Read Ngiemboon Titus 3 Bible Online

Titus 3 - Ngiemboon bible

Titus 3

¹Tè cʉ́’ pʉ̀a Ssé lege ngie pɔ́ gẅiin lé jú’ ncwò pà sá’ ngwòŋ, ńgÿo mmó gie pɔ́ ne ńzɛ́te, ḿbiŋ ńnéŋe ńtyé pɔ́ légÿo pɔ́ menò mie ée mbòŋ.

²Gɔɔn né pɔ́b ngie tà pɔ́ gɔɔn nò tepòŋ né nyìŋ, ńgie pɔ́ pɔ́ɔn mentsaŋ, ńgie pɔ́ gwɔ́ pʉ̀a mbʉ́lè pʉ́lè, ńnéŋe ńná mekù’ wɔ̌wɔ́ɔ.

³Á laa tsɔ́ fʉ̀’ pege yégè gwɔ́ pà gÿo nò té sáŋ, ńgwɔ́ pà tʉʉ twó, ńgwɔ́ pʉ̀a pie é záb ntʉ́m wɔ́b nà nò gie á té nò wɔ́, ńgwɔ́ mekwɔɔn mbwo shúm ntsèm sie ntʉ́m wégè tsɔ́ɔn lâ sie é poŋo wégè. Pege laa pʉ̀a ńcÿɔ́g, ńgwɔ́ ngàŋa kègɔ́’, ńgÿo mé pʉa wégè tɛ’, pege gíŋe ḿbʉa yégè pʉ̀a.

⁴Tá’ e Ssé gẅie à gÿo pege tsẅɛ́ɛ nyɛ ngie ntʉ́m wé poŋ, á piŋ ńkwoŋ pʉ̀a mesoŋ,

⁵á gÿo pege tsẅɛ́. Pege těen ńtsẅɛ́ɛ á gwɔ́ pɔ́ ngie pege gÿǒ menò mie é tyé ndʉŋ ndʉŋ wɔ́, pege tsẅɛ́ɛ á gwɔ́ pɔ́ ngie à tsɔ́ɔn mezìŋe mégè. À la sɔgɔ wégè, ńdɔg ńgÿo mé zyé wégè lezyé se sẅé, à Zẅìge Ndʉalʉ̌a náa le gwɔ́ we sẅé né pege.

⁶E Ssé la ńnéŋe Zẅìge Ndʉalʉ̌a ŋwɛ́ ntʉ́m pege té gɔ’, ńtí Yěsô Kristo, yé gẅie à gÿo pege tsẅɛ́ɛ.

⁷À la néŋ pá’ɔɔn légwɔ́ gie pege ge lá’ gẅiin le gwɔ́ tèmì gẅie pege neŋé ńne ńzẅí’te. E Ssé ge lá’ ná né pege, mélà’mie à la kwoŋo wégè, ńcÿó gʉm yégè, ńgÿo pege cʉ́’ pʉ̀a pie ée mvfò ye ńgwɔ́ ndʉŋ ndʉŋ.

⁸Menò mɔɔn ée jʉ’ó ńgwɔ́ pú’u. M bíŋ ne ńkwoŋo ngie ɔ̀ cwoŋo shwóŋó wɔ́b mboŋó, ńzsé ngie pʉ̀a pie é zǎb ntʉ́m nà Ssé pɔ́ ge kag tʉ̀ légÿo menò mbòŋo lékwɔgɔ nnɛ́, à gwɔ́ pú’u, ńgwɔ́ mboŋó, ḿbiŋ ńgwɔ́ mmó gie á kẅéte pʉ̀a mesoŋ.

⁹Tá’ pɔ́ɔn légɔɔn nò nà menò mie é té tyé, pá’ menò mie mé zoŋo nà mezíŋ pàmangʉa njʉ̀’ peg, pá’ menò mie mé zoŋo nà mbʉ̌ Mǒsê, é té menò mie é kẅéte nà tsɔ́ nò wɔ́, tà tsǒon méjʉ’.

¹⁰Nyìŋ lɔɔn ńgwɔ́ nyìŋ gẅie à ma’a fagte, ɔ̀ pebe yé tà’ legʉ̀a à tè jú’, ɔ̀ pɔ́ɔnte ńgíŋ ḿbebe yé à tè jú’, tà pi yé gíŋe ńteme nò.

¹¹N kwaŋ ngie ɔ̀ ne ńzsé ngie ntí pʉ̀a apɛ̌ é té gíŋe ńgwɔ́ nà mánzsè Ssé wɔ́. Pɔ́ gÿo menò tepòŋ, menò tepòŋ ŋwɛ́ ne ńnyɛɛ ngie pɔ́ èe nà mánzsè tepòŋ.

¹²N dɔɔn ńgwɔ́ tà ńtúmo Artemas kà pɔ́ Tishig wɔ́ mbwó gù, ɔ̀ kag tʉ̀ tà ńtó ńkẅɛ́te wɔ̀ɔn Nikopolos. Áa jʉ’ gie mèŋ n ka zǎb ngie n ge ńnéŋe wó nà fʉ̀’ʉ mbʉ̀ŋ.

¹³Zenas gẅie à tága nzèm pʉ̀a jʉ’ʉ ntsaŋ, tà mbɔɔ Apolos lɔɔn ńgwaa cʉ́me mánzsè legìŋ, ɔ̀ náa wɔ́b kɔ̀ɔkɔ́ɔ gie á ne ńzɛ́te ngie pɔ́ gẅiin.

¹⁴Mefɛ́ pégè nzèm Kristo gẅiin lékag tʉ̀ yɔ́b, ńdɔgɔ kwɔ́gɔ nnɛ́ ńgÿo menò mbòŋo, ńzsé ngie ńgwɔ́ pɔ́ kẅéte pʉ̀a pie nò tyě nà pɔ́b, pɔ́ le gwɔ́ pà té zẅɛ́’ɛ wɔ́b gwɔ́.

¹⁵Pʉ̀a pie pegá pɔ̌ pú ńgwɔ́, tsyɛ’té gú. Tsyɛ’te pʉ̀a pie é kwoŋo wégè, ńtí nue pege lâ pɔ̌ pǔ ńzáb ntʉ́m ná Yěsô Kristo. E Ssé ne ńgwɔ́ né pi metsèm.