Read Ngiemboon 2 Korento 9 Bible Online

2 Korento 9 - Ngiemboon bible

2 Korento 9

¹Á gʉa nà mmó lɔg ńkẅéte mefɛ́ mefɛ́ pie ée Yerósalem, mbà mèŋ n gyǎ ngie á té ne ńzɛ́te ngie mèŋ n gíŋe ne ńŋwe’e nò mǒ ŋwe’e wɔ́.

²Á nue mèŋ n ne ńzsé ngie pi gẅiin pòŋo ńtʉ́m ná yɔɔn nò, tá mbà n ka lɔgɔ nò gí ńka’te mvfò pʉ̀a Kristo pie ée Makedonia. Mèŋ n ka shwoŋó wɔ́b ngie pʉ̀a Kristo pie ée nà pàga ngwòŋ yé Akay, é tyé lénáa mmó tà fó fʉ̀’ pá’ɔɔn. Agẅi lézeŋe nnɛ́ ńnáa mmó ka gÿo lelÿò pʉ̀a ná pɔ́b gẅiin pòŋo ntʉ́m lénáa yɔ́b mmó.

³Tá’ mèŋ, n túmo mefɛ́ mefɛ́ pá’ɔɔn, légwɔ́ gie le gwɔ́ gẅie peg ka lɔgɔ nò gí ńka’te ná yɔɔn nò. À tè cʉa sẅɛ̀ɛ wɔ́. N ne ńtsɔ́ɔn ngie pi kwa’ ńtyé léná pá’ mèŋ n ka shwóŋ pʉ̀a,

⁴á nue pega tsɔ́ pʉ̀a Makedonia lɔɔn ḿbú ńtó, ńké tè gyá pi tyé lénáa mmó wɔ́, mbà le gwɔ́ gie peg ka la’te mmó gie pi tyé légÿo, tà peg tè mʉ́’te, ge sele gÿo éshʉ́ kúu wég. Egẅí piŋ ńcʉa wég.

⁵Áa mmó gie á ka gÿo n gyá ngie á ne ńzɛ́te ngie mèŋ sẅíŋte mefɛ́ mefɛ́ pɔ̀ɔn, pɔ́ vɔgɔ mbʉ̀a pi tá peg táa ńtó, ḿvɔgɔ pú’u, lécú’te gí mmó gie pi ka lǎ’ ńka’ lélɔg ntʉ́m mbòŋo ńná, ńzsé ngie n ge gwɔ tó, á gwɔ́ tà’a jʉ’. Mé gyá ngie áa kwà’ mmó pòŋo ntʉ́m, tà á té mmó gie pi náa mé ne sẅɛ́ɛ gẅi sẅɛ́ wɔ́.

⁶Pi zsé ngie nyìŋ lɔɔn ḿbye mmó á té gyɔ́ɔn, mbà á ge lá’a fʉ̀’e lélag shúm, à lag é le gyɔ́ɔn, ḿbye á gyɔ́ɔn, mbà á ge lá’a fʉ̀’e lélag shúm, à lag é gyɔ́ɔn.

⁷Pú’u la, á poŋ ngie awɔ̌wɔ́ɔ náa mmó pɔ́ pá’ à ně ńkwaŋte tsɛ̀ɛ ntʉ́m yé, ńná té ne ńgyáŋa lóŋ, té gwɔ́ gie mé sẅɛ́ɛ yé sẅɛ́, á nue e Ssé kwoŋo nyìŋ gẅie à lɔgɔ lekág ńnáa mmó.

⁸E Ssé piŋ ńku’ pá’ ńgwɔ́ á ná shúm mbóŋo mentí mentí né pi, légwɔ́ gie pi ge gwɔ́ fʉ̀’ ntsèm é gẅiin shúm sie é ne ńzɛ́te mbwo pi, tà gíŋ gẅiin mbɔɔ sie ńgwɔ́ pi lɔg fa’ mefà’ mbòŋo nzsè nzsè.

⁹Á gwɔ́ pá’ mé la ŋwe’e tsɛ̀ɛ ŋwà’ne Ssé ngie: Àgab shúm mbòŋo sé mbwo mepóŋ, Apòŋo ntʉ́m[3] yé áa ntě ḿmaga wɔ́.

¹⁰E Ssé gẅie aa náa mbyè mmó mbwo nyìŋ gẅie à pye, ńnáa mmó léjÿó á pfɛ́ɛ, à ge gÿo ké ne kẅi’i shúm sí kẅi’i, é gÿo e shʉ́a, légwɔ́ gie pi ge lɔgɔ pòŋo ntʉ́m é kẅi’i náa mmó né pʉ̀a.

¹¹Á ge cʉa pú’u, pi gẅiin shúm lélɔg fa’ mefà’ pòŋo ntʉ́m ntí ntí, à cʉa pú’u, e pʉ̀a tà ńgyɔ́ɔn ná ndǎg mbwo Ssé tɛ’, á nà nò shúm sie pi nǎ peg gaba mbwo pɔ́b.

¹²Pi zɔɔn ńzsé ngie yɔɔn ncùb gie pi ma’a e tè gÿo pʉ̀a Kristo pie ée Yerósalem é gẅiin pɔ́ mmó gie à zága mbwo pɔ́b ndà’ wɔ́, e ge gíŋe gÿo pʉ̀a kẅi’i ná ndǎg mbwo Ssé tɛ’.

¹³Pɔ́ ge zsé nzẅìŋ yɔɔn fà’, é gu’te Ssé ná pá’ pi ne ńtÿɔ́gɔ kwò ná nò gie nkʉ̀ mbòŋo Kristo ne ńgɔɔn. Pɔ́ ge gíŋe gu’te Ssé ná pá’ pi lɔgɔ́ pòŋo ntʉ́m, ńnáa mmó né pɔ́b tà mbɔɔ petsɔ́ pʉ̀a.

¹⁴Anò gí ge kúu ntʉ́m pɔ́b, pɔ́ ńnéŋe ne sẅíŋte Ssé nà twó sí, á nue pɔ́ gyá ngie à cÿó gʉm gí, pi gẅiin ntʉ́m mbòŋo tɛ’, tà ne ńkẅéte pʉ̀a pá’ɔɔn.

¹⁵Pú’u la, á poŋ ngie pege ná ndǎg mbwo Ssé, ńtí fù’u té fʉ̀’ gie à la ná né pege.