Read Ngiemboon 2 Tesalonika 1 Bible Online

2 Tesalonika 1 - Ngiemboon bible

2 Tesalonika 1

¹Pɔl, Silase mbɔɔ Timoté náa yɔɔn ŋwà’ne mbwo cú’tè gie áa Tesalonika ńgwɔ́ cú’tè Tá wege Ssé, mbɔɔ ye Cʉ̀apʉ̀a Yěsô Kristo.

²E Ssé Tá mbɔɔ Cʉ̀apʉ̀a Yěsô Kristo ne ńgwɔ́ né pi, ńne ńnéŋe sẅétè ntʉ́m pi.

³Mefɛ́ mefɛ́, peg gẅiin léná ndǎg mbwo Ssé nà twó sí ngwòŋ fʉ̀’ ntsèm. Áa mbòŋ ngie mé gÿo pú’u, mélà’mie pi tè ne ńkʉ́a lézáb ntʉ̀m ná yé wɔ́, ńgíŋe ne ńgẅiin nkwòŋe tsetsɛ̀ɛ pi ńdɔgɔ ńgee pɔ́ lê mvfò.

⁴Á cʉa pú’u, tá peg gwaa ńkím lezíŋ sí tsɛ̀ɛ metsɔ́ mecú’tè pʉ̀a Ssé, ńkím pɔ́ nê ka’te, mélà’mie pʉ̀a ne ńnyɛɛ gẅi ngʉ̀ngʉ̀, ńne ńkʉ́e gẅí, pi ké tè cú’tè kÿo, pi ké shÿɔg shÿɔg, ńne ńzába ntʉ́m gẅi pɔ́ ná Yěsô Kristo.

⁵Á lɔgɔ ńnyɛɛ ngie e Ssé ŋag ntsaŋ pɔ́ ndʉŋ ndʉŋ. Á nue ngɔ́’ gie pi ne ńgyá fʉ̀’ɔɔn, e gÿo ngie pi ku’ pʉ̀a pie pi ge lá’ kúu tsɛ̀ɛ *lefùɔ Ssé. Pi gyá ngɔ́’ ńtí pɔ́ pú’u.

⁶Pi zsé mbóŋo ngie e Ssé ge lá’ ŋag ntsaŋ pɔ́ pá’ á ne ńzɛ́te, é ná ngɔ́’ mbwo pʉ̀a pie é nyɛɛ gẅi ngɔ́’ fʉ̀’ɔɔn lɔɔn,

⁷é náa sẅétè mbwo pi pie pi ne ńgyá ngɔ́’ fʉ̀’ɔɔn lɔɔn, é gíŋe ná mbɔɔ mbwo peg yég. Mɔɔn menò ge lá’ cʉate á fʉ̀’ gie Cʉ̀apʉ̀a wégè Yěsô Kristo ge lá’ fó tÿǒ lepwó é kẅɛ, é nyɛ mbùm ye. Pâ mecÿɔ́’ pé pie é gẅiin metʉ̀ tɛ’ é gwɔ́.

⁸À ge lá’ gwaa tó pege gyá mmɔ̌g tÿɔ́’ɔ yé ńnéŋ soŋ, à gÿo pʉ̀a pie pɔ́ la lʉ’ Nkʉ̀ Mbòŋo wé gyá ngɔ́’.

⁹Ngɔ́’ gie pɔ́ ge lá’ gyá á gwɔ́ pɔ́ pá’ pɔ́ ge pú lége, Cʉ̀apʉ̀a wege tsɛ́ nzsè mbwo pɔ́b tà pɔ́ le sɔb nÿɔ́g ná yé wɔ́, é ké le gyá máamáa shʉ́shÿɔ́g we wɔ́.

¹⁰Á ge lá’ gwɔ́ pú’u, nà lyɛ̌’ gie Cʉ̀apʉ̀a ge lá’ tó, á gwɔ́ nà yɛ̌ lyɛ’ɛ́ lÿò, epʉ̀a pé ne ńnáa mekù’ mé, pʉ̀a pie é záb ntʉ́m ná yé métsèm ne ńgu’te yé. Pi gwɔ́ gí tsetsɛ̀ɛ pɔ́b, mélà’mie pi la zẅíŋe nò yé gie peg la shwóŋó gẅí.

¹¹Áa mmó gie á gÿo tá peg ne sẅíŋte Ssé fʉ̀’ ntsèm ná twó sí, ńgie à gÿo pi gwɔ́ pʉ̀a pie pi ku’u létsẅɛ́ pá’ à la ká’a mbwo pi. Peg giŋé ne sẅíŋte yé, ngie à lɔg metʉ̀ mé ńkẅéte gẅi pi gÿo kɔ̀ɔkɔ́ɔ nò mbòŋo wɔ́ gie pi ne ńkwoŋo légÿo, mbɔɔ fà’ gie pi ne ńgÿo ńtí pá’ pi záb ntʉ́m ná yé.

¹²À cʉa pú’u, epʉ̀a mesoŋ gu’te lezíŋ Cʉ̀apʉ̀a wege Yěsô, ńcʉa ná mà gẅí. Epʉ̀a mesoŋ gu’te gẅi ńcʉa ná yé yé. Á ge lá’ gwɔ́ pú’u, á nue e Ssé yege mbɔɔ Yěsô Kristo ne ńdɔgɔ pá’ pɔ́ kwoŋo wégè, ńcÿó gʉm yégè.