Read Ngiemboon 1 Tesalonika 3 Bible Online

1 Tesalonika 3 - Ngiemboon bible

1 Tesalonika 3

¹Pá’ nzyè gi ka ne ńgyáŋa wég tɛ’ la, peg ka tè jú’u légiŋe shÿɔg wɔ́. Áa yɛ̌ tá peg Silas ka gyǎ ngie peg yé ge gwɔ́ ńnéŋe Atɛ̀ne,

²é túmo Timoté né pi. Pi ne ńzsé ngie aa fɛ́ wege gẅie pega pɔ̌ fa’a fà’a Ssé, ńgwá ńtsẅii Nkʉ̀ mbòŋo Kristo. Peg ka túmo yé légwɔ́ gie à ge gÿo pi tʉte, é piŋ kẅiŋte gẅi nà gẅi lezáb ntʉ́m nà Ssé,

³légwɔ́ gie ngʉ̀ngʉ̀ gie pi ne ńgyá fʉ̀’ɔɔn, e tè gÿo tsɔ̌ nyìŋ tsetsɛ̀ɛ pi pɔ́g, ńgwá’a nò Ssé wɔ́. Pi zɔɔn ne ńzsé gí ngie ngʉ̀ngʉ̀ gẅiin lékúu wégè pàzáb ntʉ́m nà Ssé.

⁴Pi kímte pá’ peg la nyé tsetsɛ̀ɛ pi, ḿvɔg shwóŋó gẅi ngie ngʉ̀ngʉ̀ ge tóo ná pege. E kéen ńtó tà pi né ńzsé gí.

⁵Áa mmó gie á ka gÿo tá mèŋ n te gíŋe ńku’u lézẅí’te wɔ́, éfó ńtúmo Timoté, ńgie à gʉa ńgyá pá’ gẅi lézáb ntʉ́m nà Ssé ka cʉ̌’ ńgwɔ́ pú’u, ńgwɔ túmo yé, ńne ḿbɔ́gɔ ngie Sátà ka cʉ̌’ ńkwa’te gẅi tà fà’ gie peg la fa’ cʉa sẅɛ̀ɛ.

⁶Tá áa nà fʉ̀’ɔɔn, mbà a fǒ lá’ pi ḿbiŋ tà ńkúu jʉ’ɔɔn. A shwoŋó wég nò ná gẅi lézáb ntʉ́m nà Ssé, á nà nkwòŋo gie pi gẅiin, tà nò poŋo wég. A shwoŋó wég pá’ pi neŋé ńkíme wég pɔ́ mboŋó, mbɔɔ pá’ pi ne ńtsɔ́ɔn légiŋ ńgyá wég pá’ peg yég ne ńtsɔ́ɔn légiŋe ńgyá gẅí.

⁷Mefɛ́ mefɛ́, peg jǔ’ pú’u, menò tsɛ ne sẅɛ́ɛ wég sẅɛ́, peg tsɛ ne ńgyá pɔ́ ngɔ́’ tá’, anò gí mbɔɔ gẅi lézáb ntʉ́m nà Ssé kẅiŋté wég kẅiŋte.

⁸Áa fʉ̀’ɔɔn, peg ge gíŋe jú’, é gwɔ́ ntentʉ́, á nue pi kaa kʉ́a légwɔ́ pɔ́ nzèm Cʉ̀apʉ̀a wɔ́,

⁹ńgwɔ́ peg síe Ssé kwà’ lêkɔ́ ńtí gẅí? A ne ńgÿo peg gẅiin lekág pá’ɔɔn tɛ’ ńtí gẅí.

¹⁰Á gʉa fʉ̀’ gie peg ne sẅíŋte Ssé, kà zsǒ wɔ́, kà tsẅɛ́’ wɔ́, peg lʉa mbwo yé tɛ’, ńgie à gÿo peg gíŋ ńgyá meshÿó mí, peg piŋ ńnáa gẅi mmó gie á ne ńzága ná gẅi lézáb ntʉ́m ná yé.

¹¹Pú’u, peg ne ńdúɔ ngie e Ssé yé máŋwɛ́, gẅie aa Tá wege, mbɔɔ Yěso gẅie aa Cʉ̀apʉ̀a wege tsɔ́’ɔ mánzsè peg tó tà ńgyá gẅí.

¹²Peg giŋé ne ńdúɔ ngie Cʉ̀apʉ̀a gÿo nkwòŋe gie pi gẅiin tsetsɛ̀ɛ pi, mbɔɔ gie pi gẅiin ná petsɔ́ pʉ̀a mesoŋ metsèm, e kẅi’i kẅi’i, ńgie à gÿo e gwɔ́ pá’ gie peg gẅiin ná pi,

¹³ńgíŋe gÿo ntʉ́m gẅi ké ne ńzébe pɔ́ ná yé. Tá à lá’a lyɛ̌’ gie Cʉ̀apʉ̀a wege Yěso pâ pʉ̀a pie à la tsɔ́’ é tǒ, pi tyé mvfò Tá wege Ssé, ńgwɔ́ ndʉalʉ̌a, atsɔ́ *lɔ̌’ɔ gí le gwɔ́ wó wɔ́.