Read Ngiemboon Efeso 1 Bible Online

Efeso 1 - Ngiemboon bible

Efeso 1

¹Yɔɔn ŋwà’ne fóo mbwo mèŋ pɔl, e Ssé la kwoŋ ngie n gwɔ́ ngàŋ ntúm Yěsô Kristo. Mèŋ n náa mbwo pi pʉ̀a Ssé pie pi ńnéŋe Efeso, mbà pi la záb ntʉ́m ná Yěso Kristo, ńké ńzsé pɔ́ ndà’ nò yé.

²Tá wege Ssé mbɔɔ Cʉ̀apʉ̀a Yěsô Kristo ne ńgwɔ́ né pi, ńne ńnéŋe sẅétè ntʉ́m pi.

³!Pege nê ńgu’te Ssé Tá pà Cʉ̀apʉ̀a wege Yěsô Kristo. À la gÿo nò mbòŋo ná pege, ńná shúm mbòŋo ntsèm sie éfóo tàa tÿǒ né pege, ńná pú’u, ńcʉa ná pá’ à la lá’ ńtemte wégè lâ Kristo,

⁴mbà à la cʉa ná Kristo ńtsɔ́’ɔ wégè, ńdɔg ńgÿo pʉ̀a pé tà fó ńnyé pɔ́ tè nyɛte njÿó pá’ pege ge gwɔ́ mvfò yé é gwɔ́ pʉ̀a ndʉalʉ̌a, é gwɔ́ pàtèfʉa. Á la lɔg pá’ à kwoŋo wégè,

⁵ńzáb tà tyě sǎg tɛ’ ngie à ge cʉa ná Yěsô Kristo é gÿo pege cʉ́’ púɔ pé. Á gwɔ́ pɔ́ we lekwoŋ, ńké ḿboŋo yé tɛ’.

⁶À la lɔgɔ wégè ńgÿo púɔ pé le gwɔ́ gie pege ge gu’te yé ná máa nò té fʉ̀’ gẅie à la gÿo. Á la cʉa ná pá’ à la temte wégà Míŋ we gẅie à kwoŋe yé tɛ’, ńcÿó gʉm yégè, pú’u á gwɔ́ kwà’ máamaa nò tɛ’.

⁷Míŋ we ŋwɛ́ la lɔg metse mé ńdɔg ńcu’u wégè, pege tsẅɛ́. E Ssé lege mefʉa mégè ńnáa mbwo pege. Yɔɔn áa nò té fʉ̀’ gie e Ssé la lɔg ńcÿó gʉm yégè,

⁸áa fù’ gie à la náa mbwo pege tà á gyɔ́ɔn gyɔ̌ɔn, ńgwɔ náa, ńtsɔ́’ legyè ségè pege zsé nò.

⁹Áa yɛ̌ tá pege zsé mmó gie à la záb, mbà á la zɔɔn ńgwɔ́ pɔ́ lelyěen. Yɛ̌ mmó gwɔ́ gie à la tʉ́ njÿó, á poŋo yé poŋ, á záb ngie à ge lá’ lɔgɔ Kristo é gÿo à pumte,

¹⁰ńgwɔ́ ngie à fʉ̀’ ge lá’ gwɔ́ tà ku’, yé Ssé cú’te shúm ntsèm sie ée tÿǒ lepwó lâ sie ée ndùme ssé tsetsá’, é ná ntsèm ntsèm mbwo Kristo à ne sá’a pɔ́ gílé ye.

¹¹Peg la zẅɛ́’ pɔ́ pá’ peg lǎ nnɛ́ ná Kristo, tá ńgẅiin yég jʉ’ tsetsɛ̀ɛ pʉ̀a pie à gÿǒ pɔ́ tsẅɛ́, á nue e Ssé la tʉ́ njÿó ńtsɔ́’ɔ wég. Á gwɔ́ pá’ a la záb. E Ssé piŋ ńgÿo kɔ̀ɔkɔ́ɔ pɔ́ pá’ à la záb ngie à ge gÿo pú’u.

¹²À lɔ̌ɔn ńtsɔ́’ɔ wégè pú’u, le gwɔ́ gie peg pie peg ka vɔgɔ lézáb ntʉ́m nà Kristo, peg ge gu’te yé Ssé á nue à gú’ tɛ’.

¹³Á gʉa ná pi gí, mbà pi ka jú’u shwóŋè gie áa ye nénʉ́, é gwɔ́ nkʉ̀ mbòŋo gẅie e Ssé ka cʉa pɔ́ mǒ tá ńgÿo pi tsẅɛ́. Pi ka jú’ pú’u, ńzáb tʉ́m gẅi ná Kristo, e Ssé cÿɔ’ɔ liŋé yé ná pi, ńdɔgɔ ńnyɛɛ ngie pi ee pʉ̀a pé. Yɛ̌ liŋé gwɔ́ Zẅìge Ndʉalʉ̌a gie à la ka’ ngie à ge náa mbwo pege.

¹⁴A Zẅìge Ndʉalʉ̌a lɔgɔ ńgwɔ́ zyè ssé nà fù’ gie e Ssé la cwoŋte ńzáb lénáa mbwo pʉ̀a pé. E Ssé lɔgɔ ńnyɛte shwóŋó wégè ngie pege ge lá’ gẅiin setsɔ́ á fʉ̀’ gie à ge lá’ pú kẅile wégè nà nò tepòŋ. Pá’ áa pú’u la, pege ne ńgu’te Ssé á nue à gú’ tɛ’.

¹⁵Pá’ mèŋ n ka jú’ ngie pi ne ńkẅi’i ńzába ntʉ́m gẅi ná Cʉ̀apʉ̀a Yěsô, ńgíŋe ńjú’ ngie pi ne ńkwoŋo pʉ̀a Ssé métsèm lá,

¹⁶mèŋ n gee fʉ̀’ ntsèm ńně sẅíŋte Ssé, ḿbiŋe síe yé nà twó sí.

¹⁷Mèŋ n ne sẅíŋte e Ssé Cʉ̀apʉ̀a wege Yěsô Kristo, yé Tá gẅie à gẅiin legú’, ngie à náa gẅi zsé nò, ńnáa gẅi shÿó lélɔg ńcwoŋo ńzsé yé tà shwóŋó nò.

¹⁸Mèŋ n giŋé ne sẅíŋte yé, ngie à gÿo ntʉ́m gẅi zsé kyɛ̀’ yé légwɔ́ gie pi ge cwoŋo zsé mmó gie à lɔ̌ɔn ńtóŋo gẅi ńtí yɛ̌. Mbɔɔ pá’ pi ge zsé máamaa fù’u mbòŋo gie pia petsɔ́ pʉ̀a pie à la tsɔ́’ɔ wɔ́b ge gÿo kẅé, á gwɔ́ mmó gie à la cwoŋte ńzáb né pi.

¹⁹Mèŋ n giŋé ne sẅíŋte yé ngie à gÿo pi zsé ngie metʉ̀ mé pú fáŋ ńcʉa metʉ̀ ntsèm, mbɔɔ ngie à gÿo pi zsé pá’ mɛ̌ metʉ̀ tóonte wégè pàzáb ntʉ́m ná ye pú’u.

²⁰Mɛ̌ metʉ̀ ée mie e Ssé la lɔg ńgÿo Kristo zíme tsetsɛ̀ɛ mepfó, á lɔg ńgÿo á kwɔ́’ né tÿǒ lepwó ńnéŋe nà gwoŋó pwó yé, ye tʉ̀.

²¹Á gwɔ́ jʉ’ó ńdɔgɔ ḿbú ńcʉa ngwòŋ *mecÿɔ́’ Ssé pâ mefùɔ pɔ́b mbɔɔ setsɔ́ shúm sie é gẅiin metʉ̀ tÿǒ lepwó. Á cʉa mânyìŋ ntsèm tà pá’ angàŋ lɔɔn ńgwɔ́ pɔ́ wɔ̌ wɔ́ɔ, kà pɔ́ ná yɔɔn kème njÿó wɔ́ɔ, kà pɔ́ ná gie á ge lá’ tá tó wɔ́ɔ.

²²E Ssé léen ńnéŋ shúm ntsèm á mbwo yé. E Ssé la gwɔ́ tà ńnéŋe kɔ̀ɔkɔ́ɔ nà mbwo mé, ńgÿo á gwɔ́ mbwo cú’tè pʉ̀a Ssé, ńgwɔ́ twó, légwɔ́ gie pʉ̀a cú’tè ge ne jú’u ncwò yé.

²³Acú’tè pʉ̀a Ssé ée mbùm nnɛ́ Kristo. Áa tsɛ̀ɛ cú’tè pʉ̀a pé fʉ̀’ ntsèm, yé gẅie à pǔ ńgwɔ́ jʉ’ ntsèm tsɛ̀ɛ njÿó.