Read Ngiemboon Galatia 3 Bible Online

Galatia 3 - Ngiemboon bible

Galatia 3

¹Pi pʉ̀a Galatia, tsye legyè sí pyě ka? À wɔ̌ ka lɔg lekàŋ ḿbue gẅi pɛ́’ɛ̀? Tá, mbà mé ka nyɛte shwóŋó gẅi nò nà legwé Yěsô Kristo tà á gwɔ́ pá’ fʉ̀’ gie pi lɔ̌g nÿɔ́g mí ńgyá yé nà tÿǒ nkǐ la.

²N ge zɛ́te gẅi tà’a nò, pi ka lɔg pɔ́ pá’ pi ka ne ńgÿo mmó gie *lepʉ̌ ne ńzɛ́te tá Ssé náa Zẅìge Ndʉalʉ̌a né pi keen? Kà pi ka lɔg pɔ́ pá’ pi jǔ’ Nkʉ̀ Mbòŋo ńzáb ntʉ́m mǒ tá Ssé ná né pi?

³Legyè sí gǎ ḿbyé pɔ́ nzẅìŋ wɔɔn? Á gâ ammó gie pi la lɔg metʉ̀ Zẅìge Ssé ńzye, pi piŋ ńcʉ́’ ńgwɔ́ fʉ̀’ɔɔn ńně fa’a lélɔg pɔ́ mí metʉ̀ tá ḿmege?

⁴Pi kwǎŋ ngie menò mie pi lǎ gyá, pi lɔ̌ɔn ńgyá pɔ́ sẅɛ̀ɛ sẅɛ̀ɛ lá?

⁵Pú’u la, á poŋ ngie pi gíŋ ńgyá ngie e Ssé ne ńnáa Zẅìge yé né pi, ḿbiŋe ne ńgÿo menò mmɔɔn mmɔɔn tsetsɛ̀ɛ pi. Pi kwǎŋ ngie à gÿo pú’u, mélà’mie pi ne ńgÿo mmó gie *lepʉ̌ ne ńzɛ́te lá? Ngǎŋ à gÿo, pɔ́ mélà’mie pi la jú’ nkʉ̀ mbòŋo ńzáb ntʉ́m gẅi mǒ.

⁶Aŋwà’ne Ssé zɔɔn ńgɔɔn ngie Ábalam la lɔg yé pɔ́ lezáb ntʉ́m nà Ssé, tá Ssé fó ná pá’ à zǎb ntʉ́m wé ná ye pú’u, ńzẅíŋe yé pá’ nyìŋ gẅie aa mvfò yé ńgwɔ́ ndʉŋ ndʉŋ.

⁷Pú’u la, pi zsé ngie pʉ̀a pie pɔ́ záb ntʉ́m wɔ́b nà Ssé zɔ̌ kwà’ ngẅɛ̀ gie e Ssé la ka’a mbwo Ábalam.

⁸Aŋwà’ne Ssé la zɔɔn ńtʉ́ njÿó ńnyɛ ngie: E Ssé ge lá’ fó ná pá’ pʉ̀a pie é té pà Yuda wɔ́, ge lá’ záb ntʉ́m ná yé à zẅíŋe wɔ́b pá’ pʉ̀a pie ée mvfò yé ńgwɔ́ ndʉŋ ndʉŋ. Áa yɛ̌ tá ŋwà’ne Ssé la tʉ́ njÿó ńtsẅi wɔɔn nkʉ̀ mbòŋo mbwo Ábalam ngie: E Ssé ge lá’ cʉa ná gù é néŋ mbʉ́lè nà melá’ ntsèm mie ée ndùmo ssé tsetsá’.

⁹Ábalam la záb ntʉ́m nà Ssé, e Ssé néŋ mbʉ́lè ná yé. Pú’u la, pɛ̌ pʉ̀a gwɔ́ pie pɔ́ zǎb ntʉ́m nà Ssé pá’ Ábalam la, e Ssé ge néŋ mbʉ́lè ná pɔ́b yɔ́b.

¹⁰E Ssé zɔɔn néŋ pɔ́ ndòon twó pʉ̀a pie pɔ́ lɔgɔ légɔɔn ngie pɔ́ kú’te *lepʉ̌ ńdɔg ńgÿo yɔ́b kɔ̀ɔkɔ́ɔ, á nue ŋwà’ne Ssé gɔɔn ngie: Nyìŋ lɔɔn tè kú’te *lepʉ̌ pɔ́ ntsèm, ńgwɔ́ ngwòŋ fʉ̀’ ntsèm ńně ńgÿo pɔ́ mmó gie áa tsɛ̀ɛ ŋwà’ne *lepʉ̌ wɔ́, mbà ngàŋ kǎ ndòon.

¹¹Mé gíŋ ńnyɛte nyɛɛ tsɛ̀ɛ ŋwà’ne Ssé ngie ńgwɔ́ nyìŋ lelɔg pá’ à gɔɔn ngie à kú’te *lepʉ̌ ńdɔg ńku’u nyìŋ gẅie aa mvfò Ssé ńgwɔ́ ndʉŋ ndʉŋ wɔ́, á nue mé la ŋwe’e ngie: Nyìŋ gẅie à ku’u légwɔ́ mvfò Ssé ńgwɔ́ ndʉŋ ndʉŋ mélà’mie à zǎb ntʉ́m wé nà yé, zɔɔ nyìŋ gẅie à ge lá’ gwɔ̀ wó.

¹²Á zɔɔn ńgwaa gwɔ́ leku’té *lepʉ̌ tá ńgwɔ́ wó à tè pumte nà lezǎb ntʉ́m nà Ssé wɔ́. Á gʉa nà nò *lepʉ̌, mbà mé la ŋwe’e ngie: Nyìŋ gẅie à ge lá’ kú’te *lepʉ̌ sɔ́ɔn ntsèm zɔ ge lá’ gwɔ́ wó.

¹³Tá’, pá’ mánzsè we *lepʉ̌ gÿo pege kaa pɔ́ ndòon la, Kristo la tó ńgÿo pege tsẅɛ́ ndòon ŋwɛ́. À la zyɛ́b ńkaa ḿbi’, ńcʉ́’ʉ ngàŋ ndòon ńtí wégè. Mé gɔɔn nue mé la ŋwe’e ngie: Ndòon ee twó nyìŋ gẅie mé kimé yé nà tÿǒ.

¹⁴Yɔɔn nò gwɔ́ pá’ɔɔn légwɔ́ gie e Ssé ge fó nà mmó gie Yěsô Kristo, gẅie aa nà ngẅɛ̀ Ábalam gÿǒ, é pú néŋ mbʉ́lè ná pʉ̀a pie é té pà Yuda wɔ́, é cʉa ná Ábalam, mbɔɔ légwɔ́ gie pege ge lɔg pá’ pege záb ntʉ́m ná Kristo é gẅiin Zẅìge gie e Ssé la ka’a mbwo pege.

¹⁵Mefɛ́ mefɛ́, n ge pí fʉ̀’ ná mà wege pʉ̀a mesoŋ, pege zsě ngie nyìŋ gwɔ́ tà ńŋwe’e mmó ńdɔg ńtÿɔ́g legwé sé nà ntí gie á zɛ́te, ńgwɔ́ tsɔ̌ nyìŋ lelʉ’, ńké le gíŋe ńkẅi’i tsɔ́ mmó mǒ wɔ́.

¹⁶Áa mbwo Ssé ńgíŋ ńgwɔ́ pɔ́ pú’u. E Ssé la ka’a mmó mbwo Ábalam tà mbɔɔ mbwo nyìŋ gẅie Ábalam lɔ̌ɔn ńge gÿo zyé yé. Aŋwà’ne Ssé té gɔɔn ngie mé la ka’a mbwo pʉ̀a pie à lɔ̌ɔn ńge gÿo tá zyé wɔ́b pá’ fʉ̀’ gie pʉ̀a pie mé lɔ́ɔn ńka’a yɛ̌ mmó à gwɔ́ yɔ́b la gyɔ́ɔn gyɔ̌ɔn wɔ́. Ngǎŋ á la gwɔ́ pɔ́ nò tà’ nyìŋ, á nue mé zɔɔn ńtóŋo tsɛ̀ɛ ŋwà’ne Ssé ngie: Tà mbɔɔ mbwo nyìŋ gẅie ɔ̀ ge gÿo zyé yé. Wɛ̌ nyìŋ piŋ ńgwɔ́ Kristo.

¹⁷Pi jú’u nò gie mèŋ fa’a légɔɔn. E Ssé la gwɔ́ zye ńka’a nò mbwo Ábalam. *Lepʉ̌ lá’ ńgwɔ́ tó, mbà é cʉ̌a ngù’ nkÿo lekùa lê móm ntá. É ké tè gʉa nà *kʉ̀a yɔ́b Ábalam ḿbyága tsɔ́ mmó, ńdɔg pú’u, ńgÿo ammó gie à la ka’a mbwo Ábalam cʉa sẅɛ̀ɛ wɔ́.

¹⁸Á nue ntÿɔgɔ́ gẅie é fóo mbwo Ssé laa pé’e mé zẅɛ́’ɛ pɔ́ *lepʉ̌ tá ńgẅiin, mbà ńgwɔ́ é le gíŋe fó ná pá’ e Ssé la ka’ wɔ́. E Ssé la zɔɔn ńnéŋe tà fʉ̀’ ku’ á lɔgɔ mmó gie à la ka’a mbwo Ábalam ńdɔg ńcÿó gʉm yé cÿó.

¹⁹Ngwɔ́ nyìŋ jú’ ńzɛ́te ngie tà Ssé laa pá’ɔɔn ḿbiŋe ńzába *lepʉ̌ ńtí pɔ́ kɔ́ wɔ́? À lɔ̌ɔn ńzába pɔ́ lélɔg ńgÿo nyìŋ fʉa nò ńzsé ngie à fʉ̌a. Lepʉ̀ la fa’a yé fà’ tà ńdá’ ńkú fʉ̀’ gie nyìŋ Ábalam gẅie Ssé la ka’a mmó ngie áa ye ngàŋ la tó. Á gʉa ná sɛ̌ *lepʉ̌, mbà Ssé la túm mecÿɔ́’ pé, pɔ́ náa mbwo mámekěm.

²⁰Mé gwɔ́ kíme mámekěm ná nò, á lɔgɔ ńgwɔ́ nò gie megàŋ té gẅiin shÿó pá’ nò ge kẅɛɛ ncwò nyìŋ é kúu ncwò wetsɔ̌ wɔ́. Tá’ á ké ńgʉa nà nò gie e Ssé la ka’ la, mbà kwà’ yé zɔ la tyé ńgɔɔn.

²¹Pá’ áa pá’ɔɔn lɔɔn á lɔgɔ ńgwɔ́ ngie *lepʉ̌ Ssé la pyág shúm sie à la ka’ kekɔ́ wɔ́? Ngǎŋ á té pú’u, wɔ́. Á la gwé’e ńgwɔ́ gie à la ná tsɔ́ *lepʉ̌ sie ńgwɔ́ é gÿo pʉ̀a mesoŋ gwɔ́ wó, mbà à lɔɔn ńgwɔ́ nyìŋ lɔg pá’ à kú’te *lepʉ̌, ńku’u nyìŋ gẅie aa mvfò Ssé ńgwɔ́ ndʉŋ ndʉŋ.

²²Tá’ ŋwà’ne Ssé nyɛ ngie wɛ̌wɛ̌ nyìŋ wɔ́ à gwɔ́ pɔ́ nkwɔɔn mbwo nò tepòŋ. Áa pá’ɔɔn le gwɔ́ gie ammó gie e Ssé la ka’ ge pumte pɔ́ ná pʉ̀a pie é cʉa ná Yěsô Kristo ńzáb ntʉ́m wɔ́b nà ye.

²³Kristo la gwa tó tà mé záb ntʉ́m ná ye, peg pà Yuda né ńjú’u pɔ́ ncwò *lepʉ̌ Mǒsê, é ně ńkwɛɛ wég pá’ mé kwɛɛ megàŋa tsǎŋ la tà ńkú nà fʉ̀’ gie e Ssé lɔ̌ɔn ńge gÿo gÿo mé zsé Yěsô Kristo ńzáb ntʉ́m ná ye.

²⁴*Lepʉ̌ lâ pá’ɔɔn ńdɔgɔ ńgwɔ́ pá’ nyìŋ gẅie e Ssé la túm á ně ńdíe wég tà ńkú fʉ̀’ gie Kristo ka tó légwɔ́ gie peg ge záb ntʉ́m ná ye; é lɔg pú’u, e Ssé cʉ́’ ńdíe wég pɔ́ pá’ pʉ̀a pie ée ndʉŋ ndʉŋ mvfò ye.

²⁵Tá’ à fʉ̀’ɔɔn gie Kristo ka tó, tà mé ne ńzába ntʉ́m ná ye lɔɔn, wɛ̌ nyìŋ gẅie à ka ne ńdíe wég cʉ́’ʉ ńgẅiin nò ná peg wɔ́.

²⁶Pi metsèm zɔɔn ńdɔg pá’ pi záb ntʉ́m ná Yěsô Kristo ńgwɔ́ púɔ Ssé.

²⁷Pi metsèm, pie pi la kẅé ntse á gwɔ́ léla nnɛ́ ná Kristo, mà Kristo kéen ńjÿó gẅí.

²⁸Á fó pú’u, e Ssé tè gíŋe ńgÿo tsɔ́ tyɛ’te ná pà Yuda lâ pʉ̀a Gelekia wɔ́, ńké té gíŋe ńgÿo nà menkwɔɔn lâ pà ndù nnɛ́ wɔ́, ńké tè gíŋe gÿo nà mbàŋa lâ pànzwé wɔ́, á nue pi lɔg pá’ pi la nnɛ́ ná Yěsô Kristo ńcʉ́’ ńgwɔ́ pɔ́ tà’ ntí

²⁹Pá’ pi ee pʉ̀a Kristo la, pi lɔgɔ ńgwɔ́ ngẅɛ̀ Ábalam, ńgwɔ́ pàgẅiin gí mmó nà shúm sie e Ssé la ka’.