Read Ngiemboon 2 Timote 4 Bible Online

2 Timote 4 - Ngiemboon bible

2 Timote 4

¹Mèŋ n tyé mvfò Ssé mbɔɔ mvfò Yěsô Kristo gẅie à cʉ’ʉ́ ńtó tǒ léŋag pʉ̀a metʉ̀ lâ mepfó ssé, mbɔɔ ná pá’ à ge gÿo tó ńnuŋe lefùɔ sé, n cwoŋo ńgɔɔn né gù ngie:

²Ɔ̀ tsẅi nkʉ̀ mbòŋo nò Ssé, ńtyé pɔ́ nzɔ̌ wɔ́ ńcwoŋo ńgɔɔn gɔɔn, kà á gwɔ́ pɔ́ jʉ’ gie mé ee wó ńne ḿbyɛ́bɛ ngie mé gɔɔn wɔ́, kà pɔ́ jʉ’ gie mé té wó ńne ḿbyɛ́bɛ wɔ́ wɔ́, ɔ̀ gɔɔn gɔɔn. Nyìŋ fʉa nò ɔ̀ kaga yé nà ntí gie à ge jú’, ńkẅiŋte yé légÿo nò mbòŋo. Gwáa gÿo pú’u, ńdɔg pɔ́ kwɔ́gɔ nnɛ́ ḿbiŋ ne ńzí’i pʉ̀a mmó.

³Á nue atsɔ́ fʉ́’ ge gÿo gwɔ́, epʉ̀a le gíŋe ńkwoŋo lézẅí’te nò nénʉ́ gie mé zí’i pʉ̀a ná Yěsô Kristo wɔ́, é lɔg pá’ pɔ́ kwoŋo lézẅí’te pɔ́ nò gie ntʉ́m wɔ́b ne ńtsɔ́ɔn, éfa’ pɔ́b pàzí’i wɔ́b mmó tà e gyɔ́ɔn gyɔ́ɔn. Pɔ́ zí’i wɔ́b nò gie pɔ́ kwoŋo lé jú’.

⁴Pɔ́ té gÿo ńgíŋe ńzẅí’te nò gie áa nénʉ́ wɔ́, é cʉ́’ zẅí’te pɔ́ menò pú’kwɔb.

⁵Tá ńgʉa ná gù, gÿo jú kɔ̀ɔkɔ́ɔ wɔ́ à ku’ ku’. Ngɔ́’ kúu gú ɔ̀ shÿɔg shÿɔg. Ké ně fa’a pɔ́ fà’ jú gie áa létsẅi nkʉ̀ mbòŋo nò Ssé mbwo pʉ̀a. Fa’a fà’ Ssé gie ɔ́ɔ mǒ mboŋó.

⁶Á gʉa ná mèŋ, mbà wɔɔn léfó ndùmo ssé tsétsá’ ńgʉa à ne ńku’u. Afʉ̀’ kǔ’ pá’ mé ge zẅé wɔ̀ɔn, é lɔg ńgwɔ́ pá’ wɔ̀ɔn pwɔ́’ gẅie mé nuŋe mvfò Ssé.

⁷N ka lÿɔ́’ ncù mbòŋo, mèŋ n ka kÿo ndʉ̌ tà ńkúu nzotě. N ka kě ně ńzába ntʉ́m pɔ́ ná Yěsô, ńně ḿbɔ́ɔnte mboŋó.

⁸Áa nà fʉ̀’ɔɔn, mbà Ssé cwoŋté ntsɔ’ɔ́ fà’ nyìŋ gẅie à kÿǒ ndʉ̌ tà njÿó, ńzáb ńne ńdɔgɔ ńzẅí’te wɔ̀ɔn. Wɛ̌ ée tsɔ’ɔ́ fa’ pá’, n gÿǒ mmó gie e Ssé ne ńkwoŋo. Cʉ̀apʉ̀a gẅie à za’ ntsaŋ pɔ́ ndʉŋ ndʉŋ, à ge gÿo náa mbwo mèŋ nà lyɛ’ gie à ge tsɔ́’te mentsaŋ. À tè lá’ ná pɔ́ ndà’ mbwo mèŋ wɔ́. À ge lá’ gíŋe ná mbɔɔ mbwo pʉ̀a pie pɔ́ ne ńkwoŋo légyá fʉ̀’ gie à ge gÿo kẅɛ.

⁹Kag tʉ̀ ńtɔ́g ńtó ńkẅɛ́te wɔ̀ɔn.

¹⁰Zsé ngie Ndemas kéen ńgwá’a wɔ̀ɔn, mélà’mie à kwoŋ shúm njÿó tɛ’. Yɛ̌ zɔ̌ ka gÿo á gʉa né Tesalonika. Kelesens ka gʉa lé Galatia, Titus gʉa lé Ndalmatia.

¹¹Peg Lukase zɔ cʉ̌’ ńgwɔ́. Ɔ̀ lɔɔn ńgwɔ tó, pi Malékuse gwɔ́, á nue à ge kẅéte wɔ̀ɔn nà fà’a Ssé.

¹²N ka túmo Tishig á tÿǒsoŋo Efeso.

¹³Ɔ̀ lɔɔn ńne ńtóo, ɔ̀ lɔg nzsǒ fÿɔ́g yɔ̀ɔn gie n da nyé Toras á mbʉ̀a Karpus ńdɔg ńtó, ńgíŋ ńdɔg mbɔɔ meŋwà’ne ńtó, n tʉʉ lelÿò ńgɔɔn mie é gwɔ́ pɔ́ *ngùb nɔ̀ɔn.

¹⁴Zsé ngie Alekzáŋdele gẅie aa tâlɔ́ɔn la, à ka gÿo nò tepòŋ ná mèŋ tɛ’. Cʉ̀apʉ̀a zɔ ge lá’ zsé pá’ à ge gÿo ná ye, ńtí menò mé.

¹⁵Mbǎ gù jú lÿɔ́’te yé, á nue à ka pǔ ńtɔ’ɔ nò Ssé gie peg ka ne shwóŋó pʉ̀a.

¹⁶Á gʉa ná nò yɔ́ɔn, mbà n daa ndùŋ mvfò lyɛ̌’ gie mé la tóŋo wɔ̀ɔn jʉ’ʉ ntsaŋ, ńgʉa wó ḿbíte ncwò wɔ̀ɔn. Mânyìŋ ntsèm gwá’a wɔ̀ɔn, mèŋ n kẅɛ gílé mèŋ. E Ssé lége yɛ̌ nò ńnáa mbwo pɔ́b.

¹⁷Cʉ̀apʉ̀a zɔ la tè wɔ̀ɔn gwá’. À la tóonte wɔ̀ɔn tá mèŋ n tsẅi nkʉ̀ wé pá’ á ne ńzɛ́te ngie mé tsẅi, ta pʉ̀a pie é té pà Yuda wɔ́ jú’ metsèm. Á fó ncwò mepú’ ntʉ̀ ńkẅile wɔ̀ɔn.

¹⁸Cʉ̀apʉ̀a ge gÿo fó nà nò tepòŋ ntí ntí é kẅile wɔ̀ɔn, é gÿo mèŋ n tsẅɛ́ légwɔ́ gie mèŋ n ge kúu nà nò lefùɔ yé á tÿǒ lepwó. Agù’te lá’a ńgwɔ́ pɔ́ mbwo Cʉ̀apʉ̀a fʉ̀’ ntsèm. *Amen.

¹⁹Tsyɛ’te Piriska pɔ́ Akilas ńná né mèŋ. Tsyɛ’te mbɔɔ pʉ̀a Onésifor.

²⁰Eraste kéen ńzso Korento. N ka nyé Tolofine á Milet, mélà’mie à ka ne ńguɔ.

²¹Kág tʉ̀ ńtó tá fʉ̀’ʉ fÿɔ́g zye. Eubule, mbɔɔ Pẅideŋ, mbɔɔ Linus, mbɔɔ Kelɔdia ńgÿo petsɔ́ mefɛ́ mefɛ́, pɔ́ tsyɛ’té gú.

²²Cʉ̀apʉ̀a ne ńgwɔ́ né gù! Ńne ńnéŋe sẅétè yé ntʉ́m pi metsèm.