Read Ngiemboon Kolosia 2 Bible Online

Kolosia 2 - Ngiemboon bible

Kolosia 2

¹Mèŋ n ne ńkwoŋo ngie pi zsé ngie ncù gẅie mèŋ n ne ḿma’a é tʉ. Mèŋ m ma’a wɛ̌ ncù ná twó sí, mbɔɔ ná twó pʉ̀a Kristo pie ée Laodisé, mbɔɔ ná twó petsɔ́ pʉ̀a Kristo tà ńgyɔ́ɔn pie pɔ́ laa wɔ̀ɔn gyá.

²Mèŋ n gÿo pú’u, lélɔg ńnéŋ ntʉ́m wɔ́b, nkwòŋe temte wɔ́b, mbɔɔ pá’ pɔ́ ge nyɛte zsé nò gie aa ná Kristo, éfó mǒ é zsé ntsem Ssé gie à ka gÿo peg zsé, yɛ̌ ntsem gwɔ́ pɔ́ Kristo yé máŋwɛ́.

³Azse nò ntsèm, mbɔɔ legyè ntsèm pú ńgwɔ́ fù’ gie á cú’te ńdyeen pɔ́ ná Yěsô.

⁴Mèŋ shwóŋó gẅi mɔɔn menò ḿbɔ́gɔ tsɔ̌ nyìŋ létó ńdɔgɔ shwóŋè gie mé neŋé ssé ńtáŋte, ésele twó gí.

⁵Mèŋ n tsɛ ńgwɔ́ ngʉ̀a shʉ̀shʉ̀a, tá nkwaŋá wɔ̀ɔn tyé pɔ́ ná pi. Mèŋ n ne ńkága á nue mèŋ n zsě ngie pi ne ńtáŋte menò mí mboŋó, ḿbiŋ ńkú’te nò Kristo tà á tʉ.

⁶Pá’ pi ka kě ńzẅíŋ ngie Yěsô Kristo aa Cʉ̀apʉ̀a gẅi la, á ne ńzɛ́te ngie gẅi leńnéŋe gwɔ́ pá’ à ne ńkwoŋo.

⁷Pi nyɛte ńcʉŋ leŋàŋ sí pɔ́ ná ye, ńtÿɔ́gɔ gẅi le gwɔ́ pɔ́ ná ye pá’ mé tÿɔ́gɔ ndá nà cÿǒ la, ńne ńkẅi’i ńkú’te pɔ́ nò yé mboŋó, yɛ̌ nò ké ńgwɔ́ pɔ́ pá’ mé la zí’i gẅí. Pi ne ńnáa ndǎg mbwo Ssé tɛ’.

⁸Pi pɔ́ɔn nyìŋ lélɔgɔ zse nò pʉ̀a mesoŋ gie á gwɔ́ pɔ́ fÿɔ́g sẅɛ̀ɛ, éfʉte gẅí, pi gwe ná lejÿɔ̀’ sé. Yɛ̌ gwɔ́ pɔ́ cÿɔ̌ nò gẅie é jʉ́’ʉ ná nùŋe pʉ̀a mesoŋ, ńgíŋ ńjʉ’ʉ nà metʉ̀ mentí mentí mie ée tsɛ̀ɛ njÿó, é té jʉ́’ʉ ná Kristo wɔ́.

⁹Pi pɔ́ɔn á nue, akɔ́ɔkɔ́ɔ gie áa nà Ssé wɔ́, mé gyá ná Kristo, yé gẅie à la sele ńcʉ́’ʉ nyìŋ mesoŋ.

¹⁰Pia Kristo kéen ńtemte, e Ssé fó mǒ ńnáa gẅi fù’ ntí ntí. Kristo ŋwɛ́ pǔ ńcʉa kɔ̀ɔkɔ́ɔ gie á gẅiin tʉ̀, ésá’a njÿó.

¹¹Pi lâ Kristo la gwɔ́ tà ńtemte, e Ssé gÿo liŋé ná pi. Á gwɔ́ gie á nyɛɛ ngie pi ee pʉ̀a pé. À laa tsɔ́ fʉ̀’ ńtsẅii mbwo pà Yuda ngie pɔ́ gÿo mé pú’u[1] wɔ́b, á gwɔ́ liŋé, tá’ á ké ńgʉa ná pi, mbà liŋé gie a gÿǒ ná pi, á téen fóo mbwo pʉ̀a mesoŋ wɔ́, á fóo pɔ́ mbwo Kristo. Yɛ̌ liŋé kéen fó mbwo mmó gie áa soŋ nnɛ́ pege, ńtsóte wégè ńnéŋe ná nò tepòŋ, ńkẅile wégè.

¹²Á laa fʉ̀’ gie mé la nu’u gẅi tsɛ̀ɛ ntse, mé laa pú’u, ńdɔgɔ ḿbúte gẅia Kristo ńnéŋe tsɛ̀ɛ lesyè, pia pɔ́ gíŋe ḿbúte ńzíme nà legwé, á nue pi zẅǐŋ ngie e Ssé gẅie à la zíme Yěsô ná legwé, à gẅiin tʉ̀ lélɔg ńgÿo pi zím gí nà legwé.

¹³Pi laa tsɔ́ fʉ̀’ ńgwɔ́ mbwo Ssé, ńgwɔ́ pɔ́ mepfó, ńtí menò tepòŋ mí, mbɔɔ pá’ pi la tè pʉ̀a pie mé la pú’u wɔ́b lélɔgɔ wɔ́b ńgÿo pʉ̀a Ssé wɔ́. Á ké ńgwɔ́ nà fʉ̀’ɔɔn, mbà Ssé kéen ḿbúte gẅia Kristo ńzíme nà legwé. À kéen ḿbú ńdege menò tepòŋ mégè ntsèm, ńnáa mbwo pege.

¹⁴À la véle ŋwà’ne njǔ yega pɔ̌, mbà *lepʉ̌ laa tsɛ̀ɛ yɛ̌ ŋwà’ne ńne sẅiŋe wégè ná menò mie pege fʉaté, ńgwɔ́ mé gɔɔn ngie à la pú wɔ́b Yěsô ńkime nà tÿǒ nkǐ, ńdɔgɔ pú’u, ńcʉŋte ŋwà’ne.

¹⁵E Ssé lɔ̌ɔn ńdɔgɔ pú’u, ńgwoonte *messé tepòŋ, é pie é gẅiin tʉ̀, ésá’a njÿó yɔɔn, ńkẅile metʉ̀ mɔ́b ńgwá’a, ńtéme shʉ́ twó pɔ́b mvfò lá’. Á gwɔ́ pá’ à la lɔgɔ wɔ́b ńgÿo pu’u ncù, Kristo lɔgɔ wɔ́b ńgwá ńgiŋ ńdɔg ńda’te ngie à jÿǒ ncù.

¹⁶N dɔgɔ pá’ɔɔn ńgɔɔn ngie tà pi cʉ́’ nyìŋ ŋaga gẅi nà nò mmó mpfɛ̌ kà ye nu nǔ wɔ́, kà ná nò *melínɔ́ɔn pà Yuda wɔ́, kà ná línɔ́ɔn sàŋ sẅé wɔ́, kà ná *melyɛ’ɛ́ nzsè Ssé[2] wɔ́.

¹⁷Sɛ̌ shúm lɔgɔ ńgwɔ́ pɔ́ jʉ́jʉ́ŋ shúm sie é ne ńtóo. Mé ge gÿo gyá Kristo, é zsé ngie mé gyǎ kwà’ sɛ̌ shúm.

¹⁸Pi pɔ́ɔn pá’ à lɔɔn ngwɔ́ etsɔ́ pʉ̀a tó ḿbaba gẅi pi pyé ntsɔ’ɔ́ fà’ ncù gẅie Kristo la jÿó ńná né pi. Mèŋ n gɔɔn pʉ̀a pie pɔ́ gɔɔn ngie pɔ́ ná mbùm yɔb ssé tɛ’, ńgwɔ́ pʉ̀a pie pɔ́ gú’te *mecÿɔ́’ Ssé. Pɔ́ gíŋe ńdɔg shúm sie pɔ́ gɔɔn ngie e Ssé nyɛ̌’ nÿɔ́g mɔ́b pɔ́ gyá ńdɔg ńŋá’te sẅɛ̀ɛ sẅɛ̀ɛ. Pɛ̌ pʉ̀a gẅiin pɔ́ nkwaŋá pʉ̀a mesoŋ, é gÿo pɔ́ zẅíŋ pɔ́ mmóm.

¹⁹Pɔ́ té ne ńkẅi’i ńdaa nnɛ́ ná Kristo gẅie yé zɔɔ twó wɔ́. Tá mbà twó zɔ̌ náa kɔ̀ɔkɔ́ɔ gie á ge kẅéte mbùm nnɛ́. Atwó zɔ̌ gÿo mejwoŋó nnɛ́ mbɔɔ menŋàŋ nnɛ́ cú’te ńkú’te mbùm nnɛ́, é gú’ pá’ e Ssé ne ńkwoŋo.

²⁰Pia Kristo la pú ńkwé, á lɔgɔ pú’u, ńkẅé gẅi mbwo metʉ̀ nzěm mie é sá’a njÿó. Mélà’a kɔ́ mé gíŋe shwóŋó gẅi ngie tsɔ́ shúm ée shúm sie nzse ée mǒ tà pi zẅí’te pá’ fʉ̀’ gie pi gwɔ̌ pɔ́ pʉ̀a yɔɔn njÿó?

²¹N gɔɔn pá’ mé gɔɔn ngie tà pi jÿó tsɔ́ shúm léjÿó, tà pi zẅí’ mbɔɔ zẅǐ’, tà pi záb mbɔɔ pwó mǒ.

²²Mɔɔn menzse ké ńgwɔ́ pɔ́ nà shúm sie mé jÿó é mag mag, ńgwɔ́ pɔ́ menò mie pʉ̀a mesoŋ ńnéŋe ssé ńkwaŋte ńzáb.

²³Mé tyé ńgyá mɛ̌ menzse mie mé zsé é gwɔ́ pɔ́ pá’ fʉ̀’ gie ée mbòŋ la, á nue nyìŋ gẅie à ne ńzsé lélɔg pú’u, ńnyɛte ńgu’te Ssé, à ná nnɛ́ ssé tɛ’, ńnyɛ mbùm ye ngɔ́’ tɛ’. Tá mɛ̌ menzse ńgwɔ́ é le kẅéte wégè lékú’te ntʉ́m tà nkwaŋá tepòŋ lâ tsɔ́ ntí letsɔ̌ɔn shúm é le gwɔ́ tsoló wɔ́ wɔ́.