀a Kristo ntsèm gÿo mekù’ mé tɛ’, éfóo nà yé ntí leneŋé twó nà Nkʉ̀ Mbòŋo.

¹⁹Peg zɔ tě ńtúmo yé gílé peg wɔ́, mecú’tè pʉ̀a Kristo ka gǐŋ ńtsɔ́’ɔ yé ngie pega pɔ́ giŋe kwò, ńcú’te yɔɔn nkáb. Peg gÿo yɔɔn fà’a pòŋo ntʉ́m lélɔg ńgÿo Cʉ̀apʉ̀a zɔ̌ gẅiin legú’ mbɔɔ lélɔg ńnyɛ ngie peg ne ńtsɔ́ɔn lékẅéte petsɔ́ pʉ̀a.

²⁰Peg tè ne ńkwoŋo ngie mé zoonte wég ná wɔ̀ɔn máamáa mbwɔ́’ nkáb gẅie mé ne ńcubo ńge cʉ́me mbwo peg wɔ́.

²¹Peg ne ńtsɔ́ɔn légÿo mmó gie á té poŋ pɔ́ ndà’ mbwo Ssé wɔ́, peg ne ńtsɔ́ɔn légÿo gie á ge gíŋe poŋ mbɔɔ mbwo pʉ̀a mesoŋ.

²²Peg tumó wɔ́b Titus, ńgíŋe ńgÿo tsɔ́ fɛ́ wégè. Á gwɔ́ nyìŋ gẅie à kwoŋo lékẅéte petsɔ́ pʉ̀a tɛ’. Peg zyé ńgyá pú’u, á nà menò tà ńgyɔ́ɔn. Áa nà fʉ̀’ɔɔn mbùm ye gíŋe ńne ńzeŋe pá’ɔɔn tɛ’ létó ńgyá gẅi ńtí pá’ à lɔɔn ńgwɔ́ á tém nzèm yé ńná né pi té cÿɔ’.

²³Á gʉa ná Titus, mbà aa *ngàŋa kwò wɔ̀ɔn, à ne ńkẅéte wɔ̀ɔn nà fà’ gie mèŋ fa’a ńtí gẅí, ńgʉa ná pɔɔn mefɛ́ pégè mépʉ́a, mbà pɔ́ ée pʉ̀a pie mecú’tè pʉ̀a Kristo kà tumó wɔ́b, ée pʉ̀a pie yɔ́b fà’ kwé’e lezíŋ Kristo ńnáa tÿǒ.

²⁴Pâ pɔ́ lɔɔn ńtó, pi gÿo tà pɔ́ zsé ngie pi ne ńkwoŋo wɔ́b tà shwóŋó nò. Mecú’tè pʉ̀a Kristo lêen ńké ńzsé ngie peg lɔgɔ nò gí ńká’te mvfò pɔ́b pá’a éshwóŋó nò.