Read Ngiemboon Filemo 1 Bible Online

Filemo 1 - Ngiemboon bible

Filemo 1

¹Yɔɔn ŋwà’ne fóo mbwo mèŋ Pɔl, ngàŋa tsǎŋ ńtí nò Yěsô Kristo. Peg Timoté gẅie aa fɛ́ wɔgɔ nzèm Yěsô Kristo náa yɔɔn ŋwà’ne á mbwo gù Filemo. Ɔ̀ɔ fɛ́ weg we tʉ̀ nzẅìŋ, pege metsèm pú fa’a nà nò Yěsô Kristo.

²Áa jú, ńgíŋ ńgwɔ́ ye Apia, fɛ́ wege we manzwě, mbɔɔ yé Aleshʉpe, á *ngàŋa kwò wege tsẅɛɛ ncù, ńgÿo cú’tè pʉ̀a Kristo gie á kúu ndá gù.

³Tá wege Ssé, mbɔɔ Cʉ̀apʉ̀a Yěsô Kristo ne ńgwɔ́ né pi, ńne ńnéŋe sẅétè ntʉ́m pi.

⁴Fɛ́ wɔɔn Filemo, mèŋ ne sẅíŋte Ssé fʉ̀’ ntsèm, ńké ńkwaŋte gú kwaŋte, ésie Ssé, yé gẅie mèŋ n gu’te.

⁵Mèŋ sie yé á nue mèŋ n ne ńjú’u mé la’te ntí nkwòŋe gie ɔ̀ gẅiin nzèm pʉ̀a Ssé mbɔɔ ntí gie ɔ̀ lɔg ńzáb ntʉ́m gú nà Cʉ̀apʉ̀a Yěsô Kristo.

⁶Mèŋ n ne sẅíŋte Ssé ngie à lɔg pá’ pege temte, á fóo nà lézǎb ntʉ́m nà yé la, ńgÿó ngie ɔ̀ cwòŋo ńzsé menò mbòŋo mie á zɛ́te ngie pege gÿo tá ńdɔgɔ fa’a mbwo Kristo.

⁷N gɔɔn nue, nkwòŋe gie ɔ̀ gẅiin e ka gÿo m bú ńkág tɛ’. À fɛ́ wɔ̀ɔn, ntʉ́m wɔɔn sẅeté, á fóo nà pá’ ɔ̀ ka kẅiŋte pʉ̀a Ssé.

⁸Mèŋ n gee ngàŋ ntúm Kristo, n tsɛ ńku’u léshwóŋó gú mmó gie á zɛ́te ngie ɔ̀ gÿo tá’, á fó nà mmó gie ɔ̀ ne gÿo,

⁹n gyá ngie n ge cʉa nà nkwòŋe yɔgɔ, ésẅíŋte gú sẅíŋte. Tà mbɔɔ pá’ mèŋ Pɔl, n cʉ̌’ pɔ́ nzẅìŋe ndÿò, ńgíŋe ńgwaa gwɔ́ fʉ̀’ɔɔn, ńgwɔ́ ndá tsǎŋ ńtí Yěsô Kristo lɔɔn.

¹⁰Mèŋ n ne sẅíŋte ɔ̀ nà twó Onesime, aa míŋ wɔɔn nà nò Yěso gẅie mèŋ n ka kúu ndá tsǎŋ ńzyé.

¹¹Á laa tsɔ́ fʉ̀’ ɔ̀ těen ńzẅɛ́’ɛ yé wɔ́ tá’, á ké ńgwɔ́ fʉ̀’ɔɔn ɔ́ɔ gwaa ne zẅɛ́’ɛ yé, mèŋ n ne ńzẅɛ́’ɛ yé yɔ́ɔn.

¹²N tumó yé ngie à piŋ nzèm ńtsɛ́ɛ gú. Aa pɛ́’ɛ̀ ńgwɔ́ tʉ́m yɔ́ɔn.

¹³Mèŋ n gyá ngie á kěen ḿboŋ ngie à gwɔ́ pɔ́ lejʉ́ŋ mèŋ, ńne fa’a fà’ gie ɔ̀ kěen ńgwɔ́ jʉ’ɔɔn, mbà ɔ̀ fa’, á ná fʉ̀’ɔɔn gie mèŋ n gee menkÿo ńtí Nkʉ̀ Mbòŋo lɔɔn.

¹⁴Tá’, mèŋ n kaa kwoŋo légÿo tsɔ́ mmó tà ɔ̀ jú’u jú’ wɔ́. N té ne ńkwoŋo létsóte gú tsóte tà ɔ̀ gÿo nò mbòŋo ná mèŋ wɔ́. Mèŋ ne ńtsɔ́ɔn ngie ɔ̀ gÿo pɔ́ mmó gie ɔ̀ kwǒŋ.

¹⁵Ndyɛ̀’, mbà à ka na’á fó lejʉ́ŋ gù ńgʉa légwɔ́ gie ɔ̀ ge gÿo gíŋe gwaa gyá yé, à gwɔ́ pá’ pi yé ge cʉ́’ʉ ńnéŋe pɔ́ fʉ̀’ ntsèm.

¹⁶Á le gíŋe ńgwɔ́ pɔ́ nkwɔɔn wɔ́. À cʉa nkwɔɔn, ńcʉ́’ ńgwɔ́ pɔ́ fɛ́ gù gẅie ɔ̀ ge kwoŋo yé tɛ’. Aa mbwo mèŋ, ńgwɔ́ tʉ̀ nzẅìŋ tà ngʉ̀a shÿɔ́’ɔ pá’ à ge gwɔ́ mbwo gù? À ge gwɔ́ mbwo gù, é gwɔ́ kwà’ nyìŋ mesoŋ, é gíŋ gwɔ́ fɛ́ gù nzèm Yěsô Kristo.

¹⁷Á lɔɔn ńgwɔ́ gie ɔ̀ zsě ngie pɔgɔ ee nà tà’a nò, ɔ̀ kúe yé pá’ á ké ńgwé’e ńgwɔ́ wɔ̀ɔn, mbà ɔ̀ kúe wɔ̀ɔn pú’u,

¹⁸ńgwɔ́ gie à la cʉŋte tsɔ́ mmó mbwo gù, kà ɔ̀ ne ńkʉ́a pɔ́ tsɔ́ mmó mbwo yé wɔ́, ɔ̀ nyé mèŋ n gÿo ntÿó mbwo gù.

¹⁹Kwà’ mèŋ Pɔl zɔ lɔgɔ́ pwó yɔ́ɔn ńŋwe’e yɔɔn jʉ’, ńgie, n ge gÿo tÿó mbwo gù. Tá’ zsé ngie n gẅiin tsɔ́ mmó gie à lɔɔn ńgwɔ́ n zɛ́te ngie ɔ̀ tÿó mbwo mèŋ. À gwɔ́ pá’ ɔ̀ gwaa gẅiin légwɔ́ gẅie ɔ̀ gẅiin fʉ̀’ɔɔn tɛ’, ńzẅɛ́’ɛ pɔ́ wɔɔn.

²⁰Á fɛ́ wɔɔn, tsétsɔ’ lɔg lezíŋ Cʉ̀apʉ̀a ńgÿo mmó gie mèŋ n ne ńdúɔ mbwo gù. Lɔg pá’ pɔgɔ pǔ ńda nnɛ́ nà Kristo, ḿbʉ́le ntʉ́m wɔ̀ɔn.

²¹N dɔgɔ pɔ́ pá’ ɔ́ɔ nyìŋ ńjú’ ncwò tá ńŋwe’e yɔɔn ŋwà’ne. Mèŋ ne ńzsé ngie ɔ̀ ge gÿo mmó gie mèŋ n ne ńzɛ́te mbwo gù tà tɔ́g pú’u.

²²Gíŋe ńnyɛ́te lûm ndá, ńdɔg ńzẅí’te wɔ̀ɔn á nue mèŋ n ne ńkwaŋa ngie e Ssé lɔɔn jú’u sẅíŋte gí, mbà mé ge gíŋe tsɔ́’ɔ wɔ̀ɔn né pi.

²³Epafalas, gẅie peg yé pǔ ńgwɔ́ ndá tsǎŋ ńtí nò Yěsô Kristo tsyɛ’té gú.

²⁴Mbɔɔ Malékuse, mbɔɔ Alistag, mbɔɔ Ndemas pɔ́ Lukase pie pegá pɔ̌ pǔ fa’a tà’a fà’.

²⁵Cʉ̀apʉ̀a Yěsô Kristo ne ńgwɔ́ né pi.