Read Ngiemboon 1 Timote 4 Bible Online

1 Timote 4 - Ngiemboon bible

1 Timote 4

¹A Zẅìge Ndʉalʉ̌a ne ńnyɛte ńgɔɔn ngie: Tsɔ́ pʉ̀a ge lá’a nà melyɛ’ɛ́ lá’ nzsònzèm pɔ́ le gíŋe ńzáb ntʉ́m nà nò gie pege ne ńzába ntʉ́m mǒ lɔɔn wɔ́, legyè sɔ́b cʉ́’ ńtyé pɔ́ nà *messé tepòŋ mie é fʉte pʉ̀a, ńtʉʉ lelÿò ńtyé pɔ́ nà menò mie *messé tepòŋ zí’i pʉ̀a.

²Á lɔgɔ ńgwɔ́ ngie mɛ̌ menò ge lá’ kẅɛɛ ncwò pʉ̀a pie pɔ́ cÿɔ nò, ńgwɔ́ pà nkwòŋ menÿɔ́g, mbà pɔ́ léen shÿɔg tà mbùm yɔb cʉ́’ʉ ńcúa wɔ́b pɔ́ téen ńjú’u wɔ́.

³Pɛ̌ pʉ̀a ne ńzí’i pʉ̀a ngie tà pɔ́ zɔ́’, ńgie tà pɔ́ pfɛ́ tsɔ́ shúm léjÿó, tá mbà Ssé la nyɛte sɛ̌ shúm légwɔ́ gie pʉ̀a pie é záb ntʉ̀m ná yé, ńne ńzsé nò gie áa nénʉ́, ge pi, ésie yé mǒ, é jÿó.

⁴Á zɔɔn ńgwɔ gwɔ́, akɔ́ɔkɔ́ɔ gie e Ssé la nyɛte wɔ́ á gwɔ́ pɔ́ mbòŋ. Atsɔ́ gie ńgwɔ́ mé gwá’a mǒ á té wó wɔ́. Tá á ké ńzɛ́te ngie mé gwaa ne jÿó sɛ̌ shúm, ńne sie Ssé.

⁵Mé jÿó á nue e Ssé gɔ̌ɔn pú’u, mé gíŋ ńne sie yé mǒ.

⁶Ɔ̀ ge gwɔ́ kwà’ ngàŋa fà’ Yěsô Kristo, pá’ ɔ̀ lɔɔn ne ńzí’i mefɛ́ mefɛ́ mɔɔn menò zí’i. Á gʉa ná kwà’ gù, anò Yěsô gÿo ɔ̀ cwoŋo ńtʉte pá’ ɔ̀ kě ńkú’te nò gie peg ka záb ntʉ́m mǒ mboŋó mbɔɔ pá’ ɔ̀ ka jú’u nò nénʉ́ gie mé ka zí’i gú lɛ.

⁷Ké ḿbɔ́ɔn menò pú’kwɔb mie é té kẅéte, tà ńcʉ́’ pú’u, é tɔ’ pʉ̀a lézáb ntʉ́m ná Yěsô. Ké ńne ńzí’i pɔ́ légÿo mmó gie á poŋ Ssé.

⁸Nyìŋ lɔɔn ńkÿo ndʉ̌, mbà é ge kẅéte ndà’ mbùm ye. Tá legÿo mmó gie á poŋ Ssé, á kẅéte nà shúm ntsèm. Pege fó mǒ ńzsé ngie pege ge gwɔ́ wó nà fʉ̀’ɔɔn tà mbɔɔ ná fʉ̀’ gie á ge gÿo tá tó.

⁹Ashwóŋè yɔɔn áa kwà’ nénʉ́, ńgwɔ́ gie ńgwɔ́ wɔ̌wɔ́ɔ jú’ ńzẅíŋ.

¹⁰Yɔɔn áa mmó gie á gÿo peg fa’a fà’ Ssé tà ńtéŋe zì’i, ḿma’a ncù. Peg fa’a, ńne ńzẅí’te kɔ̀ɔkɔ́ɔ pɔ́ mbwo Ssé gie ee ntentʉ́. Yé zɔ̌ gÿo pá’ pʉ̀a mesoŋ ntsèm ge tsẅɛ́, tá nyìŋ ké ńgwɔ́ tsẅɛ́, éfó pɔ́ ná pá’ à záb ntʉ́m ná Yěsô.

¹¹Mɔɔn ée menò mie ɔ̀ ge tsẅii mbwo pʉ̀a, é piŋ ne zí’i wɔ́b.

¹²Pɔ́ɔn légÿo mé gwága gú ngie ɔ́ɔ múɔ. Kag tʉ̀ tà pʉ̀a Kristo pí fʉ̀’ ná gù. À cʉa nà shwóŋè jú, á nà megiŋe mú, á nà jù ntí lekwoŋo nyìŋ mesoŋ, á nà jù ntí lézáb ntʉ́m nà Ssé, á ná gù lépɔ́ɔn nkwaŋá gẅie à lɔɔn ńgwɔ́ é cʉŋte gú.

¹³Ne ńtóŋo ŋwà’ne Ssé mvfò pʉ̀a, ńne ńkẅiŋte pʉ̀a, ńne ńzí’i wɔ́b mmó tá ńdɔgɔ ńzẅí’te wɔ̀ɔn.

¹⁴Tè lɔgɔ mmó gie e Ssé la lɔg ńcÿó gʉm jú, ḿma’a kwaŋ. Néŋe ne ńkímte pá’ pàkẅé mvfò tsɛ̀ɛ cú’tè pʉ̀a Kristo la cú’te, ńgwɔ záb mbwó mɔ́b twó gù, ńtsẅi nkʉ̀ gẅie é fóo mbwo Ssé.

¹⁵Nyɛte ńnéŋe twó ná yɔɔn fà’ té tsyɛte nnɛ́, ńzsé ngie pʉ̀a metsèm ge gyá pá’ fà’a jú ne ńgiŋe.

¹⁶Laga twó jú nà gù leńnéŋe mbɔɔ ná mmó gie ɔ̀ zí’i pʉ̀a. Tè lɔgɔ tsɔ́ twó ḿma’a kwaŋ. Ɔ̀ ge gÿo pú’u, e Ssé fó mǒ ńgÿo, ɔ̀ zẅɛ́’, ńgwɔ tsẅɛ́ ntsaŋ, epʉ̀a pie é zẅí’te nò gie ɔ̀ gɔɔn gíŋe ńtsẅɛ́ yɔ́b.