Read Ngiemboon Efeso 5 Bible Online

Efeso 5 - Ngiemboon bible

Efeso 5

¹Pi púɔ Ssé, e Ssé kwoŋo gẅi tɛ’, pú’u la pi pí fʉ̀’ ná yé.

²Pi gwaa gÿo kɔ̀ɔkɔ́ɔ gí wɔ́, ńdɔg pɔ́ nkwòŋe ndʉŋ ndʉŋ pá’ Kristo la kwoŋo wégè tà ńnáa twó yé ńdɔg ńnuŋe pwɔ́’ mvfò Ssé ńtí wégè. Epwɔ́’ ŋwɛ́ ée gẅie gyě poŋo mbwo Ssé.

³Pá’ pi ee fʉ̀’ɔɔn ńgwɔ́ pʉ̀a Ssé la, tsɔ́ shúm ée sie á té zɛ́te ngie nyìŋ gẅi gÿo wɔ́, ńgíŋ tè zɛ́te ngie me zɔɔn ńkím mbàa kǐm tsetsɛ̀ɛ pi wɔ́, mé gɔɔn nò pá’ mbàŋa létóŋ pànzwě, épànzwě léfa’ mbàŋa, á mmó pá’ menò ncÿǒ mbɔɔ nò kègɔ́’.

⁴Á té ne ńzɛ́te ngie pi shwóŋó ḿmag mag wɔ́, tà mbɔɔ léma’a kwaŋ ná tsɔ̌ ntí, lâ légÿo tsɔ́ ntí megʉa. Á poŋ ngie ashwóŋè gwaa kẅɛɛ ncwò pi, pi lɔgɔ síe pɔ́ Ssé nà mmó gie à gÿǒ mbwo pi.

⁵Pi zsé ngie, mámbàŋa gẅie à tóŋo pànzwě, kà manzwě gẅie à fa’a mbàŋa wɔ́, mbɔɔ nyìŋ gẅie à gÿo menò ncÿǒ, tà mbɔɔ nyìŋ gẅie à zába ntʉ́m nà shúm pʉ̀a, atsɔ́ wɔb těen ńdá’a ńgẅiin yé jʉ’ tsɛ̀ɛ nò lefùɔ Kristo pɔ́ Ssé wɔ́. Lezǎb ntʉ́m nà shúm pʉ̀a, e gwɔ́ pɔ́ tsɔ̌ ntí legù’te shúm ńdɔg ngie ee Ssé.

⁶Tà nyìŋ lɔgɔ púu shwóŋè, éfʉʉ gẅí. Menò mie mé tʉ́ʉ lɔɔn zɔɔn ńgÿo Ssé gyáŋa lóŋ ńtí pʉ̀a pie pɔ́ té gÿo mmó gie à ne ńkwoŋo wɔ́.

⁷Pú’u la, tà pia yɛ̌ ntí pʉ̀a teme tsɔ́ nò.

⁸Pi kaa tsɔ́ fʉ̀’ ńgwɔ́ pɔ́ tsɛ̀ɛ nzěm. Á cʉa ná pá’ pi kéen ńda nnɛ́ ná Cʉ̀apʉ̀a, pi cʉ́’ ńgwɔ́ fʉ̀’ɔɔn ńgwɔ́ pɔ́ jʉ’e fɔ̌g. Pú’u la, pi gwaa gÿo kɔ̀ɔkɔ́ɔ gí wɔ́, ńgÿo pá’ pʉ̀a pie pɔ́ ée nà jʉ’e fɔ̌g.

⁹Mèŋ n gɔɔn pú’u, mélà’mie, apì légwɔ́ jʉ’e fɔ̌g aa legÿo menò mbòŋo, ńgÿo menò mie ée mvfò Ssé ńgwɔ́ ndʉŋ ndʉŋ, ńnéŋe tsɛ̀ɛ nò nénʉ́.

¹⁰Pi gwaa gÿo kɔ̀ɔkɔ́ɔ wɔ́, ńta’ menò, lézsé mie é poŋo mbwo Cʉ̀apʉ̀a.

¹¹Tà pi kúu nùɔ pʉ̀a pie pɔ́ fa’a mefà’ mie é té kẅéte, é mefà’ nzěm. Pi shʉ̀ashʉ̀a ńkyag nzèm yɔb kyag.

¹²Menò mie pʉ̀a ŋwɛ́ gÿo tsɛ̀ɛ nzěm, ée menò shʉ́, ńzɔɔn tè mie ńgwɔ́ nyìŋ kím mbàa kǐm wɔ́.

¹³Pi lɔɔn shʉa shʉa ńkyag mɛ̌ menò ntsèm, mbà é ge fɔ́g

¹⁴Á zɔɔn tè gwɔ́ pɔ́ ndà’ pú’u wɔ́, ammó vɔg tà ńkẅɛɛ jʉ’e fɔ̌g, ńkúbe, ńcʉ́’ ńkyɛ’ pɔ́ jʉ’. Áa yɛ̌ tá mé gɔɔn ngie: Gù gẅie ɔ̀ ne ńdyé, zyeen, Fó tsetsɛ̀ɛ mepfó ńdu ssé, Pú’u, Kristo ńnéŋe kyɛ̀’ yé ná gù.

¹⁵Pú’u la pi gwaa gÿo kɔ̀ɔkɔ́ɔ gí wɔ́, ńdaga twó gí mboŋó. Pi pɔ́ɔn léńnéŋe we megʉ̀gʉ̀, pi ńnéŋe pá’ megàŋa zsě nò

¹⁶pie pɔ́ zsé lézẅɛ́’ melyɛ’ɛ́ lá’ mie Ssé náa mbwo pɔ́b, éfa’ mefà’ mbòŋo, á nue afʉ̀’e njÿó yɔɔn té poŋ.

¹⁷Pú’u, tà pi gwɔ́ megʉ̀gʉ̀. Pi ta’ menò lézsé mie é poŋo mvfò Cʉ̀apʉ̀a.

¹⁸Tà pi nú melù’ tà é jÿó gẅí. Legÿo pú’u, aa lecʉmé ná mánzsè tepòŋ. À Zẅìge ndʉalʉ̌a zɔ pu njÿó gẅí.

¹⁹Pú’u, pi ne ńzɔbɔ mezɔ́bɔ ntse mie ée tsɛ̀ɛ ŋwà’ne ńdɔgɔ ńkẅiŋte mennɛ́ mí, ńzɔb mezɔ́b pʉ̀a Kristo, ńzɔb mezɔ́b mie Zẅìge Ssé neŋé ntʉ́m pi. Pi zɔb ńgu’te Cʉ̀apʉ̀a nê ngwòŋ ntʉ́m gẅi ntsèm.

²⁰Pi lɔg lezíŋ Cʉ̀apʉ̀a wege Yěsô Kristo ńne síe Ssé Tá fʉ̀’ ntsèm, á nà shúm ntsèm.

²¹Pi lɔg pá’ pi ná mbùm gi Ssé mvfò Kristo, wɔ̌wɔ́ɔ ná mbùm ye Ssé mvfò fɛ́ we.

²²Á gʉa ná pi pànzwě, awɔ̌wɔ́ɔ ná mbùm ye ssé mvfò ndúm we pá’ à náa mbùm ye ssé mvfò Cʉ̀apʉ̀a.

²³Á nue ndǔm manzwě aa twó, manzwě gwɔ́ mbùm nnɛ́. Kristo aa twó, acú’tè pʉ̀a pé gwɔ́ mbùm nnɛ́. Yé zɔ gÿo tá cú’tè pʉ̀a pé gẅiin le gwɔ́ tèmì.

²⁴Ndʉŋ ndʉŋ pá’ cú’tè pʉ̀a Kristo ne ńnáa mbùm ye ssé mvfò Kristo la, á zɛ́te ngie a gʉa ná pi pànzwě, awɔ̌wɔ́ɔ ná mbùm ye ssé mvfò ndǔm we pɔ́ pú’u.

²⁵Ńgʉa ná pi mbàŋa, awɔ̌wɔ́ɔ kwoŋo nzwě we ndʉŋ ndʉŋ pá’ Kristo kwoŋo cú’tè pʉ̀a pé tà mbà à la náa twó yé ńtí yɛ̌,

²⁶ńgÿo pú’u, ńdɔg faga cú’tè yé ńnáa mbwo Ssé. Á gwaa gwɔ́, mbà à lɔ̌g ntse sɔgɔ wɔ́b, ńgíŋe ńdɔgɔ shwóŋè ńkẅile *lɔ̌’ ná pɔ́b.

²⁷À la ne ńkwoŋo ngie yɛ̌ cú’tè, a wɔ́ tyé mvfò yé, ńcwoŋo ne ńŋwʉŋe, ńgwɔ́ té ncÿǒ, té tsɔ́ jʉ’e nnɛ́ yé ńŋú’te, té tsɔ́ *lɔ̌’, atsɔ́ mmó le nyé ńzága ná yé wɔ́.

²⁸Pú’u, á ne ńzɛ́te ngie mámbàŋa kwoŋo nzwě we yé pá’ à kwoŋo twó mbùm yé. Nyìŋ gẅie à kwoŋo nzwě we la, à kwoŋo pɔ́ twó mbùm yé.

²⁹Atsɔ́ nyìŋ laa zɔɔn ḿbʉa mbùm ye wɔ́. Nyìŋ jÿɔ́g mbùm ye jÿɔ̌g ḿbiŋ ńnyɛte. Áa ndʉŋ ndʉŋ pá’ Yěsô Kristo gÿo nà cú’tè pʉ̀a pé pú’u,

³⁰á nue pege gwɔ́ pɔ́ mekèm mbùm ye.

³¹«Áa mmó gie á gÿo mámbàŋa ńnéŋe tà fag nnɛ́ ye ná tá we pɔ́ má we, ńgʉa ńda nnɛ́ ná we mánzwě pɔ́ ye temte ńcʉ́’ʉ tà’ nyìŋ».

³²Yɔɔn ntsèm ee wó tɛ’, n gɔɔn pá’ɔɔn ná Kristo mbɔɔ ná cú’tè pʉ̀a pé.

³³Tá ńké ńgíŋe ńgɔɔn mbɔɔ ná pi gí. Á ne ńzɛ́te ngie wɔ̌wɔ́ɔ mámbàŋa wɔ́ kwoŋo nzwě we pá’ à kwoŋo twó mbùm yé, wɔ̌wɔ́ɔ manzwě wɔ́ gÿo mekù’ ndǔm we.