Read Ngiemboon Filipo 4 Bible Online

Filipo 4 - Ngiemboon bible

Filipo 4

¹Mefɛ́ pɔ́ɔn pe ntʉ̀ nzẅìŋ, áa yɛ̌ tá mèŋ n gɔɔn né pi ngie, pi lɔgɔ gẅi leńnéŋe ńnyɛ ngie pi kú’te nò Cʉ̀apʉ̀a tà á tʉ̀. Mèŋ n ne ńtsɔ́ɔn légíŋe ńgyá gẅí. Pi ée mefɛ́ pɔ́ɔn pe ntʉ̀ nzẅìŋ. Pi pie pi ee ssé ńgwɔ́ wɔ̀ɔn lekág, ńgwɔ́ yɔ̀ɔn *ngǔ’.

²Mèŋ sẅiŋté Evodie pɔ́ Sintishe ngie pɔ́ gwɔ́ tà’ ncwò á nue pɔ́ métsèm gwɔ́ pɔ́ pʉ̀a Cʉ̀apʉ̀a,

³ḿbìŋ ńgʉa ná gù, kwà’ shǔ wɔ̀ɔn tsɛ̀ɛ fà’, mèŋ n ne sẅíŋte gú ngie ɔ̀ kẅéte wɔ́b, ée pánzwě pie pega pɔ̌ nê Kelemaŋ ka pǔ ńdÿɔ́’ ncù ná nò nkʉ̀ mbòŋo. Pega tsɔ́ pʉ̀a la gíŋe ńgwɔ́, tà mezíŋ mɔ́b ée tsɛ̀ɛ ŋwà’ne gie áa mbwo Ssé.

⁴N ge gɔɔn né pi ngie ntʉ́m gẅi ńnéŋe ńkág kág, á nue pi ee pʉ̀a Cʉ̀apʉ̀a. N gɔ̌ɔn né pi ngie, ntʉ́m gẅi ńnéŋe ńkág kág.

⁵Pi gwɔ́ pʉ̀a pie mé zsé ngie pi pʉ́le pʉlé. Pi kímte ngie ntyě pá’ Cʉ̀apʉ̀a ge tó té ság.

⁶Tà pi pú’ mbùm gí nà tsɔ́ nò. Tá’, akɔ́ nò zɔ̌ lɔɔn ńtyé ssé wɔ́, pi pú’ mbwó mbwo Ssé, éshwóŋó yé mmó gie pi ne ńtsɔ́ɔn, ésẅíŋte yé, ḿbiŋ ńná ndǎg mbwo yé.

⁷Pi ge gÿo pú’u, e Ssé náa sẅétè gie nyìŋ mesoŋ tè zsé pá’ á gwɔ́ wɔ́ né pi. Yɛ̌ sẅétè pyɛ́bte mentʉ́m mí, nê nkwaŋá gẅí, ńgÿo é tyé pɔ́ ná Yěsô Kristo.

⁸Mefɛ́ pɔ́ɔn, anò gie à lɔɔn ńgwɔ́ n dɔg ńcʉ́me á gwɔ́ pɔ́ ngie, nkwaŋá gẅi ńnéŋe ńtyé pɔ́ ná menò mbòŋo mie pʉ̀a tà ńgyɔ́ɔn gɔ’te, ńtyé nà nò nénʉ́, á nà nò gie á tyé ndʉŋ ndʉŋ, á nà nò té *lɔ̌’, á nà menò mie ée me mekù’, á nà menò mie mé gÿo pʉ̀a ná ngɔ́ɔnte, é menò mie é kẅéte, á nà menò mie mé siŋte nyìŋ mǒ.

⁹Akɔ́ɔkɔ́ɔ gie n ka zí’i gẅí, akɔ́ɔkɔ́ɔ gie pi ka jú’u ncwò mèŋ, akɔ́ɔkɔ́ɔ gie pi ka gyǎ mèŋ n gÿo, pi la’te mé gyá. E Ssé gẅie à náa sẅétè à gwɔ́ né pi.

¹⁰Mèŋ n ne ńnáa ndǎ’ mbwo Cʉ̀apʉ̀a, ḿbiŋ ńne ńkága tɛ’, mélà’mie pi gíŋe ńgẅiin shÿó lényɛ ngie pi ne ńkímte wɔ̀ɔn. Pi ka zɔɔn ne ńkímte wɔ̀ɔn kímte tá ńzága mánzsè lélɔg ńkẅéte wɔ̀ɔn.

¹¹Mèŋ n těen ńgɔɔn pú’u, mélà’mie tsɔ́ mmó ne ńzága mbwo mèŋ wɔ́. N dá zí’i légwɔ́ gie n dɔɔn ńzága mmó lo, ńgẅiin lo, mèŋ n ne ńkága kǎg.

¹²Mèŋ n déen ńzí’i léshÿɔg nzyè, ńgíŋ ńzí’i léńnéŋe tsɛ̀ɛ fù’. Mèŋ n déen ńzí’i légwɔ́ gie n dɔɔn ńtyé pɔ́ nzɔ̌ wɔ́, akɔ́ zɔ̌ gwɔ́ ssé wɔ́, á gwɔ́ pɔ́ léshÿɔg nzyè, mèŋ shÿɔg, ńgwɔ́ pɔ́ lépfɛ́ tà ńzẅɛ́ mèŋ m pfɛ́, ńgwɔ́ gie á lɔɔn ńgwɔ́ pɔ́ fʉ̀’e nzyè, kà fʉ̀’e shúm léjÿó wɔ́, mèŋ n de pɔ́gɔ tsɔ́ mmó wɔ́.

¹³Kristo zɔ náa wɔ̀ɔn metʉ̀, tá mèŋ n ku’u légÿo pú’u.

¹⁴Tà mbɔɔ pú’u, pi ka gÿo mboŋó lékẅéte wɔ̀ɔn ná fʉ̀’ɔɔn gie mèŋ n ne ńgyá ngɔ́’ lɔɔn.

¹⁵Pi pà Filipo, pi ne ńzsé mboŋó ngie pi gílé pi zɔ la ké ńkẅéte wɔ̀ɔn, á fʉ̀’ gie n dá fó tsɛ̀ɛ ngwòŋ gẅi Makedonia ńgʉa, légwa ńgiŋ ńtsẅi nkʉ̀ mbòŋo. Á laa fʉ̀’ gie mé la nyé ńzye zye létsẅi Nkʉ̀ Mbòŋo, atsɔ́ cú’tè pʉ̀a Kristo ndyɛ̀’ɛ la tè zába pwó nà fà’ yɔ́ɔn, ńzsé mmó gie á ne ńzága wɔ̀ɔn, ḿbiŋ ńzsé gie fà’ yɔ́ɔn ne ńnáa wɔ́.

¹⁶N da gwɔ́ tà ńkúu Tesalonika, pi túm shúm sie é la ne ńzága mbwo mèŋ. Pi la túm ngʉ̀a tà ńgyɔ́ɔn.

¹⁷N gɔɔn pá’ɔɔn, á té gwɔ́ pɔ́ ngie, n ne fa’a pɔ́ shúm sie mé ge túm ná né mèŋ wɔ́. Mèŋ n ne ńtsɔ́ɔn pɔ́ ngie e Ssé fó mǒ ńnéŋ mbʉ́lè ná pi.

¹⁸Á gʉa nà shúm sie pi ka tǔm ńna né mèŋ, mbà mèŋ m bǔ ńgyá. N gẅiin shúm fʉ̀’ɔɔn tà é gyɔ́ɔn tɛ’. Mèŋ n gyǎ shúm ŋwɛ́ sie Epafolodite lɔ̌g ńtó. N te gíŋe ne ńzága tsɔ́ mmó wɔ́. Eshúm ŋwɛ́ poŋó wɔ̀ɔn tɛ’, ńgwɔ́ pɔ́ pá’ shúm pwɔ́’ sie mé lɔ́ɔn ńnuŋe mvfò Ssé, é poŋo yé tɛ’ la.

¹⁹E Ssé yɔ̀ɔn ge lɔg ntí gie aa gẅiin shúm pú’u, é cʉa ná Yěsô Kristo, é náa kɔ̀ɔkɔ́ɔ gie á ne ńzága mbwo pi té sáŋ.

²⁰Agù’te gwɔ́ mbwo Tá wege Ssé ná mengù’u mengù’. *Amen.

²¹Pi tsyɛ’te pʉ̀a metsèm pie pɔ́ la zẅɛ́’ɛ Yěsô Kristo ńgwɔ́ pʉ̀a Ssé. Mefɛ́ mefɛ́ pie pegá pɔ̌ ee jʉ’ɔɔn é tsyɛ’té gẅi yɔ́b.

²²Pʉ̀a Kristo metsèm é tsyɛ’té gẅí, n gɔɔn pá’ɔɔn té lege tsyɛ̀’te ye pʉ̀a Kristo pie ée nɔ́’ɔ Kása.

²³Cʉ̀apʉ̀a Yěso Kristo ne ńgwɔ́ né pi metsèm.