Read Ngiemboon 2 Timote 3 Bible Online

2 Timote 3 - Ngiemboon bible

2 Timote 3

¹Zsé ngie, á ge lá’ gwɔ́ nà melyɛ’ɛ́ lá’ nzsònzèm, ejʉ’ tʉ tɛ’.

²Epʉ̀a mesoŋ gwɔ́ mekìm, ńkwoŋ pɔ́ nkáb, ńzẅíŋe mmóm tɛ’, é gwɔ́ ngàŋa ŋá’te, é ne zoonte Ssé zoonte, é tʉʉ twó mbwo metá pɔ́b, é gwɔ́ pàjÿò ńjÿɔg ncwò, pɔ́ le gíŋe ńdɔgɔ mmó gie áa ye Ssé ńdɔg ńtóŋo tsɔ́ mmó wɔ́.

³Letʉ́m sɔ́b tʉ pá’ tóon la, pɔ́ gwɔ́ pà tètsɔ́ɔn mezìŋe, éshwóŋe té poŋ ná pʉ̀a, ayɔ́b nò gwɔ́ pɔ́ léma’a tág. Pɔ́ gwɔ́ pɔ́ mefÿɛ́, é gwɔ́ ngàŋ mbù nò mbòŋo,

⁴é gwɔ́ pàjÿò menáŋ, é gÿo nò pɔ́ ḿvege vege, é gwɔ́ ngàŋ ŋá’te tɛ’, é kwoŋo mmó gie á poŋo wɔ́b, pɔ́ le Ssé kwoŋ,

⁵é gwɔ́ pʉ̀a Ssé pɔ́ nzème pǐ, é moŋe metʉ̀ Ssé mie é kɔ’ɔ́ lɔgɔ wɔ́b gÿo pʉ̀a Ssé. Timoté lÿɔ́’te ntí pʉ̀a ápɛ̌.

⁶Etsɔ́ pʉ̀a pú’u, gwá shú ńkú mendá pʉ̀a, ńdÿɔgte pànzwě pie tsẅé yɔ́b zeŋe zeŋe, é gwɔ́ pànzwě pie é gÿo menò tepòŋ tɛ’, ńnéŋe ńtsɔ́ɔn shúm pɔ́ ntí ntí.

⁷Wɛ̌ nyìŋ wɔ́ tó, ńzí’i yɛ̌ ntí pànzwě nò, pɔ́ zẅí’te zẅi’té tá ńké tè ku’u lézsé nò gie áa nénʉ́ wɔ́.

⁸Pʉ̀a pie é zí’i wɔ́b zɔɔn ne ńdʉ’ʉ nò gie áa nénʉ́. Ndʉŋ ndʉŋ pá’ á laa tsɔ́ fʉ̀’, Jannès pɔ́ Jambrès lʉ’ʉ nò gie Mǒsê gɔɔn la, pɛ̌ pʉ̀a gíŋe ne ńdʉ’ʉ nò gie áa nénʉ́, ée pʉ̀a pie legyè sɔ́b té tyé, pɔ́ piŋ ńké tè záb ntʉ́m nà Ssé tà shwóŋó nò wɔ́.

⁹Tá’, à lɔɔn ńgwɔ́ pɔ́ lélɔg yɛ̌ ntí ńkẅi’i ńgʉa tà ngʉ̀a sag wɔ́, á nue pʉ̀a metsèm ge gyá ngie pɔ́ té tsɔ́ nò zsé, anò yɔ́b gíŋe ńgwɔ́ pɔ́ pá’ nò Jannes pɔ́ Jambrès.

¹⁰Á gʉa ná gù, mbà pɔgɔ lǎ zye ńnéŋe. Ɔ̀ ne ńzsé mmó gie mèŋ n zí’i pʉ̀a, ɔ̀ ne ńzsé yɔ́ɔn tsẅé, ńne ńzsé mmó gie mèŋ n gwɔ fa’ ńne ńtsɔ́ɔn yɛ̌, ńne ńzsé pá’ n záb ntʉ́m wɔ̀ɔn nà Ssé, ńzsé pá’ n gẅiin kwɔ́gɔ nnɛ́ pú’u, pá’ n kwoŋ pʉ̀a mesoŋ pú’u, ḿbiŋ ńzsé pá’ n kag tʉ̀ té kʉ́a pú’u.

¹¹Ɔ̀ ne ńzsé pá’ pʉ̀a ka kʉ́e wɔ̀ɔn pú’u, ńzsé pá’ n ka gyá ngɔ́’ pú’u. Á lɔɔn ńgwɔ́ gie mé la gÿo lêkɔ́ nà mèŋ á Antiokia, á Ikonium, á Listele wɔ́, mbà ɔ̀ ne ńzsé. N da gyá ngɔ́’ tɛ’, tá’ á gʉa ná sɛ̌ lekwò wɔ́, Cʉ̀apʉ̀a ké fó tsoló ńkẅile wɔ̀ɔn kẅile,

¹²ńgwɔ́ nyìŋ zɔɔn le la nnɛ́ ná Yěso Kristo tà ńne ńkwoŋo légÿo mmó gie Ssé ne ńkwoŋo, mé nyé té kʉ́e yé kʉ́e wɔ́.

¹³Tá’ n gɔɔn pá’ɔɔn pʉ̀a tepòŋ pâ ngàŋa fʉte ge gÿo lɔgɔ nò tepòŋ é kẅi’i gʉa pɔ́ lê mvfò, é ne fʉte pʉ̀a, pɔ́ gíŋe ne fʉte wɔ́b yɔ́b.

¹⁴Á gʉa ná gù, mbà á ne ńzɛ́te ngie ɔ̀ kú’te pɔ́ mmó gie ɔ̀ la zí’i tà ńzáb ntʉ́m mǒ. Ɔ̀ tè ne ḿmoŋe nyìŋ gẅie à ka zí’i gú wɔ́.

¹⁵Ɔ̀ la gwaa lu ssé ńne ńzsé mmó gie ŋwà’ne Ssé áa yɛ̌, ńgwɔ́ yɛ̌ zɔ̌ náa gú legyè lélɔg ńzáb ntʉ́m ná Yěsô Kristo, e Ssé gÿo ɔ̀ tsẅɛ́.

¹⁶Mé la gwaa ŋwe’e kɔ̀ɔkɔ́ɔ tsɛ̀ɛ ŋwà’ne Ssé wɔ́, á fóo pɔ́ ncwò Ssé. Pú’u ammó gie mé la ŋwe’e, à ku’u lélɔg ńzí’i pʉ̀a nò gie áa nénʉ́, ńku’u lélɔg ńdʉ’ʉ nò gie á té nò wɔ́, ńku’u lélɔg ńtÿɔ́gte pʉ̀a, ḿbiŋ ńku’u lélɔg ńzí’i pʉ̀a pá’ à lɔɔn ńgwɔ́ pɔ́ gÿo tá ńnéŋe nà ntí gie e Ssé ne ńkwoŋo.

¹⁷Pú’u ńzsé ngie nyìŋ Ssé ge fóo nà ŋwà’ne Ssé, é zsé nò Ssé mboŋó, tá gwɔ́ fʉ̀’e kɔ́ wɔ́, é ku’u légÿo nò gie áa mbòŋ.