Read Ngiemboon 1 Tesalonika 2 Bible Online

1 Tesalonika 2 - Ngiemboon bible

1 Tesalonika 2

¹Mefɛ́ pég nzèm Kristo, pi ne ńzsé mboŋó ngie peg ka tè tóo tÿǒsoŋ pi pɔ́ sẅɛ̀ɛ sẅɛ̀ɛ wɔ́.

²Pi giŋé né ńzsé ngie peg ka gwaa tó, éfóo ne Filipo, mbà mé nyɛ̌ wég ngɔ́’ wó tɛ’, ńzoonte wég. Tá’ e Ssé náa wég shÿɔg létsẅi nkʉ̀ mbòŋo wé mbwo pi tà mbɔɔ pá’ mé la gíŋ ne ńnyɛɛ wég pɔ́ ngɔ́’.

³Anò gie peg zɔɔn ne shwóŋó pʉ̀a, á té nò gie á téŋe wɔ́, peg tè gẅiin nkwaŋá tepòŋ wɔ́, ńké těen ḿbá’a pɔ́ legyè wɔ́.

⁴Peg gɔɔn pɔ́ nò gie e Ssé ne ńkwoŋo ngie peg gɔɔn, á nue à la lʉŋte wég tà ńgyá ngie peg ku’u létsẅi nkʉ̀ mbòŋo wé. Pú’u tá peg těen ńgɔɔn nò pɔ́ nà ntí gie pʉ̀a ge kwoŋo wég wɔ́, peg gɔɔn nò pɔ́ nà ntí gie Ssé ge kwoŋo wég, yé gẅie à líe ntʉ́m wég.

⁵Pi ne ńzsé mboŋó ngie peg laa shwóŋó shwóŋè lʉte wɔ́, ńké tè gɔɔn nò gie peg lɔgɔ ńtsɔ́ɔn pì gie á ge kúu pɔ̀ɔn peg wɔ́. Tà Ssé ne ńzsé.

⁶Peg la tè zɛ́te ngie me ná mekù’ még wɔ́, kà pɔ́ gẅi lénná wɔ́, kà pɔ́ petsɔ́ pʉ̀a wɔ́.

⁷Tá, mbà peg la ku’u lélɔg tʉ̀ ńzɛ́te, á nue peg ee ngàŋ ntúm Kristo. Peg la tè pú’u gÿo, peg la pʉ́le yég pʉlé pɔ́ pá’ má múɔ gẅie à ne ńdíe gubé yé la.

⁸Peg la kwoŋo gẅi kwoŋ tà ńtyé pá’ ńgwɔ́ peg é le ná pɔ́ ndà’ nkʉ̀ mbòŋo nò Ssé mbwo pi wɔ́, pá’ ńgwɔ́ peg gíŋe ńná mbɔɔ twó ség, á nue á la gwaa gwɔ́, mbà pi cʉ’ʉ́ mmó ntʉ̀ nzẅìŋ mbwo peg.

⁹Pi ge gǎ wɔ́ ne kímte pá’ á laa fʉ̀’ gie peg la ne ńtsẅii nkʉ̀ mbòŋo mbwo pi la, peg gíŋe fa’a tà ḿbú ńkʉ́a, tá ńgẅiin mmó mpfɛ̌. Peg lɔ̌ɔn fa’a zsǒ éfa’a tsẅɛ́’. Peg la tè kwoŋo lécʉ́’ʉ pì’ á mbwó tsɔ̌ nyìŋ gẅi wɔ́.

¹⁰Pi ne ńzsé mmó gie peg la gÿo, e Ssé gíŋe ne ńzsé yé mà weg tsetsɛ̀ɛ pi pàzẅíŋe shwóŋè Ssé, à laa mbòŋ. Peg gwɔ́ ndʉŋ ndʉŋ atsɔ́ *lɔ̌’ɔ yég té wó wɔ́.

¹¹Pi giŋé ne ńzsé ngie peg laa lejʉ́ŋ wɔ̌wɔ́ɔ ná pi, ńgÿo pɔ́ pá’ tá múɔ gÿo lejʉ́ŋ gubé yé la.

¹²Peg la kẅiŋte gẅí, ńnéŋ ntʉ́m gẅí, ńcwoŋo ńgɔɔn né pi ngie pi giŋe ná mánzsè gẅie Ssé ne ńkwoŋo. Yé gẅie à ne ńtóŋo gẅi tsɛ̀ɛ lefùɔ sé, á tsɛ̀ɛ legú’ we.

¹³Atsɔ́ mmó gie á gÿo peg sie Ssé fʉ̀’ ntsèm, áa nue peg la shwóŋó nò Ssé mbwo pi, pi jú’, ńzẅíŋ ngie áa shwóŋè Ssé, ńgie á té shwóŋè nyìŋ mesoŋ wɔ́. Á ne fa’a tsɛ̀ɛ ntʉ́m gẅí, pi pie pi ka záb ntʉm gẅi ná Yěso.

¹⁴Mefɛ́ mefɛ́, ngɔ́’ gie e la kú pʉ̀a Jẅidea pie pɔ́ la záb ntʉ́m ná Kristo, ńcú’te ńcʉ́’ pʉ̀a Ssé, e la kúu gẅi gí. N gɔɔn nue pʉ̀a lá’ pí la nyɛɛ gẅi ngɔ́’, á gwɔ́ pá’ pà Yuda, epʉ̀a lá’ pɔ́b yɔ́b, la nyɛɛ wɔ́b ngɔ́’.

¹⁵Pà Yuda ŋwɛ́ la zẅé pà *ntsẅì nkʉ̀ Ssé pe fʉ̀’e mvfò, pɔ́ kéen ńgíŋ ńzẅé Cʉ̀apʉ̀a Yěsô. Pɔ́ piŋ ne ńkʉ́e wég. Pɔ́ té gÿo mmó gie á poŋ Ssé wɔ́, pɔ́ pʉa pʉ̀a metsèm.

¹⁶Pɔ́ ne ńkaga tʉ̀ ńtɔ’ɔ wég léshwóŋó nò Ssé mbwo pʉ̀a pie é té pà Yuda wɔ́, ḿbɔ́gɔ pá’ á ge gÿo pɔ́ tsẅɛ́. Pɔ́ ée pú’u, ńdɔgɔ ńkẅi’i nzẅìŋe nò wɔb kẅi’i. E Ssé kéen ńgyáŋa lóŋ tá ńzába pwó yé ná pɔ́b.

¹⁷Á gʉa ná peg, mbà mefɛ́, tà fó pá’ pege la fege, tà pege cʉ’ʉ́ ne ńgyáte ná meshÿó wɔ́, tá ńké ńgẅiin pɔ́ tà’ nkwaŋá la, peg fǎ’ meshÿó tɛ’ légíŋe ńtó pege gyáte ná meshÿó, á nue nzyè gi ne ńgyáŋa wég tɛ’.

¹⁸Áa nò ngie peg ka kwoŋo légiŋe ńtóo lá’ pi, kwà’ mèŋ Pɔl, méŋ fǎ’ meshÿó mekwò tà ńgyɔ́ɔn tá Sátà ké ńtáte wég táte.

¹⁹Pi zɔ zɔɔn ńgwɔ́ pʉ̀a pie pɔ́ gÿo peg ne ńzẅí’te lyɛ’ɛ́ lá’ Cʉ̀apʉ̀a tɛ’. Pi zɔɔ weg lekág, ńgwɔ́ yeg *ngǔ’ gie peg ge lá’ lɔg tyé mvfò Cʉ̀apʉ̀a wege, á fʉ̀’ gie à ge lá’ gíŋe tó.

²⁰Oon pi ee weg legú’, ńgwɔ́ weg lekág.