Read Ngiemboon Galatia 5 Bible Online

Galatia 5 - Ngiemboon bible

Galatia 5

¹Kristo la zá’ nkÿo pu’ lóŋ pege légwɔ́ gie pege ge gwɔ́ pʉ̀a pie é kwǎ’ ńtsẅɛ́ nkwɔɔn *lepʉ̌. Pú’u la, pi kú’te wɛ̌ légwɔ́ mboŋó, ḿbɔ́ɔn légíŋe ńzẅíŋ atsɔ́ mmó gíŋe ńdɔgɔ gẅi ńgÿo menkwɔɔn.

²Mèŋ Pɔl, tà mèŋ shwóŋó gẅí. Pi lɔɔn ńzɛ́te ngie mé pú’u gẅí, tá pi gwɔ́ pʉ̀a Ssé, mbà mmó gie Kristo la gÿo ńtí twó sí té gíŋe kẅéte gẅi nà tsɔ́ mmó wɔ́.

³Mèŋ n ge gíŋe gɔɔn nà tsɔ́ légʉa á mbwo wɛ̌ nyìŋ wɔ́ gẅie à zɛ́te ngie mé pú’u yé, ngie à gẅiin légÿo shúm ntsèm sie *lepʉ̌ Mǒsê ne ńzɛ́te.

⁴Pi pie pi ne fa’a légÿo shúm sie *lepʉ̌ ŋwɛ́ ne ńzɛ́te tá lɔg ku’ pʉ̀a pie ée mvfò Ssé ńgwɔ́ ndʉŋ ndʉŋ, pi ee pɛ́’ɛ̀ ńdɔgɔ ńgwɔ́ pʉ̀a pie pi fǎg nnɛ́ ná Kristo. Á gwɔ́ pú’u pi lɔgɔ sɔ́ɔn nò gie e Ssé kɔ’ɔ́ lɔg cÿó gʉm gí cÿó.

⁵Á gʉa ná peg pie peg záb ntʉ́m ná Kristo, peg ne ńjú’u nò pɔ́ mbwo Zẅìge Ndʉalʉ̌a, á ne ńgÿo peg ne ńzẅí’te ngie e Ssé ge gÿo gÿo peg gwɔ́ pʉ̀a pie ée mvfò ye ńgwɔ́ ndʉŋ ndʉŋ.

⁶Á nue nyìŋ lɔɔn ńda nnɛ́ ná Kristo, mbà mé lépú’u yé kà lényé té pú’u yé wɔ́, á té tsɔ́ nò wɔ́. Lezǎb ntʉ́m ná Kristo ḿbiŋ ńkwoŋ pʉ̀a mesoŋ zɔɔ nò.

⁷Pi ka ne ńgee lê mvfò kwà’ mboŋó, awɔ̌ tɔ́’ɔ gẅi légíŋe ńjú’u nò gie áa nénʉ́ ńtÿɔ́gɔ kwò mǒ?

⁸Wɛ̌ véle gẅie mé la shwóŋó gẅi tà pi zẅíŋ, à lɔ̌ɔn tě fóo mbwo Ssé gẅie à ne ńtóŋo gẅi wɔ́.

⁹Pi lɔɔn ḿbɔ́ɔn té pòŋ á kẅɛɛ kwóonte gẅie à ne fa’a leneŋé[2].

¹⁰Tá’ Cʉ̀apʉ̀a kě ne ńgÿo mèŋ n zsé ngie pi tè kẅi’i tsɔ́ mmó nà mmó gie n da zí’i gẅi wɔ́. N giŋé ně ńzsé ngie nyìŋ gẅie à ne ḿma’a tág tsetsɛ̀ɛ pi, à lɔɔn ńgwɔ́ pɔ́ wɔ̌ wɔ́ɔ, mbà Ssé ge gÿo zá’ ntsaŋ ye.

¹¹Mefɛ́ pɔ́ɔn, n gwé’e ńgíŋe ne sá’a ngie pʉ̀a gÿo mé pú’u wɔ́b, mbà pà Yuda gíŋe ńkʉ́e wɔ̀ɔn mélà’a kɔ́? Mbà le gwɔ́ gẅie Kristo la kwé nà tÿǒ nkǐ à tè gíŋe ńgege wɔ́b gwɔ́.

¹²Á gʉa ná pʉ̀a pie é pue gẅi nà nò lépú’u nyìŋ, pɔ́ lɔgɔ nò yɔ́b ńgee mvfò, tà kwà’ pɔ́b sele shʉʉ twó mbùm yɔ́b.

¹³Mefɛ́ pɔ́ɔn, á gʉa ná pi, mbà Ssé la tóŋo gẅi pá’ pi ge tsẅɛ́ nkwɔɔn *lepʉ̌. Tá’ tà pi zẅɛ’ pú’u, ńgÿo mmó gie mbùm gi zɔ sá’a gwí pi gÿo. Tà ńcʉ́’ pú’u, pi lɔg pá’ nkwòŋe ee tsetsɛ̀ɛ pi ńkẅéte mennɛ́ mí.

¹⁴Á nue anò gie á pú ńkwɛ́ metwó menò mie ée tsɛ̀ɛ *lepʉ̌ gɔɔn ngie: Kwoŋo fɛ́ gù nyìŋ mesoŋ pá’ twó mbùm jú.

¹⁵Tá ńgwɔ́ gie pi lɔɔn ne ńgÿo pá’ menɔ̀ɔn mbà’ pie ée ssé ne ńdúmte membùm mɔ́b, ńnéŋe mefʉ̌ŋ, pi laga twó gí, á nue pi ee pú’u, ńcʉ́’ʉ fa’a pɔ́ lécʉŋte mennɛ́ mí.

¹⁶N ge gɔɔn né pi ngie: Pi zẅíŋ Zẅìge Ssé zɔ tsyeen gẅi nà gẅi le gwɔ́, pú’u pi é légÿo menò tepòŋ mie mbùm gí tsóte gẅi ngie pi gÿo wɔ́.

¹⁷Á nue menò mie mbùm nyìŋ mesoŋ tsóte yé ngie à gÿo é té mie Zẅìge Ndʉalʉ̌a ne ńkwoŋo ngie à gÿo wɔ́. Menò mie Zẅìge Ndʉalʉ̌a ne ńkwoŋo é té mie mbùm nyìŋ mesoŋ kwoŋ wɔ́, pɔ́ mépʉ́a lɔgɔ ńdʉ’ʉ lʉ’ʉ. Áa yɛ̌ tá pi tè gẅiin légÿo mmó gie pi kwǒŋ wɔ́.

¹⁸Tá pi lɔɔn ńzẅíŋ Zẅìge Ndʉalʉ̌a ne ńtsyeen gẅí, mbà *lepʉ̌ té gíŋe ńgẅiin lésá’a gẅi wɔ́.

¹⁹Mé ne ńkwa’a ńzsé menò mie mbùm nnɛ́ nyìŋ mesoŋ tsóte yé á fʉa, anò pá’ le tǒŋ pànzwě kà léfa’ mbàŋa wɔ́, anò pá’ legÿo menò ncÿǒ, anò pá’ nyìŋ letÿɔ̌g ntʉ́m wé pɔ́ nà nò mpfwɔ́’.

²⁰Pá’ legù’te shúm ngie ee messé, pá’ legẅiin lekàŋ, pá’ lekua mbù, pá’ letǎg melà’, pá’ legẅiin kègɔ́’, pá’ lecÿɔ́g, pá’ lefa’ pɔ́ letyé mvfò nà kɔ̀ɔkɔ́ɔ, pá’ leneŋé fàgte fàgte, pá’ letuŋ metuŋ.

²¹Pá’ letÿɔ̌g lejÿɔ́g nà shúm pʉ̀a, pá’ lenǔ melù’ tà ḿbʉ́a, pá’ lecu’té nà línɔ́ɔn lépfɛ́ shúm ńgÿo menò shʉ́, mbɔɔ pá’ legÿo tsɔ́ shúm sie é sẅé sie mé tʉ̌ lɔɔn. N ka zɔɔn shwóŋó gẅí, n ge gíŋe shwóŋó gẅi ngie: Pʉ̀a pie é gÿo yɔɔn ntí menò té lá’ gẅiin jʉ’ nà nò *lefùɔ Ssé wɔ́.

²²Tá’, menò mbòŋo mie Zẅìge Ndʉalʉ̌a gÿo nyìŋ gÿo é mɔɔn ńgwɔ́ légẅiin nkwòŋe, ńgwɔ́ léńnéŋe nê lekág, ńgwɔ́ léńnéŋe lésẅete, ńgwɔ́ légẅiin kwɔ́gɔ nnɛ́, ńgwɔ́ létyé lékẅéte pʉ̀a, ńgwɔ́ légẅiin pòŋo ntʉ́m, ńgwɔ́ léńnéŋe té gwɔ́ ngàŋ mepàb,

²³ńgwɔ́ lépʉ́le, ńgwɔ́ lékú’te mbùm. Áa kwà’ nénʉ́, *lepʉ̌ té lʉ’ sɔɔn shúm wɔ́.

²⁴Pʉ̀a pie ée pe Yěsô Kristo léen ńgwá’ shúm tepòŋ sie é póŋ mbùm nnɛ́ yɔb, lâ sie mbùm nnɛ́ ŋwɛ́ zɔ tsɔ̌ɔn, tá á gwɔ́ pɔ́ pá’ fʉ̀’ gie pɔ́ léen ńkim mbùm nnɛ́ ŋwɛ́ nà tÿǒ nkǐ la.

²⁵Pá’ wege le gwɔ́ we fʉ̀’ɔɔn foo pɔ́ mbwo Zẅìge Ndʉalʉ̌a la, pege giŋe ná ntí gie Zẅìge ŋwɛ́ ne ńnyɛɛ wégè.

²⁶Tà pege ŋá’te nnɛ́, tà pege tág melà’ tsetsɛ̀ɛ pege, tà pege gẅiin kègɔ́’ tsetsɛ̀ɛ pege.